“Kaum Ib Hlis Ntuj 11–17: ‘Dua daim Ntaub Thaiv ntawm Kev Tsis Ntseeg.’ Ethaws 1–5,” Los, Nrog Kuv Mus—Siv hauv Tsev thiab lub Koom Txoos: Phau Ntawv Maumoos 2024 (2023)
“Kaum Ib Hlis Ntuj 11–17. Ethaws 1–5,” Los, Nrog Kuv Mus—Siv hauv Tsev thiab lub Koom Txoos: 2024 (2023)
Cov Neeg Yales Ncaim Npanpes, los ntawm Albin Veselka
Kaum Ib Hlis Ntuj 11–17: “Dua daim Ntaub Thaiv ntawm Kev Tsis Ntseeg”
Ethaws 1–5
Vajtswv tej kev yeej siab dua li peb tej kev thiab peb yeej yuav tsum ywj rau Nws lub siab nyiam, tiam sis Nws kuj yaum peb kom xav thiab ua tej yam ntawm peb tus kheej. Nov yog ib zaj uas Yales thiab nws tus tij laug tau kawm. Piv txwv hais tias, lub tswv yim mus rau ib thaj av tshiab uas “zoo tshaj txhua thaj hauv lub ntiaj teb” los zoo li twb pib hauv Yales lub siab, thiab tus Tswv “muaj kev khuv leej” thiab tau cog lus ua raws li nws thov, hais tias, “Thiab kuv yuav ua li no rau koj vim yog koj tau thov kuv ntev npaum li no” (saib Ethaws 1:38–43). Thiab thaum Yales tus tij laug paub tias yuav tsum nrhiav kev kaj nyob hauv cov nkoj uas yuav thauj lawv mus rau thaj av uas cog lus cia, tus Tswv nug ib lo lus nug uas peb ib txwm xav nug Nws hais tias: “Koj xav kom kuv ua dab tsi?” (Ethaws 2:23). Nws xav mloog peb tej kev xav thiab peb tej lub tswv yim, thiab Nws yuav mloog thiab pom zoo los sis ntuas peb kom txhob ua li ntawd. Tej lub sij hawm tib qho uas muab peb cais ntawm cov koob hmoov uas peb xav tau yog peb “daim ntaub thaiv ntawm kev tsis ntseeg,” thiab yog peb yuav “dua daim ntaub thaiv” (Ethaws 4:15), tej zaum peb yuav xav tsis thoob txog tej uas tus Tswv txaus siab ua rau peb.
Kuj saib “The Lord Appears to the Brother of Jared” (vidi-aus), Txoj Moo Zoo cov Ntawv.
Tej Tswv Yim Pab Qhia hauv Tsev thiab lub Koom Txoos
Thaum kuv thov tus Tswv, Nws yuav muaj kev khuv leej rau kuv.
Ethaws 1:33–43 hais txog peb zag lus thov Vajtswv uas Yales tus tij laug hais. Koj kawm dab tsi los ntawm tus Tswv tej lus teb peb zag lus thov? Cia li xav txog ib lub sij hawm thaum koj tau txais tus Tswv txoj kev khuv leej rau koj thaum koj thov Nws. Tej zaum koj yuav xav sau ntawv txog tej lub sij hawm no thiab qhia rau lwm tus uas xav hnov koj zaj lus tim khawv.
Kuj saib “Secret Prayer,” Cov Nkauj Qhuas Vajtswv, no. 144.
Kuv txais tau kev tshwm sim rau kuv lub neej.
Thawj Tswj Hwm Russell M. Nelson hais tias: “Kuv taij thov kom nej sab ntsuj plig yuav haj yam muaj peev xwm txais kev tshwm sim. … Xaiv los ua tej hauj lwm ntawm sab ntsuj plig uas nej yuav tsum ua kom thiaj txais tau lub txiaj ntsim ntawm tus Ntsuj Plig Dawb Huv thiab haj yam hnov tus Ntsuj Plig lub suab kom meej zog” (“Tshwm Sim rau lub Koom Txoos, Tshwm Sim rau Peb lub Neej,” Liyahaunas, Tsib Hlis Ntuj 2018, 96).
Thaum koj kawm Ethaws 2; 3:1–6; 4:7–15, koj kawm dab tsi txog “tej hauj lwm ntawm sab ntsuj plig” uas Thawj Tswj Hwm Nelson hais txog? Tej zaum koj yuav xav siv muab ib lub xim kos rau tej lus nug los sis tej kev txhawj xeeb ntawm Yales tus tij laug thiab nws tau ua li cas, thiab siv lwm lub xim sau lub cim rau tej yam uas tus Tswv ua kom pab nws thiab qhia tias tus Tswv lub siab nyiam yog dab tsi.
Nov yog tej lus nug rau koj xav txog thaum koj kawm:
-
Koj txais kev tshoov siab twg txog tus Tswv tej lub teb Yales tus tij laug tej lus nug nyob hauv Ethaws 2:18–25?
-
Koj yuav ua li cas kom siv Ethaws 3:1–5 pab ib tug neeg uas kawm thov Vajtswv?
-
Dab tsi yuav tiv thaiv koj kom tsis txhob txais kev tshwm sim los ntawm tus Tswv? (saib Ethaws 4:8–10). Koj yuav ua li cas kom txais tau kev tshwm sim los ntawm Nws ntxiv? (saib Ethaws 4:7, 11–15).
-
Koj xav tias txoj kev “dua [daim] ntaub thaiv ntawm kev tsis ntseeg” hauv koj lub neej txhais li cas (Ethaws 4:15).
Koj kawm dab tsi ntxiv txog kev tshwm sim los ntawm Yales tus tij laug?
Txwj Laug Dale G. Renlund qhia txog “Tus Txheej Txheem Txais Kev Tshwm Sim” (Liyahaunas, Kaum Ib Hlis Ntuj 2022, 16–19). Tej zaum koj yuav xav kos duab txog plaub fab xwm yeem thiab sau plaub yam ntawm tus txheej txheem ntawd rau txhua sab. Tus txheej txheem no yuav pab koj li cas kom koj “sab ntsuj plig haj yam muaj peev xwm txais kev tshwm sim”?
Kuj saib Txoj Moo Zoo tej Ntsiab Lus, “Personal Revelation,” Txoj Moo Zoo cov Ntawv.
Los ntawm Nws txoj kev qhuab ntuas, tus Tswv caw kom kuv hloov siab lees txim thiab mus cuag Nws.
Txawm tias nws yog ib tug yaj saub, Yales tus tij laug yuav tsum txais kev qhuab ntuas los ntawm tus Tswv. Koj kawm dab tsi txog tus Tswv tej qhuab ntuas los ntawm Ethaws 2:14–15? Yales tus tij laug txoj kev teb tus Tswv lus qhuab ntuas pab npaj nws rau tej yam uas muaj los rau nws nyob hauv Ethaws 3:1–20.
Tus Tswv yuav npaj kuv hla kuv “tej dej tob heev.”
Tej lub sij hawm, qhov uas peb hla peb “tej dej tob heev” yog tib txoj kev ua raws li Vajtswv lub siab nyiam rau peb. Koj puas pom tej yam zoo li no hauv koj lub neej nyob hauv Ethaws 2:16–25? Tus Tswv tau npaj koj li cas rau koj tej teeb meem? Nws yeej xav kom koj ua dab tsi tam sim no kom npaj rau tej yam Nws xav kom koj ua thaum yav tom ntej?
Kuj saib L. Todd Budge, “Tso Siab Ruaj Nrees thiab Tsis Tseg Li,” Liyahaunas, Kaum Ib Hlis Ntuj 2019, 47–49.
Siv tej yam uas koj kawm. Kev kawm txog txoj moo zoo yuav tsum tshoov peb lub siab thiab ua rau peb xav hloov peb txoj kev ua neej. Tom qab koj nyeem Ethaws 4:11–12, tej zaum koj yuav xav sau ntawv txog seb tej kev cuam tshuam hauv koj lub neej puas yaum kom koj ua qhov zoo. Koj xav tias koj yuav tsum hloov li cas?
Cov neeg tim khawv ua tim khawv tias Phau Ntawv Maumoos muaj tseeb.
Thaum koj nyeem Maulaunais tej lus qhia tej yuav muaj los yav tom ntej nyob hauv Ethaws 5, xav txog tus Tswv lub hom phiaj thaum npaj ntau tus tim khawv txog Phau Ntawv Maumoos. Cov neeg tim khawv twg tau tshoov koj los ntseeg tias Phau Ntawv Maumoos yog Vajtswv txoj lus? Phau Ntawv Maumoos tau ua li cas qhia koj txog “Vajtswv lub hwj chim thiab Nws txoj lus”? (Ethaws 5:4).
Tej Tswv Yim Pab Qhia cov Me Nyuam
Ethaws 1:33–37; 2:16–25; 3:1–6
Leej Txiv Saum Ntuj Ceeb Tsheej hnov thiab teb kuv tej lus thov.
-
Yog koj paub ib yam lus uas koj cov me nyuam tsis paub, siv yam lus ntawd muab cov lus qhia yooj yooj yim rau lawv (los sis mloog lwm yam lus). Koj siv tau qhov no kom piav seb vim li cas Yales tus tij laug thov Vajtswv kom txais kev pab nyob hauv Ethaws 1:33–37. Piav seb tus Tswv xav li cas txog zaj lus thov Vajtswv no thiab seb Nws teb li cas (kuj saib “Chapter 50: Cov Neeg Yales Tawm Npanpes Mus,” Cov Dab Neeg Hauv Phau Ntawv Maumoos, 143–44).
-
Tej zaum koj cov me nyuam yuav xav ua yeeb yam txog kev ua ib lub nkoj thaum koj nyeem Ethaws 2:16–17. Ces koj thiab koj cov me nyuam nyeem tau txog tej teeb meem uas Yales cov neeg muaj hauv lawv lub nkoj (saib Ethaws 2:19) thiab seb tus Tswv tau ua li cas kom teb Yales tus tij laug tej lus thov (saib Ethaws 2:19–25; 3:1–6). Daim duab thiab phab ntawv ntxim ua nyob ntawm tus txheej txheem qhia no pab tau koj thiab koj cov me nyuam hais zaj dab neeg no. Peb kawm dab tsi los ntawm Yales tus tij laug txog lub hwj chim ntawm kev thov Vajtswv? Xav seb koj puas qhia txog ib lub sij hawm thaum koj thov Vajtswv thiab Leej Txiv Saum Ntuj Ceeb Tsheej pab koj.
Vajtswv tau tsim kuv raws li Nws tus yam ntxwv.
-
Thaum lawv loj hlob, koj cov me nyuam yuav hnov lus cuav hais txog Vajtswv, lawv tus kheej, thiab lawv lub cev. Tej zaum koj yuav xav hais kom lawv pab koj nrhiav cov lus tseeb txog tej yam no nyob hauv Ethaws 3:6–16. Xwv kom qhia txog qhov tseeb los ntawm Ethaws 3:13, 15, tej zaum koj yuav xav saib tus Cawm Seej daim duab ua ke thiab caw kom koj cov me nyuam taw tes rau Nws lub cev. Tej zaum lawv yuav xav taw tes rau tib qho chaw ntawm lawv lub cev. Tej zaum nej yuav xav hu ib zaj nkauj txog peb lub cev ua ke, ib yam li “The Lord Gave Me a Temple” (Children’s Songbook, 153). Tej zaum koj thiab koj cov me nyuam yuav xav sib tham seb vim li cas nej zoo siab rau nej lub cev.
Vajtswv tau tsim peb raws li Nws tus yam ntxwv
Peb tug Tim Khawv ua tim khawv txog Phau Ntawv Maumoos.
-
Maulaunais tau qhia tias Peb tug Tim Khawv yuav pab qhia tias Phau Ntawv Maumoos muaj tseeb. Xwv kom qhia tias ib zaj lus tim khawv yog dab tsi, tej zaum koj yuav xav hais kom koj cov me nyuam piav txog ib qho uas lawv tau pom tiam sis lwm tus tsis tau pom. Ces thaum nej nyeem Ethaws 5 ua ke, tej zaum nej yuav xav sib tham txog cov neeg tim khawv uas Vajtswv siv ua Nws txoj hauj lwm. Nej kuj ib leeg qhia ib leeg vim li cas nej ho paub tias Phau Ntawv Maumoos muaj tseeb thiab nej yuav ua li cas ua tim khawv txog qhov no rau lwm tus.
Yog xav tau tswv yim ntxiv, saib phau xov xwm Phooj Ywg rau lub hlis no.
Koj Puas Pom Ntau Tshaj Nov?, los ntawm Marcus Alan Vincent