Karikinan ana Tokanikai te Mitinare: 60 te Ririrki inanon karaoakina

Kamatataan te tamnei iroun Carolyn Vibbert

I tangiraki n taainako Reirei ao Berita aika Tabu 18:10: “Uringnga bwa e korakora kakawakia aomata imatan te Atua.” Ao n tabetai e na kairiira ngaira aika a mwaiti bwa ti na beku n tibwaa ara kakoaua bwa aonga n uotaki tamneia nakon te Tia Kamaiu (taraa 2 I-Korinto 13:1).

I kauringaki man kakawakin iangoan te mwakuri ni mitinare ngke I kauka au meeri n te bong teuana. Te tari are e taku bwa ngaia natin te beretitenti n te mition i Wichita, Kansa, ao n tuangai ngkana bon ngai kainnaban Robert Monson. Te tari aio e kakaea te mitinare ngkoa ae Monson are e beku n te Central States Mition n te ririki 1959. Bon anne kainabau.

E karakina nakoiu taekaia uoman mitinare aika ataeinimwaane ake a karekea te kaotioti bwa a na rinnakoa teuana te auti. Ngke a kauka te mataroa ao a kunea temanna te unaine ao n tuatua te aine aei bwa a na okiria n te bong are i mwiina. A kabaea aia tai.

Ngke a manga okira kaua te aine aei, ao a kunea bwa ngaia te aine aei bon iai ana boki rimoa aika teniua kanoana are a ikotaki iai (Ana Boki Moomon, Reirei ao Berita aika Tabu, ao Bwaeao ae Bati Boona) are e anganaki irouia mitinare n te ririki 1959. E tia ni kabanea ana tai ni wareware iai ao n ataia bwa a bon koaua reirei ake i nanona. E bon aki te roko ni kaina te Ekaretia bwa e ribaaki iroun kainabana bwa e na bwabetitoaki. E a tia ni mate kainabana, ao e tataromwaaka bwa e na manga reke riki ana tai ma mitinare. Inanon ana boki aio bon araia uoman mitinare man te ririki 1959: Robert Monson ao Granade Curran, kainabau ma toana.

I mwiin tabeua te wiiki, e reiakina te aine aio taekan te babaire ni kamaiu ao taian kakabwaia n te tembora. E motirawa natina te mwaane n ana ririki ae 22, ao e rangi ni ingainga nanona ni kan maeka ma ngaia i mwiin te maiu aei. Ngke e a kaoaki irouia mitinare bwa e na bwabetitoaki, e bon butimwaea te kakao ma te kukurei.

Kainabau ma toana, Unimwaane Curran, a tia ni motirawa, ma I kona ni katamneia n au iango bwa a kaea te bwabetito ae kakukurei aei n iteran te rabuna are teuana.

Ngke e karakina te rongorongo aei natin te beretitenti n te mition, I kauringaki iai bwa e na bon aki kona ni mwaninga taekara ara Tia Kamaiu. E na teimaroa irarikira n taainako ngkana ti kariaia bwa E na memena inanon maiura. Karakinan Takaio n te Nu Tetemanti, are e bon tamwarakea te aroka ae te tikumorea bwa e kan noora te Tia Kamaiu (taraa Ruka 19:1-10). E ngae ngke e mena i eta n te aroka, ma e bon nooraki naba iroun te Tia Kamaiu, ao n tuangnga bwa e na katairiki n ana auti. Bon titebo raoi ma, te tari te aine aio ngke e tataromwaaka ao n tataningaia mitinare bwa a na roko ni karebwerebwe n ana mataroa, ni karokoa a bon roko. E atai nanora ni kabane te Tia Kamaiu. “Bwa e na roko natin te aomata ni kamaiuia [ake] a bua” (Ruka 19:10).

A katauraoaki mitinare nakoina uoua te tai—ana moan mitinare bon inanon 60 te ririki n nako ao i mwiina a manga roko riki kanga inanon taai aikai—A kaira te tari te aine aio nakon Iesu Kristo ao a kunea bwa e kakorakoraaki aia koaua ao man reke te kimwareirei irouia inanon te Uea. I kakaitau ngkai I kona n ongora te rongorongo aio, I namakina te kimwareirei ni kairan nanon te tari te aine aio nakon te Tia Kamaiu (taraa Reirei ao Berita aika Tabu 18:15.).