Diyin God Ba’ Áłchíní T’áá’ałtso Ayóó’áyó’ní

NihiZhé’é Yi’ąąshdi Hólóonii lá ha’át’íí nits’ą́ą́doo yinízin? Niłísh bééhózin t’ahdoo ni’dichíhą́ądą́ą́’, NihiZhé’é Yi’ąąshdi Hólóonii nahasdzáán bikáá’di ne’iina’ ádiilíłígíí yee nannitin nt’éé’ígíí? President Russell M. Nelson aniinootséłí kwííłníigo neineeztą́ą́’, “NihiTáá Yá’ąąshdi Hólǫ́ǫnii ei lą’í ii’sizį́ danlį́ígo hasht’e’ neinínil—éíí shį́į́h … Aláahdi Bich’ijí danlínígíí ádaat’į́—akée’di áhodooníłígí bá.” Binyé díí akée’di dayoołkááłgo hasht’e’ nanhí’dee’nilígí éí, Jesus Christ t’áá íyisí aláahgo bee bikéé’ nisiidzį́įdoígí bí dahwiidiil’ááł.

Bóhólíihii Jesus Christ éí Na’niłkaadii Yá’át’éehii nilį́ dóó Bidibé yééhósin, dóó dibé éí Na’niłkaadii yá nilínígíí bił béédahózin haalá “bidibé bizhi’ dahólónígí yee yózhíiłeh.” T’áá áłahjį’ Nihózhí, dóó Binaanish nihaidiyii’aah, nalnishí Bá niidlį́, biká anéijahgo Ba’áłchíní bich’į’ andahiit’éésh.

Ánii éí, ła’ stake president nilį́įgo bił Sodizinjí da’atahígíí bi tahgo tádiit’áázh. Ałtso bitaashiit’áazhgo, stake president áshiłníilá t’áá ła’í hooghan haz’ą́ baa náániit’aashgóish nił t’áá bíígha shił níilá. Diyink’ehgo bił hane’go éí bik’ehgo ákǫ́ǫ́ dii t’ash níílá.

Áadi daadilkał nániilts’in dóó sodizinjí ła’ nihilah nilį́įgo nihá ąą’áyiilaa. Shinééłį́į́’, áko doo shéé hósinda, t’áadoo t’áá íyisí shichį’ haadzíí’da. Stake President bich’į’ dahdiishnii’go, áádę́ę́’ bich’į’ haadzíí’ bizhi’ yee bózhíigo. Éí áájí yiyiiłtsą́ągo, bił hoozhǫǫd. Ch’é’étiinígi sizį́įgo, ałzénázhchid dóó ałhaayícha. Díí binahjį’ ahił ndahosiilne’. Doo nihił bééhózinda lá díí Sister éí chemotherapy wolyéhígí adą́ą́dąą’ bá alyaa lá. Biyáázh t’áá bí t’éiyá ya’áhalyáánt’éé’ doo yiyóóghahda bitah doo hółdzilgo biniinaa. Áko, stake president bika’eeshwodgo Sister biyáázh ééhyiiltį́h, áadoo bik’idahasdáhí naabąąsígí biih yíłtį́. Nááná ła’ sister Sodizinjí atahígíí ch’iyáán yiníką́ągo biyiilzą́ą́’, áádoo t’áá ákódígí bíka’iit’áázh. T’áadoo dahndiit’aashí, Diyin be’adziil bee bá sodiilzin.

Díí baa niit’ázhígí baa ntséskees dóó shił bééhoozin Jesus Christ t’áá íyisí ayóó’ábó’ninígí. Bí éí bá bił bééhózin dóó yéego bich’į’ anáhoot’i’ígí dóó t’áá ałtso bee bich’į’ nahwii’nanígí. T’áadoo iits’a’í bá nshiil’nish łááhída t’éiyá ałch’į’ haa deidzihgo. Díí baa niit’ázhígí doo éína’niitą́ą’ da doodai’ Diyin bizaad nihił yá’át’ééhígí t’áaloo ła’ bee bił hwiil’ne’ da, áko Bóhólníihii nihik’ijisdli’ Biyi’sizíinii bee álilee k’ehgo yee lą’ígo yee nihí ká eelwod.

Nizhé’é Yá’ąąshdi Hólóonii k’ad kojį’ anííła’ ła’ t’áá íyisí binyéei hólǫ́ǫgo áko éí t’áá ałtso bííníghahígí ádíílííł binyé hosínlį́į́’ biih díníísééł áko éí baa ákodíníízįįł. Preach My Gospel biyi’dóó nanhintin éí Jesus Christ bikéé’ siizínígí bee, doo nááná ła’da yigááł bił ał’ch’į’ na’ádiyiiltéeda doo. Álilee k’ego hinínánígí éí łahgo át’é, t’áá nisínzinígí t’éiyá, dóó bił n’dizhchį́, dóó niZhé’é Yá’ąąshdi Hólóonii díí bee nííséełgo bééhodinílzindoo bee nika’adeeshwoł nó’ní. T’áá áłahjį’ hólǫ́ǫ doo ayóó’ádainíninígí nihahjį’ niZhé’é Yá’ąąshdi Hólóonii bee ayóó’óó’ní bił béédahodoozįįł. Náasdi ánt’ée doógí bííníghahdoogo yá’ąąshdę́ę́’ naadeet’ą́. Díí nahasdzáán bikáá’ ííná bee alááhjiyoogháado áyóo yee ahaadahonilné éí bá hasht’e’ ádíínilzin doo, biyi’doo ła’ t’áá íyisí aláahgo ná baa ntsáhákeesígí éí Jesus Christ bikéé’ sinzį́į doo dóó Iisizį́ Diyinii áníłnínígí bik’eh hół’į́įgo yínáał doo. Díí bik’ehóníł’į́įgo, Diyin God nik’ijidlíidoo; k’ad nighan haz’ą́ą́doo éí doodai’ náasdi na’áłchín dadooleełígí Yi k’ijidlíidoo; dóó ba’áłchíní t’áá haíshį́į́ ndááhikáhígí Yik’ijidlíidoo.

Nihe’iina’ígí bee ayóó át’ao nihá ahóót’i’. Azhą́ lą’ígóó nihił nahonitł’ah ndi, shił bééhózingo éí nihíka’ adoolwołgo binahjį’ nihiZhé’é Yá’ąąshdi Hólóonii ayóó’áboo’nínígí bił béédahodoozįįł binyé. President Nelson díí yee na’neez’tą́ą́’, “Bich’į’ yoołkááł, deidiiltsééł aláhdi ádaat’ei Yisda’iiníiłii bibee adziilii nahasdzáán bikáá’góó t’ahdoo yiiltséhígíí.” Diné bich’į’ áandahazt’i’ígí biká andeijahgo nihaadadeest’ą́, ádídeíníiltą’go, bik’idadíníit’į́į́go, doodai’ t’áadoo íits’aí bił dahoniidlǫ́ǫgo. Kót’ao biyéél ászólígo bá ádeíníilzingo, azhą́ t’óóníghanjį’ ndi, áko binahjį’ Yisdá’iiníiłii be’adziil aláadi át’ei yee yíka’análwo’ígí ba’ákodíníizįįł.

Jesus Christ bikéé’ nsiidzinígí, Latter-day Saints danhi’di’níigo kéyah t’áá náháaz’áant’éé’ bikáágo yá’áhoot’éehgo ádiilníiłgo biighah. Nihiłdahózhǫ́ǫgo bee nihéédaho’dólzin—éí iłhózhóonii bee ayóó’áda’ííníi’níigo bee yádeilti’ dóó bee dajiiniiba’. Yá’át’éehgo ahił kééhwiit’į́įdoo, dóó yá’át’éehgo nihá nda’anishdoo, dóó yá’át’éehgo ahił ndeilnishdoo. T’áá áłahjį’ yéego Christ yoodlánígí daniidlį́į doo.

Bóhól’níihii Binahat’a’ át’éhę́ęgi át’ao bee i’ool’įįł yee haidiidlaa áko Nihizhé’é Yá’ąąshdi Hólóonii ba’áłchíní yee yił aha’da’deest’ánaa yee Ádíyóltą’. Nihi k’iskéí dóó nihi lahkéí ha’at’ííshį́į́ bee bich’į’ ndahwii’nánígí bee bika’adiilwoł binyé, áadóó ałdó’ bénéilniih doo bika’adiilwoł biZhé’é Yá’ąąshdi Hólóonii diyingo yił aha’dadeest’ánáa áko Bí nát’ą́ą́’ yił aha’da’ didoot’ááł aláahdi yéego yik’ijidlíido díí iiná biyi’ dóó hool’áagóó. Díí bee ałha’deetánígí éí Jesus Christ bina’nitin bee yisda’iildeíhii ninályáhígíí t’éiyá binahjį’ ádoonííł dóó Bibee’adziilii Bibee áandítį́hí bee.

Jó ááhyiłninígí, éí Diyin yił aha’dadeest’ánígí be’atiin bikáá’go niłdzilgo deikáahgo bee bíká anéíjah doo. Łahda Diyin bił aha’da’diniit’ánígí be’atiin bits’á néíkah, ákodi béé déíl’niih doo NihiZhé’é Yá’ąąshdi Hólónígí bichį’ nihá anáhoot’i’. Azhą́ yii dááłgo doo t’áá ałtsohjį’ bee hahodít’éeda ndi, Yisda’iiníiłii t’áá áłahji’ yéé nihééyiiłnííh, “T’áá áłahjį’ [ádaa ná’iiniikąąh] dóó [bich’į’ díníít’į́į’] nihaanéidiyii’aah, t’áá aaníí ádii’níigo, [néiniikąąhgo] nihaanéididoot’ááł.”

Ch’į́įdi wolyéi dííjį́įdi nihintsékees yina’alo’ dóó yiiniidlą́ągo ánhóson éí nihe’iina’ łahgo ándiilníłígí doo bííghada nihiłní éí doodai’ sih hasin nihá ádin nihiłní. Díí t’óó ahonii’yoi ákót’ao nihidoołchxǫǫłgo nitsíikeesígí biniinaa Diyin doo bikéé’ yiidáałda yiidleeh. Ako díí ła’ ákót’ao yiiltséego bika’adiilwoł, nihxee ayóó’ooni’ bee, saad yá’ádaat’éehii bee sih hasinígí dóó bee adziilií bee, bá oolkiłgo ádiilnííł, ako yinahjį’ ha’ólníigo Diyin yikéé’ ninádoolááł.

Ła’ daats’í baa ntsókees, “Ákoląą, shíshą’ éí háí ákót’ao shikideez’į́į́’ doo nohsin?” Nihik’iskéí dóó nihilahkéí baa náádaniitaahgo dóó bik’idajiniidlíigo, t’áá aaníinii nihił béédahózinígíí bee Bóhólníihii Jesus Christ t’áá siidzíínt’éél’ bee yiiniidlą́ą doo. Díí t’áá aaníinii nihił bééhózinígí binahjį’ nihí ałdo’ Diyin hazhó’ó bikéé’ nádiikah. Iisizį́ Diyinii dahinii’náago ánanhi’doodlííł áádóó nihika’adoolwoł t’áá aaníinii nihił bee dahózinígí nihá ániidí áníedoolííłgo bee náás baa nidaniitł’ahígí dóó nihich’į’ ndahwiiłnánìgí bich’į’ danhidziil doo. T’áá haída biká andeijahgo bee bik’idajiniidlíigo, Bóhólníihii yéego nihaajooba’ doo; Bí éí danihidziilgo anhidoolííł dóó nihíka’á aníl’wo’ doo.

T’áá shǫǫdí bénáłniih Bóhólníihii Jesus Christ éí nihiYisdá’iiníiłii nili dóó t’ááła’í niidzínígo ániit’éhígí bił bééhózingo nihik’i’diitįįh. Bił bééhózin bee nihik’ihoodiinii’ígí bineel’nishgo dóó bee Diyin God ba’áłchíní bíká anéilwo’go t’áadoole’é ídiilnííłyę́ę t’áá da’ákwǫ́ǫgo. Bí éí bidziil t’áá ałtsoní yee nik’ijidlí yinídlą́ągo dóó t’áadoo nahjį’ kóníł’íní.

Shik’iskéí dóó shilahkéí ayóó’ánhíínishninígí, t’áá aaníigo bee nihił hweeshne’yę́ę éí Diyin God bił bééhózingo amá dóó biyáázh t’áadoo bika’oo’aashígo yich’į’ anhiiła’, éí naat’áanii Diyin God bibee’adziilii bee hólǫ́ǫgo t’áá áyisí bini’ bee bił hane’go ákǫ́ǫ́ baa ndíníitaał níigo binahjį’ baa niit’áázh dóó bika’ahi’niilchą́ą́’ azhą́ dóó bee nahwii’t’áada ndi. Áadoo bee nahool’zhiizhdi, éí shí íyisí shiká o’oowod. Íídą́ą́’, éí Yisda’iiníiłii ayóó’ánhó’nínígí bee na’nitin aláahdiígí ła’ shéíyílyá.

T’áá aaníigo shiłbééhózin éí Jesus Christ nahasdzáán yá Yisda’iiníiłii nilį́, t’áá aaníí hiná, Bee Iina’ áyiilaa áádóó nihá daaztsą́, áádóó naadiidzá ni dóó shí nihá áko biká ádeit’į́ celestialdi nihił dahózhǫ́ǫgo ahínéediikah ayóó’ádéinii’níinii andahaaskaiyę́ę bił. Shił bééhózin éí Jesus Christ nihééhósin ni dóó shí t’áá ániit’éegi bee. Bił béehózin t’áá ła’í niizinígo bee nihich’į’ ndahwii’nánígí, dóó Bidziilígíí yee nihíka’adool’woł atínihidoolííłígí bits’ą́ąjį’. Shił bééhózin Bóhólníihii Jesus Christ dóó nihiZhé’é Yá’ąąshdi Hólóonii Joseph Smith yaani’áázhgo bina’nitin nineidlá díí dayoołkááłígíí biyi’di. T’áá aníí shił bééhózin Diyin God Yáyáłt’íí ayóó’ádeiníi’ní, President Russell M. Nelson, éí Diyin Bóhólníihii yáyáłti’íí nilį́, dóó díí t’áá aníí shił bééhózin Jesus Christ bizhi’ binahjį’ ádishní, amen.