“Ro̧o̧l tok n̄an Eō, … Bwe In Maron̄ Kōmour Kom̧?”

Kōm kar jokwe lo juon em̧ ekar jepooļ kōn wōjke ko raeboojoj. Tūrin wōt delon̄tok eo ekar wōr juon wōjke etan willow. Juon bon̄ ekaburom̧ōjm̧ōj juon lan̄ ekar itok, innem willow eo ekar okjak. Ej babu ļal etūm̧ okar in ebwe an kar kaburom̧ōjm̧ōj.

Ilukkun kar pojak n̄an jōke kōn Chain Saw eo bwe in kōm̧m̧an kane ako eo itūrūm ekar kajju kabōjrak eō. Ekar luki n̄a kōn an mōkaj aō erļok jān wōjke eo im ekar rōjan̄ kōm bwe jen jab joļok e. Lak m̧ōj ejitōn̄ tok juon o̧kōr ej pād ibwidej im ba eļan̄n̄e jenaaj jipan̄ wojke in jutak, m̧wijti ra ko an, im naajidki, okar in renaaj bar dāpdep.

Ikar pere im jab tōmak wāween an juon wōjke eo em̧ōj an wōtlak im jorrāān, maron̄ mour im bar eddōk. Ikar ļōm̧nake ke men̄e emaron̄ bar eddōk, eban mour n̄e ebar wōr ļan̄. Ako kōn aō jeļā bwe eo itūrūm̧ ekar tōmak ke ewōr an wōjke in ilju im jeklaj, jekar ron̄jake.

Im tōprakin? Ālikin jet iien, jekar ello kōkaļļe ko ke wōjke eo ejino an wōr okar in. Kiiō, 12 iiō tok ālik, wōjke in ellukkun emourur im obrak kōn mour ippān okar ko an rekajoor im barjuon alen an kaeboojoj meļan eo.

Ilo aō pād ippān ro rekwojarjar ipeļaakin laļin, ij keememeje wōjke willow in im an wōr kōjatdikdik men̄e jej ļōm̧nak ejjeļok bar ial. Ewōr jet ekar wōr aer naan in kam̧ool kōn gospel in im rekar kajoor āinwōt willow eo. Innem, kōn jet wun ko, naan in kam̧ool ko rekar jino m̧ojņo, etal n̄an an jako tōmak. Jet rej dāpdep wōt kōn okar ko rej pād ioon bwidej in gospel eo.

Ijoke iien n̄an iien, ij ellowetak kōn bwebwenato ko an ro rellōn̄ im rekar kālet n̄an kōkāāl bujen jemjerā ko aer im rool tok nan kabun̄ in aer. Ijellokin aer kejool aer tōmak im tōmak āinwōt kane kan ejjeļok tokjeir, ijellokin rekar uwaak n̄an im̧we ko an jetob im kūr ko remāneen n̄an jepļaak.

Ikar etal n̄an juon Kweilok an Stake ilo Korea ijo juon membōr ej kab rooltok ej kwalok: “Ij kamoolol ro jeiū im jatu kōn aer ikdeelel n̄an atbakwoj tōmak in edik lo n̄a im aolep aō m̧ōjņo, pukōt eō, im n̄an membōr ro rekōn em̧m̧an n̄an eō. Ej lōn̄ wōt m̧ōtta ipeļaaku rejjōb jar. Ekōjak, ako rej ba n̄an doon n̄an rool tok n̄an jar im kōrooltok tōmak ko aer. Ij ļōm̧nak bōlen rekōņan tōmak

N̄an ro rekōņan tōmak, jej kūr kom̧ n̄an rool tok. Ij kallim̧ur tōmak eo am̧ enej kajoorļok ilo am̧ bar juon alen kabun̄ jar ippān ro rekwojarjar.

Juon kar mijinede jān Africa ekar jeje n̄an juon ritōl an Kabun̄ in, jolok an bōd im pukot jeorļok in bōd kōn an kar illu kōn an katakin kōn juon iminene in manit ko ad, eo ekar unin an kar em̧m̧akut jan kabun̄ in. Ilo ettā ekar kwaļok: “Ekaburom̧ōjm̧ōj bwe, aō kar illu 15 iio remootļok ekōm̧m̧an bwe in inene juon oņāān eļap. Ikar luuji eļap—wōt im ļap jen aō kar kōtmene. N̄a illukkun jook kōn jorrāān in ikar ejaake m̧aantak, ako ilōn̄ in men otemjej ilukkun m̧ōņōņō bwe em̧ōj ao bar lo iala tok.”

N̄an ro rej kile ta eo em̧ōj am̧i luuji, jej kūr kom̧ n̄an rool tok bwe kom en bar juon alen edjon̄e leen m̧ōņōņō eo an gospel in.

Juon sister ilo United States ekar etal jān Kabun̄ in ium̧win elōn̄ iiō ko. An jepļaaktok ekar wōr jet katak ko n̄an m̧am̧a im baba im ro uwaan baam̧le ko rej burom̧ōj kōn ro rejitōnbōro rekar em̧m̧akūt. Ekar je:

”Imaron jeiki juon laajrak in un ko etke ikar em̧m̧akūt jan Kabun̄ in, gosepl in, im ilo juon wāween, jen baam̧le eo aō. Ako rejjōb lukkun aorōk. Ikar jab kōm̧m̧ane juon kālet eļap n̄an em̧m̧akut jan Kabun̄ in—ikar bōlen kōm̧m̧ane taujin kāālet ko. Ako juon men ikar jeļā bwe jinō im jema rekar kōm̧m̧ane juon kālet eaorōk, im rekar dāpiji. Rekar kālet n̄an iakwe eō.

“Iban jeļā jete den in kemjaļaaļ rekar wōtļok, jete bon̄in jabwe kiki, ak jar in akweļap kōn n̄a em̧ōj jar kaki. Rekar jab kwaļok jerawiwi ko aō; ijelļokin, rekar kūr eo ilo aō jerawiwi Rekar jab kōm̧m̧an bwe in en̄jake aō makeļok lo m̧weo mweer im lo iien ko an baam̧le; n̄e ej wōr en̄jaake rōt kein ej jān n̄a make. Ijellokin, rekar wōnm̧aanļok im karuwainene eō. Rekar bōlen lo an marokļok meram eo lo n̄a. Ak rekar jelā bwe armej eo kar n̄a jem̧aanļok ekar an̄in wōt armej eo inej erōm̧.

“An kar pen ial eo aō ļok jān Kabun̄ in, ejjeļok oktak jān aō kar jepļaaktok. Ako juon men ekar jab pen n̄an aō rooltok ej aō en̄jake lām̧oren ijo jiku.”

Naan eo aō rainin ej eļaptata n̄an ro em̧ōj aer en̄jake Jetōb ako kajjitōk eļļan̄e ewōr iaļin jepļaak ako jikūm̧ ilo Kabun̄ in an Jisōs Kraist em̧ōj an jepļaaktok. Ej barāinwōt jikin jabdewōt ro rej kate er dāpdep ak ro rekōņan em̧m̧akūt.

Ennaan in ejjōb n̄an kajjion̄e eok, im ejjōb n̄an kakure. Ej juon kūr, lewaj lo iakwe im lukkun ikdeelel n̄an karuwaineneik eok n̄an m̧ōn jetōb in am̧.

Ikar jar bwe kwon en̄jake Jetōb Kwojarjar ilo am kiiō ron̄jake kūr in okmāneen im kallim̧ūr eo an Rilo̧mo̧o̧r, Jisōs Kraist.

“Kom̧injab kiiō ro̧o̧l tok n̄an Eō, im ukeļo̧k jān jero̧wiwi ko ami, im oktak, bwe In maron̄ kōmour kom̧?”

Aolep wiik eļōn̄ rej uwaake kūr in an Rilo̧mo̧o̧r ilo aer rooltok n̄an erōm̧ rikaļo̧o̧ran im m̧akutkut ko an Kabun̄ in, lo etta pukot kaenōm̧m̧an ko Jisōs ej kallim̧ūr. Im ainjuon n̄an bwebwenato ko im jet iien rej ajeeded, oran num̧ba in dūm̧m̧an ded ro ad rej kāālet n̄an jutak pen im n̄an kōkajoorļok tōmak ko aer lo Jisōs Kraist.

Jet iaan Rikaļo̧o̧r ro an Jisōs lo Kaperneum rekar lo an katak ko An pen im em̧m̧akūt, E ekar reilok n̄an Rijilōk ro an im kajjitok, “Koṃ barāinwōt kōṇaan ilọk ke?”

Kajjitōk eo in kajjojo iaad rej aikuj uwaake n̄e jej kijoon iien ko reppen. Uwaak eo an Piter n̄an Jisōs elukkun jejjōt im ekkar: “Kōm naaj ilo̧k n̄an wōn? Ippam̧ naan ko naan in mour indeeo.”

Ilo am̧ ļōm̧nake kūr in an Rilo̧mo̧o̧r n̄an rooltok n̄an E, ta eo komaron̄ ekkatak jān bwebwenato in wōjke willow eo?

1. Eitin aolep iien ad rooltok ejjōb pidodo ak em̧m̧an, bōtaab ewōr tokjen. N̄e ad willow ej bar jutak, aolep ra ko an em̧ōj aer jōki. Ekar jab aiboojoj. Bar kōj jemaron̄ en̄jaake ad makeļok ilo ad jolok mour ko mokta im kōttaik kōj. Likūt tōmak eo ioon Jisōs Kraist im gospel eo An—lo keen im okar in—naaj lewaj n̄an eok kōjātdikdik im peran n̄an kōm̧m̧ane buntōn ko jinointata n̄an rool tok.

2. Ebōk elōn̄ iiō n̄an an willow eo nejim bar kajoor im aiboojoj. Kiiō elukkun kajoorļok im aeboojojļok wōt jān m̧okta. Kijenmej ilo an tōmak im naan in kam̧ool eo am̧ eddōkļok. Men in ekitbuuj jab m̧ōkaj n̄an illu kōn naan ko rejjōb aorōk āinwōt “Kwaar pād ia iiō lōn̄lōn̄ ko wōj?”

3. Willow eo eban kar mour n̄e eaar jab pād lo kōjparok im bōk kijen. Konej najidik am̧ tōmak im am̧ naan in kam̧ool ilo am̧ kwojkwoj lo tebōļ in kwojkwoj eo kajjojo wiik im ilo am kabun̄jar ilo m̧ōn Irooj.

4. Āinwōt an willow in kar aikuj meram n̄an ra im bōlōk ko an n̄an bar eddōk, bwe naan in kam̧ool eo am̧ enaaj eddōkļok ilo am pād wōt ilo en̄jake im kamool eo an Jetōb. Ekkatak jān Amulek, eo ekar kōmeļeļeik āinwōt juon membōr eo ejakutkut an jar ekar ba, “Kūr eō elōn̄ iien im iaar m̧akoko in ron̄.”

5. Eo itūrū ekar jeļā ta eo willow eo enej kar erōm̧. Irooj barāinwōt ejeļā aorōkid im jem̧ļokin tōmak im am naan in kam̧ool. E ejjamin naaj ebbwer jān kōj. Kōn Pinmuur eo an Jisōs Kraist, aolep men rekinejnej maron̄ mo.

Ij kam̧ool bwe ewōr lan̄lōn̄ ilan̄ kōn ro rej jepļaaktok. Eļap aikuji eok, im kwojitōnbōro. Ij kam̧ool bwe Jisōs Kraist ej ad Rilo̧mo̧o̧r im bwe Enaaj kōjeram̧m̧an aolep ro rej rooltok n̄an E kōn eļapļo̧k aeņōm̧m̧an im eļapļo̧k lan̄lōn̄. An tūriam̧o ejjōb nukjōk ako ej peļļok im erļok n̄an eok. Ejjōb rūmij n̄an am̧ bar rool tok. Kōn aolepen iakwe eo ilo būruem, jej karuwaineneik eok n̄an kapijuknen. Ilo etan Jisōs Kraist, amen.