Mframa no Enngyaa dɛ Ɔbɔ

Afe 2015 mu, wɔ Pernambuco kurow a ɔwɔ Brazil mu no, J. Reuben Clark Mbra Kuw mu mba 62 nye kurow no mu Kwaadubɔnyi no Ɔfese bɔɔ mu yɛɛ nhwehwɛmu wɔ nkorɔfo a wɔwɔ nhwɛdo fie ahorow anan hɔn nsɛnsɛm mu. Memenda kor bi, ndɔnhwer esia ntamu no, dɛm mbranyimfo yi nye nkorɔfo bɔbor 200 a wɔtsetse nhwɛdo efiefi no yɛɛ mpɛnsampɛnsamu nkorkor, hɔn a ɔman no werɛ efir hɔn na woeyi hɔn tokyen no.

Hɔn mpɛnsampɛnsamu mu no, wohun bɔn pii a woedzi etsia mpanyimfo a wɔtsetse nhwɛdo efiefi hɔ no tse dɛ woeyi hɔn tokyen, wɔnnhwɛ hɔn yie, nye hɔn sika a wɔmmfa ndzi dwuma a ɔsɛ dɛ wɔdze dzi. Mbra kuw yi ne ngyinado kɛse kor nye dɛ wɔhwɛ ehiafo na abɔbɔfo. Abosoom ebien ara ekyir no, kwaadubɔnyi no tumii bɔɔ hɔn a afɔdzi wɔ hɔnho no kwaadu wɔ asɛndzibea.

Hɔn mboa no yɛ Ɔhen Benjamin ne nkyerɛkyerɛ ho fasusu mapã dɛ “ber biara a hom bɔsom hom nuanom no nna hom Nyame ara na hom rosom no no.”

Nyimpa kor a mankansa menye no yɛɛ mpɛnsampɛnsamu ber a hɛn dwumadzi a wonntua ho kaw no rokɔ do no yɛ ɔbaa yamuyiefo bi a woedzi mfe 93 a wɔfrɛ no Lucia. N’enyi asɔ wɔ hɛn som ho no, agodzi mu ara ɔtsẽaa mu dɛ, “War me!”

Moho abow me no, mubuaa dɛ: “Hwɛ ɔbabasia fɛɛfɛw no a ogyina hɔ no! Me yer nye no na ɔno nye ɔmansin no kwaadubɔfo no.”

Ntsɛmara obuaa dɛ: “Ntsi dɛn? Ɔyɛ akataasia, noho yɛ fɛw, na obotum awar bio a ɔrennyɛ no dzen koraa. Dza emi mowɔ nyina nye wo!”

Nyimpa nwanwafo a wɔtsetse hɔ no mu ennya hɔn haw horow nyina ho nsɔwano dɛm da no. Ekyingye biara nnyi mu dɛ wɔkɔr do hyiaa nkodzen fi ber to ber tse dɛ Jaredfo no a wɔwɔ hɔn hɛn mu wɔ akwantu a ɔyɛ dzen mu dze kɔ anohoba asaase do no, “dɔɔ esukɔ kɔr po no ase, osian asorɛkye akɛse a obui faa hɔn do no ntsi.”

Naaso dɛm Memenda no, hɔn a wɔtsetse nhwɛdo efiefi no hun dɛ ɔmmfa ho dɛ wonnyim hɔn wɔ asaase do no, nna Ɔsor Egya dɔfo bi nyim hɔn nkorkor, Nyia oyi mpaabɔ a ɔda famu koraa mpo ano no.

Owura mu wura no maa “ehum kɛse bi” tui bɔɔ Jaredfo no kɔɔr anohoba nhyira ho. Dɛmara, yebotum abɔ adwenpɔw dɛ yɛbɛyɛ ahobrɛadze mframa tɔw wɔ Nyame ne nsa mu. Dɛ mbrɛ “mframa no enngyaa dɛ ɔbɔ” Jaredfo no kɔ anohoba asaase do no, yebotum aboa binom ma woetu mpon wɔ hɔn akwantu mu a wɔdze benya Nyankopɔn ne nhiyra.

Mfe pii a abasen, ber a emi na me yer dɔfo, Chris, wɔyɛɛ hɛn mpɛnsampɛnsamu dze frɛɛ me dɛ bishop no, hɛn stake president bisaa me dɛ mpaabɔ mu ara munsusu nyimpa hɔn edzin a wɔbɛyɛ apamfo. Ɔtsee nyimpa hɔn edzin a mususui no, ɔkãa dɛ ɔsɛ dɛ muhu ndzɛmba kakraabi fa enuanom no hɔn mu kor ho.

Odzi kan, dɛm nua yi nnyim akenkan. Otsĩa ebien, onnyi kaar a obotum dze akɛserasera asɔrmba. Otsĩa ebiasa, dabaa—dabaa—ɔhyɛ ewia ahwehwɛ-enyiwa wɔ asɔr. President no nokwar mu haw ekyir no nyina no, nna metse nkã dzendzenndzen dɛ munsusu no ma ɔnyɛ me ɔpamfo, na stake president no fuaa me do.

Kwesida no a wɔmaa emi na m’apamfo no tsĩpia wɔ sacrament nhyiamu ase no, nna asɔrmba no hɔn ahobow no daa edzi. Onuabanyin dɔfo yi nantseew bɔkɔɔ baa sor hɔ, bea a nkandzea no hyerɛɛn hann wɔ n’ewia ahwehwɛ-enyiwa no do.

Ber a ɔtsenaa me nkyɛn no, mibisaa no dɛ, “Onua, ana ewɔ adzehu ho haw a?”

Ɔkãa dɛ, “Oho”.

“Ntsi dɛn ntsi na ehyɛ ewia ahwehwɛ-enyiwa wɔ asɔr?” Mibisae. “Me nyɛnko, ɔwɔ dɛ asɔrmba no hu w’enyiwa, na ɔwɔ dɛ itum hu hɔn yie so.”

Ber noara mu no, oyii n’ewia ahwehwɛ-enyiwa no na ɔannhyɛ no bio da wɔ asɔr.

Dɛm nuabanyin yi soom wɔ me nkyɛn kɛpem ber a wosiaan me dɛ bishop. Ndɛ, ogu do som wɔ Asɔr no mu nokwar mu ara na ɔyɛ enyimpisi na ahofama ma Ewuradze Jesus Christ ho fasusu. Eso, mfe pii a etwa mu kɔ no, nna ɔyɛ obi a ɔhyɛ ewia ahwehwɛ-enyiwa a wonnyim no a obiara nnkaa no a ɔtsena asɔr bɛnkye do. Metaa dwendwen, “Anokwafo mbanyin na mbaa hɔn mu dodow ahen na wɔtsetse hɛn mu a hɛn werɛ efir hɔn ndɛ?”

Sɛ wonyim hɛn yie anaa hɔn werɛ efir hɛn, kwan biara do no nsɔhwɛ bɛba hɛn mu kor biara do. Ber a yɛdan kɔ Agyenkwa No hɔ no, Obotum “ehyira [hɛn] wɔ [hɛn] amandzehu mu ma eesi [hɛn] yie” na Ɔaboa hɛn ma yeehyia hɛn nsɔhwɛ wɔ kwan bi do a ɔboa hɛn sunsum mu mpontu. Sɛ wɔyɛ nkorɔfo a wɔtsetse nhwɛdo fie, Asɔrba bi a woebu no atsɛnkyew, anaa obiara no, yebotum ayɛ “mframa no [a] [oenngyaa] dɛ ɔbɔ” no, a yɛdze enyidado ba na yɛkyerɛ binom kwan kɔ ahyɛmu anamɔn kwan no do.

Hɛn nkɔnhyɛnyi dɔfo, President Russell M. Nelson, maa mbabun no nkenyan nsato a ɔyɛ enyigye: “Ndɛ misi do enyiber do dɛ Ewuradze ase aberantsɛ a odzi mu na obotum biara dɛ ɔnyɛ ahoboa na ɔnsom asɛmpakã dwuma. Latter-day Saintfo mberantsɛ no, asɛmpakã som yɛ asɔfodzi asodzi. … Hom nkataasia no a hom botum no, asɛmpakã dwuma no so yɛ kwan a ɔyɛ ndam, mbom hom ara nsan mu nyi

Dabiara, mberantsewa na mbabaawa mpempem bua Ewuradze no nkɔnhyɛ ɔfrɛ no ber a wɔsom dɛ asɛmpasomafo. Hom abenben, na tse dɛ ma President Nelson akã no, hom botum “enya nsunsunado koraa wɔ wiadze no do kyɛn mbasantsen biara a woedzi kan no!” Nyew, ɔno nnkyerɛ dɛ hom bedzi mu amonmu ara ber a hom dze hom anan si asɛmpasomafo ntsetsee bea no.

Mbom, bia hom bɛtse nkã dɛ ma Nephi tsee no, a “Sunsum no gyaa [hom] kɔr hɔ a nna [hom] nnyim dza [hom] rekɛyɛ. Naaso [hom] kɔr [hom] enyim.”

Bia hom tse nkã dɛ hom nnyi gyedzi wɔ homho mu tse dɛ Jeremiah na hom bɛpɛ akã dɛ, “Munntum nnkasa: na meyɛ abofra.”

Bi mpo a hom bohu hom ankasa hom esintɔ horow na hom bɛpɛ atsẽa mu dɛ mbrɛ Moses yɛɛ no: “Ao, Ewuradze, m’ano nntsew … : osiandɛ m’ano yɛ dur, na me tɛkyerɛma yɛ pembɔɔ.”

Sɛ hom mberantsewa na mbabaawa adɔfo akatakyi mu bi wɔ adwen a ɔtse dɛm seseiara a, kaa dɛ Ewuradze buaa dɛ, “Mma nnse dɛ, Meyɛ abofra: na obiara a mobɔsoma wo no hɔ no, ebɔkɔ.” Na Ɔbɔ anohoba dɛ, “Dɛm ntsi afei kɔ, na mibedzi w’ano ekyir, na makyerɛ wo dza enkã.”

Wo nsakyeree fi wo honammunyi dze kɔ wo sunsum mu nyi no bɛba mu “nsensaneeba tsia nsensaneeba, ahyɛdze tsia ahyɛdze” na ber a eper dɛ ebɔsom Jesus Christ wɔ asɛmpakã bea do a idua daa daa nnuhu, gyedzi, setsie ketsee, na edwumadzen do dze hwehwɛ nkorɔfo aber biara, kyerɛkyerɛ nnuhu, na enuma hɔn a wɔasakyer.”

Ebɔ dzin ahyɛnsewdze dze, naaso ɔtɔfabi a ebɛtse nkã dɛ wonnyim wo anaa hɔn werɛ efir wo. Naaso, ɔsɛ dɛ ihu dɛ ewɔ Ɔsor Egya a odzi mu, a onyim wo ankasa, na Agyenkwa bi a ɔdɔ wo. Ibenya asɛmpasomafo banodzifo a, hɔn esintɔ nyina ekyir no, wɔsom wo tse dɛ “mframa no [a] [o]enngyaa dɛ ɔbɔ” no ber a wɔweɔn wo wɔ wankasa wo nsakyeree akwantu mu.

“Asaase a numfonsu nye ewo pem wɔ do” a ebɔsom wo asɛmpasomafo dwuma wɔ mu no, wɔbɔwo wo fofor wɔ sunsum mu na abɛyɛ Jesus Christ osuanyi wo bra nyina mu ber a etwe bɛn No no. Ebɛba ebohu dɛ werɛ mmfir wo dabiarada.

Binom bɔtweɔn “akyɛr” ana woenya ahotɔ dze, naaso osiandɛ “[wonnyi] nyimpa bi a” obotum aboa sesei no, Ewuradze Jesus Christ akyerɛ hɛn dɛ obiara nnyi hɔ a No werɛ efir no da. Ebirabɔ mu no, nna Ɔyɛ fasusu mapã ma erohwehwɛ kor no aber biara wɔ No ɔnnkyebo asetsena mu somdwuma mu.

Hɛn mu kor biara—na hɔn a woetwa hɛnho ehyia no—hyia hɛnara hɛn otisafo ehum na nsɔhwɛ asorɛkye a wɔmem hɛn daa daa. Naaso “mframa no [renngyaa] dɛ ɔbɔ kɔ anohoba asaase no ne tsentsendo; na dɛm na mframa no [bɔbɔ] hɛn [edzi] enyim [akɔ].

Hɛn mu kor biara botum ayɛ mframa yi n’afã bi—mframa noara a ohyiraa Jaredfo no wɔ hɔn akwantu mu no na mframa kor noara a, hɛn mboa kã ho no, obehyira nyia a wonnyim no na nyia a werɛ efir no dze hɔn ekodu hɔnara hɔn anohoba nsaase do.

Megye dase dɛ Jesus Christ nye hɛn Dzimafo wɔ Egya no enyim. Ɔyɛ Nyame tseasefo na odzi dwuma dɛ mframa dzendzen a ɔbɔweɔn hɛn aber nyina wɔ ahyɛmu anamɔn kwan no do. Wɔ Jesus Christ ne dzin mu, amen.