“Peb Hlis Ntuj 3–9, ‘Kawm Los Ntawm Kuv,’ Lus Qhuab Qhia thiab Kev Khi Lus 19,” Los, Nrog Kuv Mus—Siv hauv Tsev thiab lub Koom Txoos: Lus Qhuab Qhia thiab Kev Khi Lus 2025 (2025)
“Lus Qhuab Qhia thiab Kev Khi Lus 19,” Los, Nrog Kuv Mus—Siv hauv Tsev thiab lub Koom Txoos: 2025
Ib yam los ntawm Khexemanes Txoj Kev, los ntawm Steve McGinty
Peb Hli Ntuj 3–9: “Kawm Los Ntawm Kuv”
Lus Qhuab Qhia thiab Kev Khi Lus 19
Siv ntau xyoo rau Martin thiab Lucy Harris muaj ib thaj teb zoo tshaj plaws nyob hauv lub zos Palmyra, New York. Tiam sis thaum xyoo 1829 Martin paub zoo hais tias yuav luam tau Phau Ntawv Maumoos tsuas yog nws tiv nqi rau nws thaj teb kom them tus kws luam ntawv xwb. Martin paub tias Phau Ntawv Maumoos muaj tseeb, tiam sis Lucy tsis paub. Yog tias Martin yuav tiv nqi rau nws thaj teb thiab muag tsis tau Phau Ntawv Maumoos ntau, ces nws thaj teb yuav raug txeeb mus, nws txoj kev sib yuav yeej yuav muaj teeb meem, thiab nws txoj kev muaj koob muaj npe hauv zej zog yuav ploj mus. Txawm tias peb tej xwm txheej txawv ntawm Martin tej xwm txheej, yeej muaj tej lub sij hawm thaum peb txhua tus muaj tej lus nug uas nyuaj ib yam li nws muaj: Yexus Khetos txoj moo zoo muaj nqis npaum li cas rau kuv? Kuv txaus siab muab dab tsi txi kom pab txhim tsa Vajtswv lub nceeg vaj? Martin Harris txiav txim siab tiv nqi rau nws thaj teb kom luam tau thawj 5,000 Phau Ntawv Maumoos. Tiam sis txoj kev txi no—thiab txhua yam kev txi uas peb ua—yeej me me heev thaum peb muab piv rau Yexus Khetos txoj kev txi, uas yog “tus zoo tshaj plaws ntawm tag nrho sawv daws” (Lus Qhuab Qhia thiab Kev Khi Lus 19:18), tus uas los ntshav tawm ntawm txhua lub qhov hws los cawm cov neeg uas hloov siab lees txim.
Yog xav kawm ntxiv txog kev muab Phau Ntawv Maumoos luam, saib Saints, 1:76–84.
Tej Tswv Yim Pab Qhia hauv Tsev thiab lub Koom Txoos
Lus Qhuab Qhia thiab Kev Khi Lus 19:1–12
“Kuv, Vajtswv, tsis muaj qhov kawg.”
Joseph Smith qhia tias txoj kev tshwm sim nyob hauv tshooj 19yog “ib lo lus txib [uas] muab los rau Martin Harris, yog tus uas Nyob Mus Ib Txhis muab los” (zaj lus piav txog tshooj). Nrhiav tej qhov chaw nyob hauv nqe 1–12 uas tus Tswv hais ntau txog Nws txoj kev nyob mus ib txhis. Koj xav tias yog vim li cas qhov uas Martin Harris paub qhov no txog tus Tswv yog ib qho tseem ceeb? Vim li cas koj yuav tsum paub qhov no thiab?
Yog vim li cas koj xav tias Yexus Khetos hu ua “qhov chiv keeb thiab qhov kawg”? (nqe 1).
Lus Qhuab Qhia thiab Kev Khi Lus 19:15–20
Yexus Khetos raug txom nyem kom kuv thiaj li yuav hloov siab lees txim thiab los cuag Nws.
Phau Tshiab piav txog tus Cawm Seej txoj kev raug txom nyem nyob hauv lub vaj Khexemanes raws li cov neeg uas twb saib Nws ua li ntawd hais. Nyob hauv phau Lus Qhuab Qhia thiab Kev Khi Lus 19:15–20,Yexus Khetos yog tus uas qhia txog Nws txoj kev raug txom nyem. Thaum koj nyeem zaj dawb ceev no, cia li xav seb tus Cawm Seej piav txog Nws txoj kev raug txom nyem li cas. Cia li xav seb txhua lo lus los sis kab lus qhia dab tsi rau koj. Vim li cas tus Cawm Seej txaus siab raug txom nyem? Koj kawm tau ntxiv nyob hauv Yauhas 15:13; Mauxiyas 3:7; Amas 7:11–12; Lus Qhuab Qhia thiab Kev Khi Lus 18:10–13.
Tej zaum koj tej kev xav thaum koj kawm txog tus Cawm Seej txoj kev raug txom nyem yuav ua rau koj muaj tej lus nug zoo li no: Vim li cas tus Cawm Seej yuav tsum raug txom nyem rau kuv tej kev txhaum? Vim li cas kuv yuav tsum hloov siab lees txim kom txais tau cov koob hmoov los ntawm Nws txoj kev theej txhoj? Tej zaum koj yuav kawm ntxiv txog tej lus nug no thiab lwm yam nyob hauv Txwj Laug Ulisses Soares zaj lus “Yexus Khetos: Tus uas Tu Peb Sab Ntsuj Plig” (Liyahaunas, Tsib Hli Ntuj 2021, 82–84). Thaum koj kawm, ua rau koj txais tej kev tshoov siab twg? Cia li xav seb koj puas sau ntawv txog koj tej kev xav txog Yexus Khetos thiab Nws txoj kev txi rau koj.
Thaum koj teev tiam Vajtswv thiab kawm, tej zaum koj yuav xav nrhiav ib zaj nkauj rau koj mloog los hu tau uas qhia txog koj txoj kev ris tus Cawm Seej txiaj vim Nws raug txom nyem rau koj. “Kuv Zoo Siab Yexus Hlub Kuv” (Cov Nkauj Qhuas Vajtswv, zaj 82) yog ib qho piv txwv zoo.
Koj xav tias Leej Txiv Saum Ntuj Ceeb Tsheej thiab Yexus Khetos xav kom koj ua li cas vim tej yam uas koj tau xav thiab kawm?
Kuj saib “Yexus Khetos yuav pab koj,” Ntxiv Dag Zog rau cov Tub Hluas Ntxhais Hluas: Phau Ntawv Coj Kev Pab Neeg Xaiv (2022), 6–9; Tej lub Ntsiab Lus thiab tej Lus Nug, “Yexus Khetos txoj Kev Theej Txhoj,” “Txoj Kev Hloov Siab Lees Txim,” Txoj Moo Zoo cov Ntawv; D. Todd Christofferson, “Kev Hloov Siab Lees Txim Yog lub Txiaj Ntsim uas Los Saum Ntuj Los,” Liyahaunas, Kaum Ib Hli Ntuj 2011, 38–41; “Jesus Suffers in Gethsemane” (vidi-aus), Txoj Moo Zoo cov Ntawv.
The Savior Suffers in Gethsemane
Lus Qhuab Qhia thiab Kev Khi Lus 19:23
Kev kaj siab lug yeej los ntawm kev kawm txog Yexus Khetos thiab kev coj raws li Nws.
Cia li xav txog tus Cawm Seej txoj kev caw “Kawm los ntawm kuv.” Koj kawm dab tsi txog Yexus Khetos nyob hauv phau Lus Qhuab Qhia thiab Kev Khi Lus 19? Sau ntawv txog koj tej kev xav, thiab xav txog qhov uas tej yam tseeb txog tus Cawm Seej ua li cas kom pab koj nrhiav tau kev kaj siab lug. Qhov uas hais tias “taug kev raws [Nws] tus Ntsuj Plig txoj kev siab mos siab muag” los koj xav tias lub ntsiab yog dab tsi?
Kuj saib Henry B. Eyring, “Nrhiav Kom Tau Kev Nyob Kaj Siab Lug,” Liyahaunas, Tsib Hli Ntuj 2023, 29–31; “Peace in Christ” (vidi-aus), Txoj Moo Zoo cov Ntawv.
Peace in Christ
Lus Qhuab Qhia thiab Kev Khi Lus 19:26–41
Vajtswv cov koob hmoov yeej zoo tshaj tej nyiaj tej kub ntawm lub ntiaj teb.
Tsis tau muag tej Phau Ntawv Maumoos ntau nyob hauv Palmyra. Yog li ntawd, Martin Harris yuav tsum muag ib feem loj ntawm nws thaj teb kom them tus nqi rau tus luam ntawv (saib “The Contributions of Martin Harris,” nyob hauv Revelations in Context, 7–8). Cia li xav txog Martin txoj kev txi—thiab cov koob hmoov uas koj txais vim nws ua li ntawd— thaum koj nyeem Lus Qhuab Qhia thiab Kev Khi Lus 19:26–41. Tej zaum tsim nyog uas koj xav txog tej yam uas tus Tswv tau hais kom koj muab txi thiab. Koj nrhiav dab tsi hauv tej nqe no uas tshoov koj lub siab kom ua tej kev txi no nrog kev “xyiv fab” thiab “lub siab luag nyav”? (kuj saib nqe 15–20).
Ib yam los ntawm Martin Harris Thaj Teb, los ntawm Al Rounds
Yog xav tau tswv yim ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hlis no.
Tej Tswv Yim Pab Qhia cov Me Nyuam
Lus Qhuab Qhia thiab Kev Khi Lus 19:16–19
Yexus Khetos raug txom nyem rau kuv.
-
Koj pab tau koj cov me nyuam hnov kev tswm seeb thiab kev ris tus Cawm Seej txiaj thaum nej nyeem Lus Qhuab Qhia thiab Kev Khi Lus 19:16–19 ua ke los yog “Tshooj 51: Yexus Raug Txom Nyem Nyob hauv lub Vaj Khexemanes,” nyob hauv Cov Dab Neeg hauv Phau Tshiab, 129–32, los yog zaj vidi-aus los ntawm Txoj Moo Zoo cov Ntawv. Xav seb puas nres kom koj cov me nyuam to taub thiab cia lawv qhia lawv tej kev xav. Piv txwv hais tias, nyob hauv nqe 16, “tej yam” uas Yexus Khetos tau raug txom nyem vim Nws theej peb lub txhoj yog dab tsi? (saib Mauxiyas 3:7; Amas 7:11–12). Peb kawm dab tsi los ntawm Nws tej lus piav txog Nws txoj kev raug txom nyem? Peb yuav ua li cas kom qhia tias peb ris Nws txiaj rau tej yam uas Nws ua rau peb?
Chapter 51: Jesus Suffers in the Garden of Gethsemane
Cia li pab cov me nyuam kawm los ntawm cov vaj lug kub. Tej zaum yuav nyuaj rau cov me nyuam ib txhia nyeem vaj lug kub. Tej zaum qhov uas koj tsom ntsoov rau ib nqe los ib kab lus xwb yuav pab lawv.
-
Koj thiab koj cov me nyuam nrhiav tau cov nkauj hauv Cov Nkauj Qhuas Vajtswv los yog Children’s Songbook uas pab tau nej qhia nej txoj kev xav txog Yexus Khetos (saib cov ntsiab lus hauv ob phau no).
Lus Qhuab Qhia thiab Kev Khi Lus 19:18–19, 24
Yexus Khetos tau ua raws li Leej Txiv Saum Ntuj Ceeb Tsheej, txawm tias nyuaj npaum li cas los xij.
-
Raug kev txom nyem rau peb tej kev txhaum yeej nyuaj heev, tiam sis Yexus Khetos txaus siab ua kom ua raws li Nws Leej Txiv hais thiab vim Nws hlub Vajtswv thiab hlub peb txhua tus. Tej zaum nej yuav xav saib ib daim duab ua ke txog Yexus Khetos txoj kev raug txom nyem hauv lub vaj Khexemanes (ib yam li cov uas nyob hauv daim ntawv no) thiab hais koj cov me nyuam kom piav tias Nws ua dab tsi nyob hauv daim duab ntawd. Tej zaum nej yuav xav nyeem phau Lus Qhuab Qhia thiab Kev Khi Lus 19:18–19, 24 ua ke kom hais tias txoj kev raug txom nyem rau peb tej kev txhaum yog qhov nyuaj tshaj plaws uas leej twg ib txwm tau ua, tiam sis Yexus ua raws li Vajtswv lub siab nyiam rau qhov Nws hlub Nws Leej Txiv thiab peb sawv daws (kuj saib Mauxiyas 3:7). Vajtswv tau txib kom peb ua tej yam nyuaj dab tsi? Peb yuav ua li cas kom muaj lub siab loj ua raws li Nws hais?
Lus Qhuab Qhia thiab Kev Khi Lus 19:23
“Kawm los ntawm kuv, thiab mloog kuv tej lus.”
-
Tej zaum koj yuav xav pab koj cov me nyuam xav txog tej kev ua yeeb yam yooj yim raws li tej kab lus nyob hauv Lus Qhuab Qhia thiab Kev Khi Lus 19:23. Nyeem nqe no ob peb zaug thaum lawv ua yeeb yam ntawd. Peb yuav ua li cas kom kawm txog Khetos thiab mloog Nws cov lus?
Lus Qhuab Qhia thiab Kev Khi Lus 19:38
Vajtswv cov koob hmoov yeej zoo tshaj tej nyiaj tej kub ntawm lub ntiaj teb.
-
Tej zaum koj thiab koj cov me nyuam yuav xav tuav ib Phau Ntawv Maumoos thiab qhia tias nej nyiam dab tsi txog phau ntawv ntawd. Siv sij hawm sib tham txog Martin Harris txoj kev txi kom muab Phau Ntawv Maumoos luam tawm (saib Cov Dab Neeg hauv phau Lus Qhuab Qhia thiab Kev Khi Lus, 33). Tus Tswv hais li cas rau Martin nyob hauv Lus Qhuab Qhia thiab Kev Khi Lus 19:38 uas pab nws muaj kev ntseeg thiab kev mloog lus? Pab koj cov me nyuam xav txog ib yam uas lawv yuav txi kom mloog Vajtswv los sis pab ua Nws txoj hauj lwm.
Yog xav tau tswv yim ntxiv, saib phau xov xwm Phooj Ywg rau lub hlis no.