Diyin God DabiYe’ dóó DabiTsi’

Díí jį́ baa yá deeshtiígíí éí ła ts’ídá aláahdi baa hózhǫ́, ayóó ánoolnin, dóó éí Diyin God bina’nitin t’áá aaníinii bidziilii nihił ííshją́ą́ áyiilaa. T’áá ákóhgo, éí łahda t’áá bee nihaanáhást’įįd. Díkwíí nááhaidą́ą́’ shił ch’ídi’nídláádgo Diyin God bina’nitin t’áá aaníinii át’éego baa ahééníízįįd.

Sodizin yá sizíinii nishłį́įgo, łah nitsaago áłah aleehgo shi’ílnii’ ákwe’é bee ha’oodzíí’ éí kasidą́ą́’ t’áá ałtso da’oodlání tó bee alzį́į́h deidísinígíí bá ílį́į dooleel k’ad kodóó, háálá tó chooz’įįd dóó Diyin God Azhé’é dóó BiYe’ dóó Diyingo Ii’ Sizíinii dabízhi’ binahjį’ áda’ał’į́. Áádóó ńt’ę́ę́’ tó bee alzį́į́h bee hazáanii bee hoo’a’ígíí hazhó’ó bee shił hóóne’ éí doo Jesus Bisodizin Díí Jį́įdi Atah Daniidlínígíí doo bá ’át’ee da shi’dooniid.

Áłah alééh ałtso’go ha’át’éegoshą’ beehoo’a’ígíí nihąąyist’įįd nisingo alą́ąjį’ bóhólníhígíí nabídííłkidgo biniinaa’ígíí t’áá bíyó bik’idiitą́. Yá’á’t’éehgo nihił hózhǫ́ǫ dóó na’ahídíilkidgo ahił hwiilne’.

Éí t’óó ch’idast’ánígo, biniinaa doo nihił iiłta’ígíí bee shił hojoolne’ éí alą́ąjį’ Diyin táá’ ndi alhii’ naaziį́ áko t’ááłahdilt’éhé éí Trinity deiłní éí biniinaa lą́. Baa ahééniizįįgo bee bił ahił hweeshne’ hazhó’ó hwe’oodlą’ bee shił hojilne’go hodíína’ dóó ho’sodizinjí bee nahazáaniii’ígíí da. Ałtso ahił hwiilne’go, áhíníshiichid dóó hágoónee’ ahidiiniid.

Áádóó bik’ijį’ bee ahił hwiilne’ę́ę baa ntséskees, éí áłah álį́įdi naat’áanii kódííniid “Trinity Dadiyiní” éí Latter-day Saints doo yik’ida’diitįįh da áko éí shíni’ silį́į́’. Ha’át’íí da shą’ ááh yiłní? Jó, Diyin God ts’ídá t’áá át’éii bik’idiit’įįh shį́į́ át’ée lá. Diyin Azhé’é’ “hadaałt’éii diné” nilį́įgo bik’idadiitįįh “bits’iis atsį’ dóó ts’in naa ch’idgo t’áá diné át’éhígi’ át’éego; [dóó] BiYe’ t’áá ákót’é.” Kót’éego, Diyin God t’áá át’éii baa yéelti’go, hait’áó da, t’áá nihí ániit’éhígíí ałdó’ baa yádeelti’.

Dóó díí t’éiyá biniinaa t’áá aaníí da háálá t’áá aníiltso “[Beeł] t’éigo ánihi’diilyaa, [Bí] biniilt’éigo,” ndi ałdó’ biniinaa, éí Psalmist nayíízoh, Diyin God kodííniid,“Diyin danohłį́; dóó t’áá ánółtso Aghánáho’áádę́ę́’ ba’áłchíní danohłí.” Díí Diyin God bina’nitin ayóó ánoolnin éí k’ad bénáhosdzįįd sodizin nihá Ninályáádóó’. Ahiilta’go, Diyin God yá nda’nitiní yee nihił dahalne’ t’áadoo bi’ohí doodaii’ doo biláahdi da, ts’ídá áłtsé na’nitinígíí, saad dashijaa’ígi, áłtsé saad hait’éhígíí: “Diyin God Yá’ąąshdę́ę́’ nihizhé’é nilį́, dóó ba’áłchíní daniidlį́.”

Shooh, kódidííniił daats’í “Ndi t’óó ahayóí díí diné deiyoodlą́ éí Diyin God ba’áłchíní daniidlį́įgo.” Aoo’, éí t’áá aaníí, ndi ał’ąą át’éego yik’idadiitįįh t’óóyó łahgo át’éego íiyisíí hane’ nihił bééhózinígíí bits’ą́ą́jí. Dííshjį́įdi da’oodlanígíí éí, díí na’nitin doo t’óó bik’ijį’góó da. Ákondi, t’áá aaníí t’áá ánííltso Diyin God ba’áłchíní’ daniidlį́. Éí “[nihii’] sizíinii Yizhé’é nilį́,” dóó éí biniinaa, nihá biighah beniilt’é dadiidleełgo, éí doo bóhoneidzą́ą da danízin ła’.

Naakidi neeznádiin naahai dóó yíwohdą́ą́’ éí Áłtsé Yiiltsánígíí binahjį’ Sodizin Ninályá bá ahoot’i’ silį́į́’. Íídą́ą́’, Joseph Smith tsíłkééhgo sodizin bididiishááł niizį́į’go yá’ąąshdę́ę́’ biká adoolwołígíí yiká sodolzin. T’áá éí bijį́ diyingo bich’į’ hane’ ályaa, dóó náasdi diyingo bich’į́’ hane’ ályaaígíí, éí Diyin yá halne’ii Joseph bił bééhoozįįd Diyin God át’éii dóó hait’éego ba’áłchíní daniidłį́.

Éí biniinaa, Yá’ąąshdę́ę́’ NihiZhé’é t’áá níléídę́ę́’ bizaad ílíinii hazhó’ó bééhodiilzįįlgo yee nanihintin. Shaa hodinooh’aah Diyin God bizaad naakigo bee ak’i’diitįįh nihił ch’ínísh’aah.

Béénílniih sha’shin Diyin God Moses neeneeztą́ą́’ éí Pearl of Great Price Diyin Bizaad bii’ ndaháásdzo.

Éí deiníílta’ “Diyin God Moses yich’į́’ haadzíi’go, kódííniiid: Shooh, Diyin God Ayóó Át’éii nishłį́, dóó shízhi’ éí Doo Niníti’ Da.” Łahgo át’éego áhá’ní, Moses, háí ásht’inígíí nił bééhoodoozįįł nííníshní. Áádóó Ádííniid,“Dóó, shooh, shiye’ nilį́.” Áádóó bik’ijį’ ádííniid, “Dóó naanish ła’ ná shee hólǫ́, Moses, shiye’; dóó t’ááłá’í ShiYe’ át’éhígi’ ánít’é.” Áádóó akéedi, díí yee niiníłt’i’, “Dóó k’ad, shooh, díí ła’ nił ííshjání áshłééh, Moses, shiye’.”

Diyin God t’ááłá’í na’nitin íiyisíí bik’izhdi’dootį́į́ł ho’ní: “Shiyázhí nilį́,” éí táá’di ałkéé’ kóhodííniid. Bízhi’ Moses bee yídóózhiiłígíí t’áadoo choiyoos’įįd da éí íiyisíí BiYe’ bó’nínígíí biniinaa.

Ákohgo, Moses t’áá bíni’ silį́į’go, bąąh nahóókaad háálá doo Diyin God k’ad bił hólǫ́ǫ da. T’áá ákohgo Satan nabídínóotaahgo baa níyá. Da’ díí ałkéé’ áhooníłígíí hansííd? Áłtsé yee bich’́į’ haadzí’ígíí éí díí, “Moses, diné biye’ nilíinii, shich’į’ hodísįįh.”

Díí ha’oodzíí’, Satan shich’į’ hodinísįįh bił nínígíí éí t’óó bíní yiyiił’aahgo ání. Díí ayóó át’éego bóhooneeztą́ągo Moses doo bííchįįdgo t’óó bił hókéé’go dóó kwiiniizį́į́’ t’óó “diné biye’ nishłį́,” doo Diyin God biyázhí nishłį́į da.

“Áádóó Moses Satan hayíísid dóó kódííniid: Háíshą’ ánt’į́? Shooh, Shi éí Diyin God biye’ nishłį́, ”T’ááłá’í biye’ át’éhígi’ át’éego.” T’áá shǫ́ǫ́h, Moses t’áadoo bił hóókéé’ da dóó doo łahjigo bíni’yii’a’ da. Jílínígíí bína’niltin t’áá íídą́ą́’ bóhojiił’ą́ą́’.

Díí bikeedę́ę́’ háne’ígíí éí Matthew 4 biyi’. Díí daólta’ígíí bił éédahózinii dayíizhi’ “táádi Jesus bíhoneestą́ą́’,” t’óó t’áá táá’ídi Diyin Bóhólníihii bíhoneestą́ą́’ nahalingo, éí doo ákót’ée da.

Díí nahodi’nitaah át’éhígíí dóó hazhó’ó baa hane’go bee’ake’alchíhí tóhígíí neeznádiin haagiz bíighahgo chooz’įįd. Nihił bééhózingo, Diyin bizaad yaa halne’ éí Jesus halgaigóó dahdiiyá hodísingo ch’iyáán ádąąh yit’į́įgo dizdiin yiską́ą dóó dizdiindi chahóótł’éé’, bikéé’dóó dichin niizį́į́’.”

Satan bináhonitaah áłtséhígíí éí Diyin Bóhólníihii bits’íís neintaah biniyé lá. “Díí tsé bááhgo anilééh,” níigo Yisdá’iiníiłii yíká nee’á.

Naaki góne’ nahonitaahígíí éí Diyin God bóhoniitááh lą́: “Hadantłíísh: Háálá saad bik’e’ashchį́į’go bikáá’, Bá nidaal’a’í níká’adooojah.”

Wónáasii’, Satan táá’di yee nahwineeztą́ą́’ éí nahasdzáán bikáá’ ha’ahóóní dóó bee ayóó áhoot’é yee honaalnish. Ałtso Jesus bił ííshą́ą́ ályaago eí “ayóó át’éego ni’ bikáá’góó dah da’íínééh, … [Satan] ábiłní, Díí t’áá át’é naadideesh’ááł, ntsidinígeeh dóó shich’į́’ hodinísįįh.

T’áá aaníigo, Satan táá’di yiniyé nahoneeztą́’ígíí shį́į́ doo t’óó baa hodoo’nih téiyá yiká áát’įįł da ndi yee nahooneeztą́’ígíí éí Jesus Christ daats’í t’áá aaníí Diyin nilį́įgo yoodłą́. Doo t’áá naakidi da, Satan na’níłtł’ahgo hak’íhodii’ą́’ bikéé’dóó na’adlo’ yee’í’oołkąąhgo nahoneeztą́ą́’: “Diyin God Biyé nilį́įgo”—t’áá aaníí yinídłą́ągo, áko lą́ą kónínééh doodaii’ eiidí da.

T’áá shǫǫdí baa ákonoohsįįh k’ad Jesus halgaaigóó dahdiighááhgo sodílzingo dóó hozdósingo ch’iyáán ádąąhjit’į́į dooleeł: Christ tó bee bi’doolzį́į́’yęę nihił béédahoozin. Áádóó tsíł ts’áníyaago, yá’ąąshdę́ę́’ ha’oodzíí’, kóha’níigo, Díí ShiYe’ ayóó’ooshníinii nilį́, baa shił hózhǫ́.”

Da’ díí ałkéé’ áhooniłígíí bik’idiit’įįh? Da’ díí ałkéé’ áhooniłígíísh baa áhálchįįh?

Áyaanda diyingo ániit’é dóó bich’į’ nihá ahóót’i’ bee nanihidi’nitingo, doo nihił ákót’įįh da háálá t’áá ałtsoní yá’át’éehii yits’ą́ąjį’ nilíinii nanihinitaah.

Ádá nidahwiit’áhígíí hait’áo łahgo át’ée dooleeł háíshą’ áyisíí ádeit’ínígíí nihił béédahózingo.

Ni’ bikáá’góó na’nitaah bii’ kééhwiit’į́, t’ah yówehgo tsi’hahwiighááh nihitahgóó, diné sih danízinii ch’ééh bila’ ashdla’ii yá’át’éehii nohłį́ daaní, t’áábiłgo sodizinjí da’niitah dóó Diyin God bina’nitin nihił danilį́į́go dego dadíít’į́į́’ dóó hodiyin bich’į’ wóshdę́ę́’ nihi’di’ní.

Jesus bibee haz’áanii ání “hadanóołt’é, [nihi] Zhé’é yá’ąąshdi át’éhígi’ át’éego” díí bee t’áá bééhózinígo nihaadzool’į́ ayóó át’éego áda’diilnííł dóó hool’áágóó nihá bóhóneedzánígíí ałdó’. Shooh, díí doo t’ááłá’i tłéé’ ła’ doonííł da. President Jeffrey R. Holland, díí saad yee haadzíí’, t’áá ákóhodoonííł “baa hoolzhiizhgo.” Ákóndi bee ádeeha’oodzíí’ éí “Jesus baa ádadiit’ąągo,” binahjį’ “bee hadaałt’éii dadiidłeeł.” Éí ayóó át’éego bina’anish—doo t’óó dzólníígóó na’anish át’ée da, ndi naanish dólzinii át’é. Binaanish!

K’ad lą́ą, yá’át’éehgo hane’ éí Yá’ąąshdę́ę́’ Azhé’é kodííniid, “Shooh, díí shinaanish át’é dóó bee shi’adziilii—diné doo náádínóonééł da dóó hool’áágóó iiná bá bik’eh áhashłééh.”

President Russell M. Nelson nánihookąągo ání “yá’ąąsh baa ntsóhkees” ááh yił nínígíí ayóí’ánoolningo yéénihiiłnííh éí diyingo ániit’éhígíí, ánihi’diilyaa, dóó bich’į’ nihá ahóót’i’. Jesus Christ ti’́hooznii’go nihá ninánídlahígíí t’éiyá binahjį’ yá’ąąshdi iiná nihí dooleeł.

Éí shį́į́ biniinaa Satan bina’adlo’ yee Jesus bíighahí yee neineeztą́ą́’ t’áá bi’dizhchį́į́dę́ę́’ dóó nahasdzáán bikáa’gi na’neezt’ąąjį’. Matthew náyíízoh éí Jesus t’ah tsin ałná’asdzoh bikáajį’ bił o’oolkaalgo éí “bíighah dahidikáahígíí, … ádabiłní, … Diyin God biye’ nilį́įgo , wóshdę́ę́’ adanááh.” Diyin God baa hodoonih doo t’óó adiizts’ą́ą́’ da ndi aghánáhó’ą́ ak’ihojidlí nídidiilyééłgo nihá yee hooł’a.

Áłahjį’ béénílniih dooleeł, ił hózhǫ́ doo chohoo’į́į́góó ílį́́igo bik’e niilyá.

Apostle Paul bił díí nihi’oodlą’go baa hwiilne’, “Diyingo Ii’ Siz’íinii nihii’ sizíinii yił ííshjání’ ííł’į́įgo ání, Diyin God ba’áłchíní daniidlį́: dóó ba’áłchíní niidłį́įgo, béé hólónígíí danihí; Diyin God bíhígíí nihígo, dóó Christ bił ałts’ą́ą́’ ’anik’iiz; dóó bił ti’hwii’nííh dooleeł, áádóó t’áá áníilt’é’ hadaałt’é dadiidłeeł.” Jesus Christ bízhi’ binahjį’, amen.