Testimónio ñeme’ẽ Jesucristo-gui ñe’ẽ ha tembiapo rupive

Ñemongaraípe peteĩ promésa jajapóva ha’e ñaimeha jajapyhy hag̃uáicha ñande ári Jesucristo réra. Che propósito ko árape ha’e ñanemandu’a ikatuha jahechauka Tupãme jajapyhyha Ita’ýra réra ñande ári ñame’ẽvo testimónio ñe’ẽ ha tembiapópe, py’ỹi ikatuháicha, Jesús ha’eha upe Cristo.

Oministra ha ombo’évo Amérika tavayguápe oikove jey rire, Salvador he’i:

“Nomoñeʼẽi piko hikuái umi escritura, heʼíva pejagarravaʼerãha pende ári Cristo réra, haʼéva che réra? Kóva ko téra rupi peñehenóitagui ára pahápe;

“Ha ojagarráva hi’ári che réra, ha oñeha’ãmbaitéva ipahaite peve, péva ojesalváta ára pahápe.”¹

Presidente Russell M. Nelson ñanembo’ékuri “jajapyhy ñande ári Salvador réra ryepýpe oike ja’e ha jatestifika ambuekuérape—umi jajapóva ha ja’éva rupi—Jesús ha’eha pe Cristo”.²

Jesucristo Tupao Santokuéra Ára Pahapegua miembro ramo, jareko tovasapy ha privilegio ha’évo Ñandejára ha Héra testígo mamo jahahápe.³ Ñañeha’ãvo jaiko Jesucristo evangelio he’iháicha, ñande reko ha’éta peteĩ testimónio oikovéva ñane Redentor ha Héragui. Avei, ñame’ẽ testimónio Cristo-gui ñakompartívo ñe’ẽ rupive ambuekuéra ndive umi jarovia, ñañandu térã jaikuaáva Jesucristo-gui.

Ñakompartívo ñemomirĩme ñane testimónio Ñandejáragui ñane ñe’ẽ ha ñane rembiapo rupive, pe Espíritu Santo omoneĩ⁴ umi oipota añetéva, korasõ jepe’a ha iñakã orekóva dispuesto-pe Jesús añete ha’eha upe Cristo.⁵

Akompartise penendive mokõi ejemplo ramoite ha iñinspiradóreva miembro-kuéra ohechaukáva Tupãme ojapyhyha hi’ári Jesucristo réra oñe’ẽvo Hese ha ome’ẽvo testimónio potĩ Ñandejáragui umi Tupao atyhápe.

Ejemplo peteĩha: Che rembireko Elaine ha che roho jave España-pe 2022-pe, roho upépe reunión dominical jave peteĩ Tupao unida michĩme. Aguapy jave estrado-pe ha che rembireko congregación-pe, ahecha ha’e oguapyha peteĩ kuñakarai ika’arúmava ykére. Opakuévo reunión sacramental, aguata Elaine rendápe ha ajerure chupe topresentami chéve iñamíga pyahu. Ojapo upéicha ha he’i ko kuñakarai, ndaha’éiva Tupaogua miembro, ojapo haimete mokõi áñoma ovisitaha Tupao. Ahendúvo upéva, aporandu pe kuñakarai Itupã kyhyjévape mba’épa ojapo tou jey ha oasisti ñande atykuérape hetaite ára aja. Kuñakarai ombohovái mborayhúpe, “Ajuse ko’ápe peẽ peñe’ẽre Jesucristo-re pende atýpe.”

Ojehechaháicha, Tupaogua miembro-kuéra upe unida España-pe oñe’ẽ, ombo’e ha otestifika Cristo-gui umi ijatyhápe.

Ejemplo mokõiha: Aservi rire Brasil Área-pe, ahupyty peteĩ asignasiõ pyahu aservi hag̃ua Tupao sédepe. Rova vove Salt Lake City-pe julio pahápe ko áñope, roasisti umi reunion dominical-pe ore barrio pyahu ha iporãitévape. Peteĩva umi reunión ha’ékuri reunión de ayuno y testimonio. Ropartisipa rire ñetupaitũme Santa Cena-pe, miembro-kuéra oñembo’y ha, peteĩteĩ ome’ẽ testimónio añete Salvador-gui. Pe reunión oñemombyte Jesucristo-pe ha ikatu roñandu porã pe Espíritu. Rokakuaa ha ore jerovia oñemombarete. Upéicha Tupao amigo-kuéra, ohekaséva añetegua, ikatúva oĩ upe reunión-pe, ohechakuaava’erãmo’ã kóva ha’eha Jesucristo Tupao.

Jajehovasaite piko jahecha jave ñande Tupao reunión-kuéra ha’eha umi oportunida iporavopyréva jatestifika hag̃ua Cristo-gui ha jahechauka hag̃ua Tupãme javy’aiteha jajapyhývo Ita’ýra réra ñande ári.

Ko’ág̃a, pehejami ta’e peteĩ ejemplo mbarete mba’éichapa jajapyhy ñande ári Jesucristo réra ñame’ẽvo testimónio Hese tembiapo rupi.

Pe agosto ohasava’ekuépe, amoirũ Elder Jonathan S. Schmitt-pe jornada de puertas abiertas jave Feather River California Templo, Yuba City-pe. Upépe ajehovasa agiávo umi atýpe peteĩ recorrido-pe upe templo-re. Peteĩva umi atýpe oike peteĩ Tupaogua miembro, Virgil Atkinson, ha siéte amigo ambue religión-kueragua. Upe visita opakuévoma, pe templo sala de sellamiento-pe, hermano Atkinson oñe’emosiona omombe’úvo mborayhu orekóva umi iñamígore ouva’ekue templo-pe upe ára. Pya’ete ojapo rire, peteĩ kuña pe atygua opu’ã ha he’i, “Opavave rohayhu Virgil-pe. Ha’e araka’eve naoreimponéi i-fe. Ha katu avei ha’e nahi’õtĩri upévagui. Ovivínte pe ogueroviáva.”

Umi áño pukukue aja, hermano Atkinson rekove cristiano oiko peteĩ testimónio mbaretéicha iñamigokuérape g̃uarã. Iñehémplo ohechauka mbarete ojapyhyha hi’ári Cristo réra.

Amohu’ãvo, pehejami chéve takomparti aikuaava’ekue mba’éichapa jajapyhyva’erãre ñande ári Cristo réra ha jatestifika Chugui jaipuru porãvo Tupao réra.

Presidente Nelson, pe Tupã proféta oikovéva, peteĩ discurso-pe conferencia general 2018-pe hérava “Tupao réra hekópe,” he’i: “Upéva ha’e peteĩ corrección. “Upéva ha’e pe Ñandejára mandáto. José Smith nombohéraikuri Tupao restaurádo hese rupive; ni Mormón avei. Pe Salvador-ete he’íkuri, ‘Péicha oñehenóitagui che Tupao umi ára pahápe, Jesucristo Tupao Santokuéra Ára Pahapegua’ [}Doctrina ha Konveniokuéra 115:4].”⁶

Opavave rosẽkuri upe ára conferencia general-hágui comprometido ha decidido rosegívo profétape ha roipurúvo Tupao réra ojerrevelava’ekue upe ára guive. Añete añatende ajeasegurávo aipuru Tupao réra hekoitépe. Añepyrũvo, aimeva’erã consciente ha nañepermitiriva’erã ajevy umi jepokuaa ymaguarépe. Umi inténto ñepyrũ guie, añeñandu porãve aipuru reheve Tupao réra ojerrevelava’ekue. Amombe’u heta jey, ha’e pya’epya’eha Tupao réra. Chepy’apy oimérõ g̃uarã umi hénte noñatendéi upe Tupao réra pukukue ha opensánerõ g̃uarã ipukuha.

Ha katu, upe rire ahechakuaa ha’epaitésevo Tupao réra ome’ẽha chéve heta umi oportunida hepyvéva ha’e hag̃ua Jesucristo réra ha, upéicha, ame’ẽha testimónio Salvador-gui ha’évo Héra Itupao réra ryepýpe. Avei ahechakuaa ha’e porãvo Tupao réra ambuekuérape, chemandu’a py’ỹiveha Jesucristo-re ha añanduha oĩha che rekovépe.

Jasegivévo profétape, opavave ikatu jatestifika Jesucristo-gui jaipuru porãvo Tupao réra, jajapyhyvévo ñande ári Ñandejára réra.

Ko domingo pyhareve, torýpe atestifika Presidente Nelson ha’eha Tupã proféta oikovéva ha Jesucristo Tupao Santokuéra Ára Pahapegua ha’eha Cristo Tupao restaurado. Ame’ẽ humildemente testimónio Tupã Ra’y ha Idivinidágui. Ha’e Tupã Ra’y Primogénito ha Unigénito, ñande Salvador ha Redentor, Emanuel.⁷ Jesucristo rérape, amén.