“Kakoaua Bwa Kam Irekereke,” Riaona, Tebetembwa. 2022.
Bwanaaia Aika Itiaki ni Boong aika Kaitira
Kakoaua Bwa Kam Irekereke
N au iango te Uea e tuangira bwaai aika kangaanga, ma I kairua.
Te unaine ae kain rarikiu ma natina te mwaane a maeka tabeua te raroa rikaaki mairouia au utu. E a reke tangirana iroura. Imwiin maten natina, e a aoraki ao ni katauaki bwa e na riai n wene n ana kainiwene. Ti tararuaia ni karokoa e a motirawa teniua te namwakaina imwiina.
Imwiin mateia, I tangira karaoan te otenanti n te tembora bwa e na karaoaki ibukiia te utu aei. Ma ibukina bwa akea irekerekera, tiaki anne te rinerine. N te bong teuana te iango ae itiaki e roko n au iango: “Kakoaua Bwa Kam Irekereke, ao ko kona ni karaoa te mwakuri n te tembora ibukiia.”1 N au iango te Uea e tuangai aika a kangaanga, ma te taeka ae kakoaua e teimatoa n roko n au iango.
Aia koraki kain rarikiu a moana karaaian te aro ni bwaibwai n ana auti, ma akea tauani mwiina ae na kakoauaa aia irekereke, mwiin naba ukerakina n ana tabo ni kawakin rongorongo te tautaeka.
E tuangai te tamnei bwa iai te bwai ae bua. Man te kariaia mairouia koraki aikai, I rinnako nanon ana auti ibukin beeba taian beeba aika a kainnanoaki. Ni koonan te ruu arei I kunea tabeua baeki aika a onrake n taian beeba ni kawai. I namakinna bwa baeki aikai a kakaawaki.
I noori kanoan baeki aika uoua ao imwiina I a manga kauka ao noora te kateniua ni baeki. I a kan roko ni kabin te baeki ngke I a namakina tinanikun te boki ae uarereke. Inanon te buua n tinanikun te boki aei, I kunea nimaua moan rinan ni beeba aika a kakaawaki: ana bong ni bung te aine are e maeka ni kaan ma ngai ao ana beeba ni mare, ana beeba ni mate tibuna te aine, ao beban ana taunimate tamana.
Ngke tia rinanon beeba aikai ma ana koraki te aine arei, uoua taeka aika teke i matau: Mwakoro ae Vagaysky,” i maeaon Siberia. N te tai ae tawe, I namakinna bwa I riai n taraa oin au riki. Ngke I karaoa anne, I kunea bwa Vagaysky e oti n te mwaanga ae raroa n ana utu tamau. Kakae riki mwiina e kaotia bwa kaain rariku are e mate arei ao ngai bon koraki!
Te Uea e aki kainnanoa ae kangaanga mairou imwiin te tai. I aki konaa ni kaota kimwareireiu n reiakina bwa kaain rarikiu arei bon mwakoron au utu. Te toma e anganai bwa N na kakoaua raoi ana otenanti n te tembora a na karaoaki n taai aika a na roko.
E tangiriia Natina te Uea. E katauraoa te babaire ni kamaiu ibukira ni kabane, ni ikotaki ma kaain rarikiu arei ao natina te mmwaane.