Lus Qhuab Qhia thiab Kev Khi Lus 29

Lus Qhuab Qhia thiab Kev Khi Lus 29 qhia ntau yam tseeb txog Vajtswv txoj hau kev rau koj. Thaum koj nyeem, cia li nrhiav tej yam tseeb uas koj kawm txog tej yam ntawm txoj hau kev no:

• Lub neej ua ntej yug los hauv ntiaj teb (saib nqe 36–37)

• Kev tsim ntuj tsim teb (saib nqe 31–33)

• Adas thiab Evas txoj Kev Poob (saib nqe 40–41)

• Lub neej hauv ntiaj teb (saib nqe 39, 42–45)

• Yexus Khetos txoj Kev Theej Txhoj (saib nqe 1, 42–43, 46–50)

• Kev Sawv Rov Los (saib nqe 13, 26)

• Kev Txiav Txim Zaum Kawg (saib nqe 12–13, 27–30)

Koj tau kawm tej yam tshiab twg? Yog pab tau koj, koj sau tau cov no rau ntawm txoj kab ntawm no ze cov duab ntawm zaj lus no qhov kawg. Tej lus tseeb no tau pab koj li cas?

Kuj saib Tej Ntsiab Lus thiab tej Lus Nug, “Txoj Hau Kev Cawm Seej,” Txoj Moo Zoo cov Ntawv.

Yexus Khetos hais txog qhov uas Nws yuav muab Nws haiv neeg sau los ua ke “zoo ib yam li ib tug poj qaib sau nws cov me nyuam los rau hauv nws ob sab tis” (Lus Qhuab Qhia thiab Kev Khi Lus 29:2). Qhov no qhia dab tsi rau koj txog Yexus Khetos? Ua rau koj xav txog dab tsi ntxiv thiab thaum koj kawm daim duab txog tus poj qaib thiab nws cov me nyuam ntawm zaj lus no? Cia li xav seb koj puas tau hnov Yexus Khetos sau thiab pov hwm koj.

Thaum koj nyeem Lus Qhuab Qhia thiab Kev Khi Lus 29:1–11, cia li nrhiav tej lus:

• Yuav muab leej twg sau los ua ke.

• Kev “sau los ua ke” rau Khetos txhais li cas.

• Vim li cas peb sau los ua ke rau Nws.

Xav seb vim li cas koj xav kom lwm cov tib neeg sau los ua ke rau Yexus Khetos. Koj txais kev tshoov siab ua dab tsi kom pab?

Tej zaum koj yuav xav nug koj tus kheej tej lus nug no thaum koj saib zaj vidi-aus “A Witness of God” (Txoj Moo Zoo cov Ntawv) los sis nyeem los sis mloog ib zaj nkauj qhuas Vajtswv txog kev sau los ua ke, xws li “Ixayees, Vajtswv Hu Nej” (Nkauj Qhuas Vajtswv, zaj. 6). Koj xav tias tus Tswv xav qhia dab tsi rau koj txog Nws txoj hauj lwm kev muab neeg sau los ua ke?

2:40

Thawj Tswj Hwm Russell M. Nelson tau hais tias: “Niaj hnub no kev sau los ua ke yog nyob hauv txhua lub teb chaws. Tus Tswv tau tshaj tawm txog kev muab Xi-oos txhim tsa nyob hauv txhua qhov chaw uas Nws pub Nws Haiv Neeg Ntseeg yug los thiab nyob hauv tej teb chaws twg” (“Kev Muab Ixayees Sau Los Ua Ke,” Liyahaunas, Kaum Hlis Ntuj 2006, 81). Qhov uas tau muab peb sau los ua ke zoo li no ua li cas pab peb kom “npaj txhua yam” rau tus Cawm Seej txoj Kev Los Zaum Ob? (nqe 8; kuj saib nqe 14–28).

Kuj saib Russell M. Nelson thiab Wendy W. Nelson, “Hope of Israel” (kev tshaj tawm rau cov neeg hluas thoob ntiaj teb, Rau Hli Ntuj 3, 2018),Txoj Moo Zoo cov Ntawv; D. Todd Christofferson, “Cov Lus Qhuab Qhia txog txoj Kev Haum Xeeb,” Liyahaunas, Kaum Ib Hlis Ntuj 2022, 53–56; Tej Ntsiab Lus thiab tej Lus Nug, “Gathering of Israel,” Txoj Moo Zoo cov Ntawv.

Thaum koj kawm Lus Qhuab Qhia thiab Kev Khi Lus 29:31–35, nug koj tus kheej, “Yog vim li cas txhua txoj lus txib yog ntawm sab ntsuj plig?” Tej zaum koj yuav xav sau ob peb txoj lus txib thiab xav txog tej ntsiab cai ntawm sab ntsuj plig uas muaj feem nrog tej lus txib ntawd. Tej zaum yog koj nyeem Ntxiv Dag Zog rau cov Tub Hluas Ntxhais Hluas: Phau Ntawv Coj Kev Pab Neeg Xaiv ces yuav pab tau koj—phau ntawd qhia tej lus tseeb uas nyob mus ib txhis li txog Vajtswv cov lus txib.

Qhov uas koj paub tias “txhua yam … yog ntawm sab ntsuj plig” ua rau koj xav li cas txog Vajtswv cov lus txib? Cia li xav seb puas nrhiav lub ntsiab ntawm sab ntsuj plig nyob hauv lwm yam ntawm koj lub neej thiab.

Kuj saib 2 Nifais 9:39.

Koj yuav ua li cas kom siv Lus Qhuab Qhia thiab Kev Khi Lus 29:36–50 kom qhia tias vim li cas peb yuav tsum muaj Yexus Khetos txoj kev txhiv dim?

Adas thiab Evas txoj Kev Poob ua rau neeg tuag thiab muaj kev txhaum, tiam sis kuj tau npaj ib txoj kev rau kev txhiv dim thiab kev xyiv fab dhau los ntawm Yexus Khetos. Thaum koj xav txog qhov no, nyeem nqe 39–43 thiab sau lus cim txog tej lus uas ua rau koj muaj kev zoo siab. Koj xav li cas txog tej yam uas Adas thiab Evas hais txog txoj Kev Poob nyob hauv Mauxes 5:10–12?

Kuj saib “Why We Need a Savior” (vidi-aus), Txoj Moo Zoo cov Ntawv.

2:15

• Kom pib sib tham txog Leej Txiv Saum Ntuj Ceeb Tsheej txoj hau kev rau peb, koj thiab koj cov me nyuam sib tham tau txog ib lub sij hawm thaum koj tau tawm tswv yim npaj ua dab tsi, xws li npaj mus xyuas lwm qhov chaw los sis ua ib txoj hauj lwm tiav. Tej zaum koj kuj yuav xav qhia txog tej yam piv txwv uas tau npaj ua, xws li daim ntawv teem sij hawm uas sau tej yam ntxim saib ntxim ua rau ntawd los sis sau tej lus qhia ua ib yam dab tsi. Vim li cas kev npaj txoj hau kev yog ib yam zoo? Ces tej zaum koj yuav xav qhia txog teu yam uas Leej Txiv Saum Ntuj Ceeb Tsheej xav ua thiab Nws txoj hau kev pab peb ua tej yam ntawd.

• Koj kuj siv tau cov duab tom kawg daim ntawv no pab koj cov me nyuam nrhiav tej nqe nyob hauv Lus Qhuab Qhia thiab Kev Khi Lus 29 uas qhia txog tej feem ntawm Leej Txiv Saum Ntuj Ceeb Tsheej txoj hau kev. Tej zaum koj kuj yuav txiav cov duab tawm thiab nug koj cov me nyuam kom muab cov ntawd kho kom muaj txheej txheem yog. Vim li cas peb ua Vajtswv tsaug vim peb paub Leej Txiv Saum Ntuj Ceeb Tsheej muaj ib txoj hau kev rau peb? Qhov uas peb paub txog qhov no ua rau peb hloov peb lub neej li cas?

• Daim duab tom qab txog ib tug poj qaib muab nws cov me nyuam qaib sau los ua ke los sis zaj vidi-aus “Chicks and Hens” (ChurchofJesusChrist.org) pab tau koj cov me nyuam paub zaj lus piv txwv nyob hauv Lus Qhuab Qhia thiab Kev Khi Lus 29:1–2. Tej zaum nej yuav xav nyeem tej nqe no ua ke thiab sib tham ua ke txog qhov uas ib tug poj qaib ua li cas kom pov hwm nws cov me nyuam qaib thiab qhov ntawd zoo ib yam li tej yam uas tus Cawm Seej ua rau peb.

  

  1:24

  

• Dab tsi yuav pab koj cov me nyuam xav pab tus Cawm Seej muab Nws cov neeg sau los ua ke? Tej zaum lawv yuav xav mloog txog ib tug neeg uas tau “sau los” rau Nws thaum tus ntawd los koom Nws lub Koom Txoos. Piv txwv hais tias, leej twg qhia koj tsev neeg txog lub Koom Txoos? Peb tau txais koob hmoov twg vim peb txais tus Cawm Seej cov lus ntuas kom sau los ua ke rau Nws? Peb yuav ua li cas kom pab lwm tus sau los ua ke rau Nws? (Saib “A Message for Children from President Russell M. Nelson” [vidi-aus], ChurchofJesusChrist.org.)

  

  3:30

• Ib daim duab txog tus Cawm Seej txoj Kev Los Zaum Ob (xws li Phau Muaj Duab txog Txoj Moo Zoo, zaj. 66) los sis ib zaj nkauj txog qhov ntawd (xwv li “When He Comes Again,” Children’s Songbook, 82–83) kuj pab tau koj thiab koj cov me nyuam tham txog phau Lus Qhuab Qhia thiab Kev Khi Lus 29:11. Pab koj cov me nyuam nrhiav kab lus hauv cov vaj lug kub uas zoo li ib yam dab tsi hauv daim duab los sis zaj nkauj. Qhia tias nej xav li cas txog Yexus Khetos txoj kev rov qab los rau lub ntiaj teb no.