Ekkōļ kōn Kapo eo Kein Karuo

Elōn̄ iiō ko rem̧ootļo̧k, ke ikar 12 aō iiō, ikar ruwaineneik n̄an pād ilo kāām in kōraan eo aō kein kajuon ilo doulul eo an Priesthood eo an Aron. Juon karuwaineneik eto an nej bōk jikin ke jema ekar juon ritōl an juon doulul im ekkā an etal im kāām ippān ļaddik ro ilo ward eo, ke ikar pād wōt ilo m̧weo.

Ke raan eo ekar itok, ikar lukkuun m̧ōņōņō. Im ij aikuj kwaļo̧k m̧ool bwe ikar lukkuun kakkobaba ļo̧k ippān ļaddik ro rerūttoļo̧k. Ikar lukkuun kōņaan in kwaļo̧k ke ikkar im aikuj kile eō. Ilo kijejeto in ekar jab etto kar letok n̄an eō juon mālijjon̄ n̄an lale n̄e inaaj maron̄ ikkure ippāer im maron̄ erom̧ m̧ōttan kūrub eo.

Jerbal eo aō kar letok bwe in bōk kii ko an wa eo waan jema n̄an kōm̧m̧ane juon ikkure in kōm̧m̧an kōjan̄ n̄an ritōl ro. Ijjab keememej lukkuun ta eo ikar ba n̄an kareel jema, ak iien eo wōt ikar kakkōtkōtļo̧k n̄an kūrub in ļaddik ro kōn kii eo ilo peiū, bun̄ būruwō kōn tōprak eo aō.

Innām jerbal eo juon ekar bar itok. Ikar aikuj in kōppeļļo̧ke kōjem̧ in wa eo im kalōlōik juon aļaļ ikōtaan tulikin jea eo an rikkattōr eo im jilel eo ilo jōbwe eo. Im ikar aikuj in ļake kōjem̧ eo bwe jilel in wa eo naaj jan̄ m̧ae joteen eo ilo an ejjeļo̧k wāween n̄an deļo̧n̄e wa eo im kōm̧akūti kōm̧m̧an jidikdik eo.

En̄in ej ijo im bwebwenato in ekar oktak im lukkuun kajjookok n̄an eō. Ālkin aō kar lukkuun kapen aļaļ eo eo ilo ijo jikin, ikar ļake kōjem̧ eo im kakkōtkōt mōkaj jon̄an wōt aō maron̄ im kittilekek ilo juon jikin ekalibobo kōn mar. Ke ikar jubweļo̧k ioon laļ, ikar en̄jake juon metak ekanooj ļap. Ilo ijo emarok im ilo aō ekkairir, Ikar jijet ioon juon wūt ņaetan prickly pear cactus elōklōk.

Aō elamōjmōj kōn metak ejjeļo̧k juon ekar maron̄ ron̄ kōnke jilel in wa eo ekar eļļaaj, im ekar ejjeļo̧k bar juon wāween jipan̄ imaron̄ kar bōke ijjelo̧kin etetal ļo̧k ilo juon wāween ekōjak ļo̧k n̄an wa eo, kwaļo̧k “jerawiwi ko,” aō im kappukot jipan̄ kōn jekapeel im metak eo ekajookok.

Tokālik ilo bon̄ōn, ikar pedo kōn lo̧jeeō ilo juon em̧ nuknuk ilo an jema, kōjerbal plier ko, tum̧i in in kalōklōk ko jān … ekwe, in ba bwe ikar jab jijet aenōm̧m̧an ium̧win jejjo raan ko tokālik.

Ikar kejōkļo̧kjeņ kōn en̄jake in elōn̄ kōttan. Imaron̄ kiiō ettōn̄ kōn jon̄an bwebwe eo aō ke ij jodikdik aaet ilo an jet katak ko maron̄ lukkuun alikkar to n̄an n̄a.

Elōn̄ jon̄ak ko ilo m̧wil in armej rej āinwōt ekkā aer waļo̧k ilo lukkuun biktokin—ikdeleel n̄an kakkobabaļo̧k, ikdeleel n̄an kwaļo̧k ke jekkar, mijak bwe jekar jab kobaļo̧k, im kipel aikuj eo n̄an ņoje bwe jen jab jelm̧ae kaje ko. En̄in ej m̧wil eo ņe āliktata inaaj pedped ioon rainin—ņooje ālkin ad kōm̧m̧ane juon men jaikuj kar jab kōm̧m̧ane.

Kiiō, ijjab ļōmņak kōn kōm̧m̧an kōjak eo ke ikar āinwōt juon ajri ippān jerawiwi eo eļap, ak jemaron̄ lale jet iaan pedped in katak ko remaron̄ wōrtokjāer ilo ad jelm̧ae mālijjon̄ ilo mour in.

Ilo Jikin Kallib Eden, Adam im Ive rekar pād ilo juon jekjek eo elem̧ōņōņō—obrak kōn m̧ōn̄ā, aiboojoj an jikin kallib eo ejjeļo̧k āinwōt—ejjab wōt jikin kallib eaiboojoj eo ak juon jikin kallib ejjeļo̧k juon mar ejjeļo̧k tokjān ak wūt prickly pear ko rekalōklōk.

Ijoke, jej barāinwōt jeļā bwe mour ilo jikin kallib eo ejabwe n̄an aikuj in eddōļo̧k eo aer. Jikin kallib eo ekar jab mejān kajjek eo aer ak juon jikin mālijjon̄ kein kajuon in men ko rellōn̄ me renaaj kar kwaļo̧k ke rekkar, m̧aanjabpopo, im kōtļo̧k aer eddōkļo̧k n̄an mejān kajjek eo aer ilo aer jepļaakļo̧k n̄an im̧aan mejān Jemād im Nejin.

Kwonaaj keememej bwe ekar wōr juon menin jum̧ae ilo jikin kallib eo. Lucifer kar kōtļo̧k an kajjieon̄ e Adam im Iv. Ekar jinointata mālijjon̄e Adam bwe en bōk m̧ōttan leen wōjke in jeļā em̧m̧an im nana. Keememej kien eo n̄an jab bōk m̧ōttan, Adam ekar m̧akoko. Innām ekar itok Iv eo ejeraam̧m̧an, eo ekar kāālet n̄an bōk m̧ōttan leen eo, kipel Adam n̄an bōk m̧ōttan barāinwōt.

Tokālik, Adam im Iv rekar kwaļo̧k bwe kāālet in ekar mennin aikuj n̄an kakūrm̧ool karōk eo an Jemādwōj Ilan̄. Ak jān bōk m̧ōttan leen eo, rekar rube kakien eo—juon kakien kar leļo̧k n̄an er kajju jān Jemād. Waļo̧k in im eddodo kōn meļeļe kōn em̧m̧an im nana bōlen ekar kōm̧m̧an bwe ren pād ilo lukkuun metak ke rekar ron̄ ainikien an Jemād kōjjeļļā An ro̧o̧ltok n̄an jikin kallib eo. Rekar kile ke rekar keelwaan, bwe rekar ejjeļo̧k nuknuk jān aer kar mour ilo juon wāween mour erreo. Ak bōlen eļapļo̧k an lukkuun kar metak ke bōd eo aer ekar waļo̧k ilo iien eo, jān an waļo̧k aer keelwaan. Rekar jab maron̄ bōbrae er im rekar m̧ōjņo̧. Rekar lukkuun in keelwaan.

Lucifer ekar aolep iien kappukot iien ko rem̧m̧an kōm̧m̧an jerbal nana, Lucifer, ejeļā aer ejerwawa im pād ilo m̧ōjņo̧, kar mālijjon̄e er juon alen—iien n̄an kittilekek jān Anij.

Mālijjon̄ in—inaaj ņae etan “mālijjon̄ eo kein karuo,” —ej mālijjon̄ eo me emaron̄ bōktok bōd eo eļaptata eļan̄n̄e jej jojomar. Em̧ool, n̄an bōbrae aolep mālijjon̄ ko kein kajuon n̄an rube kakien an Anij ej em̧m̧antata, ak jej jeļā bwe aolep renaaj jojomar n̄an elōn̄ mālijjon̄ ko kein kajuon ioon laļ in. Ilo ad eddōkļo̧k ilo māletlet im meļeļe, jej kōjatdikdik bwe kajoor eo ad n̄an bōbrae mālijjon̄ eo kein kajuon enaaj em̧m̧anļo̧k ilo ad kajjieon̄ erom̧ āinwōt ad Rilo̧mo̧o̧r, Jisōs Kraist.

Jet remaron̄ kajjieon̄ in kittileek jān Anij kōnke rejjab kōņaan waļo̧k ak jedmatmat, im rej en̄jake jook im ajļo̧k. Ijoke, ebooļ eoon ko rej katakin kōj bwe kittileek jān Anij eban tōprak. Inaaj kwaļo̧k jet iaier.

Irooj ej katakin Jeremaia jān laajrak in kajjitōk kein: “Eḷaññe juon armej ej kūttiliek ilo jikin kūttiliek ko, I ban lo e ke? Irooj ej ba. I jab kobrak lañ im laḷ ke?”

Im Job ej katakin:

“Bwe Mejān rej ioon iaḷ ko an juon armej, im Ej lo etetal ko an otemjej.

“Ejjeḷọk marok, ak kapen marok, ijo ro rej kōṃṃan jab wānōk re maroñ in tilekek ie.”

Rijeje Sam David ej kōnono, ilo juon wāween boem̧:

“O Jeova, kwaar kallimjek eō im jeḷā eō.

“Kwō jeḷā aō jijet im aō jutak; Kwō jeḷā aō ḷōmṇak jān ettoḷọk. …

“Bwe ejjeḷọk naan ilo loō, im Kwe O Jeova, Kwō jab jeḷā kake wōt. …

“Inaaj ilọk ñan ia jān Aṃ Jetōb? Ak inaaj ko ñan ia jān mejaṃ?

“Eḷaññe I wanlōñḷọk ñan ilowaan lañ ko, Kwe ijo: eḷaññe I likūt kiniō ilo hell, Kwe ijo.”

Rioktaktok ro Rekāāl

N̄an ro otemjej rej kab kobatok ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata, mālijjon̄ eo kein karuo emaron̄ in emaron̄ in lukkuun pen. Jān peptaij eo ami kom̧ ar kōm̧m̧an bujen n̄an bōk ioomi etan Jisōs Kraist, eo me ekitbuuj juon aikuj in ukōt wāween mour. Ukōt wāween an juon mour ejjab pidodo. Ekkā an aikuji am̧ ukōt imminene ko im kōm̧m̧an ko im aaet iktōltōl ko n̄an eddōkļo̧k eo am̧ n̄an Jemādwōj Ilan̄ eo eļap an iakwe.

Rikapo eo ejeļā bwe komaron̄ m̧ōjņo̧ n̄an jodik ko an rekajoor. Enaaj kōm̧m̧an bwe mour eo am̧ m̧okta, eo ekōm̧m̧an an jab ju būruwōm̧ ilo elōn̄ men ko, ko me kiiō remaron̄ jab kaitoktok limo. Rikinaanļo̧k eo, āinwōt ņae etan ilo bok in Revelesōn, naaj mālijjon̄ eok kōn ļōmņak ko me rej āinwōt in: “Ejjab bwe am̧ kajoor n̄an ukōt mour eo am̧; kwojjab maron̄ kōm̧m̧ane menin; kwojjab m̧ōttan armej rein; rej jāmin bōk eok; kwe kwōm̧ōjņo̧.”

Eļan̄n̄e ļōmņak kein rej āinwōt ainikien em̧ool ej jan̄ n̄an kom̧ ro rekāāl rej kab katōk iaļ in bujen eo, ij akweļap ippemi n̄an jab ron̄jake ainikien rikinaanļo̧k eo. Kōm̧ij iakwe kom̧, komaron̄ kōm̧m̧ane, kōm̧ij bōk kom̧, im pād ippemi, kom̧ naaj bōk kajoor n̄an kōm̧m̧ane aolepān. Ilo juon iien kom̧ nej aikuji iakwe eo am im jipan̄ eļaptata, jab bōk naan riab im ļōmņak bwe kōm̧ naaj kaarmejete kom̧ eļan̄n̄e kom̧ naaj bōk juon bun̄tōn likļo̧k n̄an mour eo ami m̧okta. Jān kajoor eo ban keidi n̄ane an Pinmuur eo an Jisōs Kraist, kom̧ maron̄ lukkuun mour. Ak eļan̄n̄e kom̧ naaj kittileekek jān E im kattoļo̧k kom̧ make jān jukjukinpād in tōmak eo ami ekāāl, kom̧ij kattoļo̧k kom̧ make jān lukkuun jipan̄ eo me emaron̄ im enaaj lewaj ami kajoor n̄an anjo̧.

Juon m̧ōttan ejitōn bōro, juon rioktaktok, ekar kwaļo̧k wāween an pen n̄an rejtake tōmak ilo an makeļo̧k iaan. Ewōr kajoor eļap ilo ad erom̧ im m̧ōttan wōt juon jukjukinpād in jipan̄—aolep rej kōm̧m̧an bōd ak rej wōnm̧aanļo̧k wōt ilo eddōkļo̧k im jeraam̧m̧an jān iakwe eo an Jisōs Kraist.

Būreejtōn Russell M. Nelson ekar katakin bwe “anjo̧ jān laļ in ejjab juon men bajjōk me ej waļo̧k juon ak ruo raan. Ej waļo̧k aolep iien ilo ad atbokwoje tok katak eo an Kraist. Jej kōļapļo̧k tōmak ilo Jisōs Kraist jen ukweļo̧k kajjojo raan im kōjparok bujen ko me raar kapelpel kōj kōn kajoor. Jej pād ilo iaļan bujen in im jej jeraam̧m̧an kōn kajoor in jetōb, revelesōn an juon make, kōļapļo̧k tōmak, im jerbal in karejar an enjeļ raņ.”

Eļan̄n̄e kom̧ij jelm̧ae jorrāān in ānbwin, jekjek eo ami enaaj nanaļo̧k an pād im komaron̄ erom̧ kaam̧jak eļan̄n̄e kom̧ij jab kappukot taktō kōn ājmour. Menin em̧ool n̄an kinej ko ilo jetōb barāinwōt. Kinej ko wōt, ilo jetōb im ejjeļo̧k m̧admōd n̄ani maron̄ kaam̧jak n̄an lo̧mo̧o̧r eo ami n̄an indeeo. Jab kittileek jān ro renaaj iakwe im jipan̄ kom̧; ijjelo̧kin, ettōr n̄an er. Bisop ro rem̧m̧an, branch būreejtōn ro, im ritōl ro am̧ remaron̄ jipan̄ eok n̄an tōpar aolepān kajoor in kōmour eo an Pinmuur eo an Jisōs Kraist.

N̄an ro otemjej bōlen rej kittileek, kōm̧ij akweļap ippemi n̄an ro̧o̧ltok. Kom̧ij aikuj ta eo gospel eo im Pinmuur eo an Jisōs Kraist ej letok, im jej aikuji ta eo kom̧ij letok. Anij ejeļā jerawiwi ko ami, kom̧ij jab maron̄ kittileekek jān E. Bar kakoņ kom̧ im̧aan Mejān.

Āinwōt Rikwojarjar ro An, kōj kajjojo aikuj in ejaake juon m̧anit in m̧ōttanļo̧k Kabun̄ in me ej iakwe, bōke, im rōjan̄ aolep ro ikdeleel n̄an eddōkļo̧k ilo iaļ in An.

Ekkōļ kōn Mālijjon̄ in Kein Karuo! Ļoor ko̧o̧njeļ eo an rikanaan ro jim̧or etto im raan kein im jeļā bwe kom̧ij jab maron̄ kittileekek jān juon Jemād eo eļap an iakwe.

Ijjeļo̧kin, kwaļo̧k kom̧ make n̄an kajoor in kōmour eo an Pinmuur eo an Jisōs Kraist. En̄in ej lukkuun unleplep eo ilo ad pād n̄an—bōk juon ānbwinnin kanniōk im em̧ōjņo̧ me ej “kom̧, ij dien wōt aolep m̧ōjņo̧ ko otemjeļo̧k”im naaj jojomar n̄an, kabūrom̧ōjm̧ōj, elōn̄ mālijjon̄ ko kein kajuon; n̄an eddōkļo̧k men̄e jej wōtļo̧k ilo mālijjon̄ kein; im n̄an kappukot jipan̄ eo ekwojarjar ālkin kom̧m̧an āindein jemaron̄ erom̧ āinwōt Rilo̧mo̧o̧r eo ad im Jemād ilo Lan̄. En̄in ej iaļ eo An. En̄in ej iaļ eo wōt. Kōn m̧ool kein ij kam̧ool ilo etan Jisōs Kraist, amen.