Yɛdze Hɛn Pɛ Rebata Ne Dze ho

Ber bi, Jesus kaa batanyi bi a nna ɔrohwehwɛ “botapa’’ ho asɛm. Batanyi n’ahwehwɛ ber mu no, ohun kor a “no bo sõ.’’ Naaso, ama oeenya botapa a ɔyɛ fɛw yie no nna ɔwɔ dɛ barimba yi tɔɔn n’ahodze nyinara, a amon mu na enyigye mu ara ɔyɛe.

Abɛbusɛm yi a ɔyɛ etsia na ɔgye adwendwen nyina mu no, ahomka mu ara Agyenkwa no kyerɛkyerɛɛ dɛ sor ahenman no wɔdze totoo bota a wonntwa ho bo ho, nokwar ara egyapadze a ɔsom bo dodoodow a ɔwɔ dɛ yɛpɛ kyɛn biribiara. Nokwar no dɛ batanyi no tɔɔn n’ahonyadze nyinara amon mu hɔara dze enya dɛm bota a ɔsom bo no da edzi pefee dɛ ɔwɔ dɛ yɛdze hɛn adwen na apɛdze bata Ewuradze ne pɛ ho na ɔpɛ mu ara yɛyɛ adze biara a yebotum wɔ hɛn ɔnnkyebo akwantu ber mu no dze enya Nyankopɔn n’ahenman no onnyiewiei nhyira no.

Ama yɛafata akatua kɛse yi, nokwar ara yehia, ka ndzɛmba binom ho no, dɛ yɛbɔ mbɔdzen papaapa dɛ yɛdze pɛsankomanya ahwehwɛdze to nkyɛn na yɛpow dza wɔakyekyer hɛnho a ɔtwe hɛn ekyir fi hɛn enyimpisi emu ma Ewuradze na N’akwanhorow a ɔkrɔn na ɔyɛ krɔnkrɔn ho. Ɔsomafo Paul kã ahotsew ahwehwɛdze yinom ho asɛm dɛ “[yerenya] Christ n’adwen.’’ Dɛ mbrɛ Jesus Christ yɛɛ fasusu no, iyi n’asekyerɛ nye “aber nyina [yɛreyɛ] ndzɛmba a ɔsɔ [Ewuradze] n’enyi’’ wɔ hɛn abrabɔ mu, anaa dɛ mbrɛ ndɛ mber yi ma nkorɔfo kã no, iyi nye “yɛreyɛ dza oye ma Ewuradze.’’

Asɛmpa kasa mu no, “aber nyina [yɛreyɛ] ndzɛmba a ɔsɔ [Ewuradze] n’enyi no’’ fa yegyaa hɛnho mu ma Ne pɛ. Agyenkwa no kyerɛkyerɛɛ fapem yi no hia a ohia mu yie ara ber a nna ɔrekyerɛkyerɛ N’esuafo.

“Osiandɛ mifi sor misianee mebae, nnyɛ dɛ merebɛyɛ mankasa me pɛ, na mbom nyia a ɔsomaa me no ne pɛ.

“Na iyi nye nyia ɔsomaaa me no ne pɛ, dɛ dza ɔdze ama me nyina mennyew no mu hwee, na mebɛma no do wɔ da a odzi ekyir no mu.

“Na iyi nye m’Egya ne pɛ, dɛ obiara a ɔhwɛ Ba no na ɔgye no dzi no, onnya onnyiewiei nkwa, na mebɛma no do wɔ da a odzi ekyir no mu.”

Agyenkwa no nyaa pɛ mpɛnpɛndo a odzi mu na krɔnkrɔn dze maa Egya no ber a ɔmaa Ne pɛ Kwan ma ɔkɛhyɛɛ Egya ne pɛ mu. Ɔkãa no ber bi dɛ, “Na nyia ɔsomaa me no nye me tse; onngyaa mo nko, osiandɛ meyɛ dza ɔsɔ n’enyi daa.’’ Ɔrekyerɛkyerɛ Nkɔnhyɛnyi Joseph Smith no fa Werdambɔ ne yaayaw na ahohiahia ho asɛm no, Agyenkwa no kãa dɛ:

“Na, hwɛ, emi Nyankopɔn, meehu amandze yinom dze ama obiara, ama sɛ wonu hɔnho a, woennhu amandze; …

“Amandzehu a ɔmaa emi a meyɛ Nyame a mo sõ sen obiara mpo no, moho popoe, osian yaw ntsi, na bɔgya fii mo honandua enyi nyina kyĩi, na muhun amandze wɔ honam nye sunsum mu—na mepɛɛ dɛ nkyɛ monnkɔnom kuraba wenwen no ano na mawodow—

“Naaso, enyimnyam nkã Egya no, na monomee na muwiee mo mboaboaho biara yɛ dze maa adasamba.”

Hɛn ɔnnkyebo akwantu ber mu no, yɛtaa nye dza yɛdwen dɛ yenyim no, dza yɛdwen dɛ oye papaapa no, na dza yesusu dɛ oye ma hɛn no, dzi akõ dze tsia yɛretse dza Ɔsor Egya nyim ankasa, dza onnyiewiei mu no ɔyɛ papa, na dza nokwar ara oye ma mba wɔ Ne nhyehyɛɛ mu no. Akõdzi kɛse yi botum ayɛ dzen, tsitsir ara yɛrohwɛ nkɔnhyɛsɛm horow a ɔwɔ hɛn ndɛ mu kyerɛwsɛm mu no: “Na hu yi dɛ nda a odzi ekyir no mu … nyimpa bɛyɛ ahopɛfo, … hɔn a wɔdɔ enyigye sen Nyame.’’

Asɛnkyerɛdze kor a ɔkyerɛ nkɔnhyɛsɛm yi ne mãhyɛ nye dza ɔrokɔ do sesei wɔ wiadze, pii nara fa, nkorɔfo a wɔdwen hɔanankasa hɔnho na daa wɔpaa mu kã dɛ, “ Biribiara mmfa ho, mara medze mo nokwar bɔ bra anaa meyɛ dza oye ma me.’’ Dɛ mbrɛ Ɔsomafo Paul kãa dɛ, “wɔhwehwɛ hɔnankasa hɔndze, na nnyɛ dza ɔyɛ Christ Jesus dze bi a.’’ Hɔn a wɔdze hɔnho hyɛ pɛsankomanya ahwehwɛdze mu, iyi na mepɛ, anaa wɔgye suban bi a ɔnntaa nnye Nyankopɔn no ɔdɔ nhyehyɛɛ na Ne pɛ ma hɔn no nnsaa no taa bu adwen yi dɛ “ɔyɛ papa.’’ Sɛ yɛma hɛn akoma na adwen fua adwen nsusui yi a, yebotum ayɛ akwansidze akɛse bi ama hɛnho wɔ yerenya bota a wonntwa ho bo a ɔdɔ mu ara Nyankopɔn esiesie ama Ne mba no ho—onnyiewiei nkwa.

Ber a ɔyɛ nokwar dɛ hɛn mu kor biara tu nankasa no osuanyiyɛ akwantu wɔ ahyɛmudzi anamɔn kwan do no, yɛreper dze hɛn akoma na adwen etsim Jesus Christ do no, yehia dɛ yɛyɛ ahwɛyie na hɛn enyi da hɔ daa daa amma wɔannsɔ hɛn annhwɛ ma yɛammfa wiadze mu nyansa su yi annka hɛn abrabɔ ho. Elder Quentin L. Cook kãa dɛ “yɛreyɛ Christ-su nokwar mu ara yɛ botae a ohia yie mpo kyɛn yɛreyɛ apapa.’’

M’anyɛnkofo adɔfo, sɛ yɛsan mu yi dɛ Nyankopɔn bɛyɛ nhyɛdo a tum wɔ mu wɔ hɛn abrabɔ mu ahyɛ hɛn dza yɛpɛ do a, yebotum enya kankɔ wɔ hɛn osuanyiyɛ mu na yenyin wɔ hɛn ahom mu dɛ yɛdze hɛn adwen na hɛn akoma nye Agyenkwa ne dze bɛyɛ kor. N’afã no so, sɛ yɛamma kwan ma Nyankopɔn n’akwan enndzi nyim wɔ hɛn abrabɔ mu a, ɔka hɛn nkotsee, na Nyankopɔn ne nkyenyan akwankyerɛ nnkã ho no, yebotum yɛagye adzebiara a yɛyɛ anaa yɛnnyɛ no ato mu. Yebotum ato hɛnho kwan ber a yɛreyɛ ndzɛmba wɔ hɛnara hɛn kwan mu, a ɔtse dɛ , “mara mereyɛ dza mepɛ.’’

Ber bi, ber a nna Agyenkwa no reda Ne nkyerɛkyerɛ edzi no, nkorɔfo bi, tsitsir ara Phariseefo a wobu hɔnho bem no, poow N’asɛm na akokodur mu ara wɔpaa mu kãa dɛ wɔyɛ Abraham ne mba, a wɔrekyerɛ dɛ hɔn ebusuakuw bɛma hɔn ndzinoa soronko wɔ Nyankopɔn n’enyim. Dɛm adwen no gyaa hɔn ma wɔtwer hɔnara hɔn ntseasee na wɔanngye dza nna Agyenkwa rekyerɛkyerɛ no enndzi. Nna Phariseefo no hɔn nyɛe a wɔdze kyerɛɛ Jesus daa edzi no pefee dɛ hɔn nsusui asɛmpɛ no enngya kwan wɔ hɔn akoma mu amma Agyenkwa no n’asɛm na Nyankopɔn n’akwan. Mbuae no, Jesus nyansa na akokodur mu ara paa mu kãa dɛ sɛ wɔyɛ Abraham no nokwar ahyɛmudzi mba a, nkyɛ wɔbɛyɛ Abraham no ndwuma, tsitsir ara woruhu no dɛ “Abraham ne Nyankopɔn’’ no gyina hɔn enyim na Ɔrekyerɛkyerɛ hɔn nokwar no dɛm mber noara.

Nuambanyin na nkyerɛbaa, dɛ mbrɛ wotum hu no, yɛgye adwen yinom to mu yɛdze ridzi dwuma wɔ “dza oye ma me nye dza oye ma Ewuradze ridzi esi’’ no nnyɛ adze fofor a ɔrokɔ do a ɔyɛ soronko ma hɛn da. Ɔyɛ tsetse adwen a wɔaseen mfe ɔha mfe ɔha na ɔtaa fura hɔn a wɔyɛ hɔn enyi do enyansafo no hɔn enyiwa na ɔma Nyankopɔn ne mba yɛ basaa na wɔbrɛ. Nokwar, adwen nsusui yi, yɛ ɔsɛɛfo ne ndaadaa dadaw; ɔyɛ ndaadaa anamɔn kwan a ahwɛyie mu ara ogya Nyankopɔn ne mba fi nokwar na anokwafo ahyɛmudzi anamɔn kwan no ho. Ber a ankorankor gyinabew horow tse dɛ awosu, wiadze bea a ewɔ, na honandua na adwen mu ɔhaw nya nhyɛdo wɔ hɛn akwantu do no, wɔ ndzɛmba a ohia ankasa mu no, kwan kakra bi wɔ hɔ a yɛwɔ ho kwan dɛ yɛsan mu yi sɛ yebesi gyinae dɛ yebedzi nhwɛdo a Ewuradze esiesie ama hɛn abrabɔ no anaa yennkedzi. Nokwar mu ara, “Ɔno na ɔbɔɔ kwan no na odzii enyim, Na [Ɔkyerɛɛ] mu akwan biara.’’.

Dɛ Christ n’esuafo no, yɛpɛ dɛ yɛnantsew anamɔn kwan no a Ɔbɔe maa hɛn wɔ No ɔnnkyebo somdwuma ber mu no. Yɛmmpɛ nko dɛ yɛbɛyɛ Ne pɛ na biribiara a N’enyi bɔsɔ mbom yɛhwehwɛ dɛ yesuasua No. Ber a yɛper dɛ yebedzi ahyɛmudzi biara a yedzi na yɛdze, “asɛm biara a ofi Nyankopɔn anomu no,’’ bɔ bra no, yebenya bambɔ efi yɛbɔtɔ wiadze no bɔn na mfom mu—wiadze nyansa na nkyerɛkyerɛ mfom a obegya hɛn efi bota ahorow a wɔsom bo dodoodow no ho.

Marankasa menya nkenyan wɔ mbrɛ sunsum mu yebegyaa hɛn ho mu ama Nyankopɔn a ɔtse dɛm esi enya nsunsuando wɔ Christ n’esuafo anokwafo hɔn abrabɔ do, ber a wɔsaan mu yii dɛ wɔbɛyɛ ndzɛmba a oye ma Ewuradze na ɔsɔ n’enyi no. Minyim aberantsɛ bi a nna onntum nnsi gyinae fa ɔbɔkɔ asɛmpakã ho na onyaa nkenyan dɛ ɔnkɔ na ɔnkɔsom Ewuradze mber a otsie Asɔr no baanodzinyi panyin bi a ɔkyɛɛ nankasa noara ne dasee na sũahu krɔnkrɔn fa erosom dɛ asɛmpasomafo ho.

Noara n’anomusɛm mu no, aberantsɛ yi a, sesei ɔyɛ asɛmpasomafo a oewie aba fie no, kãa dɛ: “Ber a mitsie Agyenkwa Jesus Christ no Ɔsomafo ne dasee no, mutumii tsee Nyankopɔn no dɔ ma me nkã, na minyaa pɛ dɛ menye binom bɛkyɛ. Mber noara no nna minyim dɛ ɔwɔ dɛ mosom asɛmpakã a nna musuro, ekyingye, na me haw ekyir nyina no. Minyaa awerɛhyɛmu koraa wɔ Nyankopɔn ne nhyira na anohoba horow ma Ne mba mu. Ndɛ, meyɛ nyimpa fofor, mowɔ dase dɛ asɛmpa yi yɛ nokwar na dɛ wɔdze Jesus Christ N’Asɔr asan ananmu aba asaase do.’’ Aberantsɛ yi saan mu yii Ewuradze n’akwan na ɔbɛyɛɛ osuanyi nokwafo ho fasusu wɔ kwan biara mu.

Basiaba nokwafo bi sii gyinae dɛ ɔnnkegyaa ne gyinapɛn mu mber a wɔsee no dɛ ɔnhyɛ ntar a ɔmmfata ma noho agye mu wɔ afɛɛfɛɛdze edwuma kuw bi n’afã a nna ɔyɛ edwuma wɔ mu no. Ɔtse ase dɛ ne nyimpadua yɛ akyɛdze krɔnkrɔn fi hɛn Ɔsor Egya hɔ na bea a Sunsum no botum atsena no, onyaa nkenyan dɛ ɔmfa gyinapɛn krɔnkrɔn bi mbɔ bra nkyɛn wiadze dze no. Oennya hɔn a wohun no dɛ ɔdze Jesus Christ n’asɛmpa no robɔbra hɔ awerɛhyɛmu nko, mbom ne nsa suoo n’edwuma mu yie, a nna mber tsiabaa mu nkyɛ ɔreyɛ efi ne nsa no. N’apɛdze dɛ ɔbɛyɛ dza oye ma Ewuradze na ɔsɔ N’enyi no, akyɛn dza oye ma wiadze no, maa no ahyɛmudzi mu awerɛhyɛmu wɔ nsanmuyi horow a ɔyɛ dzen mu.

Nuambanyin na nkyerɛbaa, adwenpɔw a wɔsɛ nye hɛn dzi esi daa daa wɔ hɛn daa akwantu mu. Ɔgye akokodur na ɔpɛ akoma ma yegyina na yɛahwehwɛ nokwar na botooyɛ nhumu dze agye ato mu dɛ yɛwɔ honam mu mberɛwyɛ wɔ hɛn abrabɔ mu a obotum esiw hɛn ahom no kwan dɛ yebegyaa hɛnho mu ama Nyankopɔn, na ewiei no yesi gyinae dɛ yɛbɛfa N’akwan akyɛn hɛnara hɛn dze. Hɛn osuanyiyɛ n’ewiei nsɔhwɛ no yehu no wɔ hɛn pɛ mu dɛ yebegyaa hɛn ndzɛmba adadaw no mu na yɛdze hɛn akoma na hɛn kra nyina ama Nyankopɔn ama Ne pɛ aabɛyɛ hɛndze.

Ɔnnkyebo mber n’enyimnyam dodow no kor si mber a yehu dɛwdzi a ɔba sɛ aber nyina yɛreyɛ ndzɛmba “a oye ma Ewuradze na ɔsɔ N’enyiwa no’’ na “dza oye ma hɛn no’’ bɛyɛ kor na pɛr! Dɛ yɛnnkɛsesa na yɛnnkɛgye kyim ma Ewuradze ne pɛ ayɛ hɛnara hɛndze no hia enyimnyam na akokodur osuanyiyɛ. Mber a ɔyɛ fɛw mu no, yɛdze hɛnho hyɛ Ewuradze ne nsa, na yegyaa hɛn pɛ mu koraa dze ma No. Sunsum mu ahogyaa mu a ɔtse dɛm no, sɛ yɛrekã a, ɔyɛ fɛw, tum wɔ mu, na ɔdze nsesa ba.

Megye dase kyerɛ hom dɛ yeridzi Ewuradze ne pɛ do wɔ hɛn abrabɔ mu no bɛma hɛn tum ma yehu bota a ɔsom bo dodow no wɔ wiadze mu—sor ahenman no. Meserɛ dɛ hɛn mu kor biara, wɔ hɛn mber na hɛn aber do mu no, dze ahyɛmudzi mu awerɛhyɛmu botum apaa mu akã akyerɛ hɛn Ɔsor Egya na Agyenkwa Jesus Christ dɛ “Dza oye ma Hom no, ye ma me.’’ Mekã nsɛm yinom wɔ Agyenkwa Jesus Christ dzin krɔnkrɔn mu, amen.