“Kaum Hli Ntuj 28–Kaum Ib Hlis Ntuj 3: ‘Kheev Lam Kuv Muaj Peev Xwm Yaum Tau Txhua Tus … Hloov Siab Lees Txim.’ Maumoos 1–6,” Los, Nrog Kuv Mus—Siv hauv Tsev thiab lub Koom Txoos: Phau Ntawv Maumoos 2024 (2023)
“Kaum Hli Ntuj 28–Kaum Ib Hlis Ntuj 3. Maumoos 1–6,” Los, Nrog Kuv Mus—Siv hauv Tsev thiab lub Koom Txoos: 2024 (2023)
Maumoos Sau Ntsiab Lus txog cov Phiaj, los ntawm Tom Lovell
Kaum Hli Ntuj 28–Kaum Ib Hlis Ntuj 3: “Kheev Lam Kuv Muaj Peev Xwm Yaum Tau Txhua Tus … Hloov Siab Lees Txim”
Maumoos 1:6
Maumoos tsis tau sau “ib zaj txog tag nrho” tej kev “phem heev” thiab tej ntshav uas nws pom nyob hauv cov Neeg Nifais (Maumoos 2:18; 5:8). Tiam sis tej yam uas nws sau tseg nyob hauv Maumoos 1–6 yeej txaus qhia rau peb paub tias cov neeg ncaj ncees yuav poob deb npaum li cas. Thaum muaj kev phem thoob plaws, tsis muaj leej twg uas yuav liam Maumoos vim nws nkees thiab poob siab. Tiam sis txawm yog nws pom thiab raug tag nrho tej no, nws yeej paub txog Vajtswv txoj kev hlub tshua loj heev thiab nws paub tias yuav tsum hloov siab lees txim kom txais tau Vajtswv txoj kev hlub ntawd. Thiab txawm yog Maumoos cov neeg tau xyeej nws tej lus thov kom lawv hloov siab lees txim los, nws paub tias nws muaj ib co neeg coob dua ntxiv uas nws yuav tsum hais rau lawv thiab. Nws hais tias, “Saib seb, kuv sau rau tag nrho cov neeg thoob ntiaj teb.” Los yog hais tias, nws tau sau rau koj (saib Maumoos 3:17–20). Thiab nws zaj lus rau koj niaj hnub no, yeej yog tib zaj uas cawm tau cov Neeg Nifais dim hauv lawv lub caij nyoog: “Ntseeg Yexus Khetos txoj moo zoo” … Hloov siab lees txim thiab npaj tos mus sawv ntawm Khetos lub rooj txiav txim” (Maumoos 3:21–22).
Kuj saib “Mormon Preserves the Record to Bring the House of Israel to Christ” (vidi-aus), Txoj Moo Zoo cov Ntawv.
Tej Tswv Yim Pab Qhia hauv Tsev thiab lub Koom Txoos
Kuv muaj peev xwm coj raws li Yexus Khetos txawm yog lwm tus neeg ua li cas los xij.
Thaum txog lub sij hawm uas nws muaj 10 xyoo, Maumoos yeej tsis zoo li cov neeg uas nyob ib puag ncig nws. Thaum koj nyeem Maumoos 1–6, nrhiav seb vim li cas Maumoos txoj kev ntseeg Yexus Khetos ua rau nws tsis zoo li lwm tus nws thiaj li muaj cib fim pab thiab foom koob hmoov rau lawv. Tej nqe nram qab no pab tau koj pib kawm txog qhov no:
-
Maumoos 1:2–3, 13–17.Koj xav tias Maumoos thiab nws cov neeg sib txawv li cas? Nws muaj tej cwj pwm twg uas pab nws sab ntsuj plig muaj zog hauv ib lub caij nyoog nyuaj li no?
-
Maumoos 2:18–19.Maumoos tau hais tej lus twg kom piav txog nws lub neej? Nws tau ua li cas kom muaj kev cia siab?
-
Maumoos 3:12.Maumoos tau xav li cas txog cov neeg uas nyob ze nws? Koj yuav ua li cas kom muaj kev hlub li nws?
Lwm nqe twg nyob hauv Maumoos 1–6 qhia tias Maumoos txoj kev ntseeg Yexus Khetos zoo li cas? Vajtswv tau muab cib fim twg rau nws vim nws xaiv rau siab ntseeg ntxiv?
Xav seb puas kawm Thawj Tswj Hwm Thomas S. Monson zaj lus “Ua ib tug Yam Ntxwv thiab Ib Qho Kaj” (Liyahaunas, Kaum Ib Hlis Ntuj 2015, 86–88), thiab nrhiav tej yam uas qhia tias vim li cas cov neeg uas coj raws li Yexus Khetos yuav tsum tsis txhob ua li lwm haiv neeg. Koj yuav ua li cas kom sau tej kab lus zoo li no tiav? “ yog ib tug uas coj yam ntxwv zoo rau kuv thaum nws . Nws ua li no los twb pab kuv xav .”
Nyaj Maumoos twb xav tias nws txoj kev coj yam ntxwv tsis tau pab nws cov neeg. Yog tias koj muaj cib fim nrog Maumoos tham, koj yuav hais li cas rau nws txog qhov uas nws txoj kev coj yam ntxwv zoo tau pab koj?
Kuj saib David A. Bednar, “To Taub Sai Heev,” Ensign, Kaum Ob Hlis Ntuj 2006, 30–36, los sis Liyahaunas, Kaum Ob Hlis Ntuj 2006, 14–20; “Something Different about Us: Example” (vidi-aus), Txoj Moo Zoo cov Ntawv; Txoj Moo Zoo tej Ntsiab Lus, “Living the Gospel of Jesus Christ,” Txoj Moo Zoo cov Ntawv.
Pab lwm tus qhia tias lawv tau kawm dab tsi. Thaum tib neeg qhia tias lawv tau kawm dab tsi, lawv txhawb nqa lawv txoj kev ntseeg thiab lwm tus txoj kev ntseeg (saib Lus Qhuab Qhia thiab Kev Khi Lus 88:122). Nug koj tsev neeg los sis chav kawm seb lawv xav li cas thaum lawv kawm Vajtswv txoj lus.
Ntaus Rog, los ntawm Jorge Cocco
Kev tu siab uas Vajtswv pom zoo yeej ua rau kuv hloov siab uas kav ntev.
Thaum Maumoos pom tias nws cov neeg tu siab, nws cia siab tias lawv yuav hloov siab lees txim. Tiam sis “lawv txoj kev tu siab twb tsis yog rau txoj kev hloov siab lees txim” (Maumoos 2:13)—tsis yog kev tu siab uas Vajtswv pom zoo tiam sis yog kev tu siab los ntawm lub ntiaj teb. Yog xav to taub ob qho no sib txawv li cas, cia li sau ntawv tej yam uas koj kawm los ntawm Maumoos 2:10–15 nyob hauv ib qho zoo li no:
|
Txoj Kev Tu Siab uas Vajtswv Pom Zoo |
Neeg Ntiaj Teb txoj Kev Tu Siab |
|---|---|
|
Los Cuag Yexus (nqe 14) |
Foom Phem rau Vajtswv (nqe 14) |
Koj yuav ua li cas thiaj paub tias koj txoj kev tu siab puas yog qhov uas Vajtswv pom zoo los sis los ntawm neeg ntiaj teb? Yog tias koj muaj kev tu siab ntawm neeg ntiaj teb, koj yuav ua li cas kom hloov los ua txoj kev tu siab uas Vajtswv pom zoo?
Kuj saib 2 Kauleethaus 7:8–11; Michelle D. Craig, “Kev Txhawj Xeeb uas Zoo,” Liyahaunas, Kaum Ib Hlis Ntuj 2018, 52–55.
“Lawv tsis paub tias twb yog tus Tswv uas tau tseg lawv.”
Maumoos pom tias cov Neeg Nifais tsis tau lees paub txog tej uas tus Tswv tau foom koob hmoov rau lawv. Thaum koj nyeem Maumoos 3:3, 9, tej zaum koj yuav xav txog qhov uas koj lees paub Vajtswv lub hwj huam hauv koj lub neej li cas. Koj tau cov koob hmoov twg thaum koj lees paub Nws lub hwj huam? Yus raug li cas thaum yus tsis lees paub Nws? (saib Maumoos 2:26; Lus Qhuab Qhia thiab Kev Khi Lus 59:21).
Kuj saib Henry B. Eyring, “O Remember, Remember,” Liyahaunas, Kaum Ib Hlis Ntuj 2007, 66–69.
Yexus Khetos qhib nws ncaj npab lug tos txais kuv.
Yog koj poob siab vim koj tau ua txhaum, tej zaum Maumoos cov lus piav txog qhov uas tus Cawm Seej sawv “qhib caj npab lug tos txais [koj]” yuav pab nplij koj lub siab. Thaum koj nyeem Maumoos 5:8–24 thiab 6:16–22, koj kawm dab tsi txog Leej Txiv Saum Ntuj Ceeb Tsheej thiab Yexus txoj kev xav txog koj, tsis hais thaum koj ua txhaum los yog? Koj tau hnov Yexus Khetos txoj kev ncav tes rau koj li cas? Koj thiaj li txais kev tshoov siab ua dab tsi?
Kuj saib “Los Cuag Tswv Yexus,” Cov Nkauj Qhuas Vajtswv, zaj 42.
Tej Tswv Yim Pab Qhia cov Me Nyuam
Maumoos 1:1–3; 2:1, 23–24; 3:1–3, 12, 17–22
Ib yam li Maumoos, kuv muaj peev xwm coj raws li Yexus Khetos.
-
Vim Maumoos hluas heev thaum nws txoj kev ntseeg Yexus Khetos loj tuaj, nws yeej coj yam ntxwv zoo rau koj cov me nyuam. Tej zaum koj yuav xav nyeem Maumoos 1:1–3 thiab koj cov me nyuam mloog tau seb Maumoos muaj hnub nyoog li cas thaum Amaloos muab ntiag tug hauj lwm rau nws. Tej zaum koj pab tau lawv nrhiav hauv tej nqe no seb Amaloos tau pom tias Maumoos muaj tej cwj pwm twg. Tej cwj pwm no ua li cas pab peb coj raws li Yexus Khetos?
Maumoos, Thaum Muaj 10 Xyoo, los ntawm Scott M. Snow
-
Vim Maumoos coj raws li Yexus Khetos, nws tau muaj cib fim pab thiab foom koob hmoov rau lwm tus. Tej zaum koj yuav xav caw koj cov me nyuam nyeem ob peb zaj lus nram qab no thiab pab lawv qhia tias lawv tau kawm dab tsi txog Maumoos: Maumoos 1:1–3; 2:1, 23–24; thiab 3:1–3, 12, 20–22 (kuj saib “Tshooj 49: Maumoos thiab Nws tej Lus Qhia,” Cov Dab Neeg hauv Phau Ntawv Maumoos, 138–42). Nws tau coj raws li Yexus Khetos li cas? Vim li cas nws txoj kev ntseeg Yexus Khetos tau pab los sis foom koob hmoov rau lwm tus? Peb txoj kev ntseeg yuav pab lwm tus li cas?
Kev tu siab uas Vajtswv pom zoo yeej ua rau kuv hloov siab uas kav ntev.
-
Tej zaum koj yuav xav sau ib daim phiaj zoo li daim phiaj nyob hauv “Tej Tswv Yim Pab Qhia hauv Tsev thiab lub Koom Txoos” kom pab koj cov me yuam to taub kev tu siab ntawm neeg ntiaj teb thiab kev tu siab uas Vajtswv pom zoo txawv li cas Maumoos 2:8, 10–15. Ces lawv nyeem tau Maumoos 2:12 kom nrhiav seb vim li cas kev hloov siab lees txim yuav ua rau peb “lub siab … xyiv fab.” Peb yuav ua li cas kom peb txoj kev tu siab vim peb ua txhaum yuav ua rau peb xav nrhiav Vajtswv txoj kev pab peb hloov siab?
Leej Txiv Saum Ntuj Ceeb Tsheej tau foom koob hmoov ntau rau kuv.
-
Qhov uas koj caw koj cov me nyuam sau ntawv (los sis kos duab) txog tej yam uas ua rau lawv xav hais ua tsaug tej zaum yuav pab lawv ris Vajtswv txiaj. Tom qab lawv sau ntawv tas lawm, tej zaum koj yuav xav nyeem Maumoos 3:3, 9 thiab piav tias Leej Txiv Saum Ntuj Ceeb Tsheej tau foom koob hmoov rau cov Neeg Nifais thiab, tiam sis lawv tsis tau lees paub qhov ntawd. Peb yuav ua li cas kom qhia tias peb ris Leej Txiv Saum Ntuj Ceeb Tsheej txiaj rau peb cov koob hmoov?
Leej Txiv Saum Ntuj Ceeb Tsheej xav kom kuv hlub txhua tus.
-
Txawm yog cov Neeg Nifais ua phem, Maumoos tseem hlub lawv tsis tu tsis tseg. Pab koj cov me nyuam nrhiav tej lo lus “hlub” nyob hauv Maumoos 3:12. Tej zaum koj yuav xav hu ib zaj nkauj ua ke txog kev hlub lwm tus, xws li “Jesus Said Love Everyone” (Children’s Songbook, 61), thiab muab daim duab txog cov me nyuam nyob thoob plaws lub ntiaj teb rau lawv saib. Cia li ua tim khawv tias Vajtswv hlub tag nrho Nws cov me nyuam.
Yog xav tau tswv yim ntxiv, saib phau xov xwm Phooj Ywg rau lub hlis no.
Twb tau sau Phau Ntawv Maumoos “xwv kom nej ntseeg Yexus Khetos txoj moo zoo” (Maumoos 3:21).