Ethaws 6–11

Tej zaum koj yuav txais tswv yim ntawm sab ntsuj plig yog koj muab cov Neeg Yales txoj kev hla dej hiav txwv piv rau koj txoj kev ua neej hauv ntiaj teb no. Piv txwv hais tias, tus Tswv tau npaj dab tsi kom ci ntsa iab rau koj zoo li cov pob zeb hauv cov Neeg Yales cov nkoj? Cov nkoj piv txog dab tsi, los sis cov cua uas “tshuab mus rau tim thaj av uas cog lus cia”? (Ethaws 6:8). Koj kawm dab tsi los ntawm tej yam cov Neeg Yales ua thaum lub sij hawm ua ntej, thaum tab tom mus, thiab tom qab ntawd? Tus Tswv coj koj li cas mus rau koj thaj av uas cog lus tseg?

Txawm yog muaj kev muab hlob thiab kev phem nyob hauv cov Neeg Yales zaj keeb kwm, kuj muaj cov neeg uas coj yam ntxwv txo hwj chim nyob hauv tej tshoov no—qhov tseem ceeb nyob hauv Ethaws 6:5–18, 30; 9:28–35; thiab 10:1–2. Qhov uas koj xav txog tej lus nug no yuav pab koj kawm los ntawm lawv tus yam ntxwv no: Vim li cas cov Neeg Yales tau txo lawv lub hwj chim thaum muaj xwm txheej no? Lawv tau txo hwj chim li cas? Vajtswv tau ua li cas kom foom koob hmoov rau lawv vim lawv ua li ntawd? Cia li xav seb koj txaus siab ua dab tsi kom “txo hwj chim taug kev rau tus Tswv pom” (Ethaws 6:17) thiab tsis txhob raug txhib kom txo hwj chim (saib Mauxiyas 4:11–12; Amas 32:14–18).

Kuj saib Dale G. Renlund, “Ua Ncaj, Hlub Tshua, thiab Txo Hwj Chim rau Vajtswv,” Liyahaunas, Kaum Ib Hlis Ntuj 2020, 109–12.

Tshooj 7–11 ntawm phau Ethaws hais txog 28 tiam neeg. Vim tsis muaj chaw sau ntau yam txog cov neeg no, peb yeej pom tau ib tug yam ntxwv txog cov thawj coj ncaj ncees thiab cov thawj coj phem. Koj kawm tau dab tsi txog kev ua ib tug thawj coj—kev phem thiab kev zoo—los ntawm cov vaj ntxwv tom qab no?

• Aulaihas—Ethaws 6:30; 7:1

• Sulas—Ethaws 7:23–27

• Yales—Ethaws 8:1–7, 11–15

• Emaws thiab Khauli-atoos—Ethaws 9:21–23

• Hethes—Ethaws 9:26–30

• Ses—Ethaws 10:1–2

• Lilakis—Ethaws 10:5–8

• Mauli-atoos—Ethaws 10:9–11

• Lis—Ethaws 10:19–28

• Eethas—Ethaws 11:11–13

• Yexus Khetos—Mathais 18:1–4; 20:20–28; 23:11

Txwj Laug Dieter F. Uchtdorf tau qhia tej yam uas pab tau txog kev ua ib tug thawj coj nyob hauv nws zaj lus “Leej Twg Xav Ua tus Hlob” (Liyahaunas, Tsib Hlis Ntuj 2017, 78–81). Xav seb puas kawm zaj lus no—qhov tseem ceeb cov dab neeg uas nws qhia—nrhiav tej ntsiab cai los sis yam ntxwv ua ib tug thawj coj zoo li Khetos. Thaum twg koj tau pom tej ntsiab cai los sis yam ntxwv li no nyob hauv cov tib neeg uas ua thawj coj?

Thaum koj xav txog tej yam uas koj tau kawm no, cia li xav txog tej lub cib fim uas koj muaj kom coj lwm tus los sis pab lwm tus hauv koj lub tsev, koj zej zog, lub Koom Txoos, thiab li ntawd. Koj yuav ua li cas hloov kom muaj tej tus cwj pwm ua ib tug thawj coj zoo li Khetos txawm koj tsis tau ua ib tug thawj coj los xij?

Kuj saib Txoj Moo Zoo tej Ntsiab Lus, “Serving in Church Callings,” Txoj Moo Zoo cov Ntawv; “Principles of Leadership in the Church,” General Handbook: Serving in The Church of Jesus Christ of Latter-day Saints, 4.2 (ChurchofJesusChrist.org).

Thaum cov neeg koom tes nyiag ua kom tsis muaj leej twg paub lawv ua phem, ces lawv tuav hauv ntsiag to. Ntxiv rau tej kev tuav hauv ntsiag to uas piav txog nyob hauv Ethaws 8:7–18, muaj lwm tus yam ntxwv txog qhov no nyob hauv Hilamas 1:9–12; 2:2–11; 6:16–30; Mauxes 5:29–33. Xav seb koj puas muab tej nqe no piv rau 2 Nifais 26:22–24, thaum Nifais piav tias tus Tswv ua li cas kom ua Nws txoj hauj lwm. Koj xav tias yog vim li cas Vajtswv txib Maulaunais sau txog tej kev tuav hauv ntsiag to?

Koj tau kawm dab tsi los ntawm phau ntawv Ethaws uas pab tau koj txais cov koob hmoov uas tau qhia nyob hauv Ethaws 8:26?

• Yeej muaj tej hnub uas nyuaj rau txhua leej txhua tus—txawm cov me nyuam thiab. Tej zaum koj pab tau koj cov me nyuam nrhiav cov lus thiab tej nqe nyob hauvEthaws 6:1–12 uas qhia txog thaum cov Neeg Yales tso siab rau Vajtswv thaum muaj tej hnub uas nyuaj thiab txaus ntshai. Xav seb koj ib leeg puas qhia txog tej lub sij hawm thaum Vajtswv tau pab koj thaum muaj kev nyuaj hauv koj lub neej.

• Tom qab lawv tau los txog thaj av uas cog lus cia, cov Neeg Yales zoo siab heev ua Vajtswv tsaug lawv tau “los kua muag ntawm kev xyiv fab” (Ethaws 6:12). Tej zaum koj yuav tshoov koj cov me nyuam lub siab kom lawv ua Vajtswv tsaug rau tej koob hmoov thaum koj pab lawv nrhiav tej nqe hauv Ethaws 6:9, 12 ua qhia txog thaum cov Neeg Yales ua Vajtswv tsaug. Tej zaum lawv yuav xav hu nkauj, ib yam li cov Neeg Yales, ib zaj nkauj uas qhia txog kev ua tsaug, li “My Heavenly Father Loves Me” (Children’s Songbook, 195). Hais kom koj cov me nyuam qhia koj seb puas muaj tej yam dab tsi uas ua rau lawv zoo siab ua tsaug rau Vajtswv.

• Tej zaum koj cov me nyuam yuav xav nyeem Ethaws 6:30; 7:27; thiab 10:2 thiab nrhiav seb cov vaj ntxwv ncaj ncees nco qab txog dab tsi. Qhov no tau ua li cas kom hloov lawv txoj kev coj lawv cov neeg? Koj thiab koj cov me nyuam sib tham tau txog tej yam uas pab nej nco qab txog tej yam uas Vajtswv tau ua rau nej. Piv txwv tias, tej zaum lawv sau tau txog tej ntawd los sis kos duab. Tej zaum koj yuav xav qhia lawv kom lawv sau txhua hnub txog tej koob hmoov uas lawv pom muaj los ntawm Vajtswv (saib “O Remember, Remember” [vidi-aus], Txoj Moo Zoo cov Ntawv).

• Tej zaum koj thiab koj cov me nyuam yuav nyiam ua yeeb yam txog tej yam uas tus yaj saub tau qhia kom peb ua. Tej zaum nej yuav xav ua si twv seb tus uas ua yeeb yam ua dab tsi. Qhov no yuav pab koj cov me nyuam sib tham txog vim li cas yuav tsum ua raws li Vajtswv tus yaj saub. Ces koj nyeem tau Ethaws 7:24–27 kom nrhiav seb cov neeg raug dab tsi thaum cov neeg tau ua raws li Vajtswv tus yaj saub. Peb txais tau koob hmoov li cas thaum peb ua raws li tus yaj saub hnub no?

• Kev nrhiav tej yam ntxwv yeej yog ib txoj kev pab tau peb kawm vaj lug kub zoo. Phau ntawv Ethaws muaj ib tug yam ntxwv uas nrhiav tau ob peb zaug hauv phau ntawv uas qhia txog tus Tswv txoj kev siab hlub tshua. Kom pab tau koj cov me nyuam nrhiav tus yam ntxwv no, caw lawv nyeem Ethaws 9:28–35 thiab Ethaws 11:5–8, es nrhiav tej yam ntawm ob zaj lus ntawd uas zoo ib yam. Peb kawm dab tsi los ntawm ob zaj dab neeg no? Tej zaum lawv yuav xav saib cov duab nyob hauv Phau Muaj Duab txog Txoj Moo Zoo txog lwm tus neeg hauv vaj lug kub uas tau hloov siab lees txim thiab tau txais kev zam txim.