Yɛrohwehwɛ Sunsum mu Nsɛmbisa Nyiano

Yerebisa nsɛmbisa na yɛrohwehwɛ n’asekyerɛ yɛ nyimpasu na ɔkã hɛn ɔnnkyebo sũahu ho. Ɔtɔfabi a, yennyi nyiano a odzi mu hɔ ara no botum dze hɛn ato hɛn ntseasee ano pɛɛ, na esintɔ no botum ama yeenya abagura anaa wɔahyɛ hɛn do. Anwanwadze mu ara, Ɔsor Egya n’enyigye ho nhyehyɛɛ ma hɛn nyinara no wɔahyehyɛ dɛ ɔbɔboa hɛn ma yɛakɔ kan a ma hɛn esintɔ tse biara no yɛayɛ dza hɛnara yennkotum ayɛ, mpo dɛ yennyi ndzɛmba nyinara ho nyimdzee a odzi mu. Nyankopɔn ne nhyehyɛɛ yɛ ehumbɔbɔr ma hɛn adasamba esintɔ; ɔma hɛn Agyenkwa, Jesus Christ, dɛ ɔnyɛ hɛn Oguanhwɛfo Pa; na okenyan hɛn ma yɛdze hɛn pɛ dzi dwuma dze san mu yi No.

Elder Dieter F. Uchtdorf akyerɛkyerɛ dɛ “yerebisa nsɛmbisa nnyɛ mberɛwyɛ sɛnkyerɛdze,’’ mbom “ɔyɛ mpontu n’akwan mbuei.’’ Ɔrekasa tɔɔtsen fa hɛn ankorankor mbɔdzembɔ ho dɛ nokwar ahwehwɛfo no, hɛn nkɔnhyɛnyi, President Russell M. Nelson, akyerɛkyerɛ dɛ otwar dɛ yenya “pɛ a no mu dɔ’’ na “yɛdze nokwar akoma” [na] [yɛmpra] hɛn akoma mu, [yɛmfa] gyedzi wɔ [Jesus] Christ mu mbisa.’’ Ɔakɔ do akyerɛkyerɛ dɛ, ”pra w’akoma mu’ asekyerɛ nye dɛ nyimpa gye enyim ankasa dɛ obedzi akwankyerɛ krɔnkrɔn a wɔdze ama no do.’’

Hɛn ankorankor mbɔdzembɔ dɛ yebenyin wɔ nyansa mu no botum egya hɛn ma yɛahwehwɛ hɛn nsɛmbisa mu, ma ɔyɛ dzen anaa ɔnntse dɛm, a yedua n’ekyir nsunsuando a yehu no do, dze hwehwɛ na yehu nhwɛdo na nkyii yɛkekã nsɛm dze tsentsen hɛn ntseasee na nyimdzee a yɛhwɛ a ɔnnhyɛ mã no na yɛhyɛ no mã. Sɛ yesusu hɛn sunsum mu nyimdzee ho ahwehwɛdze a, mbom, ɔtɔ mber bi a adwendwen akwan yinom botum aboa, mbom hɔnankasa nnkotum edzi mu ber a yɛhwɛ dze hu ndzɛmba a ɔfa Ɔsor Egya na hɛn Agyenkwa, Jesus Christ, Hɔn asɛmpa, Hɔn Asɔr, na Hɔn nhyehyɛɛ ma hɛn nyinara ho no.

Nyankopɔn Egya na Ne Ba hɔn kwan a wɔdze Hɔn nyansaa ma hɛn no dze yɛrema Sunsum Krɔnkrɔn no tum yɛ hɛn ankorankor kyerɛkyerɛnyi no dzi kan ber a yɛdze Jesus Christ tsim hɛn abrabɔ ne finimfin na wɔ hɛn nokwar nhwehwɛ mu no yenya Hɔn nyiano na Hɔn nkyerɛase no. Wɔto nsa frɛ hɛn dɛ yendua mber a yetu esi hɔ do nsũa kyerɛwsɛm krɔnkrɔn na yɛnhwehwɛ nda a odzi ekyir nokwar a woeyi akyerɛ ma hɛn nda na hɛn mber, a ndɛ da yi nkɔnhyɛfo na asomafo dze ama mfa nhwehwɛ nokwar. Wɔserɛ hɛn dɛ yɛntaa ndzi mber, yɛnsɔr wɔ Ewuradze fie na yɛnkɔ hɛn ntwɛr enyim wɔ mpaabɔ mu “mfa nya ɔsor nsɛm.’’ Jesus n’anohoba ma hɔn a nna wɔwɔ hɔ rebetsie Ne Nkyerɛkyerɛ wɔ Bepɔw do no yɛ nokwar ma hɛn wɔ hɛn nda mu dɛ mbrɛ nna ɔtse wɔ N’asaase somdwuma ber mu no dɛ; “Hom mbisa, na wɔbɛma hom; hom nhwehwɛ, na hom bohu; hom mbɔ mu, na wobobue hom.’’ Hɛn Agyenkwa ma awerɛhyɛmu dɛ “Hom Egya a ɔwɔ sor no dze ndzɛmba pa ma hɔn a wobisa no.’’

Ewuradze ne nkyerɛkyerɛ kwan nye ’’nsensaneeba tsia nsensaneeba, ahyɛdze tsia ahyɛdze.’’ Ebia obehia dɛ “[yɛtweɔn] Ewuradze’’ wɔ kwan a ɔda hɛn ntseasee ndɛ na ntseasee a mbrɛana yeribenya no ntamu mu. Kwan krɔnkrɔn yi botum ayɛ bea a hɛn sunsum mu ntsetsee kɛsenara botum esi—gyinabew a yebotum dze “abotar [asɔw]’’ hɛn enyiber ahwehwɛdze na yɛayɛ hɛn ahoɔdzen fofor dze akɔ do dze esie anohoba krɔnkrɔn horow no a yedua ahyɛmudzi do yeedzi no, akyerɛ Nyankopɔn.

Yɛnye hɛn Ɔsor Egya na Jesus Christ ahyɛmudzi nkitahodzi no yɛ sɛnkyerɛdze dɛ yɛyɛ kuromamfo wɔ Nyankopɔn n’ahenman mu. Na hɛn tsenabea wɔ mu no hia dɛ yɛdze hɛn abrabɔ bata fapem krɔnkrɔn ho na yɛdze mbɔdzembɔ hyɛ mu dɛ yebenyin sunsum mu.

Fapem tsitsir kor a wɔkyerɛkyerɛɛ wɔ Mormon Nwoma nyina mu no nye dɛ sɛ Nyankopɔn ne mba san mu yi dɛ wɔbɛyɛ setsie na wosie hɔn ahyɛmudzi horow no a, wɔkɔ do nya sunsum mu afotu na akwankyerɛ. Ewuradze akã akyerɛ hɛn dɛ yɛnam hɛn setsie na enyimia do no yebotum yenya nyimdzee na ntseasee.” Nyankopɔn ne mbra na mbrasɛm no wɔannhyehyɛ no dɛ wɔmmbɛyɛ akwansiwdze wɔ hɛn abrabɔ mu mbom wɔyɛ kwan a tum wɔ mu ma ankorankor nyikyerɛ na sunsum mu adzesũa. President Nelson kyerɛkyerɛɛ nokwar tsitsir no dɛ “aber nyina nyikyerɛ a ofi Nyankopɔn hɔ nye N’onnyiewiei mbra no saa’’ na ɔkɔ do dɛ “ɔnnye Ne nkyerɛkyerɛ mmbɔ ebira da.’’ Hom ɔpɛ setsie ma Nyankopɔn ne mbra, a yennyi ho nyimdzee wɔ ne siantsir nyina ho ekyir no, dze hom gyina No nkɔnhyɛfo no hɔn kuw mu. Moses 5 kyerɛkyerɛ hɛn nkɔmbɔdzi soronko bi wɔ Adam na Ewuradze no bɔfoe hɔn ntamu ho asɛm.

Ekyir no a Ewuradze maa Adam na Eve “mbrasɛm, dɛ wɔnsom Ewuradze hɔn Nyankopɔn, na wɔmfa hɔn nguan mu mbakan mbɔ afɔr mma Ewuradze,’’ kyerɛwsɛm no kã dɛ “Adam yɛɛ setsie maa Ewuradze ne mbrasɛm.’’ Yɛkɔ do kenkan dɛ “nda pii ekyir no Ewuradze no bɔfoe yii noho kyerɛɛ Adam, see dɛ: Ebɛnadze ntsi na ebɔ afɔr ma Ewuradze? Na Adam see no dɛ: Minnyim, Ewuradze na ɔhyɛɛ me dɛ menyɛ.”

Adam ne setsie dzii ne ntseasee kan na osiesiee no ma onyaa ntseasee krɔnkrɔn no dɛ ɔdze noho ahyɛ Jesus Christ No Werdambɔ no ne sɛnkyerɛdze krɔnkrɔn no mu. Hɛn ahobrɛadze setsie, dɛmara no, bobue kwan ama hɛn sunsum mu nhumu fa Nyankopɔn n’akwan na No botae krɔnkrɔn ma hɛn mu kor biara ho. Yɛreper dɛ yebotu hɛn setsie mpon dze hɛn bɛn hɛn Agyenkwa, Jesus Christ yie, osiandɛ setsie ma Ne mbra na mbrasɛm n’asekyerɛ ara nye dɛ yɛnye No rinya nkitahodzi.

Dza ɔkã ho no, hɛn nokwardzi ma nyimdzee na nyansa a yeenya dadaw ɔnam dɛ yɛyɛɛ anokwafo dze kaa asɛmpa fapem na ahyɛmudzi horow no yɛ ahosiesie soronko ma hɛn kradoyɛ dɛ yɛbɛgye na yɛayɛ nkitahodzi a ofi Sunsum Krɔnkrɔn no hɔ n’ahwɛdofo.

Ɔsor Egya na Jesus Christ nye nokwar nyina farbaa na wɔkyɛ Hɔn nyansa no kwa. Bio so, yɛretse ase dɛ yennyi hɛnankasa hɛn nyimdzee a Nyankopɔn nnkã ho no botum aboa hɛn ma yeehu nyia a ɔwɔ dɛ yɛkɔ no hɔ kebisa na bea a yɛdze hɛn awerɛhyɛmu a ohia bɔto.

Naaman, ɔsafohen no, nyia a nkɔnhyɛnyi Elisha saa ne kwata yarba, noho asɛm a ɔwɔ Ahyɛmu Dadaw mu no yɛ dza mepɛ papa. Asɛm no kyerɛ mbrɛ “abaawa kakraba’’ a ne gyedzi a ɔyɛ dzen no sii sesaa nyimpa kor n’abrabɔ no kwan na, ma agyedzifo nyinara no, daa Nyankopɔn n’ehumbɔbɔr a ɔsõ hɔn a wɔdze hɔn werɛ hyɛ Ɔno na No nkɔnhyɛfo mu do no edzi. Wɔammbɔ ne dzin mpo no, basiaba yi sanee boae dze hɛn ntseasee kɔr kan. Na Naaman ne gyedzi wɔ ne dase do no kenyaan no ma ɔdze n’ayarsa ebisadze no kɔr Nyankopɔn n’akowaa a ɔasan mu eyi no hɔ.

Naaman no mbuae ma nkɔnhyɛnyi Elisha ne nkyerɛkyerɛ dɛ ɔnkɔ esutsen Jordan mu nkoguar no nna ahyɛse no ɔyɛ ekyingye na ebufuw. Mbom wɔsee no dɛ ɔnyɛ setsie mma nkɔnhyɛnyi n’afotu no maa n’ayarsa ho kwan na ne ntseasee nwanwa dɛ Nyankopɔn wɔ hɔ ankasa.

Yebotum ehu dɛ hɛn sunsum mu ebisadze bi wɔ nyiano a ɔda edzi yie na wɔnnkɛyɛ atseetsee kɛse ama hɛn. Anaa, tse dɛ Naaman, yebotum ehu dɛ ehiadze bi yɛ nsɔhwɛ yie na wobotum ama atsenka a ɔyɛ dzen na huuhu aba hɛn mu. Anaa, tse dɛ ma hɔn a wɔhwɛ nworaba no wosii hɔn adwen egyinae wɔ hɛn wiadze ndzɛmba ho ahyɛse no a, hɛn ahwehwɛdze wɔ sunsum mu nokwar, ho no, yebotum enya nkyerɛase a onndzi mu sɛ yɛdan hɛnara hɛn ntseasee a ɔwɔ sintɔ nkotsee a, ɔdze awerɛhow na nsunsuando a enyi nnda ba a obotum egya hɛn efi ahyɛmudzi anamɔnkwan no ho. Naaso, nsɛmbisa bi botum awɔ hɔ kɛpem dɛ Nyankopɔn, nyia, “ɔwɔ tum nyina’’ nye “ nyansa nyina, nye ntseasee nyina,’’ nyia “[ɔwɔ] adze nyina mu ntseasee’’ wɔ N’ehumbɔbɔr mu no, bodua hɛn gyedzi wɔ Ne dzin mu ebue hɛn adwen mu.

Kɔkɔbɔ soronko kor fi Naaman n’asɛm mu nye dɛ yɛrokõ tsia setsie ma Nyankopɔn ne mbra na mbrasɛm no botum ama hɛn mpontu akyɛr anaa woesianka. Ɔyɛ nhyira ma hɛn dɛ yɛwɔ Jesus Christ dɛ hɛn Yarsafo Wura. Hɛn setsie ma Nyankopɔn ne mbra na mbrasɛm botum ebue kwan no ama hɛn Agyenkwa ma Ɔama hɛn ntseasee na ayarsa a Onyim dɛ yehia, dɛ mbrɛ N’eduryɛ a ɔakyerɛw ho nhyehyɛɛ ma hɛn no tse.

Elder Richard G. Scott kyerɛkyerɛɛ dɛ “abrabɔ yi yɛ sũahu wɔ awerɛhyɛmu a no mu dɔ mu—awerɛhyɛmu wɔ Jesus Christ mu, awerɛhyɛmu wɔ Ne nkyerɛkyerɛ mu, awerɛhyɛmu wɔ hɛn ahom mu dɛ mbrɛ Sunsum Krɔnkrɔn no begya ma yɛaayɛ setsie ama nkyerɛkyerɛ no dze enya enyigye sesei na onnyiewiei asetsena a ɔyɛ mfaso, enyigye mbordo koraa. Ibenya awerɛhyɛmu n’asekyerɛ nye dɛ ebɛyɛ setsie ɔpɛ mu ara a innyim ewiei fi ahyɛse (hwɛ Mbɛbusɛm 3:5–7). Ebɔsow aba no, otwar dɛ w’awerɛhyɛmu wɔ Ewuradze mu yɛ ndam na otsim sen w’ahotodo wɔ woara w’atsenka na sũahu mu.

Elder Scott kɔɔr do dɛ: “Edze gyedzi bedzi dwuma nye dɛ ibenya awerɛhyɛmu dɛ Ewuradze nyim dza Ɔnye wo reyɛ na Obotum ayɛ ama w’onnyiewiei yieyɛ mpo sɛ nnkotum atse mbrɛ Obesi botum ayɛ ase a.’’

Anyɛnkofo adɔfo, megye dase dɛ hɛn nokwar asɛmpa ho nsɛmbisa no botum ama Ɔsor Egya na Jesus Christ akwanhorow a wɔdze bɔboa hɛn ma yeenyin. Mankasa mo mbɔdzembɔ dɛ mohwehwɛ nyiano fi Ewuradze hɔ ma marankasa mo sunsum mu nsɛmbisa—dza etwa mu na sesei dze—ama me kwan ma medze kwan a ɔda me ntseasee nsensaneeba na Nyankopɔn dze ntamu no dze esũasũa setsie ama No na nokwardzi ama sunsum mu nyansa a sesei mowɔ no.

Megye dase dɛ edze wo werɛ rehyɛ Ɔsor Egya na No nkɔnhyɛfo a Ɔasoma hɔn mu no bɔboa wo ma enyin sunsum mu na woepia wo kan akɔ Nyankopɔn ne nyimdzee na ntseasee a ɔkɔ ekyir ho. Wo gyinabew bɛsesa osiandɛ ebɛsesa. Nyankopɔn nyim dɛ mpɛn dodow a ewɔ sor no, ibotum ehu adze wɔ ekyir. Hɛn Agyenkwa to nsa frɛ wo dɛ fow kɔ sor fa nya nyimdzee. Jesus Christ ne dzin mu, amen.