Tsim wɔ Jesus Christ na N’Asɛmpa no do

Afe 1996 mu no, Nigeria mbanyin hɔn fuutbɔɔl kuw no dzii sika abawdobɔdze nyim wɔ Olympic agodzi a ɔkɔr do wɔ Atlanta, Georgia, wɔ United States no. Ber a agodzi no baa ewiei no, dɔmtutuw dze enyigye tuu hɔnho guu stiitsi mu wɔ kuropɔn na kurow biara wɔ Nigeria mu; ɔman yi ne nyimpa dɔm ɔpepe 200 amonmu ara sesae dzii afahyɛ kɛsenara anapa dɔn ebien mu! Dɛwdzi, enyigye, na ehurusi kaa obiara ber a wodzidzii, wɔtoow ndwom, na wɔsawee. Dɛm ber mu no, nna Nigeria abɔ mu ayɛ kor, na Nigerianyi biara nyaa akomatɔyamu dɛ ɔyɛ Nigerianyi.

Ansaana Olympic akansi bɛhyɛ ase no, kuw yi hyiaa nsɔhwe beberee. Ber a akansi no hyɛɛ ase no, sika mboa a wɔdze sɔ hɔn asen no do twae. Kuw no kɔr akansi no a nna wonnyi afadze papa, bea a wɔkɛyɛ ntsetsee, edziban, na ndzɛmbahor ho akadze.

Jerome Prevost/Getty Mfonyin horow

Mber bi mu no, ɔka kakrabaa nna nkyɛ woeyi hɔn efi akansi mu, naaso nkukuhwease nyina ekyir no, Nigeria kuw no dzii konyim. Mber a ohia dzendzen yi maa ɔsesaa mbrɛ wosi hu hɔnho. Wɔdze awerɛhyɛmu fofor, na wɔdze ankorankor na kuw edwuma dzen na koryɛ na enyimpisi dzendzen no, wobuu hɔn enyiwa guu ndanenyi pii no do na wotsiim wɔ wobedzi nyim no do. Ntsimii yi na ɔmaa wonyaa sika abawdobɔdze, na Nigeriafo too hɔn dzin “Adaaso Kuw no.’’ 1996 Olympic Adaa sõ Kuw no wɔkɔ do kã ho asɛm wɔ Nigeria agodzi mu.

David Cannon/Allsport/Getty Mfonyin horow

Prɛko pɛr a Nigeria mbanyin fuutbɔɔl kuw no sũae dze buu hɔn enyi guu ndanenyi pii do no a nna wɔnye hɔn ridzi esi na wotsiim wɔ hɔn botae do no, wodzii konyim bor dza wɔdwenee dɛ ɔbɛyɛ yie no do na wodzii dɛw kɛse. (Dɛmara dɛ hɛn nkaafo a yɛwɔ Nigeria!)

Kwan a ɔsɛ mu no, sɛ yebu hɛn enyi gu wiadze ne ndanenyi do na yetsim wɔ Jesus Christ na N’asɛmpa do a, yenya awerɛhyɛmu dɛ yebedzi nyim abor dza yebotum esusu ho yie na yeetum yɛatse dɛwdzi kɛse. President Russell M. Nelson akyerɛkyerɛ dɛ, “Sɛ yɛdze hɛn abrabɔ tsim Jesus Christ N’asɛmpa no do a, yebotum enya enyigye a dza orisi—anaa dza orinnsi—wɔ hɛn abrabɔ mu no mmfa ho.’’

Meserɛ dɛ Sunsum Krɔnkrɔn no bɔboa hɛn mu kor biara ma yeetsie President Nelson ne nsato dɛ yɛmfa hɛn abrabɔ ntsim “Jesus Christ na N’asɛmpa’ no do ama yeetum eenya enyigye wɔ Christ mu a “dza orisi—anaa dza orinnsi—wɔ hɛn abrabɔ mu no mmfa ho.”

Nsɛm beberee wɔ Mormon Nwoma no mu fa ankorankor na ekuwekuw a wɔsesaa hɔn abrabɔ no ber a wotsiim wɔ Jesus Christ na N’asɛmpa no do.

Susu Alma Kakraba no. Ɔtseew etua na ɔkõe tsiaa Asɔr no. N’Egya, Alma, bɔɔ mpaa na ɔkyeen kɔm. Bɔfo puee na ɔfrɛɛ Alma Kakraba dɛ onnu noho. Dɛm ber mu no, Alma hyɛɛ ase “hun ɔkra a oebu no fɔ ne yaw’’ ho amandze. No sum ber mu no, ɔkaa n’egya a ɔrekyerɛkyerɛ dɛ Christ bɛba abɔbɔ werdam ama wiadze bɔn. Ber a ɔdwendwen asɛm no ho dzendzenndzen, ɔtotɔe serɛɛ Nyankopɔn n’ehumbɔbɔr. Na dɛwdzi yɛɛ no nsusuando, dɛwdzi a ɔkãa ho asɛm dɛ ne saso bi nnyi hɔ! Ehumbɔbɔr na enyigye baa Alma hɔ osiandɛ ɔnye n’egya wotsiim wɔ Agyenkwa no do.

Awofo a wɔwɔ mba a wɔaman no, hom nya enyidado na akokodur! Mbom ebɔdwendwen siantsir a bɔfo mmba mmbɔboa wo ba ma onnu no ho no, hu dɛ Ewuradze dze nyimpa mu bɔfo: bishop anaa Asɔr baanodzifo anaa asomfo nuabanyin anaa akyerɛbaa esi n’anamɔn kwan mu. Sɛ ekɔ do yɛ akɔnkyen, ekɔ do bɔ mpaa na, sɛ erennhyehyɛ mber mma Nyankopɔn, na sɛ ibenya awerɛhyɛmu dɛ Ewuradze retsen Ne nsa dze aboa w’abofra a, nkyii—ɔnnkɛkyɛr no—ibohu Nyankopɔn ne nhyɛdo dɛ ɔresesa w’abofra n’akoma ber a w’abofra san mu yi dɛ obetsie. Iyi tse dɛm osiandɛ Christ nye dɛwdzi—Christ nye enyidado; Ɔno nye “ndzɛmba papa a ɔbɛba” n’anohoba.’’ Ntsi, fa w’abofra hyɛ Jesus Christ nsa, osiandɛ Ɔno nye ɔwofo biara, na abofra biara n’ahoɔdzen.

Prɛko pɛr a onyaa dɛwdzi wɔ Christ mu no, Alma Kakraba dze dɛm dɛwdzi no tsenaa ase. Na osii dɛn hwɛɛ dɛwdzi a ɔtse dɛm do mpo wɔ nkõdzen na nsɔhwɛ mu? Ɔkãa dɛ:

“Na ofi dɛm aber no besi ndɛ mpo, mayɛ edwuma atoa do a menngyaa da, [ama] maatwe akra aaba nnuho mu; ama medze hɔn aaba ma wɔabɔsɔ dɛw mbordo a masɔ ahwɛ no bi. …

“… Na … Ewuradze ama meenya enyigye kɛse wɔ eduaba a mo dwumadzi asow no ho. …

“Na ɔaboa me wɔ mo nsɔhwɛ nye ɔhaw biara mu.’’

Dɛwdzi wɔ Chist mu hyɛɛ ase ma Alma mber a onyaa gyedzi wɔ No mu na ɔtotɔe serɛɛ ehumbɔbɔr. Nkyii, Alma dze gyedzi dzii dwuma wɔ Christ mu ber a boa binom ma wobenyaa dɛwdzi kor noara bi. Dwumadzi yinom a ɔtoa do no maa Alma nyaa dɛwdzi kɛse mpo wɔ nsɔhwɛ na haw asorɔtow biara mu. Hwɛ, “Ewuradze dɔ mbɔdzembɔ,’’ na mbɔdzembɔ a otsim No do no dze nhyira ba. Nsɔhwɛ dzendzen mpo wotum “wɔmen no wɔ Christ enyigye mu’’

Nyimpa kuw bi so a wɔwɔ Mormon Nwoma mu a wɔdze hɔn abrabɔ tsiim Jesus Christ na N’asɛmpa no do na wonyaa dɛwdzi nye hɔn a wɔkyekyeer kuropɔn Helam no— bea a wobotum atsetse hɔn mba na woenya hɔn nyamesom ho fahodzi. Atseneneefo yi a nna wɔrobɔ bra papa no, kuw etsirmɔdzenfo bi faa hɔn ndɔmmum na wɔgyee hɔn fahodzi dɛ wɔbɔsom Nyame no, fii hɔn nsamu. Ɔtɔfabia ndzɛmba bɔn to nkorɔfo apapafo:

“Ewuradze hu dɛ oye dɛ ɔtsẽa no nkorɔfo; nyew, na ɔsɔ hɔn abotar na hɔn gyedzi hwɛ.

“Naaso—obiara a ɔdze no werɛ twer no no, ɔnoara so na wɔbɛmaa no do wɔ da a odzi ewiei no mu. Nyew, na dɛm na ɔdze yɛɛ nkorɔfo yi.”

Nkorɔfo yi sii dɛn sɔɔw hɔn nsɔhwɛ na amandzehu? Wotsiim wɔ Christ na N’Asɛmpa no do. Hɔn haw no annkyerɛ hɔn nyimpa ban mu; mbom hɔn mu kor biara danee kɔr Nyankopɔn hɔ osiandɛ wɔfrɛɛ hɔnho Nyame ne ba, ahyɛmudzi ba, na Jesus Christ no osuanyi. Ber a wɔkaa hɔn nyimpa ban na wɔserɛɛ Nyankopɔn hɔ mboa no, wonyaa asomdwee, ahoɔdzen, na no koraa koraa dɛwdzi wɔ Christ mu:

“Na Alma na no nkorɔfo … huee hɔn akoma maa [Nyankopɔn]; na ɔnodze onyim hɔn akoma mu adwendwen.

“Na ɔbaa dɛ Ewuradze ne ndze baa hɔn nkyɛn wɔ hɔn amandzehu mu see dɛ: Hom mma hom etsir do na hom nya awerɛkyekyer, na minyim ahyɛmu a hom edzi akyerɛ me; na menye mo nkorɔfo bedzi ahyɛmu na meeyi hɔn efi nkowaasom mu.”

No mbuae no, Ewuradze maa “hɔn adzesoadze a … wɔdze egu [hɔn] abatsir do no yɛɛ har … Nyew, Ewuradze hyɛɛ hɔn dzen ama woeetum aasoa hɔn adzesoadze no na wɔammberɛ, na enyigye mu na abotar na wɔdze gyaa hɔnho mu maa Ewuradze ne pɛ.” Hom nhyɛ no nsew dɛ Ahotseweefo yinom maa kwan ma hɔn haw, amandzehu, na nsɔhwɛ men wɔ Christ n’enyigye mu! Nkyii, wɔ mber pa mu no, Ɔkyerɛɛ Alma kwan ma woguanee, na Alma—Nyankopɔn no nkɔnhyɛnyi—gyaa hɔn kɔr ahotɔ mu.

Ber a yetsim wɔ Christ do na yɛka No nkɔnhyɛnyi, do no, hɛn so wobegya hɛn akɔ Christ hɔ na N’asɛmpa no mu dɛwdzi mu. President Nelson akyerɛkyerɛ dɛ: “Tum wɔ dɛwdzi mu, na yeritsim wɔ dɛwdzi mu no dze Nyankopɔn no tum ba hɛn abrabɔ mu. Dɛ wɔ adze nyina mu no, Jesus Christ nye hɛn fasusu kɛsenara no, ‘a osian dɛw a wɔdze sii n’enyim ntsi ɔsɔɔw mbeamudua no’ [Hebrews 12:2].”

Ɔnnkyɛree na me maame wuii, nna m’enyi nnda. Mepɛ me maame n’asɛm na nna ɔnnyɛ me nhyehyɛɛ dɛ obefi mu a n’enyi mmfirii. Naaso ɔnam no wu do, emi na m’ebusua enya awerɛhow nye dɛwdzi. Minyim dɛ, osian Christ ntsi, onnwui—ɔtse ase! Na minyim dɛ osian Jesus Christ na asɔfodzi nsaafee a ɔnam Nkɔnhyɛnyi Joseph Smith do wɔdze asananmu aba no ntsi, menye no bɛtsena bio. Me maame no wu awerɛhow no wɔamen no wɔ Christ enyigye mu! Murusũa dɛ “[mobɔdwen] celestial adwen’’ na erema “Nyankopɔn edzi nyim’’ no iritsim wɔ dɛwdzi a ɔwɔ hɔ wɔ Christ mu do no kã ho.

Ɔdɔ mu ara Ɔto nsa frɛ dɛ, “Hom nyina hom mbra mo hɔ, hom a hom reyɛ edwuma berɛ na wɔasoa hom dza ɔyɛ dur, na mebɛma hom ahomgye.” Wɔ Jesus Christ ne dzin mu, amen.