Tokāteline mo e Ngaahi Fuakava 10–11

Ko e loto ʻo Sētané ke ngalo ʻiate kitautolu ʻokú ne moʻui—pe ʻoua te tau fakatokangaʻi ʻene feinga ke uesia kitautolú (vakai, 2 Nīfai 28:22–23). Ka ʻoku fakapapauʻi mai ʻe he folofola ʻa e ʻEikí ʻi he Tokāteline mo e Ngaahi Fuakava 10 ʻoku moʻoni ʻa Sētane—pea ʻokú ne fakafepakiʻi mālohi ʻa e ngāue ʻa e ʻEikí. ʻI he veesi 1–33, feinga ke ʻiloʻi ʻa e meʻa naʻe ʻafioʻi ʻe he ʻOtuá fekauʻaki mo e ngaahi feinga ʻa Sētané (vakai foki, veesi 62–63). Te ke lava foki ʻo kole ki he ʻEikí ke Ne tokoniʻi koe ke ke lava ʻo ʻiloʻi ʻa e founga ʻe ala ʻahiʻahiʻi ai koe ʻe Sētané. ʻI hoʻo lau ʻa e vahe 10, fakalaulauloto ki he founga ʻe lava ke tokoniʻi ai koe ʻe he Fakamoʻuí ke tekeʻi ʻa e ngaahi feinga ʻa Sētané.

Naʻe ʻikai ke ʻilo ʻe Nīfai ʻa e ʻuhinga naʻe ueʻi fakalaumālie ai ia ke ne faʻu ha lekooti ʻe ua ʻo hono kakaí. Pea naʻe ʻikai ke ʻilo ʻe Molomona ʻa e ʻuhinga naʻe ueʻi fakalaumālie ai ia ke fakakau ʻa e seti hono uá mo e ʻū lauʻi peleti koulá. Ka naʻe falala ʻa e ongo palōfitá fakatouʻosi ʻoku ʻi ai ha “taumuʻa fakapotopoto” ʻa e ʻOtuá (1 Nīfai 9:5; Ngaahi Lea ʻa Molomona 1:7). ʻOku tau ʻilo ʻi he ʻahó ni ha konga ʻo e taumuʻa ko iá: ke fetongi ʻa e ʻū lauʻi peesi ʻe 116 ʻo e Tohi ʻa Molomoná naʻe molé. Ko e hā ʻokú ke pehē ʻoku finangalo ʻa e ʻEikí ke ke ako mei he meʻá ni kotoa? Fakalaulauloto ki he fehuʻi ko iá ʻi hoʻo lau ʻa e Tokāteilne mo e Ngaahi Fuakava 10:34–52. Te ke lava foki ʻo hiki ha lisi ʻo e ngaahi moʻoni ʻokú ke ako fekauʻaki mo e ʻEikí mei he ngaahi veesi ko ʻení. ʻOku liliu fēfē ʻe he ngaahi moʻoni ko ʻení hoʻo vā fetuʻutaki mo Iá? Ko e hā ʻoku makehe kiate koe fekauʻaki mo e poto mo e tokaimaʻananga ʻa e ʻEikí ʻi he teuteu ki he mole ʻa e ʻū lauʻi peesi ʻe 116?

Mahalo te ke ongoʻi foki ʻoku ueʻi koe ke ke fekumi ki ha fakamoʻoni ʻo Hono potó mo e tokaimaʻanangá ʻi hoʻo moʻuí. Lau ʻa e ngaahi fakamatala ʻi he pōpoaki ʻa ʻEletā Lānolo A. Lasipeni “ʻI ha Palani Fakalangi”—te nau lava ʻo ʻomi ha ngaahi sīpinga ki ho fakakaukaú (Liahona, Nōvema 2017, 55–57). Fakakaukau ke hiki kinautolu ʻi heʻenau haʻu ki ho fakakaukaú. Kuo ngāue fēfē nai ʻa e ʻEikí ʻi hoʻo moʻuí? Hangē ko ʻení, ko e hā ha “ngaahi meʻa tupukoso” kuó Ne teuteu? Ko e hā ha ngaahi fakavaʻe kuó Ne fakatoka ki ho ngaahi tāpuakí? Ko e fē ha taimi kuó Ne tataki ai koe ke ke ngāue fakaetauhi ki ha taha faingataʻaʻia?

Vakai foki, Loma 8:28; Tokāteline mo e Ngaahi Fuakava 90:24; Topics and Questions (Ngaahi Tefitó mo e Ngaahi Fehuʻí), “Plan of Salvation” (Palani ʻo e Fakamoʻuí), Gospel Library.

Naʻe vēkeveke ʻa e taʻokete ʻo Siosefa ko Hailamé ke ʻiloʻi ʻa e finangalo ʻo e ʻEikí maʻaná, ko ia naʻá ne kole kia Siosefa ke fekumi ki ha fakahā maʻana. Naʻe fiefia ʻa e Palōfitá ke fai ia, ka naʻe pehē ʻi ha pōpoaki ʻe taha ʻi he fakahā ko iá (Tokāteline mo e Ngaahi Fuakava 11) ʻe lava foki ke fekumi ʻa Hailame ki ha fakahā maʻana. Pea pehē “kiate kinautolu kotoa pē ʻoku ʻiate kinautolu ʻa e ngaahi holi leleí, pea kuo nau ʻai ʻenau hele tuʻusí ke tuʻusí” (veesi 27). ʻI hoʻo lau ʻa e vahe 11, ko e hā ʻokú ke ongoʻi ʻoku akoʻi atu ʻe he ʻEikí fekauʻaki mo e fakahā fakatāutahá? ʻOku fekauʻaki fēfē ʻeni mo e meʻa naʻá Ne akoʻi kia ʻŌliva Kautele ʻi he vahe 6–9? Ko e hā ha ngaahi pōpoaki kehe meiate Ia kiate koe?

Vakai foki, “ʻOku Taki ʻa e Laumālié,” Ngaahi Himí, fika 73.

Naʻa mo e kimuʻa pea ʻosi hono liliu ʻo e Tohi ʻa Molomoná, naʻe ʻosi vēkeveke pē ʻa Hailame Sāmita ke tokoni ʻi he ngāue ʻo hono Fakafoki Mai ʻo e Ongoongoleleí. ʻI hoʻo lau ʻa e tali ʻa e ʻEikí ki heʻene ngaahi holí, fakakaukau pe ko e hā ʻene ʻuhinga kiate koe ke “maʻu [ʻa e folofola ʻa e ʻOtuá]” (veesi 21). ‘Oku tokoni fēfē hoʻo maʻu ʻa e folofola ʻa e ʻOtuá ke ke tauhi kiate Ia ʻi he mālohí?

• Ke fakafeʻiloaki ʻa e veesi ko ʻení ki hoʻo fānaú, te ke lava ʻo fehuʻi ange fekauʻaki mo e ngaahi meʻa ʻoku nau fai “maʻu ai peé.” Ko e hā ʻoku folofola ʻe he ʻEikí ʻoku totonu ke tau fai maʻu pē ʻi he Tokāteline mo e Ngaahi Fuakava 10:5? Ko e hā ʻokú Ne finangalo ai ke tau fai ʻení?

• Te ke lava fēfē ʻo tokoni ki hoʻo fānaú ke nau manatuʻi ke lotu maʻu peé? ʻE lava ke nau tānaki ha fanga kiʻi foʻi maka iiki mo molemole ʻo tā ʻiate kinautolu ʻa e “Tokāteline mo e Ngaahi Fuakava 10:5” pe “Lotu Maʻu Ai Peé.” ʻE lava ke nau tuku ʻenau ngaahi foʻi maká ʻi ha ngaahi feituʻu kehekehe ʻa ia ʻoku nau fiemaʻu ke fakamanatu ange ai ke nau lotu, hangē ko honau veʻe mohengá, fakataha mo ʻenau ʻū tohi akó, pe feituʻu ʻoku nau maʻu meʻatokoni aí. Fakatatau ki he Tokāteline mo e Ngaahi Fuakava 10:5, ʻoku tāpuekina fēfē kitautolu ʻe he ʻOtuá ʻi he taimi ʻoku tau lotu aí? ʻE lava ke maʻu ʻe hoʻo fānaú ha ngaahi tali lahi ange ʻi ha foʻi hiva hangē ko e “Lotu ʻa ha Kiʻi Tamasiʻí” (Tohi Hiva ʻa e Fānaú, 6).

• ʻE lava ke ako ʻa e fānaú ke nau ʻiloʻi ʻa e taimi ʻoku folofola ange ai ʻa e Laumālie Māʻoniʻoní kiate kinautolú. Ke tokoni kiate kinautolú, te ke lava ʻo fufuuʻi ha foʻi ʻuhila pe kasa mo ha fakatātā ʻo ha fofonga fiefia ʻi ha feituʻu ʻi he lokí; hili iá pea kole ki hoʻo fānaú ke nau kumi ʻa e ngaahi meʻa ko ʻení. Lau ʻa e Tokāteline mo e Ngaahi Fuakava 11:13, pea tokoni ki he fānaú ke kumi ʻa e ngaahi lea ʻoku fekauʻaki mo e ngaahi meʻa ne nau maʻú. Ko e hā ʻa e meʻa ʻoku akoʻi mai ʻe he ngaahi foʻi lea ko ʻení fekauʻaki mo e founga ʻoku tokoniʻi ai ʻe he Laumālie Māʻoniʻoní kitautolú?

• ʻE lava ke tokoni hono vahevahe hoʻo ngaahi aʻusia fakalaumālié ke fakatokangaʻi ai ʻe hoʻo fānaú ʻa e ivi tākiekina ʻo e Laumālie Māʻoniʻoní ʻi heʻenau moʻuí. ʻI hoʻo vahevahé, kole ange ke vahevahe foki mo ʻenau ngaahi aʻusiá. Te mou lava foki ʻo lau fakataha ʻa e Tokāteline mo e Ngaahi Fuakava 11:12–13, ʻo kumi ki he founga te tau lava ai ʻo ʻiloʻi ʻa e taimi ʻoku tataki ai kitautolu ʻe he Laumālie Māʻoniʻoní. Fakamoʻoni ʻoku finangalo ʻa e Tamai Hēvaní ke tataki kitautolu ʻo fakafou ʻi he Laumālie Māʻoniʻoní.

• Hangē ko Hailame Sāmitá, mahalo ʻe maʻu ʻe hoʻo fānaú ha ngaahi faingamālie lahi ke vahevahe ʻa e ongoongoleleí mo e niʻihi kehé. ʻE lava ke mou lau fakataha ʻa e Tokāteline mo e Ngaahi Fuakava 11:21, 26 pea kole ki hoʻo fānaú ke kumi ʻa e meʻa naʻe fakahā ʻe he ʻEikí kia Hailame ʻokú Ne finangalo ke ne fai kae lava ke ne akoʻi ʻa e ongoongoleleí. ʻOku ʻuhinga ki he hā ke “maʻu” ʻa e folofola ʻa e ʻOtuá? Te tau lava fēfē ʻo fai ʻeni? ʻE founga fēfē ʻetau “mataʻikoloa ʻaki” ʻa e folofola ʻa e ʻOtuá ʻi hotau lotó? ʻE lava ke fakafaivaʻi ʻe hoʻo fānaú ha meʻa fekauʻaki mo Sīsū Kalaisi pe ko e Tohi ʻa Molomoná mo e niʻihi kehé.