Liahona na Bunara i Bruk

Ol famili bilong Lihai na Ismael i wokabaut long ples nogat man i stap long planti yias. Bikpela i lidim ol thru long gutpela hap bilong dispela ples. Ol i hant na kisim ol kaikai long rot bilong ol. Dispela wokabaut i bin hat

1 Nifai 16:14; 17:1, 4

Bikpela i promis long lidim ol famili i go long gutpela ples sapos ol i kipim ol komanmen. Ol no bin save hau long painim dispela ples, tasol Em bai gaidim ol.

1 Nifai 2:20; 10:13; 17:13–14

Wanpela moning, Lihai i kirap nogut long painim wanpela ain bol ausait long haus sel bilong em. Bol em ol i kolim Liahona. Insait long Liahona, wanpela ero i poin i go long rot ol bai wokabaut. Sampela taim ol i painim ol toksave i kam long Bikpela i rait antap long Liahona. Bikpela i bin gaidim ol olsem.

1 Nifai 16:10, 16, 26–29; Alma 37:38

Wanpela de taim Nifai i painim abus, ain bunara bilong em i bruk. Ol famili i no nap kisim kaikai bikos nogat bunara. Ol brata bilong Nifai i kros long em na long Bikpela.

1 Nifai 16:18–21

Olgeta i bin taiet na hangre. Sampela i wari na bel hevi. Ol i pret olsem ol bai dai long hangre. Lihai tu i bin bel hevi long Bikpela.

1 Nifai 16:19–22, 35

Nifai i mekim nupela bunara na spia long diwai. Em i gat feit olsem Bikpela bai helpim em painim kaikai.

1 Nifai 16:23

Nifai i askim Lihai we em bai go painim abus. Lihai i sore olsem em i bel hevi na toktok planti. Em i tanim bel na askim Bikpela long helpim. Bikpela i tokim Lihai long lukluk long Liahona. Wanpela toksave i bin stap long en. Ol famili i lainim olsem Liahona bai wok taim ol i gat feit long Bikpela na bihainim ol komanmen.

1 Nifai 16:23–29

Sampela taim Bikpela i senisim toksave long Liahona long helpim ol long wokabaut bilong ol. Liahona i helpim Nifai save long wanem hap em bai hant. Em i bringim kam bek kaikai, na olgeta i amamas. Ol i bin tanim bel na tenkim Bikpela.

1 Nifai 16:28–32