Iakwe eo Aō n̄an Rilo̧mo̧o̧r Ej Aō “Etke”

Kwaar ke jeļā ke rikanaan eo ad ejitōnbōro, Būreejtōn Russell M. Nelson, ej wōnmaanļo̧k wōt in letok karuwainene ko n̄an kōj? Ejjab juon menin bwilōn̄, an kar kūr kōj n̄an ekkatak im ļōmņak kōn ennaan ko kar jeeri ilo kweilo̧k ko ruo reļļap rej jemļo̧kļo̧k. Ilo Eprōļ 2024, eaar ba, “Ij kōjatdikdik kwonaaj bar ekkatak ennaan ko ilo kweilo̧k in ilo allōn̄ kaņe rej itok.” Innām, ilo Oktoba 2024, eaar ba, “Ij kipel kom̧ n̄an ekkatak naan ko [rikōnono] ro. Kōjerbali āinwōt juon idajon̄jon̄ kōn ta eo em̧ool im ta eo ejjab ilowaan allōn̄ kaņe tok jiljino.”

Kūr kein remaron̄ kobaļo̧k n̄an kūr ko kanaan kaki ko jekar būki ilo aolepen mour eo ad, ekoba im eļaptata ro raar būki ilo iiō ko rej jemļo̧k. Jemaron̄ en̄jake ak ļōmņak bwe kūr kein rej bar juon men jej aikuj kobaiki n̄an ro-do list kōnke kar kūr kōj ak kar kajjitōk bwe jen kōm̧m̧ani. Ak emaron̄ ke lōn̄ļo̧k?

Kōjekļo̧kjeņ kake menin im kūr ko aolep jej būki, Ij kemeemej juon men me ikar katak im kar kāālete etto. Ij kajjieon̄ kōm̧m̧ane men kein, im raorōk n̄an n̄a kōnke Ij iakwe E; Ij iakwe Rilo̧mo̧o̧r eo ad. En̄in ej wūn eo em̧ool im ekajoorbōtata unin aō kōm̧m̧ane ta eo ij kōm̧m̧ane, innām, ekkeijeltok ippān menin ej iakwe eo aō n̄an kom̧. ro jeiū im jatū.

Āinwōt juon ami būratōr, Ij kōjatdikdik bwe kom̧ naaj ļōmņak kake naan ko aō āinwōt juon kūr n̄an kappukōt n̄an meļeļe kōn iien em̧m̧an n̄an ekkeijel ilo aolep men ko jej kōm̧m̧ani kōn iakwe eo ad n̄an Rilo̧mo̧o̧r.

Kōm̧m̧ane menin enaaj jipan̄ kōj meļeļe m̧oolin “etke” n̄an wūnin aolep men jej kōm̧m̧ani āinwōt rikaļoor ro an Rilo̧mo̧o̧r. Menin enaaj jipan̄ kakajoorļo̧k bujen eo ad ippān Anij, meļeļe kake An kwojarjar im m̧ool ko indeeo, An indeeo im m̧ool ko rejāmin naaj oktak. M̧ool ko indeeo āinwōt “Bwe kōn an Anij yokwe laļ, ear letok juon wōt Nejin ear keotak, bwe jabdewōt eo ej lōke e en jab jako, a en mour indeeo.”

Ekabwilōn̄lōn̄ bwe jet iien kōn ad kōm̧m̧ane men ko me emōj aer oktak n̄an manit ko an armej, jej kōtļo̧k an manit kein ak makūtkūt ko kwaļo̧k kijejeto ko ad n̄an kalōk tōmak ilo Jisōs Kraist. Āinwōt jej kōm̧m̧ani men kein kōnke emōj ad kōm̧m̧ani elōn̄ iiō ko, ilo ejjeļo̧k ļōmņak kōn aer jelōt bujen ekkeijel eo ad ippān Rilo̧mo̧o̧r.

Ilo laļ in ad, ekkā ad mije ta eo jej kōm̧m̧ane im ad kate kōj kadedeļo̧k jerbal ko im kōttōpar ko. Jej bōk juon iien emman n̄an eļļā jen baj kōm̧m̧an jerbal ak tōpar kōttōpar ko jen ad meļeļe etke jej kōm̧m̧ani, eļaptata ilo mour in jetōb. Eļan̄n̄e jej maron̄ meļeļe im ekkeijel ilo wūn eo likin jerbal ko ad me ekitbuuji iakwe eo ad n̄an Rilo̧mo̧o̧r im Jemedwōj Ilan̄, ilo ad kaorōk iien kein rem̧m̧an, jenaaj meļeļe bwe men̄e kōm̧m̧ani men ko rejim̧we, āinwōt makūtkūt ko an Kabun̄ in ak manit ko im kōm̧m̧ani ilo wāween ko rekkar ej juon men em̧m̧an, wōt, n̄e jej ekkeijelļo̧k ippāer kōn “etke,” jenaaj jeraam̧m̧an n̄an meļeļe wūn eo. Eban wāppen kōm̧m̧ane men ko rem̧m̧an ak kōm̧m̧an bwe en jim̧we; jenaaj bar kajim̧we. Eban kōm̧m̧ani wōt men ko rem̧m̧an ak kōm̧m̧ani ilo jim̧we; en jim̧we ad kōm̧m̧ani.

N̄an waanjon̄ak, n̄e kwoj kōm̧m̧ane juon kōttōpar n̄an riiti jeje ko rekwojarjar, jar ilo m̧ool, ak kōpooj juon makūtkūt n̄an baam̧le ak ward eo am̧, m̧ool in kōttōpar eo in n̄an kadedeļo̧k jerbal kein ke? Ak jerbal kein rej ke meļeļein bwe, rej kein jerbal ko repojak n̄an kōjerbali, n̄an tōpare m̧ool in kōttōpar eo? Ej ke kōttōpar eo in n̄an kōm̧m̧ane juon makūtkūt kōnke emōj ad kar kōm̧m̧ane etto innām jāāk e bo̧o̧k eo bwe ededeļo̧k ad kar kōm̧m̧ane? Ak, bar juon alen, errein ke meļeļe ko jej kōjerbale n̄an ekkatak, en̄jake, im ekkeijel ippān Rilo̧mo̧o̧r?

Jouj jab tarpok kake meļeļe in aō kōn makūtkūt im manit ko ak kōm̧m̧an kōttōpar ko im kijejeto n̄an tōpare; ejjeļo̧k bōd ilo menin. Ijoke, Ij kajjitōk bwe kom̧win kōpeļļo̧k būruwōmi im ļōmņak ko ami n̄an iien emman im jeraam̧m̧an kōn ad meļeļe etke jej kōm̧m̧ani men kein im elmen ad mour kake kabun̄ in ad.

Juon waanjon̄ak eļap kōn manit ko rej pedped ilo Kraist ej idajon̄jon̄ eo me Būreejtōn Dallin H. Oaks ekar letok n̄an aoleped wōj ilo etan Būreejtōnji eo Kein Kajuon. Būreejtōn Oaks ekar ba: “Ilo ad deļon̄e iiō in ekāāl, jen pojak n̄an juon iien kemeeme Ijtō in katok in pinm̧uur an Jisōs Kraist. … Jekdoon ta ko ro jet rej tōmake ak kōm̧m̧ane, jej aikuj kemeeme Jerkakpeje eo an ad Rilo̧mo̧o̧r emour ilo ad ekkatak katak ko An im jipan̄ ejaake manit ko an Ijtō ilo jukjukin pād eo ad, eļaptata ilowan baam̧le ko ad.” Āinwōt ami loe, ejjab kūr n̄an wōt ejaaki manit ko. Ijjelo̧kin, jej kōjerbal manit kein āinwōt juon wāween n̄an ekkatak eļapļo̧k kōn Rilo̧mo̧o̧r im keememej Jerkakpeje eo An.

An ļapļo̧k ad maron̄ ekkeijel ilo wūn in kōn ad iakwe Rilo̧mo̧o̧r, enaaj ļapļo̧k ad maron̄ in bōk ta eo jej aikuji ak kappukōte. Būreejtōn Nelson ekar ba, “Jekdo̧o̧n kajjitōk ak būrabļōm ko ad, uwaak aolep iien ej pād ilo mour im katak ko an Jisōs Kraist.” Innām ekar kadepakpakeļo̧k kūr in: “Katak eļapļo̧k kōn Pinmuur eo An, An iakwe, An tūriam̧o kake, An katak, im An gospel in kōmour im eddōkļo̧k me em̧ōj an kar jepļaaktok. Oktakļo̧k n̄an E! Ļoor E!”

Kejakļo̧kjeņ kōn e ilo būruomi im ļōmņak ko ami: Kwoj tōmak ke kūr eo an Būreejtōn Nelson epād ie juon ļōmņak in jipan̄ kōj kepooj juon laajrak ijo jenaaj jino ļapļo̧k ad jeļā im kadedeļo̧k jerbal ko? Ak ej ke kūr kōj n̄an kejokļo̧kjeņ kake mwian̄ōn ko an m̧ool ko rej n̄an indeeo im pedpedin katak ko āinwōt juon iien emman n̄an meļeļe etke (wūn eo) im ekkeijel ippān bujen iakwe eo an Rilo̧mo̧o̧r n̄an kōj ippān iaļ eo ad ļo̧k n̄an erom̧ rikaļoor ro ilo mour?

Kōtļo̧k bwe in kōmeļeļeik pedpedin katak eo me Ij kajjieon̄ in kwaļo̧k. Juon kālet, me emaron̄ m̧ool, maron̄ in riiti aolep ennaan ko jān kweilo̧k in eļap, im dedeļo̧k in aō kōm̧m̧e, inaaj etale kūr in jān laajrakin men ko ij-kōm̧m̧ani ilo jab kōm̧m̧an bar jabdewōt kōn ta eo ij riiti. Imeļeļe menin ejeja an waļo̧k, ijoke ejjab m̧ool. Bōlen, elōn̄ ro rej pād ilo juon meļeļe ikōtaan menin im ļōmņak eo.

Kūr in ej n̄an ekatak im kejokļo̧kjeņ kake ennaan ko jān kweilo̧k in eļap im kōjerbali n̄an lale im meļeļe ta eo jemaron̄ kajjojo kōm̧m̧ane n̄an em̧m̧anļo̧k.

N̄e jej bōk kūr in, meļeļe wūnin, jenaaj bōk eļapļo̧k jeraam̧m̧an ko n̄an epaakeļo̧k wōt Rilo̧mo̧o̧r. Jenej jino meļeļe bwe kōnke ij iakwe Rilo̧mo̧o̧r, ikōņaan ekkatak kōn E ilo aō ekkatak naan ko an rikanaan ro remour. Im kōnke ij iakwe ro jera bareinwōt, inaaj jeere katakin ko an rikanaan ro, rilolo ro, im ribōk madeņļo̧k ro ippen ro jet, jino ippān jittōnbōro ro aō.

Ilo jim̧or waanjon̄ak ko, kwoj kōm̧m̧ane juon men eo ejim̧we. Ilo eo kein juon, kōttōpar eo n̄an kōjerbal meļeļe ko bwe Jemedwōj Ilan̄ im Rilo̧mo̧o̧r raar letok n̄an kōj, ko me rej ennaan ko jej jeeri ilo iien kweilo̧k eo eļap. Eo kein karuo ej kaorōk kōjeram̧m̧an eo eļap kōn bōk reimaanļo̧k n̄an wūn ko imaan, letok juon iaļ n̄an meļeļe m̧ool ko an indeeo im kōjeraam̧m̧an ko kallim̧ur kaki n̄an aolep ro rej kōm̧m̧an bwe katakin ko im mour eo an adwōj Rilo̧mo̧o̧r, Jisōs Kraist, en lukkuun jejjet in mour ko aer.

Būratōr im jejtōr ro rejitōn bōro, Ij kōjatdikdik komaron̄ en̄jake im loe aorōk in ekkeijel ļo̧k ilo jerbal ko ad ippān iakwe eo ad n̄an Rilo̧mo̧o̧r. Ilo laļ in, elōn̄ ainikien ko renaaj kajjieon̄ kapoiki eok im, n̄e ekkar, tōl eok bwe kwon tōmak ke jet iaan m̧ool ko raorōk ilo jepļaaktok eo an gospel in rejjab lukkuun aorōk. Ainikein kein rej jino kōn m̧ool ko remenin aikuj n̄an juon jepļaaktok ilo raan kein āliktata, ekoba aikuj eo bwe en pād aelōn̄ in kiin̄ an Anij ioon laļ in, bōk jikin jān Kabun̄ eo an Jisōs Kraist of Latter Day Saints.

Kom̧ maron̄ ron̄ ainikien ko rej kōņaan bwe juon jemdo̧o̧n an juon make ippān Rilo̧mo̧o̧r im meļeļe kōn E ebwe im bwe kabun̄ eo ak Kabun̄ eo kar kōjepļaaktok ejjab menin aikuj ak jab aorōk. Ij kūr kom̧ n̄an rumij in kejokļo̧kjeņ ak jab reel kōn ļōmņak kein re bōd im maron̄ in mōkaj n̄an kemeemej ta eo Rilo̧mo̧o̧r eaar kwaļo̧k im katakin kōj jen iien ko etto—jino kōn iakwe eo an Jemedwōj Ilan̄ im Jisōs Kraist n̄an kōj im kobaik iakwe eo ad n̄an Ippāer āinwōt juon wūn n̄an ļoor Er.

Anij Jemed im Nejin raar wanļaļtak im kar kōnono ippān Josep Smith n̄an kōjepļaaktok Kabun̄ eo an Jisōs Kraist im n̄an jino tōreān tarlepen in iien ko an, Aelōn̄ in kiin̄ eo An ioon laļ. Kōn menin, Kabun̄ eo an Jisōs Kraist im Armej ro Rekwojarjar ilo Raan ko Āliktata ej wūnleplep eo kar kajutake jān Jemedwōj Ilan̄ n̄an būki bujen ko rej kōmaron̄ ad rool n̄an kapijuknen. Āindein, jej aikuj eļapļo̧k jen juon jemdo̧o̧n an juon make ippān Jemedwōj Ilan̄ im Nejin; jej aikuj kain̄i ko remenin aikuj jen ad kōm̧m̧ani bujen ko Ippāer. Menin ej letok juon ekkeijel an bujen ippāer im ej kōtļo̧k ad deļon̄e bujen iakwe eo Aer, kōm̧m̧an an maron̄ bōk aiboojoj an laļ eo kar kepooj n̄an ro rej m̧ool im tiljek n̄an bujen ko aer.

Kōn aolepān kajoor in jetōb eo aō, Ij kam̧ool kōn m̧ool im kwojarjar eo an adwōj Rilo̧mo̧o̧r, Jisōs Kraist. Ej iakwe eok. Ejeļā ta eo ej waļo̧k ilo mour eo am̧. Pā ko pein rej eerļo̧k, letok karuwainene eo, “Kom̧win itok n̄an Ippa, … im Inaaj kakkijeik kom̧.”

Ij iakwe Rilo̧mo̧o̧r, im iakwe eo aō n̄an E ej aō “etke.” Ilo etan Jisōs Kraist, amen.