“Plaub Hlis Ntuj 21–27: ‘Yog Nej Tsis Ua Ib lub Siab Ces Nej Tsis Yog Kuv Li’: Lus Qhuab Qhia thiab Kev Khi Lus 37–40,” Los, Nrog Kuv Mus—Siv hauv Tsev thiab lub Koom Txoos: Lus Qhuab Qhia thiab Kev Khi Lus 2025 (2025)

“Lus Qhuab Qhia thiab Kev Khi Lus 37–40,” Los, Nrog Kuv Mus—Siv hauv Tsev thiab lub Koom Txoos: 2025

Pom qhov meej ntawm Haiv Neeg Ntseeg Mus rau Kirtland, los ntawm Sam Lawlor

Plaub Hlis Ntuj 21–27: “Yog Nej Tsis Ua Ib lub Siab Nej Tsis Yog Kuv Li”

Lus Qhuab Qhia thiab Kev Khi Lus 37–40

Tej Haiv Neeg Ntseeg thaum ub xav tias lub Koom Txoos tsis yog ib qho chaw rau kev mloog lus qhuab qhia xwb. Tej kev tshwm sim no tau siv tej lus xws li hom phiaj, lub nceeg vaj, Xi-oos, thiab, ntau zaus, hauj lwm. Tej zaum yog vim li no neeg thiaj nyiam lub Koom Txoos. Lawv nyiam cov lus qhuab qhia uas tau muab txum tim rov qab los npaum li cas los, lawv feem coob kuj xav tau ib yam dawb huv uas lawv muab lawv lub siab cob rau. Txawm li ntawd los, tus Tswv txoj lus txib thaum xyoo 1830 kom Haiv Neeg Ntseeg sib sau hauv lub xeev Ohio yeej tsis yooj yim. Rau ntau tus neeg, lawv yuav tsum tawm lawv tej tsev xis nyob mus rau ib qho chaw uas lawv tsis paub (saib “Tej lub Suab ntawm Kev Muab txoj Moo Zoo Txum Tim Rov Qab Los: Kev Sib Sau Ua Ke hauv Ohio”). Niaj hnub no peb pom meej tias Haiv Neeg Ntseeg ntawd tau pom los ntawm lawv txoj kev ntseeg xwb: tus Tswv tau muaj cov koob hmoov loj heev rau lawv cov uas mus rau Ohio.

Kev txib mus rau Ohio los twb tsis muaj lawm, tiam sis Haiv Neeg Ntseeg niaj hnub no tseem koom siab ua raws li tib lub hom phiaj, ua tib txoj hauj lwm ntawd: kom “mus tsim Xi-oos” (Lus Qhuab Qhia thiab Kev Khi Lus 39:13). Zoo li Haiv Neeg Ntseeg thaum ub, peb tso tej “kev txhawj xeeb txog tej yam ntawm lub ntiaj teb” tseg (Lus Qhuab Qhia thiab Kev Khi Lus 40:2) thiab tso siab rau tus Tswv cov lus cog tseg: “Koj yuav tau txais … ib txoj koob hmoov tseem ceeb heev uas koj tsis tau paub dua” (Lus Qhuab Qhia thiab Kev Khi Lus 39:10).

Kuj saib Saints, 1:109–11.

Tej Tswv Yim Pab Qhia hauv Tsev thiab lub Koom Txoos

Lus Qhuab Qhia thiab Kev Khi Lus 37–38

Vajtswv muab peb sau los ua ke kom foom koob hmoov rau peb.

Cov mej zeej hauv lub Koom Txoos hauv Fayette, New York, yuav tsum ua kev txi nyuaj kom mus rau Ohio (uas nyob deb li 250 mais) thaum lub caij ntuj no nyob rau xyoo 1831. Thaum koj nyeem txog tus Tswv txoj lus txib hauv Lus Qhuab Qhia thiab Kev Khi Lus 37:3–4, cia li xav txog tej kev txi uas tus Tswv tau hais kom koj ua. Ces, thaum koj kawm Lus Qhuab Qhia thiab Kev Khi Lus 38:1–33, nrhiav tej lus tseeb txog tus Cawm Seej uas pab koj muaj kev ntseeg ua raws li Nws tej lus ntuas. Koj kawm dab tsi los ntawmnqe 11–33 txog cov koob hmoov uas los ntawm kev sib sau ua ke ua cov uas raws Yexus Khetos?

Lus Qhuab Qhia thiab Kev Khi Lus 38:22

“Mloog kuv lub suab thiab coj raws li kuv.”

Koj yuav ua li cas kom cia Yexus Khetos ua “tus uas muab kev cai” rau koj? Qhov uas peb ua raws li Nws tej kev cai ho ua li cas ua rau koj nyob li “ib co neeg ywj pheej”?

Kuj saib 2 Nifais 2:26–27.

Lus Qhuab Qhia thiab Kev Khi Lus 38:30

Yog kuv npaj txhij, kuv tsis tas ntshai.

Puas tau muaj ib lub sij hawm uas koj paub tab txog lub ntsiab cai uas tus Tswv qhia nyob hauv Lus Qhuab Qhia thiab Kev Khi Lus 38:30: “Yog nej npaj txhij nej yuav tsis ntshai”? Thaum koj kawm tshooj 38, saib tus Tswv npaj Nws Haiv Neeg Ntseeg kom lawv ua siab loj mus rau yav tom ntej. Nws xav kom koj ua li cas kom npaj rau tej kev cov nyom koj thiaj li yuav tsis ntshai?

Kuj saib David A. Bednar, “Peb Yuav Sim Lawv lub Siab,” Liyahaunas, Kaum Ib Hlis Ntuj 2020, 8–11.

Lus Qhuab Qhia thiab Kev Khi Lus 38:24–27

Vajtswv xav kom peb “ua ib lub siab.”

Haiv Neeg Ntseeg uas sib sau ua ke nyob Ohio los nyias muaj nyias tej xwm txheej. Nyaj cov neeg hauv koj pawg ntseeg zoo ib yam li ntawd. Tiam sis tus Tswv txib kom Nws cov neeg “ua ib lub siab” (nqe 27). Peb yuav ua li cas kom muaj kev koom siab li no? Ua rau koj tawm tswv yim twg thaum koj nyeem Lus Qhuab Qhia thiab Kev Khi Lus 38:24–27? Vim li cas peb yuav tsum koom siab kom thiaj li ua Vajtswv cov neeg?

Tej zaum tej nqe no yuav tshooj koj lub siab kom xav txog cov neeg uas koj paub—piv txwv, koj tsev neeg, cov neeg hauv koj pawg ntseeg, thiab cov neeg hauv tej pawg los sis chav kawm. Muaj dab tsi tiv thaiv kom koj tsis txhob nrog Yexus Khetos koom siab? Tus Cawm Seej pab tau koj li cas kom “ua ib lub siab”? Zaj vidi-aus “A Friend to All” los sis “Love in Our Hearts” (Txoj Moo Zoo cov Ntawv) kuj pab koj teb tej lus nug no. Tej zaum koj yuav nrhiav tswv yim hauv Txwj Laug Dale G. Renlund zaj lus “Khetos txoj Kev Thaj Yeeb Rhuav Kev Ntxub,” Liyahaunas, Kaum Ib Hlis Ntuj 2021, 83–85.

Koj yuav ua li cas pab tej pawg no koom siab ntxiv? Piv txwv hais tias, xa ntawv los sis ntaus ntawv hais lus siab zoo rau cov neeg hauv koj pawg, chav kawm, los sis tsev neeg. Koj txais kev tshoov siab kom ncav tes pab leej twg?

Koj txais kev tshoov siab dab tsi txog tus Cawm Seej tus yam ntxwv nyob hauv Efexus 2:14, 18–22; 2 Nifais 26:24–28?

Kuj saib Quentin L. Cook, “Tej Siab Sib Khi Los ntawm Kev Ncaj Ncees thiab Kev Koom Siab,” Liyahaunas, Kaum Ib Hlis Ntuj 2020, 18–21; “Ib Leeg Hlub Ib Leeg,” Cov Nkauj Qhuas Vajtswv, zaj 145; Tej lub Ntsiab Lus thiab tej Lus Nug, “Kev Koom Siab hauv Yexus Khetos lub Koom Txoos,” Txoj Moo Zoo cov Ntawv.

Lus Qhuab Qhia thiab Kev Khi Lus 38:39; 39–40

Leej Txiv Saum Ntuj Ceeb Tsheej xav muab tej kev nplua nuj nyob mus ib txhis rau kuv.

Raws li koj xav, “tej kev nplua nuj hauv ntiaj teb no” thiab “tej kev nplua nuj nyob mus ib txhis” txawv li cas? (Lus Qhuab Qhia thiab Kev Khi Lus 38:39). Tej yam twg hauv koj lub neej tau qhia kom koj saib tej kev nplua nuj nyob mus ib txhis rau nqi?

Cia li xav txog qhov no thaum koj nyeem txog James Covel nyob hauv tshooj 39–40 (tsis hais keeb kwm nyob hauv tej zaj lus piav txog tshooj). Xav seb yuav siv nws zaj lus li cas hauv koj lub neej. Piv txwv hais tias, xav txog tej lub sij hawm thaum Vajtswv pom koj “lub siab ncaj ncees” (Lus Qhuab Qhia thiab Kev Khi Lus 40:1). Koj tau cov koob hmoov twg vim koj rau siab ntseeg? Thiab cia li xav txog “kev txhawj xeeb txog tej yam ntawm lub ntiaj teb” uas koj muaj. Vim li cas tej ntawd yuav tab kaum koj kom tsis txhob txais Vajtswv txoj lus “nrog kev zoo siab”? (Lus Qhuab Qhia thiab Kev Khi Lus 39:9; 40:2). Koj kawm dab tsi hauv ob tshooj no uas tshoov koj lub siab kom mloog Vajtswv tsis tu tsis tseg?

Kuj saib Mathais 13:3–23.

Ua neej raws li cov vaj lug kub qhia. “Ib yam koj ua tau kom pab cov neeg kawm txog [cov vaj lug kub] yog thaum koj nug tej yam xws li ‘Qhov no yuav pab koj li cas ua tej yam hauv koj lub neej tam sim no?’ ‘Vim li cas qhov no tseem ceeb rau koj paub?’ ‘Qhov no puas yuav hloov koj lub neej?’ (Kev Qhia Raws Li tus Cawm Seej txoj Kev, 23). Tej lus nug nyob hauv kev ntxim ua no txog Lus Qhuab Qhia thiab Kev Khi Lus 39–40 yog lwm yam piv txwv txog cov lus nug uas pab peb siv kev tshwm sim no hauv peb lub neej.

Yog koj xav tau tswv yim ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hlis no.

Tej Tswv Yim Pab Qhia cov Me Nyuam

Lus Qhuab Qhia thiab Kev Khi Lus 37; 38:31–33

Vajtswv muab peb sau los ua ke kom foom koob hmoov rau peb.

Daim ntawv qhia kev thiab phab ntawv ntxim ua nyob hauv tus txheej txheem qhia no pab tau koj thiab koj cov me nyuam to taub Vajtswv cov lus txib nyob hauv Lus Qhuab Qhia thiab Kev Khi Lus 37:3. Tej zaum koj pab lawv nrhiav tej chaw uas hais txog nyob hauv tej kev tshwm sim no. Tej zaum koj pab tau lawv nrhiav ib nqe lus los ntawm Lus Qhuab Qhia thiab Kev Khi Lus 38:31–33 uas piav vim li cas Vajtswv xav kom Nws cov neeg sib sau ua ke.

Lus Qhuab Qhia thiab Kev Khi Lus 38:24–27

Vajtswv xav kom peb “ua ib lub siab.”

Thaum koj nyeem Lus Qhuab Qhia thiab Kev Khi Lus 38:24–25 nrog koj cov me nyuam, sib tham seb kev suav tias koj tus kwv tij los sis tus muam yam li yog koj tus kheej txhais li cas (kuj saib Mathais 7:12). Pab lawv rov hais dua nqe vaj lug kub, thiab pauv “nws tus kwv tij” kom hais sawv daws lub npe.
Kom pab qhia koj cov me nyuam tias “ua ib lub siab” txhais li cas (Lus Qhuab Qhia thiab Kev Khi Lus 38:27), tej zaum koj pab lawv kos tus najnpawb 1 thiab sau cov npe thiab kos duab txog txhua tus neeg hauv nej tsev neeg los sis chav kawm. Ib sab ntawm tus najnpawb 1, tej zaum nej xav sau tej yam uas yuav pab nej ua ib lub siab.
Cia li xav seb puas siv ib yam khoom qhia seb yuav ua li cas thaum muab tej yam sib txuas los sis sib sau ua ke los sib koom, ib yam li daim ntaub uas ua ib daim pam los sis cov khoom sib tov uas coj los ua ncuav ci. Tej yam piv txwv no qhia dab tsi rau peb txog txoj kev ua ib lub siab ua Vajtswv haiv neeg?

Lus Qhuab Qhia thiab Kev Khi Lus 38:30

Yog kuv npaj txhij, kuv tsis tas ntshai.

Thaum nej nyeem Lus Qhuab Qhia thiab Kev Khi Lus 38:30 ua ke, tej zaum koj thiab koj cov me nyuam yuav xav sib tham txog tej yam uas muaj los rau nej uas yuav tsum npaj ua ntej. Ces koj nug tau koj cov me nyuam txog tej yam uas Leej Txiv Saum Ntuj Ceeb Tsheej xav kom peb npaj. Qhia koj cov me nyuam txog ib zaug thaum koj txoj kev npaj tau pab koj kom tsis txhob ntshai. Tej zaum koj nej yuav xav saib zaj vidi-aus “Men’s Hearts Shall Fail Them” (Txoj Moo Zoo cov Ntawv) ua ke.

Lus Qhuab Qhia thiab Kev Khi Lus 39:6, 23

Kuv txais lub txiaj ntsim Vaj Ntsuj Plig Dawb Huv thaum kuv txais kev pom zoo.

Xav seb puas muab daim duab txog ib tug neeg uas txais kev pom zoo rau lawv saib. Hais kom koj cov me nyuam piav tias lawv ua dab tsi nyob hauv daim duab. Tej zaum koj kuj yuav xav caw kom lawv taw tes rau daim duab thaum lawv hnov lo lus Vaj Ntsuj Plig Dawb Huv nyob hauv Lus Qhuab Qhia thiab Kev Khi Lus 39:6, 23 (los yog hauv ib zaj nkauj zoo li “The Holy Ghost,” Children’s Songbook, 105). Ib leeg qhia tau ib leeg hais tias lub txiaj ntsim Vaj Ntsuj Plig Dawb Huv tau ua rau nej txais tau tej koob hmoov twg.

Yog xav tau tswv yim ntxiv, saib phau xov xwm Phooj Ywg rau lub hlis no.

daim qhia kev txog cov Haiv Neeg Ntseeg txoj kev hla teb chaws