Lus Qhuab Qhia thiab Kev Khi Lus 23–26

Kev tshwm sim nyob hauv Lus Qhuab Qhia thiab Kev Khi Lus 24 los twb muab kom “mus txhawb, yaum, thiab qhia” Joseph Smith thiab Oliver Cowdery thaum lub sij hawm uas nkawd raug kev sim siab (zaj lus piav lub ntsiab ntawm tshooj; kuj saib Saints, 1:94–96). Nrhiav tej lus nyob hauv Lus Qhuab Qhia thiab Kev Khi Lus 24 uas koj xav tias yuav txhawb nqa thiab pab nkawd.

Tej nqe vaj lug kub no ua rau koj xav tias tus Cawm Seej ua dab tsi kom pab koj kov yeej koj tej teeb meem?

Lus Qhuab Qhia thiab Kev Khi Lus 24:1–3

Lus Qhuab Qhia thiab Kev Khi Lus 24:8

Lus Qhuab Qhia thiab Kev Khi Lus 121:7–8

Yaxayas 40:28–31

Mauxiyas 24:14–15

Thaum Emma Smith tab tom saib nws tus txiv, Joseph Smith, ua txoj hauj lwm muab Txoj Moo Zoo Txum Tim Rov Qab Los, nyaj nws xav paub seb nws muaj lub luag hauj lwm dab tsi. Nrhiav tej lus teb uas tus Tswv tau hais nyob hauv Lus Qhuab Qhia thiab Kev Khi Lus 25. Puas muaj ib yam dab tsi ntxiv nyob hauv tshooj no uas ua rau koj hnov Nws “lub suab rau [koj]”? (nqe 16).

Kuj saib “An Elect Lady” (vidi-aus), Txoj Moo Zoo cov Ntawv; “Thou Art an Elect Lady,” nyob hauv Revelations in Context, 33–39; Joy D. Jones, “Ib txoj Hauj Lwm Muaj Hwj Chim Heev,” Liyahaunas, Tsib Hlis Ntuj 2020, 15–18.

5:15

Lo lus “tus cwj pwm ua siab mos siab muag” txhais li cas rau koj? Xav seb puas nrhiav hauv tshooj 25 rau tej lus uas pab koj to taub tias kev ua siab mos siab muag zoo li cas. Tej zaum Txwj Laug David A. Bednar zaj lus “Muaj lub Siab Mos Siab Muag thiab Txo Siab Txo Ntsws” kuj pab tau (Liyahaunas, Tsib Hlis Ntuj 2018, 30–33). Vim li cas Yexus Khetos yog ib tug yam ntxwv txog kev ua siab mos siab muag? (saib Mathais 11:28–30). Xav txog tej yam hauv koj lub neej uas koj ua tau “nrog tus cwj pwm ua siab mos siab muag.”

Thaum koj xav txog tus Tswv tej lus ntuas nyob hauv Lus Qhuab Qhia thiab Kev Khi Lus 25:10, tej zaum yuav pab koj yog koj sau ntawv txog “tej yam ntawm lub ntiaj teb no” uas Nws xav kom koj “tso tseg.” Ces koj sau tau “tej yam ntawm ib qhov chaw zoo dua” uas Nws xav kom koj nrhiav. Tej zaum koj yuav xav xaiv ib yam uas koj sau ua ntej uas koj yuav muab tso tseg thiab ib yam los ntawm sab thib ob uas koj xav nrhiav.

Thawj Tswj Hwm Russell M. Nelson tau qhia thiab cog lus rau peb txog kev “tso ntau yam ntawm lub ntiaj teb no tseg.” Saib tej no nyob hauv phab 77 ntawm nws zaj lus “Tej Nqi Zog ntawm Sab Ntsuj Plig” (Liyahaunas, Kaum Ib Hlis Ntuj 2019). Koj yuav ua li cas kom ua raws li nws tej lus ntuas?

Thaum koj nyeem nqe 13, cia li xav txog tej kev khi lus uas koj tau khi nrog Leej Txiv Saum Ntuj Ceeb Tsheej thiab Yexus Khetos. Kev “muab siab npuab” tej kev khi lus no txhais li cas? Koj tej kev khi lus pab koj li cas kom “muab tej yam ntawm lub ntiaj teb no tso tseg, thiab nrhiav tej yam ntawm ib qhov chaw uas zoo dua”?

Nov yog tej nqe vaj lug kub ntxiv uas yuav pab koj paub “tej yam ntawm lub ntiaj teb no” thiab “tej yam ntawm ib qhov chaw uas zoo dua”: Mathais 6:19, 21, 25–34; Lukas 10:39–42; 2 Nifais 9:51.

Kuj saib Tej Ntsiab Lus thiab tej Lus Nug, “Kev Txi,” Txoj Moo Zoo cov Ntawv.

Koj tej “zaj nkauj uas tawm hauv nruab siab los” yog dab tsi—tej zaj nkauj uas qhia tias koj xav li cas txog Leej Txiv Saum Ntuj Ceeb Tsheej los sis Yexus Khetos? Cia li xav seb puas hu nkauj los sis mloog rau ob peb zag. Vim li cas tej zaj no tshwj xeeb rau koj?

Cia li xav seb vim li cas tej zaj nkauj no yeej zoo li kev thov Vajtswv. Cov nkauj dawb ceev thiab kev thov Vajtswv muaj tej yam twg uas zoo ib yam? Tus Tswv tau ua li cas kom “teb nrog ib txoj koob hmoov” rau koj thaum koj hu koj tej zaj nkauj dawb ceev?

Kuj saib “Oh, What Songs of the Heart,” Hymns, zaj 286.

Lo lus “sawv daws kev pom yeem” nyob hauv nqe no hais txog qhov uas peb tsa peb sab tes kom qhia tias peb txhawb nqa pom zoo ib tug neeg uas txais kev hu los yog kev tsa rau lub pov thawj hwj. Koj yuav ua li cas kom piav rau ib tug neeg uas tuaj saib lub Koom Txoos kev sib ntsib hais tias kev txhawb nqa pom zoo rau ib tug neeg muaj lub ntsiab dab tsi? Koj nrhiav tau tej lus teb twg nyob hauv Henry B. Eyring zaj lus “Lub Hwj Chim Vim Muaj Kev Ntseeg uas Txhawb Nqa”? (Liyahaunas, Tsib Hlis Ntuj 2019, 58–60).

• Yog xav kawm txog tej kev sim siab los yog tej teeb meem uas Joseph Smith thiab Haiv Neeg Ntseeg thaum ub tau raug, tej zaum koj yuav xav nyeem “Tshooj 11: Neeg Coob Los Koom lub Koom Txoos,” nyob hauv Cov Dab Neeg hauv phau Lus Qhuab Qhia thiab Kev Khi Lus, 46–47, los sis zaj vidi-aus nyob hauv Txoj Moo Zoo cov Ntawv. Ces koj thiab koj cov me nyuam kawm tau tej yam uas tus Tswv hais rau Joseph txog nws tej kev txom nyem nyob hauv Lus Qhuab Qhia thiab Kev Khi Lus 24:1, 8. Nej ib leeg qhia tau ib leeg txog qhov uas tus Tswv pab nej li cas thaum raug tej xwm txheej nyuaj.

  

  1:52

• Kom kawm tias “ua siab ntev rau [peb] tej kev txom nyem” txhais li cas, tej zaum koj thiab koj cov me nyuam yuav xav ua qhov lawv ua hauv zaj vidi-aus “Ua Siab Ntev Mus Ntxiv” (Txoj Moo Zoo cov Ntawv). Phau Lus Qhuab Qhia thiab Kev Khi Lus 24:8 qhia dab tsi rau peb txog kev ua siab ntev? Tus Cawm Seej ua li cas kom pab peb paub tias Nws “nrog [peb]” thaum peb raug txom nyem?

  

  2:42

• Tom qab nej nyeem Lus Qhuab Qhia thiab Kev Khi Lus 25:12, tej zaum nej ib leeg yuav xav qhia ib leeg txog zaj nkauj hauv lub Koom Txoos uas nej nyiam tshaj—nej “zaj nkauj uas tawm hauv nruab siab los”—thiab hu tej zaj nkauj no ua ke. Cia li qhia yog vim li cas nej nyiam tej zaj nkauj no. Vim li cas tus Tswv zoo siab thaum peb hu tej zaj nkauj no? Vim li cas qhov uas peb hu nkauj yeej zoo li “ib zaj lus thov rau [Nws]”?

• Kom to taub tias “muab siab npuab tej kev khi lus” txhais li cas (Lus Qhuab Qhia thiab Kev Khi Lus 25:13), tej zaum koj cov me nyuam yuav xav tuav ib yam dab tsi ruaj nrees ib tug zuj zus. Ces koj thiab koj cov me nyuam tham tau txog qhov uas nej “muab siab npuab” los sis tuav rawv nej tej kev khi lus. Yog xav tau, rov qab kawm nrog koj cov me nyuam txog tej kev khi lus uas peb khi (saib Mauxiyas 18:8–10; Lus Qhuab Qhia thiab Kev Khi Lus 20:37; thiab phab ntawv ntxim ua rau lub lim tiam no).

• Kom pab koj cov me nyuam to taub Lus Qhuab Qhia thiab Kev Khi Lus 25:13, tej zaum koj yuav xav qhia tias nov yog ib yam uas tus Tswv qhia Emma Smith tom qab nws tau ua kev cai raus dej. Vim li cas tej lus no yog tej lus zoo qhia rau ib tug neeg uas nyuam qhuav ua kev cai raus dej?