“Tera ae Ti Konaa n Tataro Ibukina?,” Riaona, Turai 2024.
Nakomai, Iriirai
Tera Ae Ti Kona N Tataro Ibukina?
N Aramwa 33 ao 34, ti reiakinaki bwa ti konaa n tataro n taabo nako, n aki akaka taina, ibukin bwaai nako. Aikai tabeua katooto iaoia aomata tabeman aika tataro n taai aika kakaokoro.
Ngkana ko warekii taneiai aikai, iangoi angaa tabeua ake ko a tia n tataro “iaoia am nanai n te marae” ao “inanon am ruu ni bwai, ao n taabo aika raba, ao n te marenaua” (Aramwa 34:25, 26).
Ae Itiaki ni Boong aika Kaitira Alma Richards e kaaina te tiim n Olympic n 1912.
Te Tatato n te Olympics
Te tia kiba, Alma Richards kaain te tiim n Olympic n 1912 ibukin te biri ao te takakaro n te marae are e boo ngkoa i Stockholm, Sweden. Inanon tain te kaboo, a titiku temanna imwiin temanna ni karokoa ai bon ti Alma ao temanna riki n tiku.
“Ngke e katauraoia Alma ni kiba, e biriaitua ana iango. E a mena ikekei, n tei ibukin abana n te kabane n korakora ni kaboo n te aonaaba. Ma e namakinna bwa e kabwaka, ao kanga ai aron ae te aonaaba e tine iaon angana. E iangoa Utah, ana utu, ao ana kaawa. E iangoa BYU ao Aika Itiaki. E bobaraaki, ao e wirikiriki n butiia te Atua bwa ena anganna te korakora. ‘Ngkana e riai bwa nna tokanikai,’ e tataro, ‘Nna anga au kabanea n tamaroa ni katea te banna ni katooto ae tamaroa inanon bongin maiu.’”
E karekea kakorakoraana mairoun te Uea, e kiba Alma ao e nako riaon te kai. Ngke e aki nako are aiana, e a reke iroun Alma te meteera te koora.
Imwiina, raoraona “e kangoongoa n ana tataro are imwin kibana are e tokanikai iai. ‘I tangiria bwa kona aki ngare,’ e kaeka n karaurau Alma. ‘I tataro nakon te Uea bwa ena anganai te korakora bwa nna kona n nako n te kai arei, ao I nako.’”
Te tataro ni koonan te kawai
N 1898, Inez Knight ao Jennie Brimhall bon taian moan aine aika tuai iein ake a weteaki bwa mitinare ibukin Ana Ekaretia Iesu Kristo ibukiia Aika Itiaki ni Boong aika Kaitira. Teutana te tai imwiin rokoia n aia mition i Engiran, aine aika uoman aikai a nako n kabwarabwara i Oldham, te kaawa ni karao bwai ae uarereke irarikin Liverpool.
Inez Knight ma Jennie Brimhall a tataro ibukin buokaia n aia mwakuri ni ibuobuoki mitinare i Engiran.
Atai: kariaia n te tamnei mairoun Jennifer Whatcott Hooton
Taian titita ake uoman, aia beretitenti n te mition, ao tabeman riki mitinare ake a bootaki n te tairiki teuana. “A kamironron n koonan te kawai ae rangi ni bati te kakamwakuri iai, a tataro, ao a anenei anene n taromauri ni karokoa e mwaiti te koraki ni katobibiia.” E nakoraoi mwiin aia mwakuri ai ngaia are te beretitenti n te mition “e katanoataa bwa e na iai te boowi ae raka are ena karaoki n te bong are imwiina, ao e kaoiia ni kabane bwa ana roko n ongora te kabwarabwara mairouia ‘ainen te Moomon ni koaua aika maiu.’”
Tataro Ibukin te Bao
Sahr mai Bo, Sierra Leone, e mwananga n te rebwerebwe nako buuki bwa e na anaa te bwainaoraki ae a rangi ni kainanoia ana karo akea a kara. E tikunako n maan riki nakon are ea bon tia n baireia n buokiia ana karo n karaoa kaabwan aia auti, are ea tia n uruaki n te angibuaka. Ngke ea tia, ao ea bon roo.
Bukina bwa e a nang bwakanako te tai, e a bon taara ni kangaanga reken baona n oki. E a raraoma Sahr. Ngkana ai akea te bao, e a aitara ma te rianna n oki ae e aki tii abwabwaki ma e na nang rawata te kakamwarua ae kona n aitara ma ngaia. Te tiku n mwengaia ana karo bon tiaki te bwai ae kona n karaoia bukina bwa e na manga kaea ana tei nakon te moaningabong are imwiina. Irarikin anne, e aki tangiria n katikuiia ana utu ake imwiina n ti ngaiia n bong.
Te tataro ibukin taian bao rebwerebwe e taraa n aki riai, ma Sahr e bubutia te atua bwa e na buokia n karokoa n mwengana. Tabeua te miniti imwiina, e a kaoti naba te bao, ae bon tibwa kabwakaa temanna n te tabo ae e aki nang bati te mwamwananga iai aio. E nang karabwarabwa ngke e toka Sahr, ao e namakina te kakabwaiaaki ngkai e kona n reke okiran mwengaana ao n tau ana tai n manga kaea ana mwakuri ao ni kamanoia ana utu.
Tataro Ibukin Bitakin te Tai
Tari Miguel Troncoso mai Santa Cruz, Argentina, e kaingaingaa ongoraeakinan Unimwaane Carlos H. Amado man te Itingaun are ena taetae n ana titeiki. Ma Unimwaane Amado e baireaki tain ana marooro nakon tairikin te Kauabong, ao Tari Troncoso, te tia reirei n te kauarinan, e na anga reirei n te tairiki raoi anne. Ma nanomatoana n kan kaea te bootaki, e tataro ma ana utu ibukin buokana.
Tari Troncoso e taekina ana taneiai aio:
“Te bong are imwain te maungatabu, I namakinna bwa nna riai n marooro ma au mataniwii bwa nna moantaai n oki 20 te miniti imwain bwarana. … Ma imwain ae kona n taetae, ao e titirakinai naba ngkana e angaraoi irou ngkana I bita tain au kiraati n te Kauabong ao ni waaki uoua te aoa rimoan are ti tataneiai iai. …
“Te kakabwaia aio nakoira. Ti roko n te bootaki imwain te tai ao ti namakina te Tamnei iroun temanna ana reirei te Uea. … N ikotaki ma anne, ti karekea ara kakoaua n ara utu ae Tamara are i Karawa e ataai kainanora ao e ongo ara tataro”