Usa ka Bag-ong Kasingkasing

Usa ka Bisperas sa Pasko samtang nagpuyo kami sa Pilipinas, ang akong amahan sayo nga mipauli gikan sa iyang trabaho isip usa ka chaplain sa Clark Air Base.

“Day, Tam,” miingon siya, “Gusto ko nga magluto ka og cookies ug magbansay og mga kanta sa Pasko gamit ang imong gitara. Pagkolekta usab og mga butang alang sa mga kostyum sa Pagkatawo ni Jesus. Igahin nato ang atong gabii sa prisohan.”

Nasuko gihapon ko sa akong mga ginikanan sa pagbalhin sa among pamilya sa laing nasod. Ang kataposang butang nga gusto nakong buhaton mao ang paggahin sa Bisperas sa Pasko sa prisohan sa militar. Mireklamo ko pero walay nahimo.

Sa dihang misulod kami sa prisohan, gigiyahan kami ngadto sa mingaw nga kwarto nga adunay mga lingkoranan ug usa ka lamesa. Sa wala madugay miabli ang pultahan, ug ang akong papa mainitong midapit og usa ka grupo sa gikadenahan ug giposasan nga mga lalaki ngadto sa kwarto.

Dayon nanganta kami og mga kanta sa Pasko, mipasundayag pag-usab sa Lucas 2, ug nalingaw sa niluto sa balay nga pagkaon—pareha sa mga butang nga among himoon sa panimalay. Apan adunay lahi.

Ang akong batan-ong kasingkasing nalukmay nianang gabhiona samtang nakasaksi ko sa mapainubsanong pasalamat niadtong minahal nga mga lalaki. Usa kanila, nagpasabot sa among gipasundag nga Pagkatawo ni Kristo, nangutana, “Makaapil ba ako niana?” Ang uban gusto usab nga moapil. Sa wala madugay, dugang nga “mga anghel” mipahibalo sa espesyal nga pagkatawo sa Manluluwas.

Kadto nga mga piniriso dili gusto sa lugar nga ilang nahimutangan, ug ako anaa sa usa ka nasod nga dili nako gusto. Apan nasayod ko nga kami nakit-an, nailhan, ug gimahal sa atong Manluluwas, kinsa didto usab sa usa ka dapit nga mapainubsanon Siyang nagtinguha nga kuhaon (tan-awa sa Lucas 22:42). Sa akong 16 anyos nga kasingkasing, nasayod ko nga ako wala mag-inusara.

Kadtong mga lalaki dili lamang ang mga tawo nga mipahid sa mga luha nianang Bisperas sa Pasko. Ang makapausab sa kinabuhi nga hitabo nianang gabhiona dili among kasaulogan sa Pasko apan ang gahom ni Kristo sa pagbayaw ug pag-ayo.

Hapit na mag-50 ka tuig sukad nianang Bisperas sa Pasko, apan nagpabilin kini nga usa ka sagrado nga handomanan. Ang akong labing espesyal, wala damha, ug mahimayaon nga gasa sa Pasko nianang tungora mao ang usa ka bag-ong kasingkasing. Ang tanan nausab alang kanako human niana.

Gisagop nako ang kinabuhi sa Pilipinas, nakakita og mga higala, nakakaplag og mga paagi sa pagserbisyo, ug mipili nga magmalipayon—ang tanan tungod sa saksi nga akong nadawat gikan ni Jesukristo ug sa Iyang gamhanan nga gugma nianang Bisperas sa Pasko sa prisohan.

Nasayod ko nga ang atong Manluluwas makabugto sa mga kadena gikan sa atong mga hunahuna ug sa atong mga kasingkasing kon kita moduol ngadto Kaniya. Siya mao ang atong labing mahinungdanong gasa.