Сургаал ба Гэрээ 19

Иосеф Смит 19-р хэсэг дэх уг илчлэлт нь “Мөнх болох түүгээр Мартин Харрист өгөгдсөн … зарлиг” (хэсгийн гарчиг) гэдгийг тайлбарласан. Их Эзэний Өөрийн мөнхийн мөн чанарыг онцолсон хэсгийг 1–12-р шүлгээс хайж ол. Их Эзэний тухай энэ зүйлийг мэдэх нь Мартин Харрист яагаад чухал байсан гэж та бодож байна вэ? Үүнийг мэдэх нь танд яагаад чухал вэ?

Та яагаад Есүс Христийг “эхлэл ба төгсгөл” хэмээн нэрлэдэг гэж бодож байна вэ? (1-р шүлэг).

Шинэ Гэрээнд Аврагчийн Гетсемани дахь шаналлыг дүрслэхдээ, үүнийг ажиглан харж байсан хүмүүсийн өнцгөөс тайлбарласан байдаг. Сургаал ба Гэрээ 19:15–20 дээр Есүс Христ Өөрийн зовж шаналсныг Өөрийн харах өнцгөөс авч үзэн хэлсэн байдаг. Та энэ ариун нандин, хувийн түүхийг уншиж байхдаа Аврагч зовлон шаналлаа хэрхэн тайлбарласныг олж мэдээрэй. Үг, хэллэг бүр танд юу зааж байгааг бодож үз. Аврагч яагаад зовж шаналахад бэлэн байсан бэ? Илүү ихийг олж мэдэхийн тулд Иохан 15:13; Мозая 3:7; Алма 7:11–12; Сургаал ба Гэрээ 18:10–13-ыг үзнэ үү.

Аврагчийн зовлон шаналлын талаар суралцах явцад эдгээртэй адил асуулт танд төрж магад. Тухайлбал: Аврагч яагаад миний гэм нүглийн төлөө зовж шаналах ёстой байсан бэ? Түүний золиослолын бүрэн дүүрэн адислалуудыг хүлээн авахын тулд би яагаад наманчлах ёстой вэ? Та ахлагч Үлиссэс Соарэсын “Есүс Христ: Бодгалиудын маань Халамжлагч” захиаснаас эдгээр болон бусад асуултын талаарх ойлголтыг олж болно (2021 оны 4-р сарын Ерөнхий чуулган 80–84). Суралцах явцад ямар сэтгэгдэл танд төрсөн бэ? Есүс Христийн талаар болон Түүний таны төлөө гаргасан золиосны талаар төрсөн сэтгэгдлээ бичихийг бод.

Суралцаж, шүтэн бишрэх үедээ өөрийн тань өмнөөс зовж шаналсанд нь Аврагчид талархлаа илэрхийлэхдээ сонсох юм уу дуулж болох дууг хайж ол. “Би гайхширна” (Дуулал, д. 98) дуу бол тохиромжтой жишээ юм.

Сурч мэдсэн, мэдэрсэн зүйлийн тань үр дүнд Тэнгэрлэг Эцэг, Есүс Христ хоёр танаар юу хийлгэхийг хүсэж байгаа гэж та бодож байна вэ?

Мөн “Есүс Христ танд туслах болно” гэдгийг Өсвөр үеийнхний бат бөх байдлын төлөө: Сонголт хийхэд туслах хөтөч (2022)-ийн х. 6–9-өөс; Д.Тодд Кристоффэрсоны “Наманчлалын бурханлиг бэлэг” захиасыг 2011 оны 10-р сарын Ерөнхий чуулганы 45–48-р хуудаснаас үзнэ үү.

8:48

Аврагчийн “Надаас суралц” гэсэн урилгын талаар бодож үзээрэй. Та Сургаал ба Гэрээ 19-өөс Есүс Христийн тухай юу ойлгож мэдсэн бэ? Төрсөн сэтгэгдлээ бичиж авч, Аврагчийн талаарх эдгээр үнэн амар амгаланг олоход тань хэрхэн тусалж болох талаар тунгаан бод. “[Түүний] Сүнсний номхон дөлгөөн байдалд алхагтун” гэдэг нь таны хувьд юу гэсэн үг вэ?

Мөн Хэнри Б.Айрингийн “Хувийн амар тайвныг олох нь” захиасыг 2023 оны 5-р сарын Лиахонагийн х. 29–31-ээс үзнэ үү.

4:10

Мормоны Ном Палмирад тийм ч сайн борлогдохгүй байлаа. Үүнээс болж Мартин Харрис хэвлэгчид өрөө төлөхийн тулд фермийнхээ томоохон хэсгийг зарахаас аргагүй болсон юм. Та Сургаал ба Гэрээ 19:26–41-ийг уншиж байхдаа, Мартины золиослолын талаар мөн үүний үр дүнд хүлээн авсан адислалуудынхаа талаар тунгаан бод. Та Их Эзэн танаас юу золиослохыг хүсэж байсан тухай бас бодож болох юм. Та энэ шүлгүүдээс эдгээр золиосыг “баясгалантай” мөн “баяртайгаар” (мөн 15–20-р шүлгийг үзнэ үү) гаргахад таныг урамшуулж буй юуг мэдэж авдаг вэ?

• Хүүхдүүддээ Аврагчид хүндэтгэл, талархалтай байхад туслахын тулд Сургаал ба Гэрээ 19:16–19-ийг эсвэл Шинэ Гэрээний түүхүүдийн 129–132-р хуудасны “51-р бүлэг: Есүс Гетсеманийн цэцэрлэгт зовж шаналсан нь” хэсгийг хамтдаа унших юм уу Gospel Library дээрх холбогдох видеог үзнэ үү. Хүүхдүүдийнхээ ойлгосон эсэхийг шалгаж, мэдрэмжээ илэрхийлэх боломж олгон түр зогсоо. Жишээлбэл: 1-р шүлэгт Есүсийн бидний төлөө амссан “эдгээр зүйлүүд” юу вэ? (Мозая 3:7; Алма 7:11–12-ыг үзнэ үү). Бид Түүний шаналлын тухай Өөрийнх нь дүрслэлээс юу сурч болох вэ? Бидний төлөө хийсэн зүйлд нь Түүнд бид талархлаа хэрхэн харуулж болох вэ?

1:47

• Та Есүс Христийн талаарх бодол сэтгэгдлээ илэрхийлэхэд туслах дуунуудыг Дуулал эсвэл Хүүхдийн дууны номоос хүүхдүүдтэйгээ харж болно (эдгээр номд байгаа сэдвийн жагсаалтыг үзнэ үү).

• Бидний гэм нүглийн төлөө зовж шаналах нь үнэхээр хэцүү байсан ч Есүс Христ Эцэгтээ дуулгавартай байж, Түүнийг болон биднийг гэх хайраа харуулахад бэлэн байсан. Гетсеманид зовж шаналж буй Есүс Христийн зургийг (энэ тоймд байгаатай адил) хамтдаа хараад , зураг дээрх үйл явдлын талаар мэддэг зүйлээ хуваалцахыг хүүхдүүдээс хүс. Та Сургаал ба Гэрээ 19:18–19, 24-ийг хамтдаа уншаад, уг шаналал урьд өмнө хэний ч туулж байгаагүй хамгийн хэцүү зүйл байсан хэдий ч Есүс Өөрийн Эцэгт болон бидэнд хайртай учраас Бурханы хүсэлд дуулгавартай байсан гэдгийг онцолж хэл (мөн Мозая 3:7-г үзнэ үү). Бурхан биднээр ямар ямар хэцүү зүйлийг хийлгэхийг хүсдэг вэ? Бид Түүнийг дуулгавартай дагах урам зоригийг хэрхэн хайж олж болох вэ?

• Сургаал ба Гэрээ 19:23 дээрх хэллэгийг илэрхийлэх энгийн үйлдлүүдийг бодож олоход нь та хүүхдүүддээ тусалж болох юм. Тэднийг ийн үйлдэх зуур уг шүлгийг хэд хэдэн удаа унш. Бидэнд Христээс суралцах, Түүний үгсийг сонсох ямар ямар арга зам байдаг вэ?

• Та хүүхдүүдтэйгээ Мормоны Номыг бариад, үүнээс юу нь танд таалагддаг талаар ээлжлэн хуваалцаж болно. Мормоны Номыг хэвлэхийн тулд Мартин Харрисын гаргасан золиослолын талаар товч ярь (Сургаал ба Гэрээний түүхүүдийн х. 33-ыг үзнэ үү). Мартиныг итгэлтэй, дуулгавартай байхад туслах юуг Их Эзэн түүнд Сургаал ба Гэрээ 19:38 дээр хэлсэн байдаг вэ? Бурханд дуулгавартай байх эсвэл Түүний ажилд туслахын тулд золиосолж болох зүйлийнхээ талаар бодоход хүүхдүүддээ тусал.