“Kaum Ib Hlis Ntuj 25–Kaum Ob Hlis Ntuj 1: ‘Yuav Muaj Raws Li Txhua Yam Los ntawm Kev Ntseeg.’ Ethaws 12–15,” Los, Nrog Kuv Mus—Siv hauv Tsev thiab lub Koom Txoos: Phau Ntawv Maumoos 2024 (2023)
“Kaum Ib Hlis Ntuj 25–Kaum Ob Hlis Ntuj 1. Ethaws 12–15,” Los, Nrog Kuv Mus—Siv hauv Tsev thiab lub Koom Txoos: 2024 (2023)
Ethaws Nkag hauv lub Qhov Tsua, los ntawm Gary Ernest Smith
Kaum Ib Hlis Ntuj 25–Kaum Ob Hlis Ntuj 1: “Yuav Muaj Raws Li Txhua Yam Los ntawm Kev Ntseeg.”
Ethaws 12–15
Ethaws cov lus qhia tej yuav muaj raws li yav tom ntej yeej “tseem ceeb thiab zoo kawg nkaus” rau cov Neeg Yales (Ethaws 12:5). Nws “qhia rau lawv tseeb txog txhua yam, txij thaum chiv keeb los” (Ethaws 13:2). Nws pom “Khetos lub caij” thiab lub Yeluxalees Tshiab hauv hnub nyoog kawg (Ethaws 13:4). Thiab nws hais txog “kev cia siab rau ib lub ntiaj teb uas zoo dua, muaj tseeb tiag, twb yog ib qho chaw nyob ntawm Vajtswv sab tes xis” (Ethaws 12:4). Tiam sis cov Neeg Yales tau xyeej nws tej lus, vim lawv zoo ib yam li cov neeg uas pheej xyeej Vajtswv cov tub qhe tej lus qhia niaj hnub no—yog “vim lawv tsis pom” (Ethaws 12:5). Peb yuav tsum ntseeg tej lus cog tseg los sis tej lus ceeb toom txog tej yam uas peb tsis pom, ib yam li Ethaws yuav tsum muaj kev ntseeg hais txog “tej yam tseem ceeb thiab zoo kawg nkaus” uas yuav muaj los yav tom ntej rau ib co neeg uas tsis ntseeg. Maulaunais yuav tsum ntseeg tus Tswv hais tias Nws yuav pab muab Maulaunais txoj kev “tsis tshua txawj sau ntawv” hloov los ua ib yam uas nws muaj zog (saib Ethaws 12:23–27). Kev ntseeg li no ua rau peb “ruaj thiab khov kho, ua tej yam uas zoo tas mus li, uas coj lawv mus qhuas Vajtswv” (Ethaws 12:4). Thiab los ntawm kev ntseeg li no ces “yuav muaj raws li txhua yam los” (Ethaws 12:3).
Tej Tswv Yim Pab Qhia hauv Tsev thiab lub Koom Txoos
Kev ntseeg Yexus Khetos yuav ua rau peb txais tau tej txuj ci tseem ceeb heev.
Niaj hnub no, los zoo ib yam nyob hauv Ethaws lub caij nyoog thiab, tib neeg xav pom puav pheej ua ntej lawv yuav ntseeg Vajtswv thiab Nws lub hwj chim. Koj kawm tau dab tsi los ntawm Ethaws 12:5–6 txog lub tswv yim no?
Thaum koj nyeem Ethaws 12, tej zaum koj yuav xav sau lub cim rau txhua los lus “kev ntseeg.” Cia li xav seb txhua zaj ntawd qhia li cas txog kev ntseeg. Tej lus nug li no yuav pab tau koj: Kev ntseeg yog dab tsi? Kev muab siab rau ntseeg txhais li cas? Yuav muaj dab tsi los vim yus ntseeg Yexus Khetos? Tej zaum koj kuj yuav xav sau ntawv txog koj tej kev xav txog tej lus tim khawv uas koj txais tau “txog thaum twb sim [koj] txoj kev ntseeg lawm” (Ethaws 12:6).
Kuj saib Russell M. Nelson, “Khetos Sawv Rov Los Lawm; Kev Ntseeg Nws Yuav Muab cov Roob Txav Tau,” Liyahaunas, Tsib Hlis Ntuj 2021, 101–4.
Cia lwm tus hais, thiab tej lub sij hawm qhia. Tib neeg kawm zoo tshaj thaum lawv muaj tej lub sij hawm hais txog tej yam uas lawv tau kawm los sis qhia lwm cov raws li tus txheej txheem. Txawm nyob hauv tsev los sis tom lub koom txoos, cia li cia tej tug, cov tub hluas ntxhais hluas thiab, qhia ib feem ntawm zaj lus qhia.
Yexus Khetos ua rau peb muaj “kev cia siab zoo dua.”
Ntxiv rau tej lus qhia tseem ceeb txog kev ntseeg, Ethaws 12 kuj hais ntau yam txog kev cia siab. Cia tej lus nug no coj koj txoj kev kawm vaj lug kub.
-
Vim li cas Ethaws muaj kev “cia siab rau ib lub ntiaj teb uas zoo dua”? (saib Ethaws 12:2–5).
-
Lub hom phiaj ntawm qhov uas txheem yog dab tsi? Kev cia siab ua dab tsi rau koj tus ntsuj plig ib yam li qhov uas txheem ua dab tsi rau ib lub nkoj? (saib Ethaws 12:4).
-
Peb yuav tsum cia siab rau dab tsi? Saib Ethaws 12:4; Maulaunais 7:41.
-
Yexus Khetos txoj moo zoo ua li cas muab koj “kev cia siab zoo dua”? (Ethaws 12:32).
Kuj saib Maulaunais 7:40–41; Jeffrey R. Holland, “Ib txoj Kev Cia Siab uas Ci Kawg Nkaus,” Liyahaunas, Tsib Hlis Ntuj 2020, 81–84.
Yexus Khetos muaj peev xwm muab kuv tej kev qaug zog hloov kom muaj zog.
Thaum peb nyeem Maulaunais tej lus, yeej yooj yim rau peb nco qab tias nws txhawj txog nws txoj kev “tsis txawj sau ntawv” thiab ntshai hais tias neeg yuav thuam nws tej lus (saib Ethaws 12:23–25). Yog tias tau muaj ib lub sij hawm thaum koj txhawj xeeb txog koj tej kev qaug zog, nyeem txog Maulaunais tej kev nyuaj siab—thiab tus Cawm Seej tej lus teb—nyob hauv Ethaws 12:23–29. Tej zaum koj yuav xav txog tej lub sij hawm thaum Yexus Khetos tau pab koj paub txog koj tej kev qaug zog thiab pab koj muaj zog—txawm yog Nws tsis muab tej ntawd tshem tawm. Cia li xav txog tej kev qaug zog uas koj muaj tam sim no. Koj yuav tsum ua dab tsi thiaj li txais taus tus Cawm Seej txoj kev cog lus “yuav ua kom tej uas qaug zog los ua tej uas muaj zog”? (Ethaws 12:27).
Cia li xav seb puas nrhiav tej nqe nram qab uas qhia txog lwm tus hauv vaj lug kub uas los muaj zog los ntawm Yexus Khetos txoj kev tshav ntuj:
-
Enauj (Mauxes 6:31–34; 7:13)
-
Mauxes (Khiav Dim 4:10–12; 14:31)
-
Nkide-oos (Cov Thawj Tswj 6:12–16; 8:22–23)
-
Petus (Lukas 5:8–10; 22:55–62; Tes Hauj Lwm 4:13–21)
-
Maulaunais (Ethaws 12:23–29)
-
Joseph Smith (Joseph Smith—Keeb Kwm 1:28; Lus Qhuab Qhia thiab Kev Khi Lus 35:17; 135:3)
Kuj saib Txoj Moo Zoo tej Ntsiab Lus, “Grace,” Txoj Moo Zoo cov Ntawv; “Tus Tswv Yog Qhov Kaj,” Cov Nkauj Qhuas Vajtswv, zaj 31.
Kev xyeej tus Tswv cov yaj saub yuav ua rau peb raug kev ntshai ntawm sab ntsuj plig.
Tus uas ua vaj ntxwv rau cov Neeg Yales yeej yog ib tug uas raug xwm txheej ntau. Qhov no yeej muaj tseeb rau Khauli-athumaws, vim “neeg muaj zog [ntau] … nrhiav kev ua kom nws puas tsuaj” (Ethaws 13:15–16). Nyob hauv Ethaws 13:15–22, cia li saib hais tias Khauli-athumaws tau ua dab tsi kom pov hwm nws tus kheej thiab tus yaj saub Ethaws ntuas nws kom ua dab tsi. Thaum koj nyeem phau ntawv Ethaws tiav lawm, cia li xav txog tej uas yus raug thaum yus xyeej cov yaj saub tej lus. Tib neeg raug dab tsi thaum “tus Tswv tus Ntsuj Plig twb tsum tsis nrog lawv nyob lawm” (Ethaws 15:19). Tus Tswv xav kom koj kawm dab tsi los ntawm tej zaj no? Cia li xav seb koj yuav ua li cas thiaj ua raws li Nws cov yaj saub.
Yog xav tau tswv yim ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hlis no.
Tej Tswv Yim Pab Qhia cov Me Nyuam
Kev ntseeg yog thaum peb ntseeg tej yam uas peb tsis pom.
-
Xav seb koj puas pab koj cov me nyuam hais cov lus “Kev ntseeg yog tej yam uas cia siab rau tiam sis tsis pom” los ntawm Ether 12:6. Tej zaum lawv yuav nyiam saib cov duab uas qhia txog cov neeg uas muaj kev ntseeg nyob hauv Ethaws 12:13–15, 19–21 (saib Phau Muaj Duab txog Txoj Moo Zoo, naj npawb 78, 85, thiab phab ntawv ntxim ua rau lub lim tiam no). Cia koj cov me nyuam qhia tej yam uas lawv paub txog hauv txhua zaj dab neeg. Nov yog tej lus nug uas pab tau koj qhia txog tej piv txwv uas hais txog kev ntseeg:
-
Cov tib neeg no cia siab rau dab tsi?
-
Lawv raug kev sim siab li cas?
-
Lawv tau raug dab tsi vim lawv muaj kev ntseeg?
Koj kuj qhia tau txog tej lub sij hawm thaum koj muab siab rau ntseeg.
-
Kev cia siab yeej zoo li qhov uas txheem rau kuv tus ntsuj plig.
-
Kom to taub txog thaum Ethaws 12:4 qhia txog kev cia siab, koj thiab koj cov me nyuam kuj saib ib daim duab txog ib lub nkoj thiab qhov uas txheem. Vim li cas yuav tsum muaj ib qho uas txheem lub nkoj? Yuav ua li cas rau lub nkoj yog tias lub nkoj tsis muaj dab tsi txheem? Thaum koj nyeem Ethaws 12:4 ua ke, cia li sib tham txog qhov uas txoj kev cia siab yuav pab peb ib yam li qhov uas txheem pab lub nkoj. Caw koj cov me nyuam kos duab txog ib lub nkoj thiab qhov uas txheem kom lawv thiaj li qhia tau lwm tus txog txoj kev cia siab.
-
Yog koj cov me nyuam xav paub lub ntsiab ntawm lo lus kev cia siab, pab lawv nrhiav nyob hauv Phau Qhia txog Vaj Lug Kub, “Cia Siab” (Txoj Moo Zoo cov Ntawv). Los ntawm lub ntsiab no thiab Ethaws 12:4, 32, peb yuav tsum cia siab rau dab tsi? (kuj saib Maulaunais 7:40–42). Pab koj cov me nyuam xav txog tej lo lus uas zoo ib yam li lo lus kev cia siab, thiab tej lo lus uas tsis zoo li kev cia siab. Tej zaum koj yuav xav kom sawv daws sib qhia txog tej yam tseeb ntawm txoj moo zoo uas ua rau nej muaj kev cia siab.
Yexus Khetos muaj peev xwm pab tau kuv sab ntsuj plig muaj zog.
-
Tej lub sij hawm cov me nyuam raug tej teeb meem uas ua rau lawv qaug zog thiab pab tsis tau lawv tus kheej. Pab koj cov me nyuam to taub vim li cas Maulaunais xav li no nyob hauv Ether 12:23–25, thiab nug lawv seb puas muaj tej lub sij hawm thaum lawv tau xav li no thiab. Ces caw lawv nyeem nqe 26–27 kom saib seb tus Tswv pab Maulaunais li cas.
-
Tej zaum koj cov me nyuam kos tau ib daim duab txog tej yam uas qaug zog thiab tej yam uas muaj zog. Ces lawv sau tau ib cov lus rau lawv daim duab uas los ntawm Ethaws 12:23–29 uas qhia lawv txog qhov uas tus Cawm Seej yuav ua li cas kom pab peb tej kev qaug zog hloov kom muaj zog. Cia li yaum koj cov me nyuam xav txog ib yam qaug zog uas lawv muaj thiab nrhiav tus Cawm Seej txoj kev pab kom los muaj zog. Tej zaum koj kuj yuav xav qhia txog ib lub sij hawm thaum tus Cawm Seej tau pab koj los muaj zog ua ib yam dab tsi uas nyuaj.
Yog xav tau tswv yim ntxiv, saib phau xov xwm Phooj Ywg rau lub hlis no.
Ethaws tej Kev Qhia tej Yuav Muaj Los Yav Tom Ntej Yeej Zoo Kawg Nkaus, los ntawm Walter Rane