15 ka Gasa nga Ikonsiderar Karong Pasko

“Usa sa pinakamatahom nga mga simbolo sa pagkatawo ni Jesukristo dinhi niini nga kalibotan mao ang kahayag. Ang pag-abot sa dugay nang gisaad nga Mesiyas nakadala og kahayag ngadto sa usa ka mangitngit nga kalibotan.

“Daghan kaninyo ang nag-ampo alang sa kalig-on sa paglahutay sa mga pagsulay nga misukod kaninyo sa unsay inyong gibati nga daw mao lang ang inyong makaya. Ang Dios nahibalo sa atong matag gikinahanglan, nahigugma Siya kanato, ug nagbantay Siya kanato. Mihatag Siya kanato sa gasa sa usa ka Manluluwas, ang Iyang hingpit nga Anak. Siya mao ang Kahayag sa Kalibotan ug ang tinuod nga tinubdan sa kahupayan, paglaom, kalinaw, ug hingpit nga kalipay.

“Ako mopahayag sa akong gugma nganha kaninyo uban sa akong panghinaot nga kamo makaangkon og malipayong panahon sa Pasko ug mobati sa gugma ug kahayag ni Kristo—karong tuiga ug sa kanunay.”

“Gawas kon atong makita ang tanang kahulogan ug kalipay sa Pasko—ang tibuok kinabuhi ni Kristo, ang Iyang tiunay nga misyon, ang kataposan ingon man usab ang sinugdanan—nan ang Pasko mahimong lain nga adlaw nga walay trabaho nga adunay pagkaon ug kalingawan ug mga pagsaulog.

“Ang tinuod nga kahulogan—ang talagsaon, makalipay nga kahulogan—sa pagkatawo ni Jesukristo wala lang mahitabo sa unang mga oras sa Betlehem apan makita diha sa kinabuhi nga Iyang gidumala ug sa Iyang kamatayon, sa Iyang madaogong sakripisyo sa pag-ula, ug sa Iyang makapagawasnon nga Pagkabanhaw. Mao kini ang mga reyalidad nga nakapahimo sa Pasko nga malipayon.

“Karong tuiga, atong hinumdoman ang labing mahinungdanon nga gasa nga sukad nahatag: ang Pag-ula ug Pagkabanhaw ni Ginoong Jesukristo.”

“Nalipay ko sa oportunidad sa pag-ugmad ug pagpadayon sa mga relasyon ngadto sa ubang mga tinuohan sa mga nasod sa tibuok kalibotan. Isip mga anak sa Dios, kitang tanan gipanalanginan og talagsaon nga mga gasa ug mga talento sa pagserbisyo alang sa mas dakong kaayohan.”

“[Ania ang mga ehemplo sa] lima ka gasa nga atong mahatag sa usag usa:

• Ang gasa sa pagkamainantoson pinaagi sa pagsalikway sa kalagot

• Ang gasa sa pagdawat pinaagi sa pagsalikway sa yawan-ong pagtratar sa tanang katawhan tungod sa mga binuhatan sa pipila

• Ang gasa sa pagsabot pinaagi sa dili paghukom sa uban tungod lamang sa ilang panggawas nga mga kinaiya

• Ang gasa sa kamatinahoron ug kaligdong pinaagi sa pagsalikway sa panghimaraot, pagbugal-bugal, ug pagpakaulaw sa uban nga dili makig-uyon nato

• Ang gasa sa mauswagon nga katilingban pinaagi sa pagrespeto sa tanang katawhan, ilabi na niadtong kinsa adunay lahi nga panglantaw

“Si Jesus mianhi sa yuta isip usa ka mapaubsanon nga masuso gani mao ang Kahayag sa Kalibotan. Mianhi Siya sa pagdala og kalinaw, gugma, ug kamaya. Ang mga pang-iwag libot sa Washington D.C. visitors’ center nagsimbolo sa Iya ug sa Amahan nga mahinungdanon nga mga gasa alang kanato.”

“Ang usa ka paborito nga tradisyon sa Pasko sa mga Gong mao ang pagbasa og kusog sa ‘A Christmas Carol [Daygon sa Pasko] ni Charles Dickens isip usa ka pamilya.

“Kanunay kong maghunahuna ngano, kon maghunahuna kita ni Scrooge, ang unang mosantop sa atong hunahuna mao man ang bati nga batasan nga dalo nga tigulang, tawo nga nagbugalbugal sa Pasko isip usa ka dakong ‘pagpakaaron-ingnon’?

“Nganong dili man nato mas ilailahon ang bag-ong Scrooge? Ang bag-ong Scrooge kinsa sa manggihatagong paagi nagpadala sa regalo nga pabo isip surprisa sa Pasko? Ang bag-ong Scrooge kinsa nakig-uli sa iyang madasigon nga pag-umangkon nga si Freddie? Ang bag-ong Scrooge kinsa mipataas sa sweldo ni Bob Cratchit ug miatiman ni Tiny Tim?

“Aduna bay mga tawo sa atong palibot, tingali kita mismo, kinsa mahimong lahi nga tawo kon unta lamang mohunong kita sa pagtan-aw o paghusga kanila sa ilang kanhi nga pagkatawo?

“Walay tawo ug walay pamilya nga perpekto. Matag usa kanato adunay mga kahuyang ug mga kasaypanan—mga butang nga gipangandoy nato nga mahimong mas maayo. Niini nga Pasko, tingali makadawat kita—ug motanyag—sa bililhong mga gasa ni Jesukristo sa kausaban ug paghinulsol, sa pagpasaylo ug paghikalimot, alang sa usag usa ug sa atong kaugalingon.

“Makig-areglo kita sa sayop nga nahitabo sa miaging tuig. Kalimti ang emosyonal nga mga kabalaka ug kahasol, ang mga panagbingkil ug mga kalagot, nga nakapasamok sa atong kinabuhi. Hinaot nga atong hatagan ang usag usa sa atong bag-o nga mga posibilidad imbes maghunahuna kanunay sa atong nangagi nga mga limitasyon. Atong hatagan ang bag-ong Scrooge nga anaa sa matag usa kanato sa kahigayonan nga mausab.”

“Samtang mamalandong kamo sa dagko ug gagmay nga ‘maayong mga gasa’ nga miabot sa inyong kinabuhi, giunsa ninyo pagkakita sa kamot sa Ginoo nga nagluwas kaninyo, nagsuporta kaninyo, ug naghatag kaninyo og kahupayan?

“Ang Dios naghatag kanato sa gasa sa paghinumdom aron nga kita dili makalimot sa Tighatag, aron nga kita mahimong makabati sa Iyang walay kinutoban nga gugma alang kanato ug makakat-on sa paghigugma Kaniya agig balos. Ang karaan nga propeta nga si Moroni nag-awhag kanato sa paghinumdom nga ‘matag maayo nga gasa nagagikan ni Kristo’ (Moroni 10:18). Ang atong Manluluwas naghatag og mga gasa nga dili sama sa gitanyag sa kalibotan—temporaryo, dili kompleto, ug dako og kalagmitan nga mahanaw sa paglabay sa panahon. Si Jesukristo naghatag og malahutayon nga mga gasa.”