Man te Rootongitong nakon te Kakukurei

N 1988, I mwananga ma raou n I-Buritan aika tia reirei bwa ti na nako n angareirei n te reirei i Sudan. A rangi n tamaroa ataei aikai, ao ti waekoa ni kamwaingaki nakon te tabo ae a kainnano kaaina. Ara tia kamwakuri, bon te, tia kairiiri ae buakaka ao ni katuuaia naake a kataia n ekinakoa n ana iango. E rangi n riribaai man te tai are I tei iai ibukin te aomata are e a bon tia ni bwainikirinna.

N te bong teuana ao e a weteai nakon ana aobiti. Tao nakon te itera n aoa, ao e a taekin naba nakoiu taeka aika a kammaraki ao ni kakamaku. I kitana ana ruu ma te kubanako ae korakora. Akea au iango ni karokoa e bwara te reirei n te bong anne. Ni katoa tairiki ao e okioki mwanewen ana taeka n au iango.

I mwain matu, ao I tekateka i aon au kainewene ao ni wareware n booki aika tabu. I katorobubua i mwiina ao n tataro ibukin karekean te rau n nano, ma I bon aki namakinna. I mena i aon au kainiwene ao n aki reke matu. Tao uoua ke nako riki au tai, n teirake, n wareware, ni katorobubua, ao n tataro, ma I bon aki buokaki.

“O, eng” I taku n au iango, “E bon aki kona ni kaekai ara tataro n taainako Tamara are i karawa nakon te tai are ti kainnanoia iai.” I kabwara nanou man te iango ae buakaka aei, ao n aki reke matu n te tairiki.

Ma ngke I a manga wene riki, ao e roko n au iango bwa , “Iai riki te bwai teuana ae I kona ni karaoia.” I moanna ni kaokioka mwanewen te otenanti n te tembora ni bon nakoiu n au iangoi. Ngke I karaoa aio, iai te bwai ae riki ae rangi ni kamimi. I namakina te rootongitong bwa e raanga nako mai irou, ao te kimwareirei ma te rau e raanga n rin inanou.

I teirake ao n tataro, ao n tang ni karabwarabwa nakon Tamau are i karawa. I toka n au kainiwene i mwiina ao e a reke matu. Te bong are i mwiina, ao ngai irou bwa e na kaonaki ma te maaku, ma e bitaki nakon te bong ae rangi ni kakukurei ao ni kabanea au tai ma ataein te kiraati.

I namakinna bwa e tangirai te Uea ma N na iangoi raoi mwanewen taian otenanti n te tembora. E taetae nakoia aika itiaki ake a tia ni karekea te kakabwaia n te Tembora i Nauvoo, Beretitenti Bringham Young (1801–1877) e taku, “Kamena inanom, mwaakan te berita ae tabu are kam a tia ni karaoia inanon ana Auti te Uea, bwa e rikirake ao ni maiureirei inanomi” Ngkai e rikirake inanora ao n ara iango ara berita aika tabu n te tembora, ti na bon kunea te korakora, te rau, ao te mwengaraoi.