“Si Jesukristo Mao ang Tinubdan sa “ “Masadyaon,” “Maayo,” ug “Labing Maayo nga Paglaom,’” Liahona, Dis. 2024.
Si Jesukristo Mao ang Tinubdan sa “ “Masadyaon,” “Maayo,” ug “Labing Maayo nga Paglaom”
Niining espesyal nga kapanahonan sa pagsaulog sa pagkatawo sa bata sa Betlehem, hinaot nga hinumdoman nato kanunay nga si Jesukristo mianhi sa kalibotan aron mahimo natong Manluluwas ug Manunubos.
Ang Pagkatawo, ni Sharlotte Andrus
Si Apostol Pedro ug ang mga propeta sa Basahon ni Mormon nga si Jacob ug si Moroni mipasabot og maayo sa espiritwal nga gasa sa paglaom diha kang Kristo sa mga paagi nga matudlo ang susama ka mapuslanong impormasyon.
Sama pananglit, namahayag si Pedro, “Magpasalamat kita sa Dios ug Amahan sa atong Ginoong Jesukristo kay tungod sa iyang dakong kaluoy gihatagan kita niya ug masadyaon nga paglaom pinaagi sa pagkabanhaw kang Jesukristo” (1 Pedro 1:3). Palihog timan-i ang paggamit sa pulong nga “masadyaon” sa paghulagway sa “paglaom.”
Si Jacob namahayag nga, “Busa, hinigugmang kaigsoonan, pakig-uli kaniya pinaagi sa pag-ula ni Kristo, ang iyang Bugtong anak, ug makaangkon kamo og pagkabanhaw, sumala sa gahom sa pagkabanhaw nga anaa kang Kristo, ug ihalad ngadto sa Dios isip ang unang mga bunga ni Kristo, nga adunay pagtuo, ug nakaangkon og maayong paglaom sa himaya diha kaniya sa dili pa niya ipakita dinhi sa unod ang iyang kaugalingon” (Jacob 4:11). Palihog bantayi ang paggamit sa pulong nga “maayo” sa paghulagway sa “paglaom.”
Ug si Moroni miingon, “Ug ako usab nahinumdom nga ikaw miingon nga ikaw nag-andam og usa ka balay alang sa tawo, oo, gani diha sa mga mansyon sa imong Amahan, diin ang tawo makaangkon og labaw nga maayo nga paglaom; busa ang tawo kinahanglan molaom, o siya dili makadawat og usa ka kabilin diha sa dapit nga imong giandam” (Ether 12:32). Palihog bantayi ang paggamit sa pulong nga “labing maayo” sa paghulagway sa “paglaom.”
Unsa Ang Paglaom diha kang Kristo?
Ang espirituhanong gasa sa paglaom diha kang Kristo mao ang malipayon nga pagpaabot sa kinabuhing dayon pinaagi sa “mga maayong buhat, kaluoy, ug grasya sa Balaang Mesiyas” (2 Nephi 2:8) ug kusganong tinguha alang sa gisaad nga mga panalangin sa pagkamatarong. Ang mga paghulagway nga “malipayon,” “maayo,” ug “labihan ka maayo” dinhi niini nga mga bersikulo nagsugyot og usa ka padayong paglambo ug puno sa kaseguroan mahitungod sa Pagkabanhaw ug sa kinabuhing dayon pinaagi sa pagtuo kang Jesukristo.
Si propeta Mormon mipasabot:
“Ug usab, akong hinigugma nga mga kaigsoonan, ako mamulong nganha kaninyo mahitungod sa paglaom. Unsaon nga kamo makakab-ot ngadto sa hugot nga pagtuo, gawas nga kamo magbaton og paglaom?
“Ug sa unsa kana nga kamo molaom? Tan-awa ako moingon nganha kaninyo nga kamo magbaton og paglaom pinaagi sa pag-ula ni Kristo ug sa gahom sa iyang pagkabanhaw, aron mabanhaw ngadto sa kinabuhi nga dayon, ug kini tungod sa inyong hugot nga pagtuo diha kaniya sumala sa saad.
“Busa, kon ang usa ka tawo adunay pagtuo siya kinahanglan nga magbaton og paglaom; kay kon wala ang pagtuo wala usab ang paglaom” (Moroni 7:40–42).
Ang Plano sa Amahan sa Kalipay
Ang paglaom diha kang Kristo nga usa ka masadyaon, maayo, ug labing maayo magsugod sa kahibalo nga ang Dios nga Mahangtorong Amahan buhi. Siya ang atong Langitnong Amahan, ug kita iyang espiritung mga anak. Sa tinuod kita espiritung mga anak sa Dios ug nakapanunod og balaanong mga kalidad gikan Kaniya.
Ang Amahan mao ang tigpasiugda sa plano sa kalipay (tan-awa sa Abraham 3:22–28). Isip espiritung mga anak sa Dios, kita “midawat sa Iyang plano diin ang Iyang mga anak makaangkon og pisikal nga lawas ug makaangkon og yutan-ong kasinatian sa paglambo ngadto sa kahingpitan ug sa kataposan makakab-ot sa ilang walay kataposang kapalaran ingon mga manununod sa kinabuhing dayon.” Diha sa mga kasulatan, atong nakat-onan nga: “Ang Amahan adunay lawas nga unod ug mga bukog nga mahikap ingon sa tawo; ang Anak usab; apan ang Espiritu Santo walay lawas nga unod ug mga bukog, apan usa ka personahe sa Espiritu” (Doktrina ug mga Pakigsaad 130:22). Sa ingon niana, ang pag-angkon og pisikal nga lawas mahinungdanon sa proseso sa pag-uswag padulong sa atong balaanon nga destinasyon.
Mga binuhat kita nga dunay duha ka bahin. Ang atong espiritu, ang mahangtoron nga bahin kanato, gisul-oban og mga lawas nga pisikal ug mag-agad sa mga tinguha ug mga gana sa mortalidad. Ang plano sa Amahan sa kalipay gidisenyo nga mohatag og direksiyon alang sa Iyang mga anak, aron matabangan silang makabalik nga luwas ngadto Kaniya uban sa nabanhaw, nahimaya nga mga lawas, ug makadawat sa mga panalangin sa walay kataposang kamaya ug kalipay.
Ang Bata nga si Kristo, ni Sharlotte Andrus
Ang Makatubos nga Tahas ni Jesukristo sa Plano sa Amahan
Si Jesukristo mao ang Bugtong Anak sa Mahangtoron nga Amahan. Mianhi Siya sa kalibotan aron buhaton ang kabubut-on sa Iyang Amahan (tan-awa sa 3 Nephi 27:13). Si Jesukristo mao ang usa nga gidihogan sa Amahan nga mahimo nga Iyang personal nga representante sa tanang butang kabahin sa kaluwasan sa katawhan. Siya ang atong Manluluwas ug Manunubos kay Siya ang mibuntog sa kamatayon ug sa sala.
Nanagna si Alma ngadto sa mga tawo sa Gideon ang mahitungod sa makaluwas nga buhat sa Mesiyas:
“Ug siya magpadayon, mag-antos sa mga sakit ug mga kasakit ug mga pagtintal sa matag matang; ug kini aron ang pulong matuman nga nag-ingon nga siya modala diha kaniya sa mga sakit ug mga balatian sa iyang mga katawhan.
“Ug siya modala diha kaniya sa kamatayon, nga siya mahimo nga mohubad sa mga higot sa kamatayon diin naghigot sa iyang mga katawhan; ug siya modala diha kaniya sa ilang mga kahuyang, nga ang iyang kasingkasing mahimo nga mapuno uban sa kaluoy, sumala sa unod, nga siya mahimo nga masayod sumala sa unod unsaon pagtabang ang iyang mga katawhan sumala sa ilang mga kahuyang.
“Karon ang Espiritu nahibalo sa tanan nga butang; bisan pa niana ang Anak sa Dios mag-antos sumala sa unod nga siya unta modala diha kaniya sa mga sala sa iyang katawhan, nga siya unta mopapas sa ilang mga kalapasan sumala sa gahom sa iyang kaluwasan” (Alma 7:11–13).
Ang unang baroganan sa ebanghelyo mao ang pagtuo diha sa Ginoo nga si Jesukristo. Ang tinuod nga hugot nga pagtuo magtutok diha sa ug ngadto sa Manluluwas ug maghimo kanato sa pagsalig Kaniya ug sa pag-angkon og hingpit nga pagsalig sa Iyang gahom sa pagluwas kanato gikan sa kamatayon, molimpyo kanato gikan sa sala, ug mopanalangin kanato og gahom lapas sa atong kaugalingon.
Si Moroni mipamatuod, “Ug tungod sa katubsanan sa tawo, nga miabot pinaagi ni Jesukristo, gidala sila pagbalik ngadto sa atubangan sa Ginoo; oo, sa ingon niini ang tanang tawo natubos, tungod kay ang kamatayon ni Kristo mipahitabo sa pagkabanhaw, nga mipahitabo sa katubsanan gikan sa walay kataposan nga pagkatulog, diin niana nga pagkatulog ang tanang tawo mahigmata pinaagi sa gahom sa Dios sa higayon nga ang trumpeta motingog; ug sila mobangon, mga dili halangdon ug mga halangdon, ug ang tanan mobarog sa atubangan sa iyang hukmanan, nga natubos ug nabadbaran gikan sa walay kataposan nga higot sa kamatayon, diin kana nga kamatayon mao ang temporal nga kamatayon” (Mormon 9:13).
Mopamatuod ko nga ang Manluluwas mibugto sa mga higot sa kamatayon. Nabanhaw Siya, Buhi Siya, ug Siya ang bugtong tinubdan sa masadyaon, maayo, ug labing maayo nga paglaom.
Usa ka Angkla sa Kalag
Si propeta Ether mipamatuod, “Busa, kinsa kadto nga motuo diha sa Dios tingali uban sa kasiguroan molaom alang sa maayo nga kalibotan, oo, gani usa ka dapit diha sa tuo nga kamot sa Dios, kansang paglaom moabot pinaagi sa hugot nga pagtuo, naghimo og kalig-on ngadto sa mga kalag sa mga tawo, diin makahimo kanila nga lig-on ug makanunayon, sa kanunay puno sa maayo nga mga buhat, gitultolan ngadto sa paghimaya sa Dios” (Ether 12:4).
Niining espesyal nga kapanahonan sa pagsaulog sa pagkatawo sa bata sa Betlehem, hinaot nga hinumdoman nato kanunay nga si Jesukristo mianhi sa kalibotan aron mahimo natong Manluluwas ug Manunubos. Gitanyag Niya kanato ang dili mapalit nga espirituhanong mga gasa sa kinabuhi, kahayag, pagbag-o, gugma, kalinaw, panglangtaw, kamaya, ug paglaom.
Dapiton ko kamo sa pagpangita sa tukmang paagi sa espirituhanong gasa sa paglaom diha sa Manluluwas pinaagi sa pagtuon sa mga pagtulun-an ug sa mga pagpamatuod sa karaan ug sa modernong mga propeta kabahin sa Iyang maulaon nga sakripisyo ug tinuod nga Pagkabanhaw. Kon buhaton ninyo kini, mosaad ko nga ang inyong pagpamatuod sa kabalaan sa Manunubos malig-on, ang inyong pagkakabig Kaniya mas molambo, ang inyong tinguha ug determinasyon sa pagbarog isip maisog nga saksi Kaniya molambo, ug mapanalanginan kamo og ankla sa inyong kalag—gani sa kamasadyaon, kamaayo, ug labihan ka maayo nga paglaom.
Kauban sa Apostoles nga mipamatuod mahitungod Kaniya sa tibuok kapanahonan, malipayon akong mopahayag sa akong pagsaksi nga si Jesukristo ang buhi nga Anak sa buhi nga Dios. Siya ang atong nabanhaw nga Manunubos nga adunay nahimaya, mahikap nga lawas nga unod ug mga bukog. Ug tungod sa pagtubos ug pagpasig-uli sa Dios nga gihimong posible sa Dios alang sa tanang katawhan, makadawat kita sa espirituhanong kaseguroan ug masadyaon, maayo, ug mas labing maayo nga paglaom nga “banhawon usab ang tanan tungod sa ilang pagkahiusa kang Kristo” (1 Mga Taga-Corinto 15:22).