Ehayhu Nde Rapichápe

Ko pyharevépe, po’invita pejoaju hag̃ua chendive peteĩ viáhe africano-pe. Ndapehechamo’ãi mba’eveichagua leõ, sebra ni elefante, ha katu, pe viáhe opakuévo, ikatu pehecha mba’éichapa miles umi miembro Jesucristo Tupao Santokuéra Ára Pahapegua ombohovái hína Cristo rembiapoukapy guasu mokõiha “ehayhu nde rapichápe” (Marcos 12:31

Peñeimahinamína sapy’ami, pe África yvy okaraygua ha pytãva rehe. Pe yvy ikã ha omoheñoi’ỹvva rehe ojekuaa pe ama ndo’aveihague medida oñeikotevẽháicha hetaiterei áñorema. Umi vaka mbovymi ohasáva pende raperãme ikanguekuereive upe ho’o rangue ha oñemboguata hína peteĩ pastor Karamojong rehe ojejaho’íva ahojápe ha, sandalia ipy rehe, ojeporeka’asyetéva oha’arõva ojuhu y ha ka’avo.

Peguata aja pe tape korócho ha itaju ári, pehecha heta mitãmi porã aty ha peporandu mbaʼérepa noĩri eskuélape. Mitãnguéra opukavy ha oporomomaitei, ha peẽ pemomaitei avei tesay ha pukavýpe. Noventa y dos por ciento umi mitã michĩvéva pehecháva ko viáhepe imboriahu hi’upyrãme ha pene korasõ ipyahẽ ñembyasýgui.

Tenonderã katu, pehecha peteĩ sy ogueraha porã asýva iñakã ári peteĩ mba’yru cinco galón (19 L) y ipype ha ipópe katu ambue. Ha’e orrepresenta peteĩva opa mokõi ógape ko zona-pe kuñanguéra, imitã ha kakuaáva, oguatahápe treinta minuto rasa ou ha ohokuévo, káda día, peteĩ yvu peve i-familia-pe g̃uarã. Peteĩ ñembyasy pu’ã ou pende ári.

Ohasa mokõi aravo ha peg̃uahẽ peteĩ tenda hesakã porãva oñemboyke ha iñypytũha. Upe ñembyaty oikoha ndaha’éi peteĩ salón ni peteĩ ogao jepe, ha katu, mbovymi yvyramáta tuichavéva guýpe omo’ãva kuarahy poromboykúvagui. Ko tendápe, pehechakuaa ndaiporiha y osyrýva, ndaipóri eletrisida, ndaipóri oñeñemopotĩ hag̃ua. Pemaña pende jerére ha peikuaa peimeha peteĩ táva ohayhúva Tupãme apytépe ha upe javete peñandu Tupã mborayhu hesekuéra. Ha’ekuéra oñembyaty ohupyty hag̃ua pytyvõ ha esperánsa, ha peẽ katu peg̃uahẽ pekomparti hag̃ua umíva.

Péichakuri hermana Ardern ha che viáhe, hermana Camille Johnson, ñande Presidenta General Sociedad de Socorro pegua ñemoirũ reheve ha iména Doug ha hermana Sharon Eubank, Tupao Servisio Umanitário directora, roviaha aja Uganda gotyo, peteĩ tetã orekóva 47 millones tapicha Tupao Área oĩva África Central-pe. Upe árape, yvyramáta kuarahy’ã guýpe, rovisita peteĩ proyecto tesãi rehegua upe komunidagua ohepyme’ẽva oñondive Tupao Servisio Umanitário, UNICEF ha Ministerio de Salud Uganda Govierno-pegua. Ko’ãva ha’e organisasiõ rojeroviakuaáva rehe, ojeiporavo porãva’ekue ojeasegura hag̃ua umi fondo umanitário ome’ẽva umi miembro Tupaogua tojeiporu hekoitépe.

Ijetu’úramo jepe rohecha mitãnguéra okaru porã’ỹva ha umi oguerúva upe mba’asypo’i, akãnunduro’y ha tye opave’ỹva, og̃uahẽ peteĩteĩ oréve esperánsa tuichavéva peteĩ ko’ẽ iporãvetaha umi roikuaava’ekuépe g̃uarã.

Upe esperánsa ou, párte avei, Tupao miembro-kuéra py’aporã rupive opa múndo jerére ome’ẽva tiempo ha pirapire Tupao rembiapo umanitáriope. Ahechávo umi hasýva ha ohasa’asývape oñepytyvõ ha ojehupi, añakãity aguyje reheve. Upérõ ahechakuaa porãve mba’épa he’isékuri pe Rréi rreikuéra apytépe he’ívo:

“Peju, peẽ che Ru penderovasáva, pehupyty pe réino oñembosako’iva’ekue peẽme g̃uarã … :

“Cheñembyahýi ramo guare, ha peẽ chemongaru; che’yuhéi ramo guare, ha peẽ chemboy’u; aiko ramo guare mombyrygua ramo ha peẽ chemog̃uahẽ” (Mateo 25:34–35).

Ñande Salvador jerure’asy ha’e “péicha tomyesakã pende resape yvyporakuéra renonderã, ohecha hag̃ua hikuái pene rembiapo porãngue, ha toglorifika pende Ru oĩva yvágape” (Mateo 5:16; tojehecha avei umi vérso 14–15). Upe yvy pa’ũmi mombyryetépe, pene rembiapo porãngue ohesape umi tekove ha ombovevyive peteĩ táva oikotevẽtereíva mba’e pohýi, ha Tupã ojeglorifika.

Upe ára haku ha yvytimbópe, aipotava’erãmo’ã pehendumi umi iñembo’e omomba’eguasúvo ha oaguyjeme’ẽvo Tupãme. Ha’ekuéra oipota ha’e peẽme Karamojong ñe’ẽme: “Alakara”. Aguyje.

Ore viáhe chemomandu’aite pe Samaritano py’aporã parávola rehe, upe ijeho ogueraháva chupe peteĩ tape yvytimbóre, naiñambueguasúiva pe che amombe’úvagui, peteĩ tape ohóva Jerusalén guive Jericó peve. Ko samaritano ministránte ñanembo’e mba’épa he’ise jahayhu tapichápe.”

Ohecha “peteĩ kuimba’e … [ho’áva] mondaha pópe, oipe’áva chugui ijao, ha oinupã chupe, ha osẽ oho ohejávo chupe haimete he’õngue” (Lucas 10:30). Pe samaritano “oiporiahuvereko chupe” (Lucas 10:33).

Pe poriahuvereko ha’e peteĩ Cristo atrivúto. Heñói mborayhúgui ambue tapicha rehe ha ndoikuaái hembe’y. Jesús, ko múndo Salvador, ha’e pe poriahuvereko ra’anga. Ñamoñe’ẽvo “Jesús hasẽ hague” (Juan 11:35, ñande ha’e testigo, María ha Marta-icha, Iporiahuvereko omoñepyrũ hague Chupe omopyahẽ espíritu-pe ha ombopy’apy (tojehecha Juan 11:33). Peteĩ Cristo poriahuvereko ehémplo oĩva Mormón Kuatiañe’ẽme, Jesús ojehechauka peteĩ atyguasúpe ha he’i:

“Peguerekópa ikarẽva, térã ohechaʼỹva, térã ijypíva, … ohenduʼỹva, térã oguerekóva oimeháichagua mbaʼasy? Pegueru koʼápe ha che amongueráta chupekuéra, poiporiahuverekógui. …

“… Ha omonguera peteĩteĩ chupekuéra” (3 Nefi 17:7, 9).

Ñañeha’ãmbavéramo jepe, nde ha che nañamonguerapamo’ãi opavavépe, ha katu peteĩteĩ ñande ikatu ha’e pe ikatúva ojapo peteĩ diferencia iporãve hag̃ua peteĩ tapicha rekove. Ha’e peteĩ mitãkuimba’énte, peteĩ mitãkaria’ymínte, oikuave’ẽva umi cinco mbujape ha mokõi pira omongarúva umi cinco mil-pe. Ikatu ñaporandu ñane ofrénda rehe, ojapo haguéicha discípulo Andrés umi mbujape ha pira rehe: “Mba’e oĩ umi hetaite apytépe?” (Juan 6:9). Aasegura peẽme iporãnte peme’ẽ hag̃ua térã pejapo hag̃ua pe ikatúva, ha upéi peheja Cristo-pe tomomomba’eguasu pene ñeha’ã.

Ko’a peve, Elder Jeffrey R. Holland ñaneinvita, “irríko térã imboriahúva, … ‘jajapo hag̃ua ikatumíva’ oiméramo oikotevẽva.” Upéi otestifika, che ajapoháicha, Tupã “penepytyvõta ha penesãmbyhýta [pende] discipulado poriahuvereko rembiapópe” (“Ndaha’éipiko ñande opavave mendígo?,” Liahona, Nov. 2014, 41).

Upe tenda mombyrýpe, upe ára oiko’ỹva’erãgui tesarái, che aikokuri testigo upérõ, ha ko’ág̃a, tupaogua miembro-kuéra irríko ha imboriahúva poriahuverekógui, opokóva ñande py’áre ha omoambuéva tekove.

Pe Samaritano py’aporã parávola ojesegi “ojejokuávo [pe kuimba’e] erida … ha oñeñangarekóvo hese” (Lucas 10:34). Ñane ñeha’ã umanitário Tupaópe ñandejuhu pya’e ñambohovaiha umi desastre natural ha jajokuaha umi erida múndo pegua amadia ombotuichavéva umi mba’asy, ñembyahýi, mitã ñemano, desnutrición, desplazamiento ha umi desánimo erida py’ỹi ojehecha’ỹva, pe desilusión ha py’aropu.

Upérõ pe samaritano “oguenohẽ mokõi denario, ha ome’ẽ upe mesonéro-pe, ha he’i chupe: Eñangareko hese” (Lucas 10:35). Tupaóicha, oreaguyjeme’ẽ roñomoirũ haguére ambue “mesonero-kuéra” térã organisasiõnguéra ndive, ha’eháicha Servicios de Socorro Católico, UNICEF, ha Cruz Roja/Media Luna Roja, roipytyvõ hag̃ua ore rembiapo umanitáriope. Roaguyjeme’ẽ avei pende “mokõi denario” térã mokõi euro rehe, mokõi peso térã mokõi cheline rehe, ombovevýiva hína pe mba’e pohýi hetaiterei tapicha ko múndo jerére oikova’erã ogueropu’aka. Ikatukuaaite ndapeikuaáivo umi ohupytyva’ekue pene tiempo, dólar ha centávo, ha katu pe poriahuvereko noikotevẽi jaikuaa chupekuéra; oikotevẽ jahayhúnte chupekuéra.

Aguyje, Presidente Russell M. Nelson, oremomandu’a haguére “jahayhúramo Tupãme opa ñane korasõ reheve, Ha’e ombojereha ñane korasõ ambue tapicha rekoporã rehehápe” (“Tembiapoukapy Guasu Mokõiha,” Liahona, Nov. 2019, 97). Atestifika peteĩteĩ ñande jaguerekotaha tuichave vy’apavẽ, py’aguapy, umilda ha mborayhu ñambohováivo Presidente Nelson ñehenói ha José Smith jerure’asy “ñamongaru umi iñembyahýivape, ñamonde umi ijao’ỹvape, ñame’ẽ pe viúdape g̃uarã, ñamokã pe tyre’ỹ resay, [ha] ñakonsola umi ohasa’asývape, taha’e ko Tupaópe, térã oimeraẽ ambuépe, térã ni peteĩ tupaópe, oimeraẽ mamo [jajuhuhápe] hesekuéra” (“Editor’s Reply to a Letter from Richard Savary,” Times and Seasons, Mar. 15, 1842, 732).

Ojapo opa umi mése, rojuhuha umi iñembyahýi ha ohasa’asývape peteĩ yvyty ikã ha yvytimbópe ha roiko testígo hesakuéra ojerure’asývagui pytyvõ. Ore rekópe, orepyahẽ espíritu-pe ha rojepy’apy (tojehecha Juan 11:33, ha katu umi temiandu oñembopiro’y rohechávo Tupaogua miembro-kuéra poriahuvereko omba’apóva umi iñembyahýivape oñemongarúvo, umi viúda rehe oñeñangareko, ha oñekonsola umi ohasa’asývape ha umi hesay oñemokã.

Ñama’ẽ tapiaite ambue tapicha rekoporãre ha jahechauka ñe’ẽ ha tembiapo rupive ñande haʼeha “oguerahaséva ojupe imbaʼe pohyikuéra” (Mosíah 18:8), “omoangapyhy hag̃ua umi ikorasõ rasývape” (Doctrina ha Konveniokuéra 138:42), ha ñakumpli hag̃ua Cristo rembiapoukapy guasu mokõiha “ehayhu nde rapichápe” (Marcos 12:31). Jesucristo rérape, Amén.