Lus Qhuab Qhia thiab Kev Khi Lus 27–28

Sally Knight thiab Emma Smith tau ua kev cai raus dej thaum lub Rau Hli Ntuj xyoo 1830, tiam sis ib pawg neeg phem tau meem txom thaum nkawd yuav txais kev pom zoo. Ob lub hlis tom qab ntawd, Sally thiab nws tus txiv, Newel, tau tuaj xyuas Emma thiab Joseph, thiab txiav txim siab tias yuav ua kev pom zoo thiab lawv sawv daws yuav txais lub cim nco txog ua ke. Thaum nws tab tom mus yuav cov cawv txiv hmab rau lub cim nco txog, ib tug tim tswv hais kom Joseph tsum.

Cia li nyeem Lus Qhuab Qhia thiab Kev Khi Lus 27:1–4 kom kawm seb tus tim tswv tau qhia dab tsi rau nws txog lub cim nco txog. Tej nqe no qhia dab tsi rau koj txog qhov uas tus Cawm Seej xav kom koj ua li cas thaum koj txais lub cim nco txog? Koj xav tias kev noj thiab haus nrog “lub qhov muag ntsia ntsoov rau [Nws] lub yeeb koob” txhais li cas? Xav txog qhov no—thiab nrhiav tej lub tswv yim ntxiv txog lub cim nco txog—thaum koj nyeem Lukas 22:19–20 thiab 3 Nifais 18:1–11. (Kuj saib cov vidi-aus “The Last Supper,” “Jesus Christ Blesses Bread in Remembrance of Him,” thiab “Jesus Christ Blesses Wine in Remembrance of Him,” Txoj Moo Zoo cov Ntawv).

6:12

4:24

2:28

Kom kawm seb yuav ua dab tsi thaum txais lub cim nco txog, xav seb puas kawm Txwj Laug D. Todd Christofferson zaj lus “Cov Mov uas Los Saum Ntuj Los Cawm Neeg txoj Sia” (Liyahaunas, Kaum Ib Hlis Ntuj 2017, 36–39). Txwj Laug Christofferson qhia tias koj ua tau dab tsi kom muab siab npuab tus Cawm Seej ntxiv los ntawm lub cim nco txog? Xav seb koj yuav ua li cas kom koj noj thiab haus tej lub cim ntawm tus Cawm Seej txoj Kev Theej Txhoj thiab hwm tej lub cim ntawd thiab saib lub hom phiaj ntawm tej ntawd.

Xav seb puas hu nkauj, mloog, los sis nyeem tej zaj nkauj, xws li “As Now We Take the Sacrament” (Hymns, zaj. 169), thiab sau txog koj tej kev xav thaum koj ua txoj kab ke dawb ceev no.

Kuj saib Lus Qhuab Qhia thiab Kev Khi Lus 20:77, 79; 59:9–13; Tej Ntsiab Lus thiab tej Lus Nug, “Lub Cim Nco Txog,” Txoj Moo Zoo cov Ntawv; “Kev Tau Ib txoj kev Zam Nej tej Kev Txhaum Dhau Los ntawm cov Kab Ke,” nyob hauv David A. Bednar, “Niaj Hnub Tau Ib txoj Kev Zam Nej tej Kev Txhaum,” Liyahaunas, Tsib Hlis Ntuj 2016, 60–62.

15:20

Koj paub dab tsi txog cov yaj saub los ntawm tej nqe no? Tej zaum nej yuav xav nrhiav xov xwm txog lawv nyob hauv Phau Qhia txog Vaj Lug Kub. Peb tau cov koob hmoov twg los ntawm tej yawm sij uas cov yaj saub no tuav?

Thawj Tswj Hwm M. Russell Ballard hais tias: “Tsis muaj ib yam loj thiab tseem ceeb uas peb ua tau kom tiv thaiv peb tus kheej sab ntsuj plig. Lub hwj chim tseeb ntawm sab ntsuj plig yeej los ntawm tej yam me me uas xaws ua ke ua cov ntaub ntawm sab ntsuj plig uas tiv thaiv thiab pov hwm peb kom txhob raug kev phem” (“Be Strong in the Lord,” Ensign, Xya Hli Ntuj 2004, 8).

Thaum koj kawm txog Vajtswv tej cuab yeej tiv rog nyob hauv Lus Qhuab Qhia thiab Kev Khi Lus 27:15–18, tej zaum koj yuav xav tsim ib daim zoo li nram qab no. Koj ua li cas kom rau Vajtswv txhua lub cuab yeej tiv rog?

Kuj saib Efexus 6:11–18; Jorge F. Zeballos, “Tsim lub Neej Kom Tiv Taus tus Yeeb Ncuab,” Liyahaunas, Kaum Ib Hlis Ntuj 2022, 50–52.

Cia li xav seb yuav zoo li cas yog tias leej twg txais tau tej lus txib thiab kev tshwm sim rau lub Koom Txoos tag nrho. Thaum Hiram Page hais tias nws tau txais kev tshwm sim li no, cov mej zeej hauv lub Koom Txoos tsis paub ua li cas. Nyob hauv phau Lus Qhuab Qhia thiab Kev Khi Lus 28, tus Tswv tau qhia txog ib tug txheej txheem rau kev tshwm sim nyob hauv lub Koom Txoos. Koj kawm dab tsi los ntawm tshooj no txog tus Thawj Tswj Hwm ntawm lub Koom Txoos lub luag hauj lwm? Koj kawm dab tsi txog qhov uas Vajtswv coj tau koj li cas?

Kuj saib Dale G. Renlund, “Tus Txheej Txheem Txais Kev Tshwm Sim,” Liyahaunas, Kaum Ib Hlis Ntuj 2022, 16–19.

Ib lub hom phiaj ntawm Phau Ntawv Maumoos yog “xwv kom cov Neeg Lamas yuav los mus paub txog lawv cov yawg koob, thiab xwv kom lawv yuav paub tus Tswv tej lus cog tseg” (Lus Qhuab Qhia thiab Kev Khi Lus 3:20). Lub hom phiaj no yeej sib haum nrog cov lus cog tseg uas tus Tswv hais rau cov yaj saub coob hauv Phau Ntawv Maumoos (saib, ua piv txwv, 1 Nifais 13:34–41; Enos 1:11–18; Hilamas 15:12–13). Cov mej zeej ntawm lub Koom Txoos thaum ntawd xav tias cov Neeg Qhab Amelikas yog cov neeg hauv Phau Ntawv Maumoos cov xeeb leej xeeb ntxwv. (Lub Koom Txoos niaj hnub no hais tias cov Neeg Lamas “yog cov neeg Qhab Amelikas cov poj koob yawm txwv” [zaj lus piav txog Phau Ntawv Maumoos].)

Yog xav nyeem ntxiv txog Oliver Cowdery ntiag tug hauj lwm mus qhia tej pawg Neeg Qhab Amelikas uas nyob ze, saib “A Mission to the Lamanites” (Revelations in Context, 45–49). Ntiag tug hauj lwm no qhia dab tsi rau koj txog tus Tswv thiab Nws txoj hauj lwm?

• Tej zaum cov me nyuam yuav xav seb yog vim li cas peb siv dej rau lub cim nco txog thaum Yexus siv cawv txiv hmab (saib Lukas 22:19–20; 3 Nifais 18:1–11). Tej zaum nej yuav xav nyeem Lus Qhuab Qhia thiab Kev Khi Lus 27:1–2 ua ke thiab sib tham txog seb kev txais lub cim nco txog thaum “ntsia ntsoov rau [Vajtswv] lub yeeb koob” txhais li cas (nqe 2). Peb yuav ua li cas kom nco ntsoov tus Cawm Seej thaum peb txais lub cim nco txog?

• Tej zaum yog koj muaj cov duab, tej nqe vaj lug kub, los sis cov lus ntawm tej zaj nkauj txog tus Cawm Seej yuav pab koj cov me nyuam nco ntsoov Nws thaum lawv txais lub cim nco txog. Tej zaum lawv yuav nyiam siv cov duab, tej nqe lus, thiab cov lus ntawm tej zaj nkauj no kom tsim ib phau ntawv me me. Tej zaum lawv yuav xav kos duab los sis nrhiav ib co duab nyob hauv phau Phooj Ywg.

• Tej zaum koj yuav xav cia koj cov me nyuam saib ib daim duab txog cov cuab yeej tiv rog li hauv tus txheej txheem qhia no los sis nyob hauv phab ntawv ntxim ua nyob hauv tus txheej txheem qhia rau Efexus hauv Los, Nrog Kuv Mus—Rau lub Koom Haum Me Nyuam Yaus: Phau Tshiab 2023. Thaum nej nyeem Lus Qhuab Qhia thiab Kev Khi Lus 27:15–18, pab lawv nrhiav cov cuab yeej tiv rog hauv daim duab. Vajtswv tej cuab yeej tiv rog pab peb “tiv tau hnub phem” li cas? (nqe 15).

• Yog koj muaj ob peb tug me nyuam, tej zaum koj yuav xav caw lawv ua si “coj raws li tus thawj coj,” tiam sis nug kom ob peb tug me nyuam ua tus thawj coj ua ke. Yuav muaj xwm dab tsi yog tias muaj dua ib tug thawj coj? Nej kawm tau txog Hiram Page (saib “Tshooj 14: Tus Yaj Saub thiab tej Kev Tshwm Sim rau lub Koom Txoos,” nyob hauv Cov Dab Neeg hauv phau Lus Qhuab Qhia thiab Kev Khi Lus, 56–57, los sis zaj vidi-aus txog qhov ntawd hauv Txoj Moo Zoo cov Ntawv; los sis zaj lus piav txog tshooj rau Lus Qhuab Qhia thiab Kev Khi Lus 28). Leej Txiv Saum Ntuj Ceeb Tsheej tau ua li cas kom kho tej kev tsis paub meej ntawm cov mej zeej ntawm lub Koom Txoos thaum ntawd? Nws coj li cas thaum Nws coj lub Koom Txoos niaj hnub no? (saib Lus Qhuab Qhia thiab Kev Khi Lus 28:2). Hais lus tim khawv tias tus Tswv tau hu tus yaj saub tam sim no kom coj Nws lub Koom Txoos hauv lub caij nyoog no.

  

  1:21

• Txawm tus yaj saub yuav txais kev tshwm sim rau lub Koom Txoos tas li, tus Vaj Ntsuj Plig Dawb Huv coj tau peb kev. Koj pab tau koj cov me nyuam nrhiav tej vaj lug kub tom qab no thiab sau txog tej yam uas tus Vaj Ntsuj Plig Dawb Huv ua kom coj peb kev: Lus Qhuab Qhia thiab Kev Khi Lus 28:1, 4, 15; Yauhas 14:26; Maulaunais 8:26; 10:4–5. Qhia txog tej lub sij hawm uas tus Vaj Ntsuj Plig Dawb Huv tau coj koj kev li cas.