“Kaum Ob Hlis Ntuj 16–22: ‘Cia Li Los Cuag Khetos, thiab Los Ua Neeg Zoo Tag Nrho Vim Yog Los ntawm Nws.’ Maulaunais 10,” Los, Nrog Kuv Mus—Siv hauv Tsev thiab lub Koom Txoos: Phau Ntawv Maumoos 2024 (2023)
“Kaum Ob Hlis Ntuj 16–22. Maulaunais 10,” Los, Nrog Kuv Mus—Siv hauv Tsev thiab lub Koom Txoos: 2024 (2023)
Xwv Kom Nej Yuav Paub, los ntawm Gary L. Kapp
Kaum Ob Hlis Ntuj 16–22: “Cia Li Los Cuag Khetos, thiab Los Ua Neeg Zoo Tag Nrho Vim Yog Los ntawm Nws.”
Maulaunais 10
Phau Ntawv Maumoos pib thaum Nifais cog lus tias nws yuav qhia peb tias “tus Tswv txoj kev hlub tshua muaj nyob nrog txhua tus uas nws tau xaiv tseg, vim lawv txoj kev ntseeg” (1 Nifais 1:20). Phau ntawv no xaus thaum Maulaunais caw hais tias: “Nco qab tias tus Tswv tau hlub tshua noob neej npaum li cas” (Maulaunais 10:2–3). Koj tau pom tej yam twg uas yog yam ntxwv txog tus Tswv txoj kev hlub tshua hauv Phau Ntawv Maumoos? Tej zaum koj yuav xav txog Vajtswv txoj kev hlub tshua thaum Nws coj Lihais hla roob moj sab qhua thiab hla cov dej hiav txwv, tej kev hlub tshua uas Nws muab rau Enos thaum Enos xav tau kev zam txim, los sis kev hlub tshua Nws muab rau Amas, lub Koom Txoos ib tug yeeb ncuab uas tau los ua ib tug uas tsis muaj kev ntshai tiv thaiv lub Koom Txoos. Los sis koj yuav xav txog kev hlub tshua ntawm tus Cawm Seej uas sawv rov los rau cov neeg thaum Nws kho lawv cov neeg mob thiab foom koob hmoov rau lawv cov me nyuam yaus. Tej zaum qhov tseem ceeb tshaj plaws yog qhov uas txhua tus yuav ua rau nej nco qab tias “tus Tswv tau hlub tshua [koj] npaum li cas,” vim ib lub hom phiaj ntawm Phau Ntawv Maumoos yog kom caw peb txhua tus txais Vajtswv txoj kev hlub tshua—kev caw uas hais nyob hauv Maulaunais tej lus xaus, “Cia li los cuag Khetos, thiab cia li los ua neeg zoo tag nrho vim yog los ntawm nws” (Maulaunais 10:32).
Tej Tswv Yim Pab Qhia hauv lub Koom Txoos thiab hauv Tsev
Kuv yuav paub qhov tseeb ntawm txhua yam los ntawm tus Vaj Ntsuj Plig Dawb Huv lub hwj chim.
Cov lus cog tseg nyob hauv Maulaunais 10:3–7 tau hloov tib neeg nyob thoob plaws lub ntiaj teb lub neej. Cov lus no tau hloov koj lub neej li cas? Thaum koj nyeem Maulaunais 10:3–7, xav seb koj puas yuav ua tib zoo nyeem zoo dua li yav tas los. Tej zaum koj yuav xav saib txhua kab lus, thiab nug koj tus kheej tej yam li no: Qhov no txhais li cas? Kuv yuav ua li cas kom ua qhov no zoo dua? Kuv puas tau muaj li no hauv kuv lub neej?
Thaum koj xav txog koj txoj kev nrhiav qhov tseeb ntawm sab ntsuj plig, tej zaum koj tej kev kawm seb lwm tus tau nrhiav tau qhov tseeb los ntawm tus Vaj Ntsuj Plig Dawb Huv lub hwj chim yuav pab. Txwj Laug Mathias Held piav txog tej yam uas muaj los rau nws thaum nws yog ib lub koom txoos tus mej zeej tshiab (saib “Nrhiav Kev Txawj Ntse Los ntawm tus Ntsuj Plig,” Liyahaunas, Tsib Hlis Ntuj 2019, 31–33). Txwj Laug David F. Evans piav txog tej yam uas muaj los rau nws thaum nws loj hlob hauv lub Koom Txoos tiam sis tseem muaj lo lus nug (saib “Qhov Tseeb ntawm Txhua Yam,” Liyahaunas, Kaum Ib Hlis Ntuj 2017, 68–70). Tej zaum koj yuav xav nyeem ob zaj lus no thiab sau tej yam uas koj kawm los ntawm nkawd txoj kev nrhiav qhov tseeb uas yuav pab koj.
Tej zaum koj yuav xav nrhiav seb Vajtswv tau qhia li cas txog qhov tseeb thaum nyeem zaj lus nyob hauv Phau Qhia txog Vaj Lug Kub, “Qhov Tseeb” (Txoj Moo Zoo cov Ntawv). Tej nqe vaj lug kub twg pab koj kawm? Tej zaum koj yuav xav xaiv ib nqe thiab qhia rau ib tug neeg uas xav kawm qhov tseeb los ntawm tus Ntsuj Plig.
Kuj saib Henry B. Eyring, “Kev Ntseeg Kom Thov ces Kev Ntseeg Kom Ua,” Liahona, Kaum Ib Hlis Ntuj 2021, 74–76; “Cia tus Ntsuj Plig Dawb Huv Coj,” Cov Nkauj Qhuas Vajtswv, zaj 58; Tej Ntsiab Lus txog Txoj Moo Zoo, “Seek Truth and Avoid Deception,” Txoj Moo Zoo cov Ntawv.
Sau ntawv txog tej yam uas tshoov koj lub siab. Txoj kev hloov siab los ntseeg Yexus Khetos txoj moo zoo txhais tias yus paub thiab coj raws li txoj moo zoo. Koj yuav ua raws li qhov koj kawm yog tias koj sau cia. Yog koj qhia, caw cov neeg koj qhia kom lawv muab lawv tej kev tshoov siab sau cia.
Vajtswv tau muab tej txiaj ntsim ntawm sab ntsuj plig rau kuv.
Muaj ntau yam uas ib tug neeg yuav “xyeej Vajtswv tej txiaj ntsim” (Maulaunais 10:8). Ib txhia neeg xyeej tias muaj tej txiaj ntsim no. Lwm tus xyeej lawv tej txiaj ntsim vim lawv tsis quav ntsej los yog lawv tsis ua dab tsi. Thaum koj nyeem Maulaunais 10:8–25, nrhiav tej lus tseeb uas yuav pab koj kawm txog koj tej txiaj ntsim ntawm sab ntsuj plig thiab siv tej ntawd kom pab Vajtswv cov me nyuam tau koob hmoov. Tej lus nug li no yuav pab tau koj: Tej txiaj ntsim ntawm sab ntsuj plig yog dab tsi? Muab tej no rau leej twg? Vim li cas thiaj muab rau peb? Peb yuav ua li cas kom txais tau? Koj puas txawj xav txog tej tus neeg uas siv tej txiaj ntsim raws li hais nyob hauv Maulaunais 10:9–16?
Kuv yuav los ua neeg zoo tag nrho dhau los ntawm Yexus Khetos txoj kev tshav ntuj.
Maulaunais txoj kev qhuab ntuas kom “los cuag Khetos” tsis yog kev kawm txog Nws los sis xav txog Nws ntau xwb. Tiam sis, cov lus no yog kev caw kom los cuag Khetos tas yus lub siab lub ntsws—hloov los ua neeg zoo li Nws. Thaum koj nyeem Maulaunais 10:30–33, cia li pom tej kab lus uas pab koj to taub tias kev los cuag Khetos txhais li cas, yuav ua li cas, thiab tej yam uas muaj los thaum ua li ntawd.
Cia li xav txog koj txoj kev kawm Phau Ntawv Maumoos xyoo no, thiab xav txog tej yam koj tau hnov thiab kawm txog Yexus Khetos. Piv txwv tias, Phau Ntawv Maumoos tau pab koj li cas kom los cuag Nws? Nws pab koj li cas kom tso siab rau Nws txoj kev tshav ntuj? Qhov uas koj tsis tau xyeej tus Cawm Seej lub hwj chim tau pab koj li cas? Tej zaum koj yuav xav qhia koj zaj lus tim khawv txog Phau Ntawv Maumoos rau ib tug neeg uas xav hnov, suav nrog cov neeg koj hlub thiab phooj ywg uas tsis paub txog phau no zaj lus.
Kuj saib “Moroni Invites All to Come unto Christ” (vidi-aus), Txoj Moo Zoo cov Ntawv.
Yog xav tau tswv yim ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hlis no.
Tej Tswv Yim Pab Qhia cov Me Nyuam
Kuv paub tau rau kuv tus kheej tias Phau Ntawv Maumoos muaj tseeb.
-
Koj yuav ua li cas pab koj cov me nyuam txais Maulaunais tej lus caw kom nug Vajtswv seb Phau Ntawv Maumoos puas muaj tseeb? Tej zaum koj yuav xav muab daim ntawv uas muaj lo lus Nyeem, Nco ntsoov, Xav txog, thiab Nug sau rau. Tej zaum koj cov me nyuam yuav xav nrhiav cov lus no nyob hauv Maulaunais 10:3–4. Peb yuav tsum nyeem, nco ntsoov, xav txog, thiab nug txog dab tsi kom txais thiab ntxiv zog rau peb zaj lus tim khawv txog Phau Ntawv Maumoos? Tej zaum koj cov me nyuam yuav xav nrhiav tej yam uas zoo ib yam los ntawm tej nqe no thiab zaj nkauj “Search, Ponder, and Pray” (Children’s Songbook, 109).
-
Koj cov me nyuam kuj saib tau cov duab nyob hauv tus txheej txheem qhia no kom qhia txog Maulaunais muab cov phiaj kub faus cia (kuj saib “Chapter 54: Kev Cog Lus ntawm Phau Ntawv Maumoos,” Cov Dab Neeg hauv Phau Ntawv Maumoos, 156). Tej zaum cov me nyuam yaus yuav xav ua yeeb yam txog Maulaunais txoj kev sau ntawv rau cov phiaj thiab muab faus cia. Nej ib leeg qhia tau ib leeg txog nej zaj lus tim khawv txog Phau Ntawv Maumoos.
Leej Txiv Saum Ntuj Ceeb Tsheej muab tej txiaj ntsim ntawm sab ntsuj plig rau kuv.
-
Tej zaum koj yuav xav sau tus lej 9 mus txog 16 rau tej daim ntawv thiab qhwv txhua daim ntawv ib yam li ib qhov khoom plig kom qhia koj cov me nyuam txog tej txiaj ntsim ntawm sab ntsuj plig. Tej zaum koj cov me nyuam yuav xav qhib cov khoom plig, nyeem nqe los ntawm Maulaunais 10:9–16 raws li txhua tus lej uas tau sau, thiab kawm txog txhua lub txiaj ntsim ntawm sab ntsuj plig. Tej zaum koj yuav xav hais txog qhov uas Leej Txiv Saum Ntuj Ceeb Tsheej xav kom peb siv tej txiaj ntsim no kom foom koob hmoov rau Nws cov me nyuam. Tej zaum koj yuav xav pab koj cov me nyuam pom tej txiaj ntsim uas Leej Txiv Saum Ntuj Ceeb Tsheej tau pub rau lawv.
Yexus Khetos xav kom kuv los cuag Nws.
-
Koj cov me nyuam puas paub tias “los cuag Khetos” txhais li cas? Tej zaum koj yuav xav nyeem Maulaunais 10:32 thiab caw kom lawv hais lo lus ntawd nrog koj. Ces cia lawv qi muag thaum koj muab Yexus daim duab cia hauv chav uas nej nyob. Ces cia lawv qhib qhov muag, nrhiav daim duab, sib sau ua ke nyob ib ncig, thiab sib tham txog tej yam peb ua tau kom los cuag Khetos. Tej zaum yog koj sau lo lus nug Los cuag Khetos txhais li cas? yuav pab. Pab lawv nrhiav hauv Maulaunais 10:32–33 seb puas muaj lus teb (kuj saib Tej Nqe Kev Ntseeg 1:3–4). Ua hauj lwm ua ke kom sau ntawv seb Khetos xav kom peb ua li cas thiab Nws cog lus tias Nws yuav ua li cas rau peb.
-
Tej zaum koj cov me nyuam yuav nyiam kos duab rau ib daim ntawv zoo li lub plawv uas hais “Kuv hlub Vajtswv kawg kuv lub siab thiab lub dag lub zog” (saib Maulaunais 10:32). Thaum lawv ua li ntawd, nrog lawv sib tham txog qhov uas peb ua li cas kom Vajtswv paub tias peb hlub Nws.
Yog xav tau tswv yim ntxiv, saib phau xov xwm Phooj Ywg rau lub hlis no.
Ua ntej nws muab cov phiaj kub faus cia, Maulaunais caw peb “nco qab tias tus Tswv tau hlub tshua noob neej npaum li cas” (Maulaunais 10:3).