Koaua aika Uoua ake a Buokai n Ataa te Nanorinano

Teuana te taneiai are I namakina raoi iai te nanorinano e bon riki n au mition. I taku bwa a mwaiti mitinare ake a kaonaki ma te namakin ni karawawata n aia tai ni kairiia aomata nakon Iesu Kristo. N au mition, I kabanea te aoa n te bongina ni kakaea temanna bwa N na reireinna ma n angin te tai I aki butimwaeaki irouiia. I aki namakina te tokanikai. I aki namakina te tau n au kekeiaki. Tokin te tai, I a moanna n namakinna bwa I aki tau.

Tao bon tiaki raoi te bwai ae I kainnanoa te nanorinano, bwa ngke I kabwarabwara au namakin nakon au beretitenti n te mition, e buokai n ataia raoi bwa ngaia e mena irou te iango ae aongkoa I a kainaomataaki man kangaanga ake a kaitiboo ma ngaia mitinare ni kabuta te aonaaba. Ma bon tiaki tii ngai te moan mitinare ae I aki butimwaeaki, ao bon tiaki naba ngai te kabane.

I a kunea raoi bwa ngaia a riki au kangaanga aikai bon mai irou, n aki moa iangoa rongorongoia mitinare n taai ake rimoa—n ai aroia Abotoro ake Tengaun ma uoman, natin Motiaea aika mwaane, ao Aramwa te Nati—ake a tia n kaaitara ma te bwainikirinaki ao te katinanikuaki ae korakora riki nakon ae riki nakoiu.

Irarikin ae na nanokawaaki i bon irou, I a tabe n namakinna bwa I tei ni kaan ma Iesu Kristo inanon karawawatakiu. Ao ngkana e roko te ang ni maamaa ibukin au kekeiaki ae aki tau, I uringa ana reirei, Beretitenti Jeffrey R. Holland, Bonomwi ni Beretitenti n te Kooram n Abotoro n te Tengaun ma Uoman: “Ana Mwakuri ni Kamaiu [Kristo] e na kairiia mitinare nakon tibwangaia ae moan te kakawaki nakoia aia aomata. Ngkana ko rawawata, ke ni katinanukuaki, … Ko a tia n maeka inanon te maiu ae akea n ai arona n te aonaaba aei, te maiu inanon te itiaki ma te kororaoi.”

E okirikaaki au ururing nakon te taneiai aei ngke I tangiria ni kan nanorinano ao n onimakina te Uea.

I reiakinna arou aika bati bwa bon ngai natin te Atua inanon au tai n te mition. Ma ngke I a okira mweengau, I ataia bwa e mwaiti riki baika a kakawaki bwa N na uringnga bwa aomata ni kabane bon natin naba te Atua.

I mwiin okiran mweengau, ao I weteaki nakon nakoau ae rangi ni kangaanga ao n tuangaki bwa N na tararua teuana te botaki ae rangi ni kakawaki. I aki ataia bwa tera ae n na karaoia, ao I aki kona ni karekeia aomata ake a na riai ni buokai. I kanakoa au i meeri ae rangi ni, koaua raoi, ao n rangi ni kakaongora taekana.

E bon eti bwa e bongana te nakoa ae I weteaki nako iai ao man kainnanoa te boutoka ae bati, ma ngaia I a tibwa ataia raoi bwa bon tiaki aio te anga ni kaungaia aomata. I kainnanoia bwa N na rabakau n nanorinano; I riai n ataia bwa bon iai aia kangaanga aomata n tatabemaniia nako.

N aron are e reirei Unimwaane Steven E. Snow ngke e a riki bwa te membwa n te Itingaun, “ngkana ti nanorinano, ara tataro a na kaekaaki; ara iango a na aki burebureaki; ti na mwakuri raoi n nakoara; ao ngkana ti reitinako ni kakaonimaki, n tokina ti na oki nako matan Tamara i Karawa.”

Ao e bon koaua, bwa I rang namakina riki te kimwareirei ni karaoan nakoau inanoni maiu ngkai I kariaia bwa N na bwaina te nanorinano.

Irou, reiakinan te koaua ibukin te nanorinano bon kabaerantakin koaua aika uoua aikai:

Ngai natin te Atua. Ao I maeka ma aomata aika natin naba te Atua.

Ngkai I tabe n reiakina riki taekan te nanorinano, I a kakoaua raoi te bwai are e reireia Unimwaane Quentin L. Cook man te Kooram n Abotoro ake Tengaun ma Uoman: “Te Nanorinano bon tiaki karekean te tokanikai ibukin kaotan bannam ke te tokanikai ma tabeua kangaanga aika a bubura. … Bon karekean te mweengaraoi n te bong ao n te aoa are ti kona iai ni katan i aon te Uea, ni beku Ibukina, ao n tokanikai n Ana kantaninga.” I reiakinna bwa ngaia I bon kona n tokanikai n ana kaantaninga te Uea—bon tii ngkana I anga nanou Nakoina ao n onimaki irouna bwa bon Ngaia ae ataa te kabanea n tamaroa ibukiu.

I ataia bwa ngkana ti kekeiaki n nanorinano ao ni katootonga te Kristo, Tamara are i karawa e na bon kakabwaiaiira ni kaineti ma ara kekeiaki.