Сургаал ба Гэрээ 6–9

1829 оны хавар Оливер Каудери Иосеф Смитийг Мормоны Номыг үргэлжлүүлэн орчуулах үед сайн дураараа түүний бичээчээр ажиллав. Энэ туршлага түүнийг гайхшируулж, тэр ч мөн адил илчлэлт, орчуулгын бэлгийг хүлээж авах эсэхийг мэдэхийг хүсэв. Гэсэн хэдий ч түүний эхний оролдлого бүтсэнгүй.

Танд илчлэлт хүлээн авч эсвэл үүнийг ойлгоход бэрхшээлтэй байсан бол Оливерт тохиолдсон зүйлийг та ойлгож, үүнээс суралцаж ч болох юм. Сургаал ба Гэрээ 6, 8, 9-ийг уншаад, Их Эзэн Оливер Каудерид хувийн илчлэлтийн тухай юу заасныг анзаар. Жишээлбэл:

• Сургаал ба Гэрээ 6:5–7; 8:1; 9:7–8-д Их Эзэн Өөрийнхөө хүслийг илчлэхээс өмнө танаас юу шаарддаг тухай юу гэж хэлсэн байдаг вэ?

• Та Сургаал ба Гэрээ 6:14–17, 22–24; 8:2–3; 9:7–9-өөс илчлэлт ямар өөр өөр арга замаар ирж болох тухай юу сурч мэдсэн бэ? Та үүнийг хэрхэн таньж чадах вэ?

• Та эдгээр хэсгээс илчлэлтийн талаар өөр юу мэдэж авсан бэ?

Оливерын туршлага Их Эзэний тантай ярьж байгааг мэдэрсэн тэр мөчийг “оюундаа санахад” хүргэж магад (Сургаал ба Гэрээ 6:22). Та эдгээр туршлагын талаарх санаа бодол эсвэл мэдрэмжүүдээ тэмдэглэж байсан уу? Хэрэв тийм бол бичсэн зүйлээ уншина уу. Хэрэв үгүй бол санаж байгаа зүйлээ бичиж авахад цаг гаргаарай. Та эдгээр туршлагаас хэрхэн үргэлжлүүлэн хүч чадал олж авахаа бодож үз. Ахлагч Нийл Л.Андэрсэны “Амьдралыг тодорхойлогч сүнслэг дурсамжууд” захиаснаас зарим нэг санааг авч болно (2020 оны 10-р сарын Ерөнхий чуулган, 18–23).

Хэд хэдэн Сүмийн удирдагч “Түүнийг сонс” видео цуглуулга дээр илчлэлийн талаарх туршлагаа хуваалцсан байдаг. Эдгээр видеоны нэг эсвэл хэд хэдийг үзсэний дараа Их Эзэн танд хандан хэрхэн ярьдаг талаарх өөрийн туршлагыг хуваалцан, тэмдэглэж авах урам зориг авч магадгүй юм.

Их Эзэн Иосеф Смитийг ирэх жилүүдэд “хүнд байдалд” орох болно гэдгийг мэдэж байсан (Сургаал ба Гэрээ 6:18). Тэр та нарын ирээдүйд ч ямар сорилтууд тохиолдохыг мэддэг. Сургаал ба Гэрээ 6:18–21, 29–37 дээрх Иосеф, Оливер хоёрт өгсөн Түүний зөвлөгөөнөөс танд Түүнд найдахад туслах юуг олж мэдсэн бэ?

“Санаа бодол болгондоо [Христ] рүү харагтун” гэдгийг та ямар утгатай гэж бодож байна вэ? (36-р шүлэг). Та сайн цаг үед мөн “хүнд нөхцөл байдалд” үүнийг хэрхэн илүү тууштай хэрэгжүүлж чадах вэ? Ерөнхийлөгч Рассэлл М.Нэлсоны дараах зөвлөгөөг авч үз. “Санаа бодол бүрдээ Түүн рүү харахын тулд оюун санаагаараа нэлээн хичээл зүтгэл гаргах ёстой байдаг. Гэхдээ ийнхүү үйлдсэн үед бидний эргэлзээ, айдас арилдаг юм” (“Есүс Христийн хүчийг амьдралдаа татан авах нь,” 2017 оны 4-р сарын Ерөнхий чуулган, 26).

Мөн Нийл Л.Андэрсэны “Миний оюун Есүс Христийн талаарх энэхүү бодол дээр тогтон тунгаасан” захиасыг 2023 оны 5-р сарын Лиахонагийн 91–94-р хуудаснаас үзнэ үү.

Бид яагаад заримдаа “сайныг үйлдэхээс айдаг” вэ? (33-р шүлэг). Та Сургаал ба Гэрээ 6:29–37-оос танд сайныг үйлдэх урам өгсөн юуг олсон бэ? “Тэмүүлж урагшилцгаая” (Дуулал, д. 127) зэрэг Христээс урам зориг авах тухай дууг дуул эсвэл сонс.

6, 7-р шүлэг дээр “хүсэл,” “хүслүүд” гэдэг үг хэр олон гарч байгааг анзаар. Та Бурханыг өөрийн хүслээс дээгүүр тавихын ач холбогдлын талаар эдгээр хэсгээс юу сурч мэдсэн бэ? Сургаал ба Гэрээ 7:1 дээрх “Чи юу хүсээ вэ?” хэмээсэн Их Эзэний асуултыг өөртөө тавь.

Оливер Каудеригийн зөв шударга хүслүүдийн нэг болох Иосеф Смиттэй адил орчуулах хүсэл биелсэнгүй. Та Сургаал ба Гэрээ 9:3, 7–14-ийг уншаад, зөв шударга хүсэл тань одоогоор гүйцэлдээгүй үед тус болох юуг мэдэрсэн бэ?

Мөн Сургаал ба Гэрээ 11:8-ыг үз мөн Даллин Х.Өүксийн “Дур хүсэл” захиасыг 2011 оны 4-р сарын Ерөнхий чуулган сэтгүүлээс үзнэ үү.

• Хувийн илчлэлтийн талаар Оливер Каудеригийн мэдэж авсан үнэн хүүхдүүдэд тань Ариун Сүнсийг таньж мэдэх чадвараа хөгжүүлэхэд туслах болно. Та “5-р бүлэг: Иосеф Смит, Оливер Каудери хоёр” (Сургаал ба Гэрээний түүхүүд, 22–25 эсвэл Gospel Library дээрх холбогдох бичлэг) хэсгийг ашиглан, Оливерын тухай болон түүний сурсан зүйлийн талаар тэдэнд заа. Уг түүхээс хамгийн их таалагдсан хэсгийг бие биетэйгээ хуваалц. Хуваалцаж байхдаа Их Эзэн Оливерт Бурханы дуу хоолойг хэрхэн сонсох талаар заасан зүйлсийг онцолж, Сургаал ба Гэрээ 6:23 эсвэл 9:7–9 зэрэг холбогдох шүлгүүдийг унш.

  

  3:11

  

• Таныг Сургаал ба Гэрээ 8:2 дээрх “оюун” болон “зүрх сэтгэл” гэсэн үгсийг унших үед та мөн хүүхдүүдийг толгой, цээжиндээ хүрэхэд урьж болно. Ариун Сүнс таны оюун бодол, зүрх сэтгэлд ярих нь ямар байдаг тухай туршлагаасаа хүүхдүүддээ хэлж өг. Сургаал ба Гэрээ 6:15–16, 22–23; 8:2; 9:7–9 шүлгээс “Ариун Сүнс бидэнтэй хэрхэн ярьдаг вэ?” гэсэн асуултын хариултыг олоход нь тэдэнд тусал.

• “Бүү ай, бяцхан сүрэг” (Сургаал ба Гэрээ 6:34) хэмээн Их Эзэн Иосеф, Оливер хоёрт хэлсэн. Та хүүхдүүдийг уг хэллэгийг өөртэйгөө хамт хэд хэдэн удаа давтан хэлэхэд урьж болно. Тэд мөн айж үргэсэн хонин сүрэг болж жүжиглэх дуртай байж магад. Хоньд юунаас айсан байж болох вэ? Дараа нь та болон хүүхдүүд тань Аврагчийг хоньчноор дүрсэлсэн зургийг харж (энэ тоймын арын хэсэгт нэг зураг бий), биднийг хоньчин Өөрийн хоньдыг хариулдгийн адил хэрхэн харж ханддаг талаар ярилц.

• “Зөвийг чи хий” (Хүүхдийн дууны ном, 80), “Тэмүүлж урагшилцгаая” (Дуулал, д. 127) зэрэг Христээс урам зориг авах тухай дууг дуулж эсвэл тоглуулж болно. Уг дуунд бидэнд айхгүй байхад Аврагч хэрхэн тусалдаг талаар юу зааж байна вэ?

• Сургаал ба Гэрээ 6:36-г хамтдаа уншсаны дараа, хүүхдүүдтэйгээ хамт “санаа бодол болгондоо [Есүс Христ] рүү харахад” сануулах зураг зурж болно. Зурсан зургаа нэг нэгэнтэйгээ хуваалцаж, хүүхдүүддээ зургаа байрлуулах байнга харагдах газар бодож олоход нь тусал.