Kaum Ib Hlis Ntuj 4–10: “Kuv Hais Lus rau Nej Ib Yam Li Nej Nyob ntawm No.” Maumoos 7–9,” Los, Nrog Kuv Mus—Siv hauv Tsev thiab lub Koom Txoos: Phau Ntawv Maumoos 2024 (2023)
“Kaum Ib Hlis Ntuj 4–10. Maumoos 7–9,” Los, Nrog Kuv Mus—Siv hauv Tsev thiab lub Koom Txoos: 2024 (2023)
Maulaunais Sau rau cov Phiaj Kub, los ntawm Dale Kilborn
Kaum Ib Hlis Ntuj 4–10: “Kuv Hais Lus rau Nej Ib Yam Li Nej Nyob ntawm No”
Maumoos 7–9
Maulaunais paub tias qhov uas yus nyob yus ib leeg hauv ib lub ntiaj teb phem zoo li cas—nws paub tshaj tom qab nws txiv tuag thaum nws ua rog thiab cov Neeg Nifais raug puas tsuaj. Nws sau hais tias, “Kuv tib leeg nyob.” “Kuv twb tsis muaj phooj ywg thiab tsis pom qab yuav mus qhov twg” (Maumoos 8:3, 5). Tej zaum lwm tus yuav tsis muaj kev cia siab hlo li, tiam sis Maulaunais muaj kev cia siab rau Yexus Khetos thiab nws zaj lus tim khawv txog “tus Tswv tej hom phiaj uas nyob mus ib txhis yuav dov mus” (Maumoos 8:22). Thiab Maulaunais paub tias ib qho tseem ceeb ntawm tej hom phiaj uas nyob mus ib txhis ntawd yuav los ntawm Phau Ntawv Maumoos—cov ceev xwm txheej uas nws tab tom rau siab sau, cov ceev xwm txheej uas yav tom ntej yuav coj neeg coob “paub txog Khetos” (Maumoos 8:16; 9:36). Maulaunais txoj kev ntseeg tej lus cog tseg no ua rau nws txawj tshaj tawm rau cov uas yuav nyeem phau ntawv no hais tias, “Kuv hais lus rau nej ib yam li nej nyob ntawm no,” thiab “kuv paub tias nej yuav tau kuv tej lus” (Maumoos 8:35; 9:30). Tam sim no peb yeej muaj nws tej lus, thiab tus Tswv txoj hauj lwm yeej mus tom ntej, feem ntau yog vim Maumoos thiab Maulaunais ua nkawd ntiag tug hauj lwm, tsis hais thaum nkawd nyob nkawd tus kheej xwb.
Tej Tswv Yim Pab Qhia hauv Tsev thiab lub Koom Txoos
Cia li “ntseeg Yexus Khetos” thiab “tuav nkaus [Nws] txoj moo zoo.”
Tom qab nws sau ntsiab lus txog nws cov neeg tej ceev xwm txheej, Maumoos tau hais nws zaj lus kawg nyob hauv Maumoos 7. Koj xav vim li cas nws xaiv zaj lus no? “Tuav nkaus Khetos txoj moo zoo” txhais li cas rau koj? (Maumoos 7:8).
Kuj saib“Kuv Ntseeg Tswv Yexus,” Cov Nkauj Qhuas Vajtswv, no. 51.
Maumoos 7:8–10; 8:12–16; 9:31–37
Phau Ntawv Maumoos muaj nqis heev.
Thawj Tswj Hwm Russell M. Nelson tau nug hais tias: “Yog tias leej twg yuav muab ib co pov haum los sis Phau Ntawv Maumoos pub rau nej, nej yuav xaiv qhov twg? Tiag tiag, nej saib qhov twg muaj nqi ntau tshaj?” (“Phau Ntawv Maumoos: Nej lub Neej Yuav Zoo Li Cas Yog Tias Tsis Muaj?,” Liyahaunas, Kaum Ib Hlis Ntuj 2017, 61).
Koj nrhiav tau dab tsi nyob hauv Maumoos 7:8–10; 8:12–22; thiab 9:31–37 uas pab koj to taub tias vim li cas Phau Ntawv Maumoos muaj nuj nqis heev hauv peb lub caij nyoog? Vim li cas muaj nqis rau koj? Tej zaum koj yuav nrhiav tau tej lub tswv yim tshiab nyob hauv 1 Nifais 13:38–41; 2 Nifais 3:11–12; thiab Lus Qhuab Qhia thiab Kev Khi Lus 33:16; 42:12–13.
Phau Ntawv Maumoos cov yaj saub tej lus uas lawv sau cia muaj nqis rau peb.
Kuv muaj peev xwm ua raws li tej lus txib txawm hais tias lwm tus tsis ua.
Qee zaus koj yuav xav tias koj nyob koj ib leeg xwb thaum koj ua raws li tej lus txib. Koj kawm tau dab tsi los ntawm Maulaunais tus yam ntxwv uas pab tau koj? (saib Maumoos 8:1–11). Yog tias koj nug tau Maulaunais tias nws tau ua li cas kom rau siab ntseeg tsis tu tsis tseg, koj xav tias nws yuav hais li cas?
Kuj saib “All May Know the Truth: Moroni’s Promise” (vidi-aus), Txoj Moo Zoo cov Ntawv.
Phau Ntawv Maumoos yeej yog ib phau rau peb lub caij nyoog.
Yexus Khetos tau qhia Maulaunais tias yuav muaj li cas thaum Phau Ntawv Maumoos yuav tawm los (saib Maumoos 8:34–35), thiab qhov uas Maulaunais pom ua rau nws ceeb toom peb hauv peb hnub nyoog. Thaum koj nyeem Maumoos 8:26–41 thiab 9:1–30, cia li xav seb koj yuav siv nws tej lus li cas. Piv txwv tias, hauv tej nqe no Maulaunais nug 24 tej lus nug. Koj nrhiav tau dab tsi hauv cov lus nug no uas qhia koj tias Maulaunais tau pom peb lub caij nyoog? Vim li cas Phau Ntawv Maumoos yuav pab tau tej teeb meem uas Maulaunais tau pom?
Mloog tus Ntsuj Plig lus. Tsom ntsoov rau koj tej kev xav, txawm yog koj xav tias tsis yog tej kev xav txog tej yam uas koj nyeem. Tej zaum tej kev tshoov siab ntawd yog tej yam uas koj Leej Txiv Saum Ntuj Ceeb Tsheej xav kom koj kawm. Piv txwv hais tias, koj muaj tej kev tshoov siab dab tsi tom qab koj xav txog cov lus nug uas Maulaunais tau hais nyob hauv Maumoos 9:1–30?
Yexus Khetos yog ib tug Vajtswv uas ua txuj ci tseem ceeb.
Maulaunais xaus nws txiv tej lus sau nrog ib zaj lus uas muaj hwj chim rau tib neeg nyob hauv peb lub caij nyoog uas tsis ntseeg tej txuj ci tseem ceeb (saib Maumoos 8:26; 9:1, 10–11). Koj xav tias yog vim li cas yuav tsum ntseeg tej txuj ci tseem ceeb niaj hnub no? Nrhiav hauv Maumoos 9:9–11, 15–27 thiab Maulaunais 7:27–29 thiab xav txog tej lus nug no ib yam li:
-
Kuv kawm dab tsi txog tus Cawm Seej los ntawm tej nqe no?
-
Kuv kawm dab tsi txog tej txuj ci tseem ceeb, thaum ub thiab tam sim no?
-
Tej nqi zog los ntawm kev ntseeg tias Yexus Khetos yog ib tug Vajtswv uas ua txuj ci tseem ceeb yog dab tsi? Yuav raug li cas yog tias yus tsis ntseeg qhov no?
-
Tej txuj ci tseem ceeb twg—tsis hais tej loj thiab me—yog tej uas tus Cawm Seej tau ua nyob rau hauv kuv lub neej? Tej txuj ci tseem ceeb no qhia dab tsi rau kuv txog Nws?
Thawj Tswj Hwm Russell M. Nelson qhia hais tias: “Peb tus Cawm Seej thiab tus Txhiv Dim, Yexus Khetos, yuav ua Nws tej hauj lwm zoo tshaj plaws tam sim no mus rau thaum Nws yuav rov qab los.” Peb yuav pom tej txuj ci tseem ceeb uas qhia tias Vajtswv Leej Txiv thiab Nws Tib Leeg Tub, Yexus Khetos, yeej muaj yeeb koob coj kav lub Koom Txoos no.” (“Kev Tshwm Sim rau lub Koom Txoos, Kev Tshwm Sim rau Peb lub Neej,” Liyahaunas, Tsib Hlis Ntuj 2018, 96). Koj xav tias tej txuj ci tseem ceeb no yog dab tsi? Koj ua tau dab tsi kom pab tus Cawm Seej ua raws li tej lus ntawd?
Koj kawm dab tsi txog kev ntseeg thiab tej txuj ci tseem ceeb los ntawm cov Ntseeg nyob hauv Samoa, Tonga, Fiji, thiab Tahiti thaum Thawj Tswj Hwm Nelson thiab Muam Nelson mus xyuas lawv? (saib Russell M. Nelson, “Khetos Sawv Rov Los Lawm; Kev Ntseeg Nws Yuav Muab cov Roob Txav Tau,” Liyahaunas, Tsib Hlis Ntuj 2021, 101–4.
Kuj saib Ronald A. Rasband, “Saib Seb! Kuv Yog Ib tug Vajtswv Ua Txuj Ci Tseem Ceeb,” Liyahaunas, Tsib Hlis Ntuj 2021, 109–12; Txoj Moo Zoo tej Ntsiab Lus, “Miracles,” Txoj Moo Zoo cov Ntawv.
Tej Tswv Yim Pab Qhia cov Me Nyuam
Phau Ntawv Maumoos ua tim khawv txog Yexus Khetos.
-
Kom qhia txog phau Npaivnpaum thiab Phau Ntawv Maumoos, ib yam li Maulaunais tau ua, tej zaum koj yuav xav ua si li ntawm no nrog koj cov me nyuam: Thov kom lawv hais “Phau Qub, Phau Tshiab” thaum koj tuav thiab tsa phau Npaivnpaum thiab “Ib Zaj Tim Khawv Ntxiv” thaum koj tuav thiab tsa Phau Ntawv Maumoos. Tej zaum koj yuav xav xaiv ob peb lub sij hawm hauv phau Npaivnpaum thiab Phau Ntawv Maumoos—xws li thaum Yexus yug los, thaum Nws tuag, thiab sawv rov los—thiab caw koj cov me nyuam nrhiav cov duab rau tej lub sij hawm no (piv txwv tias, nyob hauv Phau Muaj Duab txog Txoj Moo Zoo).
-
Kom pab koj cov me nyuam kawm nqe kev ntseeg thib yim, tej zaum koj yuav xav sau ib lo lus rau ib daim ntawv thiab ua li ntawd rau txhua lo lus. Caw koj cov me nyuam koom ua ke pab kho cov lus kom muaj txheej txheem yog thiab rov ua ob peb zaus.
Kuv muaj peev xwm ua raws li tej lus txib txawm hais tias kuv ib leeg ua xwb.
-
Maulaunais tus yam ntxwv tshoov tau koj cov me nyuam lub siab thaum lawv ua raws li tej lus txib txawm lawv xav tias lawv ib leeg ua xwb. Tom qab koj nyeem Maumoos 8:1–7 nrog lawv, lawv kuj qhia txog tej yam uas lawv xav yog tias lawv tau yog Maulaunais. Nyob hauv nqe 1, 3, thiab 4, Vajtswv txib kom Maulaunais ua dab tsi, thiab nws mloog lus li cas? Peb yuav ua li cas kom ua neeg zoo li Maulaunais?
-
Tej zaum koj thiab koj cov me nyuam yuav xav sib tham txog tej lub sij hawm uas lawv yuav tsum xaiv qhov yog thiab tsis yog thaum tsis muaj leej twg pom. Txoj kev muab siab rau ntseeg Yexus pab peb li cas thaum muaj tej lub sij hawm li no? Ib zaj nkauj zoo li “Stand for the Right” (Children’s Songbook, 159) pab tau nej sib tham.
Yexus Khetos yog “ib tug Vajtswv uas ua txuj ci tseem ceeb.”
-
Tej zaum koj yuav xav qhia koj cov me nyuam tias ib qho txuj ci tseem ceeb yog Vajtswv cia peb pom Nws lub hwj chim thiab foom koob hmoov rau peb. Ces koj kuj nyeem tau tej nqe nyob hauv Maumoos 9:11–13, 17 uas qhia txog ib cov txuj ci tseem ceeb, thiab koj cov me nyuam xav tau txog lwm yam txuj ci tseem ceeb (cov duab los ntawm Phau Muaj Duab txog Txoj Moo Zoo, xws li naj npawb 26, 40, 41, thiab 83, kuj pab tau). Qhia txog tej txuj ci tseem ceeb uas Vajtswv tau ua nyob hauv koj lub neej.
-
Muab ib daim ntawv qhia ua khoom noj rau koj cov me nyuam pom, thiab qhia lawv yuav muaj tshwm sim li cas yog tias koj tshem tawm ib qhov khoom sib tov uas coj los ua ib yam. Nyeem Maumoos 8:24 thiab 9:20–21 ua ke kom nrhiav cov “khoom sib tov uas coj los ua ib yam” uas los ua tau tej txuj ci tseem ceeb uas los ntawm Vajtswv.
Yog xav tau tswv yim ntxiv, saib phau xov xwm Phooj Ywg rau lub hlis no.
Maulaunais Saib cov Neeg Nifais Raug Puas Tsuaj, los ntawm Joseph Brickey