“Kaum Ob Hlis Ntuj 9–15: ‘Thov Kom Khetos Tsa Koj Sawv.’ Maulaunais 7–9,” Los, Nrog Kuv Mus—Siv hauv Tsev thiab lub Koom Txoos: Phau Ntawv Maumoos 2024 (2023)
“Kaum Ob Hlis Ntuj 9–15. Maulaunais 7–9,” Los, Nrog Kuv Mus—Siv hauv Tsev thiab lub Koom Txoos: 2024 (2023)
Minerva Teichert (1888–1976), Maulaunais: Tus Neeg Nifais Kawg, 1949–1951, pleev roj rau pob zeb, 34 3/4 × 47 yas tes. Brigham Young University Qhov Chaw Saib Duab, 1969.
Kaum Ob Hlis Ntuj 9–15: “Thov Kom Khetos Tsa Koj Sawv”
Maulaunais 7–9
Ua ntej Maulaunais xaus Phau Ntawv Maumoos nrog nws tej lus kawg, nws tau sau peb zag los ntawm nws txiv, Maumoos: ib zaj rau “cov uas nyob kaj siab lug coj raws li Khetos” (Maulaunais 7:3) thiab ob tsab ntawv uas Maumoos tau sau rau Maulaunais. Tej zaum Maulaunais tau tso peb zag no hauv Phau Ntawv Maumoos vim nws pom tias yuav muaj xwm txheej hauv peb lub caij nyoog ib yam nws pom nyob hauv nws lub caij nyoog. Thaum nws sau tej lus no, cov Neeg Nifais tab tom tig mus ntxeev siab rau tus Cawm Seej. Lawv feem coob “twb tsis muaj kev hlub, ib leeg rau ib leeg” thiab nyiam “txhua yam tsuas yog tshuav tej uas zoo xwb” (Maulaunais 9:5, 19). Tiam sis Maumoos tseem muaj kev cia siab, nws qhia peb tias kev cia siab tsis txhais hais tias yus tsis paub txog lub ntiaj teb tej teeb meem. Kev cia siab txhais tias yus ntseeg Leej Txiv Saum Ntuj Ceeb Tsheej thiab Yexus Khetos, ob tug uas muaj hwj chim loj tshaj plaws thiab kav ntev tshaj tej teeb meem ntawd. Kev cia siab txhais tias yus “ua txhua yam uas zoo” (Maulaunais 7:19). Kev cia siab txhais tias yus cia Yexus Khetos txoj Kev Theej Txhoj “thiab txoj kev cia siab ntawm nws lub yeeb koob thiab ntawm txoj sia nyob mus ib txhis, nyob rawv hauv koj lub siab” (Maulaunais 9:25).
Tej Tswv Yim Pab Qhia hauv Tsev thiab lub Koom Txoos
Khetos txoj kev kaj pab kuv txiav txim paub qhov tseeb thiab qhov cuav.
Tib neeg coob xav paub, “Kuv yuav ua li cas thiaj paub yog ib lub tswv yim los ntawm Vajtswv los, los sis yog kuv txoj kev xav xwb?” los sis “Vim muaj kev ntxias ntau niaj hnub no, kuv yuav ua li cas kom paub qhov yog thiab qhov tsis yog?” Maumoos cov lus nyob hauv Maulaunais 7 qhia ob peb lub ntsiab cai uas peb siv tau kom teb tej lus nug no. Nrhiav tej lus no nyob hauv nqe 12–20. Tej zaum koj yuav siv tej yam tseeb no pab koj ntsuam xyuas tej zaj lus uas koj hnov thiab tej uas koj raug lub lim tiam no.
Kuj saib Phau Qhia txog Vaj Lug Kub, “Kaj, Khetos txoj Kev Kaj,” Txoj Moo Zoo cov Ntawv; “Patterns of Light: Discerning Light” (vidi-aus) Txoj Moo Zoo cov Ntawv.
Vim muaj Yexus Khetos, kuv yuav “ua txhua yam uas zoo”
Maumoos nug ib los lus uas niaj hnub no tseem ceeb heev: “Yuav ua li cas [koj] thiaj yuav ua tau txhua yam uas zoo?” (Maulaunais 7:20). Ces nws qhia txog kev ntseeg Yexus Khetos, kev cia siab, thiab kev siab hlub. Thaum koj nyeem tej nqe 20–48, saib seb txhua tus cwj pwm ntawm no pab koj nrhiav thiab “tuav nkaus” qhov zoo uas los ntawm Yexus Khetos li cas. Vim li cas tej cwj pwm no tseem ceeb heev rau Yexus Khetos ib tug thwj tim?
Kuj saib “Mormon’s Teachings about Faith, Hope, and Charity” (vidi-aus), Txoj Moo Zoo cov Ntawv.
“Kev siab hlub twb yog Khetos txoj kev hlub uas dawb paug.”
Maumoos pom tias peb txoj kev ntseeg thiab kev cia siab rau Yexus Khetos yuav cia peb muaj kev siab hlub. Tiam sis kev siab hlub yog dab tsi? Tej zaum koj yuav sauKev siab hlub yog … ces nyeem Maulaunais 7:44–48, kom nrhiav tej lus zoo kom sau kab lus ntawd tiav. Thaum koj sau tas, xav seb puas rho tawm lo lus Kev siab hlub thiab muab lo lus Yexus Khetos tso haud. Qhov no qhia dab tsi rau koj txog tus Cawm Seej? Yexus Khetos tau ua dab tsi kom qhia peb txog Nws txoj kev hlub uas dawb paug? Xav txog tej piv txwv nyob hauv cov vaj lug kub thiab hauv koj lub neej.
Thawj Tswj Hwm Dallin H. Oaks qhia tias: “Kev siab hlub yeej tsis ploj mus thiab kev siab hlub yeej zoo tshaj txhua yam yus ua zoo … vim kev siab hlub yog ‘Khetos txoj kev hlub uas dawb paug’ [Maulaunais 7:47], tsis yog ib yam yus ua tiam sis ib yam hauv yus lub siab. … Kev siab hlub yog ib tug yam ntxwv yus coj” (“The Challenge to Become,” Ensign, Kaum Ib Hlis Ntuj 2000, 34). Thaum koj xav txog kab lus no, tej zaum koj yuav nyeem Txwj Laug Massimo De Feo zaj lus “Kev Hlub Dawb Paug: Lub Cim Tseeb txog Yexus Khetos ib tug Thwj Tim Tiag Tiag” (Liyahaunas, Tsib Hlis Ntuj 2018, 81–83). Kev siab hlub hloov koj txoj kev ua thwj tim li cas? Koj yuav ua li cas koj thiaj li “npuab rau txoj kev siab hlub”? (nqe 46).
Kuj saib 1 Kauleethaus 13:1–13; Ethaws 12:33–34; “Ib Leeg Hlub Ib Leeg,” Cov Nkauj Qhuas Vajtswv, zaj 145; “Charity: An Example of the Believers” (vidi-aus), Txoj Moo Zoo cov Ntawv; Txoj Moo Zoo tej Ntsiab Lus, “Charity,” Txoj Moo Zoo cov Ntawv.
Siv ib yam khoom kom qhia. Tej zaum thaum koj xav txog ib lub rooj zaum uas muaj peb ceg xwb yuav pab koj to taub ntxiv txog kev ntseeg, kev cia siab, thiab kev siab hlub (saib Dieter F. Uchtdorf, “The Infinite Power of Hope,” Liyahaunas, Kaum Ib Hlis Ntuj. 2008, 21–24).
Kev npau taws yeej ua rau tib neeg nyuaj siab thiab txom nyem.
Maumoos zaj lus txog kev hlub nyob hauv Maulaunais 7:44–48 yeej txawv ntawm Maumoos tsab ntawv rau Maulaunais thib ob uas hais lus ceeb toom txog ib yam uas coob leej raug niaj hnub nim no—kev npau taws. Raws li Maulaunais 9:3–5, cov Neeg Nifais raug li cas vim lawv npau taws? Peb nrhiav tau tej lus ceeb toom dab tsi los ntawm tej nqe 3–5, 18–20, 23?
Kuj saib Gordon B. Hinckley, “Tsis Chim Sai,” Liyahaunas, Kaum Ib Hlis Ntuj 2007, 62–66.
Kuv muaj kev cia siab rau Khetos tsis hais kuv lub neej zoo li cas los yog.
Tom qab nws piav txog tej kev phem uas nws tau pom, Maumoos qhia nws tus tub kom nws tsis txhob tu siab. Maumoos zaj lus txog kev cia siab tshoov koj lub siab li cas? Qhov uas Khetos “tsa [koj] sawv” muaj nqis npaum li cas rau koj? Khetos tej cwj pwm thiab cov ntsiab cai ntawm Nws txoj moo zoo twg “nyob rawv hauv koj lub siab” thiab ua rau koj muaj kev cia siab? (Maulaunais 9:25).
Kuj saib Russell M. Nelson, “Kev Xyiv Fab thiab Kev Nyiaj Kom Dhau ntawm Sab Ntsuj Plig,” Liyahaunas, Kaum Ib Hlis Ntuj 2016, 81–84.
Yog xav tau tswv yim ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hlis no.
Tej Tswv Yim Pab Qhia cov Me Nyuam
Yog kuv ntseeg Yexus Khetos, kuv yuav muaj peev xwm ua txhua yam uas Nws xav kom kuv ua.
-
Xav seb puas saib ob peb daim duab ua ke uas qhia txog ib tug neeg hauv cov vaj lug kub uas tau ua tej yam tseem ceeb (saib, ua piv txwv, Phau Muaj Duab txog Txoj Moo Zoo, naj npawb 19, 70, 78, 81). Txoj kev muab siab rau ntseeg Khetos pab peb li cas nyob hauv tej piv txwv no? Koj thiab koj cov me nyuam nyeem tau Maulaunais 7:33, thiab nrhiav tej yam uas peb ua tau thaum peb muaj siab rau ntseeg Yexus Khetos. Ces tej zaum koj yuav xav qhia txog tej lub sij hawm thaum Vajtswv tau foom koob hmoov rau koj kom muaj Nws lub hwj chim ua raws li Nws lub siab nyiam.
Kev ntseeg Yexus Khetos ua rau kuv muaj kev cia siab.
-
Thaum koj nyeem Maulaunais 7:41 rau koj cov me nyuam, tej zaum lawv yuav xav tsa lawv txhais tes thaum lawv hnov ib yam dab tsi uas Maumoos hais uas peb yuav tsum cia saib rau. Qhia lawv txog koj txoj kev cia siab vim yog Yexus Khetos.
-
Koj thiab koj cov me nyuam kuj xav tau txog ib tug neeg uas tej zaum muaj ib lub sij hawm nyuaj txog dab tsi. Tej zaum koj thiab koj cov me nyuam yuav xav kos duab rau tus neeg ntawd kom nws rov nco qab muaj kev cia siab rau Yexus Khetos.
Txawm raug kev sim siab nyuaj los, kuv muaj peev xwm cia siab rau Yexus Khetos.
-
Kom qhia koj cov me nyuam txog kev cia siab rau Yexus Khetos, koj hliv dej rau ib lub ka poom uas pom kev tshab plaws thiab pov ob yam rau hauv— ib yam uas yuav poob dej thiab ib yam uas yuav ntab. Thaum nej nyeem Maulaunais 7:40–41 thiab 9:25–26 ua ke, tej zaum yuav kom koj cov me nyuam nrhiav seb kev cia siab ua dab tsi rau peb. Ces cia lawv maub yam uas ntab hauv lub ka poom piv rau ib tug neeg uas muaj kev cia siab rau Khetos. Nws “tsa [peb] sawv” li cas thaum peb raug tej kev sim siab uas nyuaj? Pab koj cov me nyuam xav txog tej yam uas lawv cia tus Cawm Seej thiab Nws cov lus qhia “nyob nrog [lawv] mus ib txhis.”
“Kev siab hlub twb yog Khetos txoj kev hlub uas dawb paug.”
-
Ib zaj nkauj txog kev hlub, xws li “Ib Leeg Hlub Ib Leeg” (Children’s Songbook, 136), tej zaum yuav pab txoj kev sib tham seb kev sia hlub yog dab tsi. Koj kuj nyeem tau los sis qhia txog lub ntsiab lus ntawm Maulaunais 7:47 thiab caw koj cov me nyuam kos duab txog lawv tus kheej hlub lwm tus. Hais kom lawv muab lawv cov duab tso rau ib qhov chaw uas yuav pab lawv nco qab hlub lwm tus ib yam li Yexus hlub.
-
Koj yuav ua li cas kom tshoov koj cov me nyuam lub siab kom lawv nrhiav thiab tsim tsa Khetos txoj kev hlub uas dawb paug? Tej zaum koj pab tau lawv xav txog tej yam uas Yexus ua kom qhia tias Nws muaj kev siab hlub (saib, piv txwv, Lukas 23:34; Yauhas 8:1–11; Ethaws 12:33–34). Peb yuav ua li cas kom coj raws li nws tus yam ntxwv?
Yog xav tau tswv yim ntxiv, saib phau xov xwm Phooj Ywg rau lub hlis no.
Daim Duab txog Khetos tus Cawm Seej, los ntawm Heinrich Hofmann