Dza Nyankopɔn Pɛ Ankasa

Ansaana mebɛhyɛ ase no, ɔsɛ dɛ mekã kyerɛ hom dɛ me mba beenu enyido esiw hɔn ber a nna wɔrekasa wɔ asɛnkadaka do, na sesei na matsee hɔn ase yie. Bebree wɔ m’adwen mu kyɛn abobow no

Hɛn ebusua wɔ mba beesia a ɔtɔfabi a wosi hɔnho atwetwe dɛ hɔn mu kor nye dɔba no. Hɔn mu kor biara wɔ siantsir a ɔgye dzi dɛ ɔyɛ dɔba no. Hɛn dɔ ma hɛn mba hɔn mu kor biara no yɛ krɔngyee na ɔhyɛ mã na odzi mu. Yennkotum adɔ kor mbordo akyɛn kor—abofra kor biara n’awoe tserɛɛw hɛn dɔ mu wɔ kwan fɛɛfɛw bi do. Mpɛn pii no, medze Ɔsor Egya no dɔ ma me no toto dɔ atsenkã a mowɔ ma me mba no ho.

Ber a wɔkã dzi agor dɛ hɔn mu kor pɛr nye dɔba no, ebɔdwen dɛ hɛn ebusua nnyaa pia a no mu nntsew da. Nkekaa a ɔda baatan na ɔba ntamu no do huan koraa ber a wotsim wɔ ɔdɔ do.

Mber bi mu no, bia ɔnam dɛ muhu dɛ ebusua wentwiwentwi reyɛ abɛn no, mekã biribi dɛ “Yoo, hom ama mabrɛ dodow, naaso monnkɔbɔ no dawur, hom nyim hom mu kor a ɔyɛ mo dɔba no.” Mo botae nye dɛ beesia no mu kor biara nya konyimdzi atsenkã ma wentwiwentwi biara ennsi—kɛpem da fofor!

N’asɛmpa mu no, John daa no ho edzi dɛ “osuanyi no a Jesus dɔ no no,” dɛ gyama dɛm nhyehyɛɛ no yɛ soronko. Mepɛ dɛ modwen dɛ ɔtse dɛm osian Jesus no dɔ emudzi atsenkã a John nyae no ntsi a. Nephi maa me ntseasee bi tse dɛ iyi ara ber a ɔkyerɛwee, “mehyɛ moho enyimnyam wɔ me Jesus mu.” Ampaara, Agyenkwa no nnyɛ Nephi dze nnkyɛn John, naaso Nephi n’ankorankor nkitahodzi a ɔnye “ne” Jesus wɔ no gyaa no ma ɔkyerɛɛw dɛm ahobrɛadze asɛm yi.

Ana ɔnnyɛ nwanwa dɛ mber bi wɔ hɔ a yenya atsenkã a odzi mu na ɔyɛ ankorankor dɛ wohu hɛn na wɔdɔ hɛn a? Nephi botum afrɛ No “ne” Jesus, na hɛn so yebotum ayɛ dɛm ara. Hɛn Agyenkwa no dɔ no nye dza “ɔkrɔn kɛse, ɔyɛ nwanwa, ɔdɔ a ɔyɛ dzen,” na Ɔdze ma kɛpem dɛ yɛahyɛ “mã.” Ɔsor dɔ no nnsã da, na hɛn mu kor biara yɛ dɔba a ɔsom bo. Nyankopɔn no dɔ tse dɛ bea bi a ɔwɔ Venn diagram mu no a hɛn nyinara yɛbɔ mu. Nsonsonee biara a ɔda hɛn mu no, No dɔ mu na yenya koryɛ.

Ana ɔyɛ ahobow dɛ mbrasɛm mu kɛse tsitsir ebien no nye yɛbɔdɔ Nyankopɔn na hɔn a woetwa hɛnho ehyia no? Sɛ muhu dɛ nkorɔfo reda Christ-su dɔ edzi ma hɔnho nkorkor a, ɔyɛ me dɛ dɛm dɔ no wɔ biribi a ɔkyɛn hɔn ankasa hɔn dze; ɔyɛ dɔ a krɔnkrɔnyɛ su wɔ mu. Sɛ yɛdodɔ hɛnho wɔ dɛm kwan yi do, wɔ emudzi na mãhyɛ mu dɛ mbrɛ yebotum a, sor so dze no ho gye mu.

Ntsi sɛ obi a yɛdɔ no nnya sor dɔ ho atsenkã a, yebotum edzi dɛm esusudzi yi do—dɛ yɛreyɛ ndzɛmba a ɔtwe hɛn bɛn Nyankopɔn na nkyii yɛreyɛ ndzɛmba a ɔtwe hɛn bɛn hɔn yie—nsato a wɔmmfa ano nnkã, dɛ bra Christ hɔ.

Modɔ pɛ dɛ nkyɛ menye hom bɛtsena ase ebisa hom gyinabew horow a ogya hom ma hom tse Nyankopɔn no dɔ nkã? Ebɛn kyerɛwsɛm nyiyimu binom, anaa somdwuma pɔkyee a? Henfa na ebɔwɔ? Ebɛn ndwom? Woana ne nkyɛn a? Wiadze mfɛndzanan ehyiadzi ase yɛ bea mapã dɛ yesũa kwan a yɛbɛtakyer sor dɔ ho asɛm.

Bia na enya atsenkã dɛ ewɔ ekyirekyir fi Nyame no dɔ ho? Anaa abagura ndze na sum sian w’adwendwen mu, nsɛm a ɔse wo dɛ epira koraa, innyi ntseasee koraa, eyɛ mberɛw koraa na wobu enyiwa gu wo do, anaa nnyɛ soronko biara dɛ ebɛfata ɔsor dɔ wɔ kwan pa biara do. Sɛ etse dɛm nsɛm no a meserɛ tsie iyi: dɛm ndze horow no nnyɛ nokwar dabiarada. Yebotum dze akokodur eyi mbubui biara a ɔmma yɛmfata sor dɔ no—ber biara a yɛtow ndwom a ɔkaa hɛn dɛ hɛn Agyenkwa dɔfo a odzi mu no saan mu yii dɛ “woposow no, wobubu no, [na] wɔtsetsew no ma hɛn,” ber biara a yedzi paanoo a woebubu no. Ampa, Jesus yi enyito nyinara fi hɔn a wɔayɛ mberɛw no ho. Oduaa Ne mberɛwyɛ do bedzii mu ankasa, na Obotum ama yeedzi mu a hɛn mberɛwyɛ nyina ekyir no. Ɔyɛɛ mberɛw, ankonam, na woposoow no—na bia yebenya dɛm atsenkã noara—naaso wɔnntsew hɛn mmfii Nyame no dɔ ho. “Nkorɔfo a wɔayɛ mberɛw; ɔdɔ a odzi mu,” dɛ mbrɛ ndwom no kɔ no.

Bia inyim esumasɛm bi fa woho a ɔma edwen dɛ emmfata dɔ. Ɔmmfa ho dɛ dza inyim no wɔ woho yɛ nokwar no, afom dɛ ebɔdwen dɛ edze woho esi bea a Nyankopɔn no dɔ runntum nnkã wo. Ɔtɔfabi a, yɛyɛ otsiɔdzen na yennsie abotar mma hɛnara hɛnho wɔ kwan horow a nkyɛ yɛnnkɛkyerɛ mma binom koraa do. Beberee wɔ hɔ ma hɛn dɛ yɛyɛ wɔ abrabɔ yi mu, naaso, enyimtsiabu na ɔtan ma ɔwoara woho no nnkã ho. Ɔmmfa ho dɛ yɛtse nkã dɛ yɛayɛ basabasa, Ne nsa nnyɛ tsia. Oho. Ɔatserɛw N’abasa mu kɛsenara a “ɔsõ hɛn do” dze rufua hɛn mu kor biara.

Sɛ yɛnntse sor dɔ ahomka ne nkã mpo a, ɔnnkɔree. Nyankopɔn noara N’asɛm nye dɛ ”mbepɔw botutu akɔ, na akoko atwetwe hɔnho, na mbom [N’ayamuyie] dze orunntutu mmfi [hɛn] nkyɛn.” Ntsi, nya ntseasee pefee dɛ adwendwen no dɛ Nyankopɔn egyaa dɔ no nnkã abrabɔ ne siantsir na nkyerɛase ho gye dɛ mbepɔw no etututu kɔ na akoko no so kɔ!

M’enyiwa gye mbepɔw ngyinahɔmadze a ɔkyerɛ Nyankopɔn no dɔ a otsim no ho. Dɛm ngyinahɔmadze a tum wɔ mu wen kɔ hɔn a wɔkɔ mbepɔw do kɛgye nyikyerɛ no hɔn suahu mu na Isaiah ne nkyerɛkyerɛ fa “Ewuradze ne fie bepɔw” a ”worisi no mbepɔw no do.” Ewuradze ne fie nye hɛn ahyɛmudzi horow a ɔsom bo ne fie na bea a hɛn nyinara kɔhom na yegyaa hɛn ho kɔ bun mu wɔ Egya no dɔ ma hɛn no mu. Masan so enya enyigye wɔ awerɛkyekyer a ɔba me kra mu sɛ medze moho takyer m’enuma ahyɛmudzi no na moboa obi a oridzi yaw osiandɛ ɔahwer biribi anaa onnyi enyidado, ma onya ntseasee fa ne yaw atsenkã no ho. Ana iyinom yɛ akwan a yebotum dze hɛnho ahyɛ ahyɛmudzi dɔ a ɔsom bo no mu ara yie a, hesed

Ntsi sɛ Nyankopɔn no dɔ nngya hɛn ekyir a, ebɛnadze ntsi na yɛnntse no aber nyina? Tse dɛ hom ara: emi so minnyim. Mbom, bi rodɔ wo nntse dɛ irinya dɔ atsenkã , na mowɔ adwendwen kumaa bi a obotum aboa wo ber a ehwehwɛ nyiano ma dɛm asɛmbisa no.

Bia na enye awerɛhow, abagura, oyima, akonamyɛ, anaa tumdzi bi a ɔhyɛ wo mbɔdzembɔ do dɛ ibenya Nyankopɔn no dɔ ho atsenkã no ridzi aper. Sɛ ɔtse dɛm a, ndzɛmba yinom botum abrɛ tum a yɛdze tse nkã no adze. Oye, mber kumaa bi mu no, bia nnkotum atse No dɔ nkã na nyimdzee dɛ ɔdɔ wo wɔ dɛ ɔhyɛ ananmu Mbom, mibisa hom sɛ hom dze—abotar—bɔsɔ kwan horow a yɛdze ma na yɛdze gye sor dɔ ahwɛ a? Ana ibotum atwe woho efi dza ereyɛ biara ho kɛpem dɛ ibohu asaase yantamm a ogya wo ma “edwen celestial” adwen osiandɛ erohwɛ nworaba na erekae wiadze pii a wonntum nnkan na ɔnam iyi do ekaa hɔn Bɔfo no?

Nnoma a wɔrotow ndwom, ewia ne hyehye anaa mframa anaa nsutɔree wɔ mo wer do, na ber a abɔdze kyerɛ me Nyankopɔn no nwanwason a ɔyɛ—no mu kor biara edzi dwuma atwe me abɛn sor. Bia na awerɛkyekyer a ofi anyɛnkofo anokwafo hɔ bɔboa a? Bia asɔr ndwom a? Anaa erosom a? Ana ewɔ nwoma korabea ma mber a ɔwo na Nyankopɔn ntamu nkitahodzi yɛ pefee ma wo? Bia ibotum ato nsa afrɛ hɔn a egye hɔn dzi ma wɔnye wo akyɛ hɔn sor nkitahodzi ne farbaa ber a ehwehwɛ mboa na ntseasee.

Mibisa dɛ, nkyɛ Jesus san mu yi bea a ɔwo na Ɔno botum ehyia, kokoa bi mu a ibotum etsim Ɔno nko do a, ana Obotum asan mu eyi wo yaw bea soronko, bea a w’ehiadze kɔ bun mu, bea a obiara nnkotum akɔ gye dɛ Ɔno? Bea a eyɛ ankonam ankasa mbom ɔyɛ bea a Ɔno nko na Ɔakɔ hɔ da na Ɔagye enyim esiesie dɛ Obehyia wo wɔ hɔ sɛ ikodur hɔ a. Sɛ erotweɔn dɛ Ɔbɛba a, gyangyanbiara Ɔbɔ wɔ hɔ na nsa akã wo?

Sɛ inya dɔ mãhyɛ atsenka wɔ dɛm mber yi wɔ w’abrabɔ mu a, meserɛ suo mu dzen dɛ mbrɛ sɔnee kora nsu. Fa petse beebiara a ebɔkɔ biara. Sor anwanwadze kor nye dɛ sɛ yɛbɔ mbɔdzen kyɛ Jesus no dɔ no a, dɔ hyɛ hɛn mã dze dzi dase fa fapem a ɔkyerɛ dɛ “obiara a emi ntsi ɔbɛyew no nkwa no, obohu” no ho.

Nyankopɔn no dɔ rehyɛ hɛn mã no bɔ hɛn ho ban fi ɔbra n’ehum horow ho na ɔsan so ma enyigye mber no yɛ ahomka kɛse—hɛn dɛwdzi mber, ber a ewia epuei wimu, yɛ dɛw mapã ɔnam enyigye a ɔwɔ hɛn akra mu.

Hom mma “yɛntsim dzen“ wɔ hɛn Jesus na No dɔ mu. Hom mma yɛnhwehwɛ na yɛnkora No dɔ atsenkã suahu horow na tum a ɔwɔ hɛn abrabɔ mu do. Asɛmpa no ne dɛw wɔ hɔ ma obiara: nnyɛ hɔn a hɔn enyiwa agye nko, nnyɛ hɔn a woridzi awerɛhow nko. Dɛw nye hɛn botae, nnyɛ hɛn gyinabew n’akyɛdze bi. Yɛwɔ siantsir mapã dɛ “yedzi dɛw na yɛma dɔ hyɛ hɛn mã ma Nyankopɔn na adasa nyina.” Hom mma yɛmmee. Wɔ Jesus Christ ne dzin mu, amen.