Nifai na ol Bras Plet

Leman, Lemuel, Sam, na Nifai i go bek long Jerusalem long nait. Nifai i go bek long haus bilong Leban taim ol brata bilong em i hait ausait long siti.

1 Nifai 4:4–5

Nifai larim Spirit i gaidim em. Em i no bin save em bai mekim wanem, tasol em i save Bikpela bai helpim em long kisim ol bras plet.

1 Nifai 4:6

Taim Nifai i stap klostu long haus bilong Leban, em i painim Leban long graun. Leban i bin spak nogut tru. Nifai i lukim naip bilong pait bainat bilong Leban na i kisim.

1 Nifai 4:7–9

Taim Nifai i lukluk long naip bilong pait, Spirit i tokim em long kilim Leban. Tasol Nifai i no laik kilim Leban. Spirit tokim Nifai olsem em i moabeta bai Leban i dai nogut famili bilong Nifai i nogat ol skripsa. Ol i bin nidim ol komanmen bilong God i stap long ol bras plet.

1 Nifai 4:10–11, 13–17

Nifai i save olsem Leban i bin laik kilim em. Leban tu i bin stilim ol samting bilong ol na i no bihainim komanmen bilong God.

1 Nifai 4:11

Spirit tokim Nifai gen long kilim Leban. Nifai i save Bikpela i redim wei bilong em long kisim ol bras plet. Em i susim long bihainim Spirit. Nifai i kilim Leban na dresim emyet wantaim klos bilong Leban.

1 Nifai 4:12–13, 17–19

Nifai i go long tresari bilong Leban na bungim wokman bilong Leban Zoram. Nifai i mekim na toktok olsem Leban.

1 Nifai 4:20–23, 35

Nifai i tokim Zoram em i nidim ol bras plet. Bihain Nifai tokim Zoram long kam wantaim em. Zoram i ting Nifai em i Leban, na em i mekim wanem Nifai i laikim.

1 Nifai 4:24–26

Taim Nifai na Zoram i kam aut long siti, Leman, Lemuel, and Sam i ting Nifai em Leban. Ol i pret na i stat long ranawe.

1 Nifai 4:28

Nifai i singautim ol brata bilong em. Taim ol i save em i Nifai, ol i stop long ranawe. Tasol Zoram i pret na i traim long go bek long Jerusalem.

1 Nifai 4:29–30

Nifai i stopim Zoram. Em i tokim Zoram olsem Bikpela i komandim ol long kisim ol plet. Em i invaitim Zoram long go wantaim ol long promis len. Zoram i save em bai kamap fri man, na i no wokman, na promis long go wantaim Nifai na famili bilong em.

1 Nifai 4:31–37

Ol i wokabaut i go bek long Lihai na Saraia. Lihai na Saraia i amamas long lukim ol pikinini bilong ol. Saraia i bin ting ol pikinini bilong em i bin dai. Bikos Bikpela i kipim ol seif, nau em i trastim olsem famili bilong ol i bin kisim komanmen long lusim Jerusalem. Lihai na Saraia i ofarim sakripais long tok tenkyu long Bikpela.

1 Nifai 4:38; 5:1–9

Lihai i bin ritim ol bras plet. Em i lukim olsem ol bras plet i gat ol tising bilong ol profet. Em i lainim tu olsem wanpela ol tumbuna bilong em i Joseph, husat ol brata bilong em i bin salim em long Egypt bipo tru. Lihai i save ol bras plet i impoten tru. Em i save Bikpela i laikim famili bilong em long gat ol komanmen.

1 Nifai 5:10–22