Lan̄lōn̄ Kōn Bujen Rikaļoor

Juon raan ilo 2023 eo, Uyanga Altansukh ekar pād ilo jerbal ilo ituiiōn̄ in Mongolia jikin eo Darkhan ke mijen būreejtōn eo an Mongolia ekar deļo̧n̄ ilo jikin jebral eo an. Ilo naan ko an:

“Ikar lo e im ļōmņak ekar wōr ippān meram in emeram ilo pitokin. Ekar kanooj jouj im kam̧ōņōņō n̄an ro ipeļaakin, im ikar en̄jake okmeņeņ. M̧okta jān an ilo̧k, ikar kajjitōk ippān jet kajjitōk ko. Jejjo raan tokālik, ekar bar deļo̧n̄tok lowaan jikin jerbal eo aō im kajjitōk eļan̄n̄e imaron̄ etal ippān n̄an jar. Ikar lōmņak emaron̄ in kar jipan̄. Ikar inepata kōn jekļaj eo an ro nejū, āinwōt an jukjukin pād eo obrak kōn inepata im marok. Ikar kōņaan bwe ajri ro nejū ren āinwōt em̧m̧aan in ewōr ippān juon meram ilo piktokin, kajeeded lan̄lōn̄ n̄an ro jet ipeļakier.

“Juon raan mijenede ro raar katakin kōm kien juon m̧ōttan jon̄oul. Ajri ro nejū raar ba ilo itok limo, ‘Jej aikuj kōļļā ad juon m̧ōttan jon̄oul, M̧am̧a.’ Imaron̄ lo tōmak eo an ajri ro nejū ilo iien in. M̧okta jān aō kar kobatok ilo Kabun̄ in, ikar alooje kweilo̧k eo eļap im ron̄jake an Būreejtōn Russell M. Nelson kōnono Ekar kōjjeļā kōn tampeļ kāāl ko aolepān laļ in im kar ba bwe juon tampeļ kāāl enaaj kar ekkal ilo Ulaanbaatra, Mongolia. Ikar lem̧ōņōņō im kōmejaaļaļ, jon̄an men̄e ikar jab meļeļe unin. Kōn lan̄lōn̄ in, imaron̄ kar ba bwe tōmak im naan in kam̧ool eo aō rekar kajoorļo̧k.”

Uyanga, āinwōt milien ro jet, ej m̧ōttan aiintok Israel eo eļap ilo kōppopo n̄an Itok eo Kein Karuo an Jisōs Kraist. Liin ekar jino iaļ eo an ilo iaļ in bujen eo im kar erom juon rikaļooran Kraist. Ta meļeļe in n̄an erom juon rikaļooran Kraist? Ij nebar naan in Japan eo kōn rikaļoor—deshi—de meļeļe in ļeo jatū, im shi meļeļe in ajri.

Jisōs Kraist ekar ba, “Iaar pād ilo jinoin ippān Jemān, im ij M̧aanje eo.” Kōnke kōn wōn E ej im ta eo E ekar kōm̧m̧ane, jej kabun̄ jar n̄an E, jej wūjtak E, im jej leļo̧k wōj n̄an E, im jej ļoor E. Kraist ekar lo̧mo̧o̧ren kōj, im jej indeeo kam̧m̧oolol kōn en̄taan in pinmuur eo An ejjeļo̧k jem̧ļo̧kin.

Ewōr juon Jemedwōj Ilan̄, eo ej iakwe kōj āinwōt ajri ro Nejin. An iakwe n̄an kōj eweppāān. Jisōs Kraist im mijen eo An rej kwaļo̧k iakwe eo an Anij n̄an kōj. Āinwōt an Jon kar je: “Bwe kōn an Anij yokwe laļ, Ear letok juon wōt Nejin Ear keotak, bwe jabdewōt eo ej lōke E en jab jako, a en mour indeeo.”

Ilo jipadpad eo ad n̄an meļeļe ta eo jejjab jeļā, jemaron̄ jet iien pedped ioon iminene ko ad ilo mour in jeļā kaki, ak men ko jej jeļā. N̄an waanjon̄ak, jemaron̄ katak jidik kōn ta eo Anij Jemād kōn eddo eo ad make an jinen ak jemān im kadkad ko an baam̧le ilo mour in. Ijoke, jej aikuj kōjerbal oktak kein n̄an ad kajjieon̄ meļeļe kōn Jemedwōj Ilan̄. Paotok ko an Anij Jemād raorōkļo̧k jān jabdewōt paotok ko rejjab weppān an juon armej wabanban. Anij Jemād ej juon Jemād eo eweppān. E ej juon eo ej iakwe, jouj, kijenmej, im meļeļe im weppān eo eaiboojoj. Jemaron̄ lukkuun lōke E. Iakwe eo an Kraist ej kwaļo̧k iakwe eo an Anij Jemād im ej juon kakōļļe in iakwe jab in.

Jisōs Kraist ej jim̧or waanjon̄ak im ej unjen. Ilo Kraist, emaron̄ em̧m̧anļo̧k ad meļeļe paotok ko roweppān kōn Jemād im karōk eo An. Kōn Kraist, kar letok n̄an kōj kajoor in kōmaron̄ eo n̄an anjo̧ ioon kōņaan ko an lukkuun piktok in em̧m̧aan im kōrā ro bwe jen maron̄ erom āinwōt Jemād.

Ejja āinwōt Jemedwōj Ilan̄, Jisōs Kraist elukkuun tūriam̧o kake im jim̧we. Paotok kein rekwojarjar an jim̧we im tūriam̧o kake rejjab jum̧ae doon. Rej rie doon. Jim̧or jim̧we im tūriam̧o kake rej kwaļo̧k iakwe eo eweppān an Anij n̄an ro Nejin. Jemaron̄ lōke Anij Jemād im Jisōs Kraist kōnke Er rejim̧we im jokkuun wōt ippād aolep.

Anij Jemād im Nejin, Jisōs Kraist, relukkuun juon wōt juon ilo jibadbad im iakwe. Kōnke Anij im Jisōs Kraist rej iakwe kōj, kar letok n̄an kōj iien em̧m̧an im jim̧we eo āinwōt rikaļoor ro rem̧ool n̄an kōm̧m̧ani bujen ko Ippāer. Ilo ad kōm̧m̧an āindein, kadkad eo ad ippān Kraist ej ļapļo̧k: “Im kiiō, kōnke bujen eo kom̧ ar kōm̧m̧ane naaj ān̄inn̄in kom̧ ro nejin Kraist, m̧aan ro nejin, im kōrā ro nejin; bwe lo, rainin Eaar keotak kom̧ ilo jetōb; bwe kom̧ij ba bwe būruōmi raar oktak kōn tōmak ilo Etan; kōn menin, kom̧ij ļotak ilo E im kar erom m̧aan ro im kōrā ro nejin.”

Āinwōt rikaļoor ro, n̄e jej kōm̧m̧an im kōjparok bujen ko rekwojarjar jej jeraam̧m̧an kōn kajoor eo an jetōb. Jej ekkejel n̄an Kraist im Anij Jemād ilo juon kadkad āinjuon im maron̄ en̄jake iakwe eo Aer im lan̄lōn̄ ilo juon m̧ōttan dāpij n̄an ro me raar kōm̧m̧an im kōjparok bujen ko. Maron̄ eo ad n̄an en̄jake ļap in iakwe eo an Anij, ak n̄an wōnm̧aanļo̧k ilo iakwe eo An, ej pedped ioon ikdeelel ko im m̧akūtkūt ko ad rejim̧we.

Ilo Jon jebta 15, eoon 9, jej riit: “Āinwōt Jema ear yowke eō; barāinwōt Iar yokwe kom̧.” Innām kar letok n̄an kōj juon kūr: “kom̧win pād wōt ilo aō yokwe.”

Ilo eoon eo tok juon, “Eļan̄n̄e kom̧ij kōjparok kein ko Aō, kom̧ naaj pād ilo Aō yokwe; im barāinwōt Iar kōjparok kein ko an Jema, im Ij pād ilo An yokwe.”

Jej lo un eo n̄an kōjparok kien ko ilo eoon 11: “Men kein ij kōnono n̄an kom̧ bwe aō lan̄lōn̄ en pād ilo kom̧, im bwe ami lan̄lōn̄ en obrak.”

Kōn bujen rikaļoor ro rem̧ool, emaron̄ jino em̧manļo̧k ad meļeļe ļamļam eo an Anij im lan̄lōn̄ eo me E ej kōņaan bwe aolep ro Nejin ren en̄jake. Jemaron̄ barāinwōt jino meļeļe jet pedped in katak ko me ilo jinoin remaron̄ āinwōt kapokpok. N̄an waanjon̄ak, elmen an Anij maron̄ obrak kōn lan̄lōn̄ n̄e jet iaan ro Nejin rej kanooj en̄taan? Uwaak eo ej pād ilo erreilo̧k eo eweppān an Anij im ilo karōk eo eweppān An. E ej lo kōj jān jinoin n̄ankōjatdikdik eo ad eaiboojoj. E ekar kōpooj juon iaļ, kōn Nejin Jisōs Kraist, n̄an kōj wōj aolep, ro Nejin, n̄an anjo̧ ioon metak ko, en̄taan, jerawiwi ko, bōd, im ajimakeke eo ad ilo mour in. Anij ekar kōpooj n̄an kōj iaļ eo im kāālet eo.

Waanjon̄ak ko an ro me raar en̄jake lan̄lōn̄ eo kōn rikaļoor maron̄ jipan̄ kōkōm̧anm̧anļo̧k ad meļeļe ļōmņak in. Bōlen kwar ron̄ naan eo me dettan wōt ad m̧ōņōņō āinwōt an elōn̄ iaan ajri ro nejid rejjab m̧ōņōņō. Em̧ōj aō lo wāween in ke ejjab jekjek eo in. Eo jinō 94 iiō dettan elōn̄ļo̧k jān 200 ro bwijjin remour. Ilo jabdewōt iien, emaron̄ juon iaan ro 200 eban m̧ōņōņō. Eļan̄n̄e ennaan in ekar m̧ool, jinō ejjamin naaj kar bōjrak jān an jab m̧ōņōņō, eo ejjab. Ro me rejeļā kajjien liin rejeļā ewi jon̄an an liin lem̧ōņōņō.

Ikōņaan kiiō kwaļo̧k bar juon en̄jake. Ilo Jānwōde in 2019 eo, eo pāleō Debbie ,im n̄a kar kūrļo̧k kom̧ n̄an opiij eo an Būreejtōn Nelson. Ekar karōk juon jea epaake kōm, im kōm kar jijet enan̄in itaak bukween neem. Ālkin letok n̄an kōm kūr eo kiiō am, Būreejtōn Nelson ekar oktakļo̧k n̄an Debbie im kalimjōk e. E ekar jouj, iakwe, em̧m̧an, im obrak kōn lan̄lōn̄, āinwōt juon baba ak jim̧m̧an ejetjet. Ekar jibwe pein Debbie im den̄den̄ōte, kam̧ool n̄an e bwe enaaj Em̧m̧an, im bwe baam̧le eo am enaaj jeraam̧m̧an. Ekar āinwōt n̄an kōm ilo tōre in bwe kōm kar armej ro raorōk tata n̄an e im bwe ekar wōr an iien n̄an kōm. Kōm kar ilo̧k jān opiij eo an ilo raelepān Bōļaide eo en̄jake kam̧ool, iakwe, im lem̧ōņōņō.

Ilo M̧ande eo kōm kar lo ilo nuuj. Ilo ejja raan eo wōt me Būreejtōn Nelson ekar pād ippām, juon iaan leddik ro nejin ekar mej jān kāānjōr. Kōm kar bwilōn̄. Būruōm ekar obrak ke kōm kar būrom̧ōj kōn e im baam̧le eo an. Būruōm ekar barāinwōt obrak kōn kam̧m̧oolol kōn wujlepļo̧k in Kraist eo an n̄an kōm ke ekar būrom̧ōj kōn leddik eo nejin me ekar en̄taan.

Ke kōm kar kejekļo̧kjeņ kōn en̄jake in, kōm kar kajjitōk ippām make, “Ekōjkan an kar maron̄ kanooj jouj, iakwe, im em̧ool lem̧ōņōņō ilo juon iien epen?” Uwaak eo ej kōnke ejeļā. Ejeļā bwe Kraist ekar anjo̧. Ejeļā bwe enaaj bar pād ippān leddik eo nejin im enaaj joļo̧k indeeo ippān. Lan̄lōn̄ im kejekļo̧kjeņ indeeo eo ej itok kōn loklok n̄an Rilo̧mo̧o̧r kōn kōm̧m̧an n̄an kōjparok bujen ko im kōn rikaļoor eo āinwōt an Kraist.

Būreejtōn Nelson ekar katakin “Āinwōt an Rilo̧mo̧o̧r eo letok aenōm̧m̧an ‘eḷḷā jān jeḷā otemjej’ [Philippians 4:7], Ej barāinwōt letok kajoor, ājmour, im menwar kōn m̧ōņōņō eo epen kōmeļeļeki. N̄an waanjon̄ak, koban en̄jake m̧ōņōņō n̄e ajri eo nejūm̧ ej nan̄inmej, ak n̄e ejako jerbal eo am̧, ak n̄e lieo ak ļeo ippam̧ ej kaarmejete eok. Aaet en̄in ej m̧ōņōņō eo Rilo̧mo̧o̧r eo ej letok.”

Ilo ad kōm̧m̧an im kōjparok bujen ko, jenaaj make oktak jān im wōr juon ikdeelel n̄an jipan̄ ro jet en̄jake m̧ōttan lan̄lōn̄ im iakwe eo jej en̄jake ilo bujen jemjerā ko ad. Jemaron̄ erom m̧ōttan jerbal eo eļap ioon laļin rainin—n̄an aiintok Israel. Jemaron̄ jipan̄ bōktok ro nejin Anij n̄an Kraist. Āinwōt an rikanaan Jekab ekar katakin, “Im jeraam̧m̧an n̄an kom̧; bwe kōnke kom̧ ar niknik ilo jerbal ippa ilo jikin kallib eo Aō, im kar kōjparok kien ko Aō, im kar bar bōktok n̄an eō lukkuun leen eo, … kom̧ naaj lan̄lōn̄ ippa kōnke leen jikin kallib eo aō.”

Ilo ad lukwōj kōj make n̄an jerbal āinwōt rikaļoor in bujen ro, ilo jon̄an wōt ad maron̄, kadkad eo ad ippān Jemād im Nejin ej em̧m̧anļo̧k, lan̄lōn̄ eo ad ej ļapļo̧k, im kejekļo̧kjeņ ad indeeo edepakpakļo̧k. Innām jej bōk menin letok kwojarjar eo kōn kajoor n̄an maron̄ en̄jake lan̄lōn̄ eo eļap n̄an dāpij bujen rikaļoor ro rem̧ool an Anij. Ilo et eo ekwojarjar etan Jisōs Kraist, amen.