Kwe Ri Kraist
(Matu 16:16)
Jekōņaan bwe ajri ro nejid ren tōmak ilo JIsōs Kraist, ekkeijel ippān Jisōs Kraist im Kabun̄ in An ilo bujen, im kajjieon̄ erom āinwōt Jisōs Kraist.
Ke ļaddik eo nejim ej kūlaaj emān, kūlaaj eo an rekar ekkāleel opiija im ro m̧ōttan Eli rekar kālete bwe en ri ekajet ak judge n̄an kūlaaj eo aer. Juon raan juon ri ekajet jān 2nd District ear itok, ear kanuknuk Eli kōn kōbar in jerbal eo an, innām kōm̧m̧ane juon iien kallim̧ur an opiij n̄an kūlaaj eo aer. Mennin ear kairuji juon ikdeleel ippān n̄an ekkatak kakien im Rikōm̧m̧an kien eo Make, Jisōs Kraist.
Ālkin iiō in kijeje, Eli ar bōk juon kūr n̄an juon intōrpiu ippān juon iaan kāālet ko an n̄an jikuuļ in kakien. Ekar ba, “M̧am̧a, kar kajitūkin eō 10 kajjitōk. Kajjitōk eo āliktata ar, ‘Ia eo kwōj bōk am̧ ājinkōj ikijeen jim̧we im bōd?’ Iar ba ke ilo bwebwenato armej rej bōk jerbal in jeļā jim̧we im bōd ilo aer jon̄ake mour ko aer jān men ko m̧oktata. Men eo m̧oktata an jim̧we im bōd me ij kajjieon̄ jon̄ak e mour eo aō jān e ej Jisōs Kraist. Iar ba bwe n̄e aolepān laļin enaaj mour kōn katak ko an Jisōs Kraist ilo Kwaļo̧k eo Ion Toļ lal in enaaj juon jikin em̧m̧anļo̧k, eaenōm̧m̧anļo̧k.” Innām ekar dedeļo̧k intōrpiu eo, im ear ļōmņak ippan make, “etal in kōttōpar eo aō ne jān ke iar dik. Ejjeļo̧k juoon ilo jikin jeļāļo̧kjen ko ekōņaan ron̄ kōn Jisōs Kraist.”
Ruo wiik tokelik, Eli ear deļo̧n̄ kōn juon jāān in jipan̄. M̧okta jān an kar kāālet, ear loļo̧k jikin jikuuļ eo. Jikuuļ in kakien eo eitōnļo̧k juon em̧ kileplep im ekar pād ioon juon toļ ej jitļo̧k n̄an juon lake. Ekabwilōn̄lōn̄, ilo am kar etetalļo̧k ilo ļaibrāre eo im ettōņaak ko kem kar elolo būļāāk im jeje ko ilo dekā kōn naan ko jān Kwaļo̧k eo Ion Toļ.
Kwaļo̧k eo ion Toļ watōke ke ej kwaļo̧k eo ebun̄bun̄ tata kar kwaļo̧ke, jinointata ilo katak ko an. Ejjeļo̧k bar juon iien kwaļo̧k emaron̄ jipan̄ kōj meļeļeļo̧k kadkad in Jisōs Kraist, jinōkjej ko An rekwojarjar, im jibadbad eo ad n̄an erom āinwōt E.
Ļoor Jisōs Kraist ilo aolepān mour ko ad ej ijjino ilo m̧oko im̧ōd—im ilo Būraimere m̧ōkaj in wōt n̄e ej 18 allōn̄ dettan. Jekōņaan bwe ajri ro nejid ren tōmak ilo JIsōs Kraist, ekkeijel ippān Jisōs Kraist im Kabun̄ in An ilo bujen, im kajjieon̄ erom āinwōt Jisōs Kraist.
Tōmak ilo Jisōs Kraist
M̧oktata, tōmak ilo Jisōs Kraist.
Ālkin kwaļo̧k eo an bred in mour, “elōn̄ iaan rikaļoor ro [an Irooj]” ar pen aer mour kōn katak ko An, im “rej jepḷaak, im jab bar etetal Ippān. Innām Jisōs oeaar oktakļo̧k n̄an Jon̄oulruo ro im kajjitōk: “Kom̧ barāinwōt kōņaan ilo̧k ke?”
Piter eaar uwaak:
“Irooj, kōm naaj ilo̧k n̄an wōn? Ippam̧ naan ko naan in mour indeeo.
“… Im kōm ar tōmak im jeļā bwe Kwe Juon eo E kwōjarjar nejin Anij.”
Āinwōt an kar Piter kwaļo̧k tōmak ej “n̄an an wōr tōmak ilo juon armej ak n̄an bōk juon men bwe em̧ool.” Im bwe tōmak eo ad en tōl n̄an lo̧mo̧o̧r, ej aikuj pedped ioon Irooj Jisōs Kraist. “Jej … kōjerbal tōmak ilo Jisōs Kraist n̄e ej wōr ad lōke ke Emour, [juon meļeļe] kōn [m̧ool] in kadkad In, im juon jeļā ke jej kajjieon̄ mour ekkar n̄an Ankilaan.”
Rikanaan eo ad ejitōnbōro, Būreejtōn Russell M. Nelson ekar kean̄, “Tōmak ilo Jisōs Kraist ej pedped eo an aolep tōmak im wāween ko n̄an tōpar kajoor eo ekwojarjar.”
Ekōjkan ad maron̄ jipan̄ ajri ro kōkajoor tōmak eo aer ilo Jisōs Kraist im bōk kajoor eo an ekwojarjar? Jej aikuj jab kalimjōk ettoļo̧k jān Rilo̧mo̧o̧r eo Make.
“[Irooj ar] kōnono n̄an armej ro, im ba:
“Lo, N̄aij Jisōs Kraist. …
“Jutak im wōnm̧aantak n̄an Ippa. …
“… Jarlepju eo ar wōnm̧aanļo̧k, im karum̧ļo̧k peier ilo katin, im kar en̄jake jenkwan dila ko ilo pein im ilo neen; im men in raar kōm̧m̧ane, wōnm̧aanļo̧k juon ilo̧k juon … im kar lo kōn mejaer im en̄jake kōn peier, im kar jeļā ilo m̧ool im kar kam̧ool e, bwe kar e eo.”
Ij karuwaneneik kom̧ n̄an kōļmenļo̧kjen ta in menin emaron̄ āinwōt ilo mour ko an ajri ro redik. Rej ke ron̄ naan in kam̧ool ko kōn Jisōs Kraist im gospel in An? Rej ke lo pija in kautiej im kabun̄jar ko an jerbal eo An an m̧ōttan anij? Rej ke en̄jjake im kile Jetōb Kwojarjar eo ej kam̧ool kōn m̧ool im kwojarjar eo An? Rej ke jeļā kōn enaan im mijen eo An?
Uwaan Jisōs Kraist im Kabun̄ eo An
Kein karuo, uwaan Jisōs Kraist im Kabun̄ eo An.
Armej ro an Kiin̄ Benjamin raar en̄jake juon oktak in bōro eļap im kōn bujen raar aje mour ko aer n̄an kōm̧m̧ane Ankilaan Anij. Kōn bujen eo raar kōm̧m̧ane ippā Anij im Jisōs Kraist, kar “ān̄inn̄in kom̧ ro nejin Kraist, m̧aan ro nejin, im kōrā ro nejin; bwe.” Āinwōt membōr ro an Kabun̄ eo an Jisōs Kraist im Armej ro Rekwojarjar ilo Raan Ko Āliktata, ewōr juon ad eddo in bujen n̄an kalōk aelōn̄ in kiin̄ eo An im kōppopo n̄an jepļaaktok eo An.
Ekōjkan ad maron̄ jipan̄ ajri ro kōm̧m̧an im kōjparok bujen ko? Ilo Itok, Ļoor Eō appendix A im B, jej lo kein ijjino menin kōnono im katak ko me renaaj kōkajoor baam̧le ko im jipan̄ rūkaki ro im ritōl ro ilo jerbal in ekwojarjar aer n̄an kōpooj ajri ro n̄an juon mour indeeo ilo iaļan bujen in an Anij.
Erom Āinwōt Jisōs Kraist
Kein kajilu, erom āinwōt Jisōs Kraist.
Ilo Bok in Mormon, Rilo̧mo̧o̧r ar kipel rikaļoor ro An rekāāl n̄an anōk E jon̄an wōt eo remaron̄ kepaak: “Armej rot kom̧ij aikuj in āinwōt? Em̧ool ij ba n̄an kom̧, em̧ool āinwōt N̄aij.”
Ekōjkan ad maron̄ jpan̄ peptaij im kaben ajri ro n̄an kakūrm̧ool eddo in bujen ko aer n̄an aintok er make im ro jet n̄an Jisōs Kraist? Rikaļoor n̄an mour emennin aikuj bwe jen “ri kōm̧anm̧an naan eo, im jab ri ron̄jake wōt.”
N̄e jej leļo̧k karuwanene ko n̄an rikaļoor ro redik tata an Irooj, jouj im bōk aolep iien em̧m̧an n̄an tōl er, an tok er, etetal ippaer, im jipan̄ er kappukot Iaļ eo. Kapilōk ren reddik rejitōnbōro ilo aer kōppopo in katakin, kam̧ool, jar, ak jerbal in jipan̄ bwe ren lōke im en̄jake m̧ōņōņō ilo kakūrm̧ool eddo ko aer. Kappukot wāween ko reim̧we n̄an jipan̄ er itok im jeļā ke Kabun̄ eo aer in im ewōr aer eddo eaorōk ilo kōppopo n̄an jepļaaktok eo an Rilo̧mo̧o̧r.
Ilo an Jisōs Kraist erom pedped in mour ko ad, ta ko jej ikdeleel kaki, im ekōjkan ad ikdeleel kake em̧ōj an oktak indeeo. Oktak ej ukōt aolep men! Ej oktak nememed “bwe kōmin jab bar itok wōt in kōm̧m̧an nana, ak n̄an kōm̧m̧an em̧m̧an wōt.” Ej ukōt wāween ad kōjerbal iien ko ad, kein jipan̄ ko ad; ta ko jej riit, alooj, ron̄jaki, im jeeri. Ej bar ukōt wāween ad uwaak ilo juon intōrpiu in jerbal im jikin jeļāļo̧jen.
Jej aikuj rome Meram an Jisōs Kraist ilo aolep kona ko ilo mour ko ad. N̄e jejjab kam̧ool n̄an m̧ool in An uwaan anij ilo mour eo An m̧okta, mijen eo An ekwojarjar, im Jerkakpeje eo An ilo m̧oko m̧ōd im ilo aolep kweilo̧k ko ad ilo Kabun̄ in, innām enaan eo ad kōn iakwe, jerbal in jipan̄, m̧ool, ettā, kam̧m̧oolol, im tūriam̧o emaron̄ erom naan in rōjan̄ bajjōk kōn muur. Ijelo̧kin Jisōs Kraist ejjeļo̧k kajoor n̄an oktak, ejjeļo̧k jibadbad n̄an kōttōpar, im ejjeļo̧k kakije jān eddo ko an mour in. N̄e jej erom waan ilo ad ļoor Jisōs Kraist, emaron̄ kabūrom̧ōjm̧ōj n̄an ajri ro nejid.
N̄e jej jiron̄ ajri ro nejid ke jej iakwe er, jej ke bar jiron̄ er ke Jemedwōj Ilan̄ im Rilo̧moo̧r Jisōs Kraist rej iakwe er? Iakwe eo ad emaron̄ kaenōm̧m̧an im kōketak, bōtaab Aer iakwe emaron̄ kōkwojarjar, kautiej tata, im kōmour.
Jisōs in ejjab aikuj in juon riabin Jisōs, ak juon Jisōs bajjōk, ak juon Jisōs ejjeļo̧k ānbwinnin, ak juon Jisōs waan, ak Jisōs eo jejjab jeļā kake, bōtaab juon eo ekwojarjar, kajoor bōtata, kar jerkakpeje, utiej tata, kabun̄jar n̄an e,ekajoor, Nejin Anij Emake Wōt,eoekajoor n̄an lo̧mo̧o̧r Im āinwōt juon ajri ilo Philippines ear kam̧ool n̄an eō juon raan, “Kem aorō!k n̄an lo̧mo̧o̧r” Ilo et eo ekwojarjar etan Eo “Eo Anij ear kwaḷọk E bwe En kein medek [ekajoor],” Jisōs Kraist, amen.