“Ana Mwakuri te Uea ae Korakora ao Tibwangara ae Korakora,” Riaona, Turai 2024.
Ana Mwakuri te Uea ae Korakora ao Tibwangara ae Korakora
Ngkana ti tatangira, tibwatibwa, ao ni kakao, ti mwakuri ma te Uea ni buokiia aomata aika a rangi ni kakawaki n tatabemaniia bwa a na Nakoina.
Burabeti ni kabane n te kabanea ni bong, ae korakora aio a reireiniia kaain Ana Ekaretia Iesu Kristo ibukiia Aika Itiaki ni Boong aika Kaitira bwa a na tibwaua ana euangkerio Iesu Kristo ae kaokaki. Inanon au tai ni maiu, iai tabeua banna ni katooto aika a roko n au iango:
Beretitenti David O. McKay (1873–1970), te burabeti inanon au tai ni kairake, e taku, “Membwa ni kabane bon mitinare.”
E reirei Beretitenti Spencer W. Kimball (1895–1985), “Te bong are e uotaki te euangkerio nakon taabo nako aika a mwaiti ao aomata bon aikai ao ngkai,” ao “ti riai ni kananaua kawaira n teirake ao ni waakinako” n tibwaua te euangkerio ma tabeman.
E taku Beretitenti Gordon B. Hinckley (1910–2008): “Moan te korakora ara mwakuri, moan te korakora mwiokoara n ibuobuoki ni ukoukoriia naake a na reireinaki. E a tia te Uea ni kawenea i aora te mwioko n taetaekina te euangkerio nakoia aomata nako. Aio e na bon anaa [ara] mwakuri ae te kabanea n tamaroa.”
Ao e reirei Beretitenti Russell M. Nelson: “Te mwakuri ni mitinare bon te mwakoro ae rangi ni kakawaki ibukin ikoikotaia Iteraera. Te ikoikotaki anne bon te mwakuri ae moan te kakawaki ae e a karaoaki ngkai iaon te aba. Akea ae e kona ni kabotauaki ma aron korakorana. Akea riki ae e kona ni kabotauaki ma aron kakawakina. Ana mitinare te Uea—Ana reirei—a ikarekebai inanon te kakaewenako ae korakora aei, te waaki ae e korakora, te mwakuri ae e korakora i aon te aba n te bong aei.”
I a moanna n ataa aio i bon irou ngke I mitinare inanon au tai ni kairake n te British Mition. I a bon kakoaua raoi riki n te bong aei. Ngkai ngai ana Abotoro te Uea ae Iesu Kristo, I kakoaua bwa taian tibwanga a bon mena n taabo nako ni buokiia aomata nakon Kristo man kaotan ara tangira, tibwauaan ara koaua, ao ni kaoiia bwa a na raoniira n namakina kakukurein ana euangkerio Iesu Kristo.
E Waaki Nako te Mwakuri
Bon tibwangau bwa N na karaoa mwiokoau n ana Tabo ni Mwakuri te Ekaretia ibukia Mitinare ni moan boreetiakin te boki ae Taetaekina Au Euangkerio e kabwarabwaraaki n 2004, ao ngke e a manga moan boreetiaki riki te kauoua n tai n 2023. I kakoaua bwa Taetaekina Au Euangkerio e a tia ni kakabwaia te mwakuri ni mitinare n te kawai ae rangi n nano.
Te boki ae boou ae Taetaekina Au Euangkerio bane n iai inanona bwaai ake ti a tia n reiakin man 2004, kaetieti man ana kairi te tamnei mairouia kaain te Moan Beretitentii ao te Kooram n Abotoro ake Tengaun ma Uoman, ao bitaki ake a karaoaki ibukin tibwauaan te euangkerio n ririki are a maiu iai bwaai man te iti. Tabeua mai buakon bitaki aikai a bon riki man kakoroan nanon te mwakuri ae moan te tamaroa.
Ti kunea bwa tibwauaan te euangkerio n te aro ae bebete, n ae riai, ao ni bon teina rinanon tuua n “tangira, tibwatibwa, kakao” e kakabwaia te abanuea n te aro ae moan te korakora. E tibwaua te euangkerio Iesu Kristo n te kawai aio ngke E maeka i aon te aba. E tibwaua Maiuna ao Ana tangira ao e kaoiia ni kabane Nakoina (taraa Mataio 11:28). Arom n tangira, n tibwatibwa, ao ni kakao n aron are E karaoia bon te kakabwaia ae onoti ao mwiokoaia kaain te Ekaretia ni kabane.
Waaki ma te Tangira
N te Onaroka are i Ketetemwane ao iaon te kaibangaki, Iesu Kristo e uoti i Aona “marakira, aorakira, karawawataakira, mamarara, ao ara bure ni kabane” (Aramwa 7:11). Aio “e karekea [Nakoina], … te kabanea ni korakora, bwa e na ruru ibukin te maraki, ao n wawanako te rara man bwangabwangan kunna” (Reirei ao Berita aika Tabu 19:18). Man Ana Mwakuri ni Kamaiu ao Mangautina, Iesu Kristo e a tia n karekea nakoira ni kabane te kamaiuaki ao te karietataaki.
Rairakira nakon te Tia Kamaiu ao n iangoi inanora Ana mwakuri ake e a tia ni karaoi ibukira e na kaona nanora ma ara tangira Ibukina. E bitii nanora nakoia tabeman ao n tua bwa ti na tangiriia (taraa Ioane 13:34–35) ao n tibwaua Ana euangkerio nakoia (taraa Mataio 28:19; Mareko 16:15). Ngkana a namakinna naake a maeka irarikira bwa ti tangiriia ma nanora ae koaua ma ni mwannanoiia, a na kaukii nanoia ni butimwaea ara rongorongo, n aron naba te Uea ae Ramonaai ngke e kauka nanona ni butimwaea te euangkerio man ana tangira ao ana mwakuri n ibuobuoki Amon (taraa Aramwa 17–19).
Ngkana ti tibwauaa te euangkerio, ti na waaki ma te tangira. Ngkana ti reitaki ma aomata inanon te tangira—n uringnga bwa bon ngaiia tarira ma mwaanera ao natin Tamara are i Karawa ae E tangiriia—ao a na reke tibwangara n tibwauai bwaai ake ti atai bwa a koaua.
Ingainga ni Karaoan ae Raoiroi ao n Tibwatibwa
Akea ae e bane nanona riki n tibwauaan te euangkerio nakon Beretitenti M. Russell Ballard (1928—2023). N ana kabanea ni marooro n te maungatabu ni kabuta, e kaota ana koaua, “Teuana te bwai ae moan te mimitong ao n tamaroa ae riai n ataia temanna n te aonaaba aei [ae] Tamara are i Karawa ao te Uea Iesu Kristo a tia ni Kaotiia ni boong aika kaitira ao e a tia Iotebwa [Timiti] ni bukinaki bwa e na kaoka bwaninin ana euangkerio Iesu Kristo ae akea tokina .”
Inanon maiuna ae bwanin, ao angiina n te aonaaba ni kabuta, e korakora ingaingan nanon Beretitenti Ballard ni karaoan tabena n tibwaua te rongorongo ae kakawaki aei ma aomata n tatabemaniia nako. E kaungaira bwa ti na karaoa ae aron naba aei. E reireiniira bwa ti kona n tibwaua te euangkerio “n riki bwa rao aika a tamaroa ao man mwamwannano ni kakaota ara tangira.” Ni karaoan aio, ti “kaotaa te euangkerio inanon maiura, ao … ni kaotaa nakoia [aomata] kakabwaia are ena reke man te euangkerio.” Ko kona naba ni “kaota ara koaua n te bwai are [ti] ataia ao ni kakoaua ao are [ti] namakinna.” Beretitenti Ballard e reireiniira, “Te kakoaua ae itiaki … e kona ni uotaki iroun te Tamnei ae Raoiroi nako nanoia tabeman ake a tauraoi ni karekea.”
Tibwauaan ana euangkerio Iesu Kristo are e a tia ni kaokaki bon te bwai ae kakorakoraaki iai nanon Beretitenti Ballard. Ko kona n ingainga ni karaon ae raoiroi—n ai arona—n tibwauaan te euangkerio n am taetae ao am mwakuri. Ti aki kona n ataia bwa antai mai buakora aika a ukoukora otan te euangkerio ma aki ataia bwa a na kunea iaa (taraa Reirei ao Berita aika Tabu 123:12).
Anga te Kakao ae Nako Mai Nanom
Ni buokiia aomata bwa a na nakon Kristo, ti kaoiia bwa a na namakina te kimwareirei are e uotia te Tia Kamaiu ao Ana Euangkerio. Ti kona ni karaoa aio ni kaoiia bwa a na roko n te waaki ni kakukurei, ni wareka ana Boki Moomon, ke ni kaitibo ma mitinare. Ko kona n kanakoa ara kakao ae nako mai nanora nakoia bwa a na raoniko ni kaea te bootaki n toa.
Ti kaea te bootaki n toa ni katoa wiiki n “neboa te Atua ao ni kana te toa ni kauringa Iesu Kristo ao Ana Mwakuri ni Kamaiu”.” Aio te tai ae onoti ibukiia aomata n namakina te Tamnei, ni kaniiaki nakon te Tia Kamaiu, ao ni kakorakoraaki aia onimaki Irouna.
Ngkai ti kakaei nako aanga ni kaota ara tangira, n tibwatibwa, ao ni kakao, n ara babaire ma ara mwakuri ti riai ni kairiia aomata ake a ibuobuoki bwa a na roko n ira te bootaki n toa. Ngkana a butimwaea ara kakao ao a ira te bootaki n toa, a taraa n teimatoa ni kawain te berita nakon te bwabetio ao te rairaki. I kakoaua ma nanou ni kabane bwa e na reke te tokanikai ae korakora ngkana ti kaoiia aomata bwa a n roko n te bootaki n toa ao n buokiia ni kinai kakabwaia ake a kona n karekei man karaoan aio.
E Na Kairiira te Uea
Ti aki kona n ataia bwa tera taian tokanikai ao kangaanga ake ti na karekei ngkana ti tangiria, tibwatibwa, ao ni kakao. Natin Motiaea mwaane “a mwananga man te kaawa ae bubura teuana nakon te kaawa ae bubura teuana, ao man te bata n taromauri teuana nakon teuana, bwa a na kabwarabwara man reirei ana taeka te Atua i buakoia; ao ngaia are a moanna n nako raoi aia waaki.” Man aia mwakuri, “ngaa ma ngaa ake a karekea ataakin te Uea,” ao a mwaiti “ake a rairaki … [ao] aki manga tannako” (Aramwa 23:4–6).
Tao tiaki aio ae e na riki nakoira n taainako, ma te Uea e berita bwa e na mwakuri irarikira ibukina bwa a bane ni kakawaki aomata Irouna. Ao ngkana ti katuka ara onimaki iroun te Uea ao ni karaoa Ana mwakuri, E na kairiira bwa ti na kanga n tibwaua ana euangkerio ma tabeman man kaotan ara tangira nakoia, n tibwaua maiura ao ara koaua mangaiia, ao ni kaoiia bwa a na raoniira bwa ti na Iriiria.
“Ai korakorara kimwareirei [ra]” (Reirei ao Berita aika Tabu 18:15) ngkana ti kabonganai taian tibwanga aikai ni buoka te Uea ae Iesu Kristo n Ana mwakuri ae moan te korakora ni uotiia aomata Nakoina.