“Kaeka nakon Au Boki ni Moomon,” Riaona, Tebetembwa. 2022.
Bwanaaia Aika Itiaki ni Boong aika Kaitira
Kaeka nakon Au Boki Moomon
I kabanea au kona ni “buoka” tinau Wong, ma ae bon kainnanoia raoi e rangi ni bebete, ana taeka te Atua ae korakora.
Tinau Wong ao Annie
Kariaia n te tamnei iroun te tia korokaraki
Imwiin bwabetitoakiu n Tuun 2002, I tibwaua au onimaki ma tinau. E ngae ngke tinau ae Wong bon raou n roroko n te taromauri, e aki kan reitanako riki ana reirei.
Rimwi, 10 te ririki imwiinaimwina, e rineia Tinau Wong bwa e na bwabetitoaki. I onrake n te kukurei ae korakora. Te kananokawaki, tabeua te ririki imwiina e katoka kakorakoraan ana koaua ao man karioi aanga bwa e na aki kaea te taromauri.
I kataia bwa e na roko n taromauri, ma anne e karika te itabaraaraa. Ni karokoa, I a bon katoka imanonoana bwa e aonga n aki rota aron ara reitaki.
N tain te maungatabu ni kabuta n Okitobwa 2019, Beretitenti Nelson e kaoia kaain te Ekaretia bwa ana “karaoa oin [ara] babaire” ni kakorakorai ara kakoaua ibukin Kaokan te Ekaretia.1 Ngke I tabe ni iangoa ana kakao, I namakina kakorakorakiu bwa I riai ni karaoa te bwai bwa e aonga n tamaroa marenau ma tinau Wong.
Ibukin au anga ni katoka te kangaanga n te Ririki ae Boou, I kakorakoraai ni wareka Ana Boki Moomon ma Tinau Wong. N te tai are e taku bwa a maraki matana, I taku, “Ko kona n ti kakauongo.” Ngkana e taku bwa e na riai ni kaitiakii bwain amwarake, I rimwiina nakon te tabo n amwarake ao n reitanako au wareware ni kabaibati.
E otinako mwiina bwa Tinau Wong e bon kakauongo raoi ao n uringii ake I warekia. N tokina, e rineia ni wareware i bon irouna. Rimwi e tuangai bwa te aomata n ai arora e aki kona ni korea Ana Boki Moomon. Akea ana nanououa bwa te boki bon ana taeka te Atua. Ma irou, noorana man te tai are akea nanona n wareka ao ni taekina ana kakoauan Ana Boki Moomon bon te kakai.
Mwiin bwabetitoan Tinau Wong, I raraoma bwa e kaaina te Ekaretia ti ibukiu. Ma ngkai e reke ana kakoaua i bon irouna. N ririki aika mwaiti, I kataia ni “buoka” tinau, ma ae kainnanoia bon, ana taeka te Atua ae korakora.
I karabwarabwa ibukin te burabeti ae maiu are e aki toki n anganai te kairiri n taina raoi. Ngkana ti karaoa are e reireia, a na roko kakabwaia aika a korakora. Te taneiai aei e kaota nakoiu mwaitin ana kakabwaia ae tangiria nakoira. Ae I karaoia bon ti warekan tabeua mwakoro man Ana Boki Moomon nakon tinau. Imwiina te Uea e karaoa are imwina!