Walay Pasko Niining Tuiga?

Makita gihapon nako ang panimalay sa akong hunahuna nianang mabugnaw, abuhon nga Disyembre sa Illinois, USA. Ang atop anaa ibabaw sa yuta, apan hapit ang kinatibuk-an sa balay anaa sa ubos sa yuta. “Tingali, walay nagpuyo diha,” ang akong kompanyon ug ako nakapangagpas.

Nanuktok mi. Human sa pipila ka gutlo, usa ka babaye ang miabli og gamay sa pultahan. Giingnan namo siya nga kami mga misyonaryo gikan sa Ang Simbahan ni Jesukristo sa mga Santos sa Ulahing mga Adlaw ug nga kami adunay importante nga mensahe alang kaniya. Nagduha-duha siya apan gipasulod kami.

Misinyas siya namo nga molingkod sa duha ka lingkoranan nga kahoy nga uyog-uyogon na. Hinay ang suga sa kwarto. Sa dihang naanad na ang akong mga mata sa suga, nakamatikod ko nga yuta ang salog sa balay. Walay mga litrato nga nagbitay sa mga bong-bong. Sa kalit, upat ka masulob-on nga mga bata nga nagsinina og walay kolor nga sinina ang nagpakita.

Duha ka semana na lang sa dili pa ang Pasko. Asa man ang masuso nga si Jesus sa pasungan? Asa man ang mabulokon nga mga dekorasyon ug ang Christmas tree?

Human namo mahatag ang among mensahe mahitungod sa Pagpahiuli, ang inahan midapit namo sa pagbalik aron makigsulti sa iyang bana. Sa wala pa kami mobiya, nangutana mi mahitungod sa Pasko. Miingon siya nga ang panahon lisod ug nga sila walay bisan unsa alang sa Pasko nianang tuiga.

Human sa among pagbiya, ang akong kompanyon ug ako nanghangyo og tabang gikan sa lokal nga mga miyembro sa ward. Ang dakong buhat sa gugma ang misunod. Ang mga miyembro midonar og pagkaon, mga sinina, mga dulaan, ug Christmas tree nga adunay mga adorno.

Mibalik mi ngadto sa panimalay paglabay sa pipila ka adlaw. Nanuktok mi, ug usab giablihan og gamay ang pultahan. “Malipayong Pasko,” miingon mi samtang among gitimbaya ang amahan, inahan, ug upat ka bata nga misiga ang mga mata.

Gisulod namo ang christmas tree, mga regalo, ug pagkaon ngadto sa panimalay. Ang pamilya nakurat. Gipahimutang namo ang christmas tree, mibutang sa mga regalo sa ilawom niini, mibutang sa pagkaon sa lamesa, ug nalingaw sa pag-istoryahanay og kadiyot. Samtang nangandam na mi sa pagbiya, mitan-aw ko sa mga bata. Silang tanan adunay dako nga mga pahiyom sa ilang mga nawong.

Nagpadayon mi sa pagtudlo sa pamilya, ug sa kataposan miapil sila sa Simbahan. Samtang ang kahayag sa ebanghelyo mipahayag sa ilang panimalay, ang amahan mipalambo og hugot nga pagtuo ug nakadawat og bag-ong panlantaw alang sa iyang pamilya. Nakakita siya og mas maayo nga trabaho. Ang pamilya mas nagkasuod. Sa wala madugay mibalhin sila ngadto sa usa ka bag-o nga balay.

Sobra sa 60 ka tuig ang milabay, nagpasalamat gihapon ko sa Ginoo sa pagtugot namo sa pagpanalangin sa unom sa Iyang bililhon nga mga anak, nagpahinumdom nako nga “maingon nga gibuhat ninyo kini ngadto sa usa sa mga labing gagmay niining akong mga igsoon, gibuhat usab ninyo kini kanako” (Mateo 25:40).