Nsanananmu no ho Ndze Ahorow

No kun, Joseph Smith Kakraba

“Medze enyigye a munntum nkyerɛ, na dɛwdzi a metse no mo bo mu no, ber a medze me nsa suoo no mu, mo dɔfo Emma, anafua no—ɔno a ɔyɛ me yer, me mbrantsɛber mu yer mpo no; na nyia modɔ no m’akoma mu. Ndzɛmba pii na modwendwen ho sɛ mohwɛ wɔ m’enyiwa do ndzɛmba pii a yeedua mu. Ɔberɛ horow, edwumadzen, awerɛhow, na yaw na enyigye na awerɛkyekye a ofi mber to mber wohue gu hɛn akwan mu na ohyira hɛn abrabɔ. O! Adwendwen nwanwa a ɔhyɛ m’adwen mu ber yi. Bio no, ɔwɔ ha, wɔ ɔhaw a otsĩa esuon mu, onnsuro, ogyina pintsinn, onnhihim, ɔnnsesa, dɔfo Emma.”

“Nna ɔyɛ akataasia, na n’akoma nyina wɔ Ewuradze edwuma do, osian n’enyimpi su, na n’enyi anngye biribiara mu gyedɛ asɔr na nokwar ho. Biribiara a ne nsa bosuo mu no, ɔdze n’ahoɔdzen nyina yɛ na ombisa pɛsɛankonya nsɛmbisa dɛ, ‘Menya ho mfaso akyɛn obiara a?’ Sɛ wɔsoma elderfo dɛ wɔnkɛkã asɛmpa no a, ɔno nye ɔbaa a odzi kan tu noho si hɔ dɛ ɔdze efuradze bɔsoom hɔn wɔ hɔn akwantu no mu, mbrɛ nankasa n’ehiadze tse biara no.”

Emma ne patriarch nhyira a, Joseph Smith Panyin a, nna ɔrosom dɛ Asɔr no ne Patriarch nhyira no kãe:

“Emma, m’asew basia, Ewuradze ehyira wo, osian wo nokwardzi na nokwar ho: wobehyira ɔwo na wo kun, na edzi ehurusi wɔ enyimnyam a ɔbɛba no do no: Wɔatseetsee wo kra osian nyimpa n’emumuyɛdze dɛ wɔrohwehwɛ asɛɛ wo hokãfo, na edze wo kra nyina abɔ mpaa ma no ɔgye: dzi ehurusi, osiandɛ Ewuradze wo Nyankopɔn atse wo ntotɔserɛ mpaabɔ no.

“Edzi yaw wɔ w’egya fie hɔn akomadzen ho, na ahwehwɛ hɔn nkwagye. Ewuradze dze obu betsie wo sũ, na ɔnam n’atsɛmbu do binom bohu dza ɔmmfata a wɔayɛ no na woenu hɔn bɔn ho, naaso ɔnam atseetsee mu na wɔbɛgye hɔn nkwa. Ibohu nda pii; nyew, Ewuradze bɛma efi nsa kɛpɛm dɛ ɔbɛyɛ wo enyisɔ, osiandɛ ibohu wo Pomfo. W’akoma bedzi ehurusi wɔ Ewuradze n’edwuma kɛse no mu, na obiara nnkotum agye wo dɛwdzi efi wo hɔ.

“Ebɛkaa daa mbrɛ wo Nyame si kotow ara yie a ɔmaa kwan ma ekãa me babanyin no ho ber a ɔbɔfo dze Nephifo nkyerɛwee no hyɛɛ ne nsa no. Ehu awerɛhow pii osiandɛ Ewuradze eyi wo mba baasa efi wo hɔ: iyi mu no ɔnnyɛ wo mfom, osiandɛ onyim dɛ wo pɛ no ho tsew dɛ ibɛtsetse w’ebusua, ama me babanyin no eetum aayɛ nhyira. Na afei, hwɛ, Mese wo dɛ, na dɛm na Ewuradze se, sɛ ibɛgye edzi a, wobehyira wo wɔ adze yi mu na ebɔwoo mba binom so, ma wo kra enya enyigye na ɔamee, na w’anyɛnkofo edzi ehurusi.

“Wɔdze ntseasee behyira wo, na ibenya tum dze akyerɛkyerɛ mbasiafo no. Kyerɛkyerɛ w’ebusua ndzeyɛtsenenee, na wo mbofra no abrabɔ kwan, na abɔfo krɔnkrɔn bɔhwɛ wo do: na wɔbɛgye wo nkwa wɔ Nyankopɔn ahenman mu, ɔnyɛ dɛm. Amen.”