Lus Qhuab Qhia thiab Kev Khi Lus 18

Nyob hauv tshooj 18, tus Tswv tau muab lus qhia rau Oliver Cowdery kom nws pab teeb lub hauv paus ntawm Yexus Khetos lub Koom Txoos. Koj kawm dab tsi txog tej lus qhia uas Nws muab—qhov tseem ceeb nyob hauv nqe 1–5? Tej zaum koj yuav xav txog tej lus qhia no thaum koj “txhim tsa” koj txoj kev ntseeg Yexus Khetos. Piv txwv hais tias:

• Koj tau “xav paub” dab tsi txog tus Tswv? (nqe 1).

• “Vam khom rau tej yam uas twb tau muab sau cia” txhais li cas rau koj? (nqe 3). Tus Ntsuj Plig tau ua li cas kom “ua rau koj pom” tias tej yam no muaj tseeb? (nqe 2; kuj saib Lus Qhuab Qhia thiab Kev Khi Lus 6:22–24).

• Koj yuav ua li cas txhim tsa koj lub neej los ntawm “lub hauv paus ntawm [tus Cawm Seej] txoj moo zoo thiab [Nws] lub pob zeb”? (nqe 5).

Peb yuav ua li cas thiaj paub tias ib yam muaj nqis npaum li cas? Piv txwv hais tias, vim li cas ib qhov khoom tom kiab khw kim dua lwm qhov? Thaum koj nyeem tshooj 18 lub lim tiam no, qhov tseem ceeb nqe 10–13, tej zaum koj yuav xav seb tib neeg ua li cas kom txiav txim tias ib yam dab tsi muaj nqis npaum li cas ces xav seb yog vim li cas Vajtswv saib tib neeg muaj nqis npaum li cas. Xav seb koj puas muab koj lub npe pauv tso rau tej lus “tus neeg,” “tib neeg,” thiab “tag nrho tib neeg.” Tej nqe no pab tau ib tug neeg uas tsis paub tseeb tias nws muaj nqis li cas?

Nov yog ob peb nqe ntxiv uas qhia txog seb ib tug neeg muaj nqis li cas: Lukas 15:1–10; Yauhas 3:16–17; 2 Nifais 26:24–28; Mauxes 1:39. Los ntawm tej nqe no, koj xav hais tias Vajtswv xav li cas txog koj? Tej zaum koj yuav xav nrhiav hauv Thawj Tswj Hwm Dieter F. Uchtdorf zaj lus “Nws Saib Nej Rau Nqi” (Liyahaunas, Kaum Ib Hlis Ntuj 2011, 19–22) kom nrhiav tej lus thiab tej nqe uas pab koj paub tias koj muaj nqis npaum li cas rau Vajtswv.

Vajtswv ua dab tsi kom koj paub tias Nws saib koj muaj nqis heev? Qhov no puas hloov koj txoj kev xav txog koj tus kheej thiab lwm tus?

Kuj saib Joy D. Jones, “Muaj Nqi Tshaj Qhov Ntsuas Tau,” Liyahaunas, Kaum Ib Hlis Ntuj 2017, 13–15; Tej lub Ntsiab Lus thiab tej Lus Nug, “Vajtswv cov Me Nyuam,” Txoj Moo Zoo cov Ntawv.

Cia li saib hais tias tau siv cov lus hloov siab lees txim thiab kev hloov siab lees txim pes tsawg zaus nyob hauv phau Lus Qhuab Qhia thiab Kev Khi Lus 18. Xav txog qhov uas koj kawm dab tsi los ntawm cov lus no txhua zaus uas hais. Qhov tseem ceeb xav txog nqe 11–16. Tej nqe no ua rau koj xav li cas txog kev hloov siab lees txim—koj txoj kev hloov siab lees txim thiab koj lub luag hauj lwm kom caw lwm tus los hloov siab lees txim? Nov yog ib txoj kev uas koj sau tau tej yam uas koj tau kawm: sau ob peb yam raws li koj xav tias yuav sau cov lus no kom tiav hais tias “Kev hloov siab lees txim yog .”

Kuj saib Amas 36:18–21; Phau Qhia txog Vaj Lug Kub, “Hloov Siab Lees Txim,” Txoj Moo Zoo cov Ntawv; Dale G. Renlund, “Kev Hloov Siab Lees Txim: Kev Xaiv Kev Xyiv Fab,” Liyahaunas, Kaum Ib Hlis Ntuj 2016, 121–24.

Thaum koj nyeem nqe 14–16, cia li xav seb “tshaj tawm kev hloov siab lees txim” txhais li cas—thiab vim li cas qhov ntawd ua rau koj muaj kev xyiv fab. Koj yuav ua dab tsi kom pab lwm tus neeg los cuag tus Cawm Seej thiab txais kev zam txim? Lwm tus neeg tau ua li cas kom pab koj ua li ntawd thiab?

Kuj saib Craig C. Christensen, “Tsis Muaj Dab Tsi Zoo Nkauj thiab Qab Zib Heev Npaum Li Kuv txoj Kev Xyiv Fab,” Liyahaunas, Tsib Hlis Ntuj 2023, 45–47.

Yog ib tug neeg nug koj seb tus Tswv lub suab zoo li cas, ces koj yuav hais dab tsi? Cia li xav txog txoj lus nug no thaum koj nyeem Lus Qhuab Qhia thiab Kev Khi Lus 18:34–36. Koj tau kawm dab tsi txog tus Tswv lub suab los ntawm kev nyeem phau Lus Qhuab Qhia thiab Kev Khi Lus? Koj ua tau dab tsi kom hnov tau Nws lub suab meej dua ntxiv?

Kuj saib “Thaum Kuv Nyeem Vaj Lug Kub Dawb Huv,” Cov Nkauj Qhuas Vajtswv, zaj. 130.

• Thaum koj thiab koj cov me nyuam nyeem Lus Qhuab Qhia thiab Kev Khi Lus 18:10–13, xav seb nej puas muab nej lub npe pauv tso rau tej lus “tus neeg,” “tib neeg,” thiab “tag nrho tib neeg.” Koj kuj qhia tias tej nqe no pab peb to taub tias Leej Txiv Saum Ntuj Ceeb Tsheej xav li cas txog peb.

• Koj kuj nug tau koj cov me nyuam txog tej yam uas tib neeg xav tias muaj nqis. Los sis tej zaum koj yuav xav cia lawv pom ib yam dab tsi uas muaj nqis rau koj. Peb ua li cas kom saib xyuas tej yam uas muaj nqis rau peb? Ces cia lawv sim saib hauv ib daim iav. Thaum lawv ntsia haud, qhia txhua tus tias lawv yog Vajtswv tus me nyuam thiab lawv muaj nqis heev. Peb yuav ua li cas kom qhia lwm tus tias “[lawv] muaj nqis heev” rau peb?

• Kom qhia tias tib neeg muaj nqis npaum li cas rau Leej Txiv Saum Ntuj Ceeb Tsheej, tej zaum koj cov me nyuam yuav xav saib cov duab tom kawg ntawm daim ntawv no thaum koj nyeem Lus Qhuab Qhia thiab Kev Khi Lus 18:10–13. Hu ua ke zaj nkauj li “Every Star Is Different” (Children’s Songbook, 142–43) kuj yuav pab txhawb nqa qhov no.

• Kom pab koj cov me nyuam xav qhia Yexus Khetos txoj moo zoo, tej zaum koj yuav xav nrog lwm tus sib tham txog tej lub sij hawm uas koj nrhiav tau ib yam uas ua rau koj xav hais rau koj cov phooj ywg thiab tsev neeg. Vim li cas koj xav qhia qhov ntawd, thiab thaum koj qhia ua rau koj xav li cas? Ces, koj nyeem tau Lus Qhuab Qhia thiab Kev Khi Lus 18:13, 16. Dab tsi ua rau tus Tswv muaj kev xyiv fab? Nws hais dab tsi uas yuav pab peb muaj kev xyiv fab? Koj thiab koj cov me nyuam tham tau txog tej lub sij hawm thaum nej tau qhia txog txoj kev xyiv fab uas los ntawm tus Cawm Seej txoj moo zoo.

• Ib zaj nkauj uas hais txog kev qhia txoj moo zoo, xws li “I Want to Be a Missionary Now” (Children’s Songbook, 168), yeej pab tau koj cov me nyuam xav txog tej yam uas lawv ua tau kom qhia txog txoj moo zoo.

• Tej zaum koj cov me nyuam yuav nyiam ua si thaum lawv xaiv seb tej suab mus rau leej twg, xws li tsev neeg, phooj ywg, los sis lub Koom Txoos cov thawj coj. Peb ua li cas thiaj paub lawv lub suab? Peb ua li cas thiaj paub tus Tswv lub suab? Tej zaum nej yuav xav nyeem Lus Qhuab Qhia thiab Kev Khi Lus 18:34–36 ua ke kom sib tham txog txoj lus nug no? Tej zaum nej ib leeg yuav xav qhia ib leeg hais tias nej tau ua li cas kom hnov taus tus Tswv lub suab nyob hauv cov vaj lug kub.