Ang Among mga Panlimbasog Nahimo nga Among mga Panalangin

Ang mga hagit sa kinabuhi sa Nairobi usahay dili matag-an, sa kapital nga Kenya sa Sidlakang Africa. Apan isip mga anak sa usa ka manedyer sa factory nga kasarangan ang pagkabutang, ang akong duha ka igsoon ug ako dunay daghang makaon ug panimalay nga aduna sa tanan nga among gikinahangaln.

Apan ang eleksiyon sa tuig 2008, sa kalit lang miusab sa komportable namong kinabuhi, ug mihatag og kasamok sa nasod. Daghang rebelde ang nagbahisbahis sa mga karsada ug gipangkawatan ang mga negosyo. Sa pag-adto sa trabaho, ang akong papa, magkinahanglan og mga polis nga eskort.

Alang sa kaseguroan, mibiya kami sa siyudad ug namalhin ngadto sa balay nga gitukod sa among papa mga 450 kilometros (280 ka milya) ang gilay-on, nahimutang sa Busia, Kenya. Apan bisan didto, ikandado gihapon namo ang among mga pultahan.

Sa walay pagpangutana, ang Kapaskohan sa tuig 2009 mao ang labing lisod kaayo namo sukad. Matag adlaw atol niana nga kapaskohan, nahadlok kami alang sa among kinabuhi. Ang mga tawo naa palibot sa among balay, gusto na kaayo ug andam nga mangawat. Usa ka gang sa mga kriminal kausa misulong namo dala ang mga sundang. Kanunay kaming nahadlok nga moabli sa pultahan. Nakombinse ko nga ang matinud-anong mga pag-ampo sa among inahan naghimo namong luwas.

Nianang panahona, ang akong papa wala nay trabaho. Nahurot na sa wala madugay ang among pagkaon. Ang among pagkaon sa Kapaskohan nianang tuiga kutob ra sa pinabukalan nga mga dahon nga kinutlo gikan sa mga batong nga tinanom sa akong mama. Bisan sa among mga kasakit, nagmalig-on ang akong papa, bisan og mibati siya nga nasakitan sa hilabihan.

Gisanapan na kami sa kahingawa ug hapit na mahutdi sa paglaom. “Nganong nanghitabo kini?” nagpangutan-anay kami sa among kaugalingon. “Nganong nagsagobang man kami niini nga mga kalisod human lang gayod magpasakop sa Ang Simbahan ni Jesukristo sa mga Santos sa Ulahing mga Adlaw?”

Usa ka gabii ang duha ka senior nga misyonaryo kinsa nakahibalo sa among mga pagpameligro miadto gihapon sa among lugar nagdala ngari namo og mensahe sa kalinaw. Nakaangkon kami og kaisog dihang gisaysay nila ang pagsaksi ni Nephi ug ang saad diha sa 1 Nephi 1:20: “Ang malumo nga mga kaluoy sa Ginoo anaa alang sa tanan nga iyang pinili tungod sa ilang pagtuo, aron mahimo silang lig-on hangtod nga makaangkon og gahom nga maluwas.”

Mituo kami niini.

Natabangan kami sa mga misyonaryo sa pagsabot nga bisan sa among mga kasakit, ang Ginoo naglaom nga magpadayon kami sa pagpakabuhing matinud-anon. Klaro pa kaayo nakong mahinumdoman ang kalinaw ug kahupayan nga misanap kanako nianang gabhiona. Akong nahibaloan, labaw pa sukad, nga ang Ginoo nagmahunahunaon kanamo ug sa among panaw. Nianang gabhiona, ug atol sa mga panahon sa among mga pagsulay human niana, akong nahibaloan nga ang Iyang malumo nga mga kaluoy talagsaon.

Dihang ang panahon miabot kanako alang sa pagmisyon, mibati ko og usa ka tinguha nga mopanalangin sa mga tawo sa kasilinganan sa Uganda dala ang ebanghelyo, apan ganahan sab kong motudlo sa mga tawo sa Zimbabwe, sa panimalay sa misyonaryo nga mibunyag kanako.

Nag-ampo ko, apan sulod sa akong kasingkasing, wala koy nakitang paagi nga makaserbisyo ko og duha ka nasod nga naglagyo kaayo sa usag usa. Wala madugay, nadawat nako ang akong tawag alang sa Zimbabwe, apan samtang naa ko sa missionary training center sa Johannesburg, South Africa, nalangay ang akong visa. Gipadala ko sa Uganda, diin didto nagserbisyo ko og walo ka bulan sa wala pa nako madawat ang akong visa alang sa Zimbabwe.

“Ang Ginoo adunay Iyang misteryosong mga paagi,” naghunahuna ko.

Ang una nakong area sa Zimbabwe mao ang Chikanga Mutare. Mahinamon nga mapalgan ang pamilya sa misyonaryo nga mibunyag nako, gitun-an nako ang area book uban sa akong kompanyon. Daghang ngalan ang kaparehas sa iyang apilyedo. Nag-ampo kami, mihimo sa kinamaayohan namong desisyon kon asa moadto, ug namasin sa among lakaw.

Didto sa unang pultahan nga among gituktok among napalgan ang pamilya sa misyonaryo. Diha dayon labihan ang among kalipay. Nanagbakho kami ug naggakos sama sa pamilya. Samtang gipakli namo ang album sa mga litrato sa pamilya, nakita nako ang mga litrato sa akong pamilya atol sa among bunyag.

Nauli ko human sa akong misyon ug nahibaloan nga ang kahimtang sa akong pamilya walay kalamboan. Ang akong papa wala gihapon makatrabaho. Duha ka ig-agaw midapit nako nga mopuyo uban nila sa Kibera—kinadelikadohan nga dapit sa Nairobi. Didto, mihimo ko og dapit nga matawag og balay.

Mga gang ang nagdumala sa Kibera, apan nagpalayo ko sa dapit diin sagad mahitabo ang krimen. Gibati nako ang kadili komportable, apan ang akong mga ig-agaw mitabang sa pagpanalipod kanako, nagseguro nga ang uban mahibalo nga relihiyoso ako ug angay nga respetohan.

Ang pagkaon sa hilit nga mga dapit kasagaran kutob ra sa tubig ug tsokolate nga pormahon og doughnut. Akong gipili nga sa gabii ko mokaon. Matag buntag, momata ko nga gutom. Sa simbahan, naningkamot ko nga mopahiyom ug magmalipayon aron ang mga miyembro dili makahibalo nga gigutom ko.

Niini nga panahon, nagserbisyo ko isip presidente sa elders quorum sa Langata Branch ug mieskwela kutob sa mahimo. Sa mga hapon sa Dominggo, mokuyog ko sa presidente sa branch sa pagbisita sa mga miyembro, nahibalo nga ang puti namong mga sinina mao ang dali nga target sa mga gang. Apan langit ang among pagbati kon makaserbsiyo mi sa uban, ug ang akong mga ig-agaw nagbantay namo samtang gilatas namo ang abogon nga mga dalan.

Paglaom nga Gigantihan

Usa kadto ka lisod nga panahon, apan uban sa pag-ampo, mibati ko nga gisuportahan ug wala mawad-i sa paglaom. Kadto nga paglaom nagantihan.

Wala madugay, gihatagan ko sa kahigayonan nga mainterbyo alang sa usa ka trabaho. Nakigkompetinsiya ko sa posisyon batok sa daghan pang uban nga mas kwalipikado nga may mga nahuman nga kurso ug mga sertipikasyon. Apan ako nakaadto og misyon, ug dunay pagtuo ug pagsalig nga ang Ginoo motabang nako. Militok ako og pag-ampo ug dayon miadto aron moatubang sa panel nga tig-interbyo.

Dapit sa kataposan sa akong interbyo, sa kalit miingon ko, “Kanus-a ko magsugod?” Paglabay sa duha ka semana, usa ako sa duha nga nadawat. Sa wala madugay nailhan nako ang akong kaugalingon isip nag-una nga salesman, nga nag-abli og mga pultahan aron motaas ang akong katungdanan, lakip sa tawag gikan sa chief executive officer nga isakop ako sa iyang dako nga kompanya. Karon, napanalanginan ko nga mahimong usa ka bana ug amahan ug nagserbisyo isip bishop sa Langata Ward.

Gihinumdoman nako ang Pasko sa tuig 2009 ug ang misunod nga mga panglimbasog isip usa ka halandomon nga leksiyon—usa ka panahon nga ang among mga panlimbasog nahimo nga among mga panalangin ug ang Ginoo mitunol sa malumong mga kaluoy ngari kanamo sa labihan ka buhong tungod sa among pagtuo.