Yɛrotwer Hɛn Egya
Nyankopɔn wɔ awerɛhyɛmu wɔ hɛn mu dɛ yesi gyinae ahorow a ohia, na wɔ ndzɛmba nyina mu no Ɔkã kyerɛ hɛn dɛ yɛntwer No.
Obiradzi 1, afe 1843 mu no, Addison Pratt fii Nauvoo, Illinois, dɛ ɔrokɔ Hawaii Esupruw do akɛkã asɛmpa no, a ogyaa ne yer, Louisa Barnes Pratt wɔ ekyir, dɛ ɔnhwɛ hɔn ebusua a onnyinii no do.
Nauvoo hɔ no, ber a atseetsee no no mu yɛɛ dzen no, ɔhyɛɛ Ahotseweefo no ma wotui fii hɔ kɔr Winter Quarters no, na ekyir yi wɔreyɛ ahoboa etu kwan akɔ Salt Lake Valley no, nna ɔwɔ dɛ Louisa si gyinae dɛ ɔbɔkɔ anaa ɔnnkɔkɔ. Nkyɛ ɔbɔgow ama no dɛ ɔbɛka ekyir na ɔatweɔn ma Addsion aaba kyɛn dɛ ɔno nko botu kwan no.
Mber ebien no nyina no, ɔserɛɛ akwankyerɛ fii nkɔnhyɛnyi, Brigham Young hɔ, a ɔhyɛɛ no nkuran dɛ ɔnkɔ. Ɔyɛ dzen kɛse na nankasa no ntwetweho ekyir no nyina no, otumii kodur dwudwoodwo wɔ akwantu ebien ne nyina mu.
Ahyɛse no, Louisa n’enyi anngye kɛse wɔ akwantu no mu. Mbom, annkyɛr na n’enyi hyɛɛ ase dɛ ɔregye efuw ahaebun a ɔwɔ asaase yantamm do, nhyiren afɛɛfɛw, na asaase pawee nkakrankakra a ɔwɔ esutsen ano no ho. Ɔkyerɛwee dɛ, “awerɛhow a nna ɔda m’adwen do no fii mo do bɔkɔɔ, na nna ɔbaa biara nnyi akwantufo no mu a n’enyi gye kyɛn me.”
Louisa n’asɛm yi ekenyan me papaapa. M’enyi gye ne pɛ ho dɛ ɔdze noara dza ɔpɛ to nkyɛn, no tum dɛ ɔtwer Nyame, na mbrɛ osi ma ɔdze ne gyedzi ridzi dwuma boaa no ma ohun gyinabew no wɔ kwan fofor do.
Ɔakaa me dɛ yɛwɔ Ɔsor Egya dɔfo, a Ɔdwen hɛnho wɔ beebiara a yɛwɔ biara na dɛ yebotum atwer No kyɛn nyimpa biara anaa adze biara.
Nokwar ne Farbaa
Nyankopɔn wɔ awerɛhyɛmu wɔ hɛn mu dɛ yesi gyinae ahorow a ohia, na wɔ ndzɛmba nyina mu no Ɔkã kyerɛ hɛn dɛ yɛntwer No. Iyi taa yɛ dzen nkanka ber a nsonsonee da hɛn nsusui anaa ɔmamfo adwenkyerɛ na Ne pɛ ma Ne mba ntamu.
Binom susu dɛ yɛhwɛ nsonsonee a ɔda papa na bɔn ntamu bio osiandɛ wɔse dɛ nokwar sesã, dza ɔyɛ nokwar no ankorankor noara na ɔkyerɛ, anaa dɛ Nyankopɔn yɛ ayamuyie ara ma Ɔnnhyɛ da ara nndwen dza yɛyɛ ho.
Ber a yɛhwehwɛ dɛ yɛbɛtse Nyankopɔn ne pɛ ase na yɛagye ato mu no, ohia dɛ yɛkaa dɛ ɔnnyɛ hɛn na yebotwa ɔhẽ a ɔda papa na bɔn ntamu ato hɔ. Nyankopɔn Nankasa edzi kan etwa ato mu dada, a ogyina onnyiewiei nokwar do dze ma hɛn mfaso na nhyira.
Ɔpɛ no dɛ wɔbɛsesa Nyankopɔn n’onnyiewiei nokwar no n’abakɔsɛm war. Ɔhyɛɛ ase ana wiadze no reba, ber a Satan kõe tsiaa Nyankopɔn ne nhyehyɛɛ, a pɛsɛankonya mu no ɔhwehwɛɛ dɛ ɔbɛsɛɛ nyimpa ne pɛ. Woridzi dɛm kwan yi do no, nkorɔfo tse dɛ Sherem, Nehor, na Korihor akã dɛ gyedzi yɛ nkwaseasɛm, nyikyerɛ nnhia, na dza yɛpɛ dɛ yɛyɛ biara no ye. Ɔyɛ yaw dɛ, mpɛn pii no mmanee a ɔtsetse dɛm fi Nyankopɔn no nokwar ho no egya akɔ awerɛhow kɛse mu.
Ber a ndzɛmba binom gyina tsebew do no, nnyɛ ndzɛmba nyina na ɔtse dɛm. President Russell M. Nelson esi do akyerɛkyerɛ dɛ Nyankopɔn no nkwagye nokwar no yɛ trɔdɔdɔ, ɔnntwer biribiara, na Nyankopɔn Noara na Ɔakyerɛ.
Hɛn Nsanmuyi
Nyia yɛsan mu yi no dɛ yɛdze hɛn werɛ bɛhyɛ no mu no yɛ ɔbra ne gyinaesi horow mu kor a ohia. Ɔhen Benjamin kyerɛkyerɛɛ no nkorɔfo dɛ, “Hom ngye Nyame ndzi, hom ngye ndzi dɛ ɔwɔ hɔ … ; hom ngye ndzi dɛ ɔwɔ nyansa nyina … ; hom ngye ndzi dɛ nyimpa runntum nnhu adze nyina a Ewuradze nyim.”
Hɛn tsir ayɛ nkokwa dɛ, yɛwɔ kyerɛwsɛm no na kwankyerɛ fi nkɔnhyɛfo atseasefo hɔ a wɔboa hɛn ma yɛtse Nyankopɔn no nokwar ase. Sɛ nkyerɛmu bi wɔ hɔ a yehia a ɔbor dza yɛwɔ no a, Nyankopɔn dze bodua No nkɔnhyɛfo do dze ama. Na ɔnam Sunsum Krɔnkrɔn no do beyi hɛn nokwar mpaabɔ ano ber a yɛhwehwɛ dɛ yɛbɛtse nokwar a yɛnntse ase yie sesei no ase.
Ber bi Elder Neil L. Anderson kyerɛe dɛ ɔnnsɛ dɛ ɔyɛ hɛn nwanwa “sɛ ɔtɔfabi a ahyɛse no [hɛn] ankorankor adwenkyerɛ nnye Ewuradze no nkɔnhyɛnyi ne nkyerɛkyerɛ nnsaa. Mber yinom,” ɔkãe, “nye mber a yesũa ahobrɛadze ho nsɛm, sɛ yɛkɔ hɛn nkotodwe enyim wɔ mpaabɔ mu. Yɛdze gyedzi nantsew kɔ kan, yɛwɔ awerɛhyɛmu wɔ Nyame mu, a yenyim dɛ mber rugu mu no yebenya sunsum mu ntseasee pefee efi hɛn Ɔsor Egya hɔ.”
Mber nyina no, ɔboa dɛ yɛkaa Alma ne nkyerɛkyerɛ no dɛ Nyankopɔn N’asɛm a Ɔdze ma gyina setsie na mbɔdzembɔ a yɛdze ma asɛm no do. Sɛ yɛyɛ aso ma Nyankopɔn n’asɛm a, hɛn nsa bɛkã bi akã ho; sɛ yeyi N’afotu akwa a, hɛn nsa bɛkã kumaabi kɛpem dɛ hɛn nsa nnkã bi koraa. Dɛm nyimdzee nyewee yi nnkyerɛ dɛ nna nokwar no yɛ mfomdo; mbom, ɔkyerɛ dɛ yɛayew tum a yɛdze bɛtse ase.
Hwɛ Agyenkwa no
Capernaum mu no, Agyenkwa no kyerɛkyerɛɛ faa Nyimpa ban a Ɔyɛ na N’edwuma ho. Pii hun Ne nsɛm dɛ ɔyɛ dzen dɛ wobetsie, ma ogyaa hɔn ma wɔdaan hɔn ekyir na “wɔnnye no annantsew bio.”
Dɛn ntsi na wɔkɔree?
Osiandɛ nna wɔmmpɛ dza Ɔkãe no. Ntsi, wɔrotwer hɔnara hɔn nsusui no, wɔkɔree, a woyii nhyira a nkyɛ wɔtsenaa hɔ a ɔbɛba hɔn hɔ no akwa.
Ɔgow dɛ hɛn ahantan begyina hɛn na onnyiewiei nokwar ntamu. Ber a yɛnntse ase no, yebotum egyina, ma hɛn atsenka ataa dzinn, na nkyii yɛasan mu eyi mbrɛ yebesi bobua no. Agyenkwa no ahyɛ hɛn nkuran dɛ “[yɛnhwɛ] [No] wɔ [hɛn] adwendwen biribiara mu; mma [yɛnngye] kyim, mma [yennsuro].” Sɛ yetsim wɔ Agyenkwa no do a, hɛn gyedzi botum ahyɛ ase edzi dza yɛnntse ase do.
Dɛ President Dieter F. Uchtdorf hyɛɛ hɛn nkuran dɛ yɛnyɛ no: “Meserɛ, hom ndzi kan ngye hom ekyingye ho kyim ana hom agye hom gyedzi ho kyim. Onnyi dɛ yɛma ekyingye to hɛn adaduamu dabiarada na oyi hɛn fi ɔdɔ, asomdwee nye akyɛdze a ofi sor a odua gyedzi wɔ Ewuradze Jesus Christ mu ba no ho.”
Nhyira Ba Hɔn a Wɔtsena Hɔ
Ber a esuafo no fii Agyenkwa no ne nkyɛn kɔree dɛm da no, Obisaa Duebien no dɛ: “Ana hom so hom pɛ dɛ hom kɔ a?’’
Peter buae dɛ:
“Ewuradze, woana hɔ na yɛbɔkɔ? Ɔwo na ewɔ onnyiewiei nkwa ho nsɛm.”
“Na hɛndze, yɛagye edzi na yenyim dɛ ɔwo nye Nyankopɔn, no Hotseweenyi no.”
Afei, nna Asomafo no tse wiadze kor noara mu na wohyiaa asetsena mu haw tse dɛ esuafo a wofii hɔ kɔree no. Mbom, dɛm mber yi mu no, wɔfaa hɔn gyedzi na wɔtweer Nyankopɔn, ntsi wɔkoraa nhyira a Nyankopɔn dze ma hɔn a wɔtsena hɔ no do.
Bia ɔwo, tse dɛ emi, ɔtɔfabi a yehu dɛ yɛwɔ gyinaesi yi n’afã ebien no nyina. Sɛ ɔyɛ hɛn dzen dɛ yɛbɛtse Nyankopɔn ne pɛ ase anaa yɛbɛgye ato mu a, ɔyɛ awerɛkyekyer dɛ yɛbɛkaa dɛ Ɔdɔ hɛn dɛ mbrɛ yɛtse, beebi a yɛwɔ biara. Na Ɔwɔ adze papa bi ma hɛn. Sɛ yɛfrɛ No a, Ɔbɔboa hɛn.
Ber a yɛrefrɛ No no botum ayɛ dzen no, tse dɛ egya no a ɔrohwehwɛ ayarsa ama ne babanyin no Agyenkwa no kãa kyerɛɛ no dɛ, “Nyia ɔgye dzi no, ndzɛmba nyina botum ayɛ hɔ ama no.” Hɛn aperdzi mber mu no, hɛn so yebotum aka mu ase dɛ, “Boa m’ekyingye.”
Yerigyaa Hɛn Pɛ Mu ama Nedze
Elder Neal A. Maxwell kyerɛkyerɛɛ mber bi dɛ “nyimpa rigyaa ne pɛ mu nokwar ara no nye ankorankor adze soronko a ɔwɔ dɛ yɛdze to Nyankopɔn n’afɔrmbukyia no do.” Ɔnnyɛ nwanwa dɛ Ɔhen Benjamin nna ɔpɛ dodoodow dɛ no nkorɔfo, bɛyɛ dɛ “abofra, na ogyaa noho ma; ɔdwe, ahobrɛadze, onya abotar, ɔdɔ hyɛ no mã, onya pɛ dɛ ɔbɔsɔw biribiara a Ewuradze noara nyim dɛ oye dɛ ɔdze ba no do, koraa mpo ɔyɛ dɛ mbrɛ abofra gyaa noho ma n’egya no.”
Dɛ mbrɛ ɔyɛ no dabaa no, Agyenkwa no yɛɛ fasusu a odzi mu maa hɛn. Awerɛhow kɛse akã No no, na Onyim edwuma yaayaw a ɔwɔ dɛ Ɔyɛ no, Ogyaa Ne pɛ mu maa N’Egya nedze no, a Ɔhyɛɛ ne messiah botae no mã na Obuee onnyiewiei anohoba no ano maa emi na ɔwo.
Ɔpɛ no dɛ yebegyaa hɛn pɛ mu ama Nyankopɔn nedze no yɛ gyedzi dwuma a ohia tsitsir wɔ hɛn suanyiyɛ mu. Yɛreyɛ dɛm nsanmuyi no, yehu dɛ hɛn pɛ no do nntsew; mbom ɔyɛ kɛse na Sunsum Krɔnkrɔn n’anyɛnkoyɛ no bɛyɛ hɛn akatua, ɔno a ɔdze botae, dɛw, asomdwee, na enyidado ba a yennkenya no wɔ beebiara.
Abosoom pii a etwa mu kɔ, emi na stake president bi kɛseraa akyerɛbaa bi na ne babanyin wɔ ne stake mu. Mfe pii a ofii Asɔr no mu, kyinkyiin anamɔnkwan horow a ɔyɛ dzen na omuo do no, Ɔasan ekyir aba. Hɛn nsera mu no, yebisaa siantsir a ɔasan aba.
“Nna mayɛ me bra basabasa,” ɔkãe, “na nna minyim bea a ɔsɛ dɛ mowɔ.”
Nkyii mibisaa no dza oesũa wɔ n’akwantu mu.
Ɔdze atsenkã no, ɔkyɛe dɛ oesũa dɛ ohia dɛ ɔkɔ asɔr mber tsentseentsen ara ma otum dzi ɔmmba asɔr suban no do na dɛ ohia dɛ ɔtsena hɔ ara kɛpem dɛ hɔ bɛyɛ bea a ɔpɛ dɛ ɔtsena. Ɔresan aba no anngow amma no, naaso ber a ɔdze gyedzi wɔ Egya no ne nhyehyɛɛ mu dzii dwuma no, ɔtsee nkã dɛ Sunsum no asan aba ne nkyɛn.
Na nkyii ɔdze kãa ho dɛ, “Mesũa ama moho dɛ Nyankopɔn ye na N’akwan ye kyɛn me dze.”
Megye dase wɔ Nyankopɔn, hɛn Ɔsor Egya ho, Ɔno a ɔdɔ hɛn; Ne Ba Jesus Christ ho, Ɔno a Ɔgyee hɛn nkwa. Wonyim hɛn yaw na haw horow. Wɔremmpa hɛn da na emudzi mu ara wonyim mbrɛ wobesi bɔboa hɛn. Hɛn enyi botum agye ber a yɛdze hɛn werɛ hyɛ Hɔn mu kyɛn nyimpa biara ana biribiara mu. Wɔ Jesus Christ ne dzin krɔnkrɔn no mu, amen.