“Kaum Ob Hlis Ntuj 2–8: ‘Kom Ceev Tau Lawv Taug txoj Kev Yog.’ Maulaunais 1–6,” Los, Nrog Kuv Mus—Siv hauv Tsev thiab lub Koom Txoos: Phau Ntawv Maumoos 2024 (2023)
“Kaum Ob Hlis Ntuj 2–8. Maulaunais 1–6,” Los, Nrog Kuv Mus—Siv hauv Tsev thiab lub Koom Txoos: 2024 (2023)
Minerva Teichert (1888–1976), Amas Muab Neeg Ua Kev Cai Raus Dej hauv cov Dej Maumoos, 1949–1951, pleev roj rau pob zeb, 35 7/8 × 48 yas tes. Brigham Young University Qhov Chaw Saib Duab, 1969.
Kaum Ob Hlis Ntuj 2–8: “Kom Ceev Tau Lawv Taug txoj Kev Yog”
Maulaunais 1–6
Tom qab nws sau nws txiv cov ceev xwm txheej txog cov Neeg Nifais tas lawm thiab sau ntsiab lus txog cov Neeg Yales cov ceev xwm txheej, Maulaunais xav tias nws twb ua nws hauj lwm tas lawm (saib Maulaunais 1:1). Muaj dab tsi ntxiv uas nws yuav tsum tau hais txog ob haiv neeg uas raug puas tsuaj tas lawm? Tiam sis Maulaunais tau pom peb lub caij nyoog (saib Maumoos 8:35), thiab nws tau txais kev tshoov siab “sau ob peb yam ntxiv, [vim] tej zaum tej uas kuv sau no yuav muaj nuj nqis … nyob rau lub caij yav tom ntej” (Maulaunais 1:4). Nws paub tias tib neeg yuav tso qhov tseeb tseg tag nrho, yuav ua rau tib neeg tsis paub meej txog cov kab ke pov thawj hwj thiab kev teev ntuj. Tej zaum yog vim li no nws tau qhia meej txog lub cim nco txog, kev cai raus dej, kev muab lub txiaj ntsim Vaj Ntsuj Plig Dawb Huv rau neeg, thiab cov koob hmoov uas los tau cov ntseeg koom ua ke kom “ceev tau [peb] taug txoj kev yog, … cia siab ntsoov rau Khetos tej kev ua zoo xwb, tus uas yog lub hauv paus ntawm [peb] txoj kev ntseeg thiab tus ua kom [peb] txoj kev ntseeg tiav” (Maulaunais 6:4). Tej lub tswv yim zoo li no pab peb ua tus Tswv tsaug vim Nws ceev Maulaunais txoj sia nws thiaj li tau “sau ob peb yam ntxiv” (Maulaunais 1:4).
Tej Tswv Yim Pab Qhia hauv Tsev thiab lub Koom Txoos
Kuv muaj peev xwm coj raws li Yexus Khetos txawm kuv raug kev tawm tsam los.
Thaum koj nyeem Maulaunais 1, koj puas txais kev tshoov siab txog Maulaunais txoj kev rau siab ntseeg tus Tswv thiab qhov uas Vajtswv tau hu nws? Muaj tej yam twg uas ib tug neeg ua tau kom “xyeej Khetos”? (Maulaunais 1:2–3). Xav seb koj yuav ua li cas kom rau siab ntseeg Yexus Khetos, tsis hais thaum koj raug kev sim siab thiab muaj neeg tawm tsam koj.
Yuav tsum ua cov kab ke pov thawj hwj raws li tus Tswv txib ua.
Thaum Maulaunais sau cov tshooj no, nws tseem khiav kom dim cov neeg uas xav muab nws tua. Yog vim li cas nws xav sau txog tej yam xws li kev qhia kom paub ua cov kab ke li cas? Xav txog qhov no thaum koj nyeem Maulaunais 2–6. Koj xav tias yog vim li cas tej yam no tseem ceeb rau tus Tswv? Nyob no los muaj tej lus nug uas tej zaum pab tau koj kawm:
-
Kev pom zoo (Maulaunais 2; 6:4).Tus Cawm Seej tej lus qhia nyob hauv Maulaunais 2:2 qhia dab tsi rau koj txog txoj kab ke pom zoo? Koj yuav hais dab tsi kom piav tias “tus Vaj Ntsuj Plig Dawb Huv lub hwj chim tau los tshoov lawv lub siab thiab ntxuav lawv lawm” txhais li cas? (Maulaunais 6:4).
-
Kev tsa rau lub pov thawj hwj (Maulaunais 3).Koj kawm dab tsi hauv tshooj no uas yuav pab ib tug neeg npaj siab txais lub pov thawj hwj? Koj kawm dab tsi uas yuav pab ib tug ua kab ke tsa?
-
Lub cim nco txog (Maulaunais 4–5; 6:6).Koj yuav ua li cas kom kev txais lub cim nco txog yog qhov zoo tshaj plaws rau koj sab ntsuj plig txhua lub lim tiam?
-
Kev cai raus dej (Maulaunais 6:1–3).Koj ua dab tsi kom ua neeg tsim nyog ua kev cai raus dej txhua lub sij hawm?
Yexus tau qhia tias yuav tsum ua cov kab ke li cas.
Raws li koj tau kawm, koj yuav hloov koj tej kev xav, tej yam koj ua, los sis kev npaj lwm tus thaum yuav ua cov kab ke no?
Kuj saib Lus Qhuab Qhia thiab Kev Khi Lus 84:20.
Ua yeeb yam. Ib qhov zoo uas pab koj nco qab txog tej yam uas koj tau kawm yog qhia tej yam koj kawm rau lwm tus. Piv txwv tias, sim ua yeeb yam txog tej xwm txheej li no: Ib tug phooj ywg tsis paub yog nws xav ua kev cai raus dej los tsis ua. Koj yuav siv Maulaunais 6 li cas kom pab nws?
Kev txais lub cim nco txog pab kuv los cuag Khetos.
Tej zaum koj tau hnov ob zaj lus thov Vajtswv foom koob hmoov rau lub cim nco txog ntau zaus, tiam sis koj puas xav txog seb cov lus txhais li cas? Tej zaum koj yuav xav sau ob zaj lus thov Vajtswv foom koob hmoov rau lub cim nco txog los ntawm lub cim xeeb xwb. Ces koj muab tej yam koj sau piv rau Maulaunais 4:3 thiab 5:2. Koj puas kawm dab tsi txog ob zaj lus thov no uas koj tsis tau kawm dua?
Tej zaum koj yuav xav siv lub cim nco txog tej zaj nkauj, xws li “Nco tus Raug Ntsia Saum Ntoo Khaub Lig” (Cov Nkauj Qhuas Vajtswv, zaj 79).
Yexus Khetos cov thwj tim ib leeg saib xyuas ib leeg.
Nyob ntawm peb yog tias peb xaiv los ua raws li Khetos, tiam sis cov uas ntseeg pab tau peb “taug txoj kev yog” (Maulaunais 6:4–5). Cov mej zeej ntawm lub Koom Txoos hauv Maulaunais caij nyoog tau ua dab tsi kom ib leeg pab ib leeg muaj zog? Thaum koj nyeem Maulaunais 6:4–9, cia li xav txog cov koob hmoov uas los rau koj vim “yuav suav [koj] nrog cov neeg ntawm Khetos lub koom txoos” (Maulaunais 6:4).
Tej zaum koj yuav xav txog tib neeg uas nyob hauv koj pawg ntseeg los sis ceg ntseeg. Puas muaj leej twg uas tej zaum xav tau koj txoj kev hlub—tej zaum ib tug uas tuaj tshiab los sis nyuam qhuav rov qab los? Koj yuav ua li cas kom pab lawv lub sij hawm zoo thaum nyob hauv lub koom txoos zoo li tej yam uas Maulaunais piav? (Yog xav tau tswv yim, saib My Covenant Path los sis qhov vidi-aus “Strengthening New Members” nyob hauv Txoj Moo Zoo cov Ntawv). Koj nrhiav tau tswv yim nyob hauv kem ib ntawm Thawj Tswj Hwm Dallin H. Oaks zaj lus “The Need for a Church” (Liyahaunas, Kaum Ib Hlis Ntuj. 2021, 24–25).
Thaum koj xav txog seb “Vajtswv txoj lus zoo tau tu” txhais li cas (Maulaunais 6:4), tej zaum yuav pab yog tias koj xav txog qhov uas yuav tsum pab tu ib lub noob los sis ib tug me nyuam mos liab kom loj hlob li cas—thiab yuav ua li cas yog tsis tu kom loj hlob. Nrhiav tej tswv yim txog tej yam uas koj pab “tu” tau lwm tus sab ntsuj plig nyob hauv Maulaunais 6:4–9. Lwm tus thwj tim tau ua li cas kom pab tu koj?
Neeg coob tsis paub vim li cas yuav tsum “suav [koj] nrog cov neeg ntawm Khetos lub koom txoos” thiab vim li cas “tau sib ntsib ua ke tsis tu ncua” hauv lub koom txoos tej kev sib ntsib. Koj yuav piav li cas txog qhov uas vim li cas koj zoo siab ua ib tus mej zeej hauv Yexus Khetos lub Koom Txoos? (saib lwm nqe ntawm Thwj Tswj Hwm Oaks zaj lus “Yuav Tsum Muaj Ib lub Koom Txoos”).
Yog xav tau tswv yim ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hlis no.
Tej Tswv Yim Pab Qhia cov Me Nyuam
Tus Vaj Ntsuj Plig Dawb Huv yog ib lub txiaj ntsim dawb huv.
-
Nyob hauv Maulaunais 2–6 tau hais ntau zaus txog tus Vaj Ntsuj Plig Dawb Huv los sis tus Ntsuj Plig. Tej zaum koj yuav xav nug koj cov me nyuam kom nrhiav txhua nqe uas hais txog Nws, nyeem tej nqe ntawd, thiab sau tej yam uas lawv tau kawm txog tus Vaj Ntsuj Plig Dawb Huv. Tej zaum koj yuav xav kom ib leeg qhia ib leeg txog tej lub sij hawm thaum nej tau hnov tus Ntsuj Plig tej kev tshoov siab.
Kuv txais lub cim nco txog kom qhia tias kuv yuav nco ntsoov Yexus Khetos.
-
Tej zaum yog nej nyeem tej zaj lus thov Vajtswv foom koob hmoov rau lub cim nco txog ua ke ces yuav pab nej sib tham txog qhov uas nej yuav ua li cas kom saib lub cim nco txog rau nqi ntxiv. Tej zaum yuav pab yog tias lawv xav seb yuav zoo li cas yog ib tug phooj ywg tuaj thawj zaug rau txoj kev sib ntsib txais lub cim nco txog. Peb yuav qhia rau peb tus phooj ywg li cas tias txoj kev sib ntsib txais lub cim nco txog yog dab tsi thiab vim li cas yog ib qho tseem ceeb rau peb? Txhawb nqa lawv kom lawv sib dab tsi los ntawmMaulaunais 4 los sis 5 nyob hauv lawv tej yam piav. Cov me nyuam yaus siv tau phab ntawv ntxim ua rau lub lim tiam no los sis Phau Muaj Duab txog Txoj Moo Zoo, naj npawb 108.
-
Xav seb puas hu ib zaj nkauj uas yuav pab koj cov me nyuam xav txog tus Cawm Seej (xws li “Reverently, Quietly,” Children’s Songbook, 26). Tej zaum koj yuav xav xyaum tswm seeb zaum thiab txais lub cim nco txog.
Kuv muaj peev xwm npaj ua kev cai raus dej.
-
Leej twg ua tau kev cai raus dej? Pab koj cov me nyuam nrhiav tej lus teb qhov no nyob hauv Maulaunais 6:1–3. Qhov uas yus muaj “ib lub siab mob thiab lub siab xav ua zoo” txhais li cas? (Maulaunais 6:2). Qhov no ua li cas pab peb npaj ua kev cai raus dej? Xav seb puas qhia koj cov me nyuam seb koj ua li cas npaj ua kev cai raus dej.
Peb mus rau lub koom txoos kom txais lub cim nco txog thiab ib leeg txhawb nqa ib leeg.
-
Koj cov me nyuam puas paub vim li cas koj nyiam mus rau lub koom txoos? Thaum koj nyeem Maulaunais 6:4–6, 9 pab tau koj muaj lub sij hawm sib tham ua ke txog tej yam uas peb ua tom lub koom txoos. Tej zaum lawv kos tau ib co duab txog lawv tus kheej ua tej no (xws li thov Vajtswv, qhia, hu nkauj, thiab txais lub cim nco txog.
-
Tom qab nyeem Maulaunais 6:4 ua ke, koj thiab koj cov me nyuam kuj saib tau ib co duab los sis piv txwv txog tej zaub mov uas ua rau yus muaj zog thiab muab piv rau kev tu peb lub cev zoo li “Vajtswv txoj lus zoo tau tu.” Tej zaum koj yuav xav saib qhov vidi-aus “Children Sharing the Gospel” (Txoj Moo Zoo cov Ntawv).
Yog xav tau tswv yim ntxiv, saib phau xov xwm Phooj Ywg rau lub hlis no.
Maulaunais Nyob hauv lub Qhov Tsua, los ntawm Jorge Cocco