Ne Ñemoñare Ñeimeporãrã

Ojapo pokã ary, aservi aja Área Sudamérica Noroeste-pe ha aiko Perú-pe, arekókuri peteĩ tembiasa porãite akompartiséva penendive.

Ojehúkuri ajevývo ógape peteĩ semana paha cherembiapoitévape umi asignasiõ reheve. Ajapopa rire inmigración kuatiakuéra aeropuerto-pe, ajuhu peteĩ taxista iñamigábleva ore taxi servicio jepiguavapegua chera’arõva hína. Chegueraha ikóchepe ha aguapy tapykuépe, apytu’u ha aguerovy’a hag̃uáicha peteĩ je’ói kirirĩ ógape. Roho rire pokã cuadra, isupervisor ohenói chofer-pe he’ívo chupe ajavy hague pe taxi. Ambue coche ojerreservákuri chéve g̃uarã, ha supervisor ojerure chupe tachegueraha jey aeropuerto-pe aipotárõ ambue coche. Ha’e chupe natekotevẽiha ha rohokuaánte tenonde gotyo. Pokã aravo’i rire kirirĩháme, oma’ẽ cherehe retrovisor-pe ha oporandu chéve: “Ndéngo mormón, ajepa?”

Nei, upe ñepepirũ porandu rire, aikuaáma che ára kirirĩ ohasahague. Ndaikatúi ajejoko aexplorávo moõpa oregueraháne iporandu.

Aikuaa heraha Omar, hembireko héra Maria Teresa ha orekoha mokõi mitã: Carolina, orekóva 14 áño, ha Rodrigo, 10 áño. Omar ha’eva’ekue Tupaogua miembro imitã guive. Ifamilia oĩkuri activo, ha katu ituvakuéra ndohovéi sapy’a tupaópe. Omar ndohoveiete tupaópe oreko guive 15 áño. Upérõ ha’e oreko 40 áño.

Upépe ahechakuaa ndajavyihague ajagarrávo upe taxi. Ndaha’éikuri peteĩ coincidencia! Ha’e chupe mávapa che ha aĩha itáxipe Ñandejára ohenói jeýgui hína chupe Irredílpe.

Upéi roñe’ẽ ára ha’e ha ifamilia ha’e aja tupaogua miembro activo rehe. Ha’e orekókuri mandu’a porã umi noche de hogar rory ohasava’ekue ha Primaria-gua purahéire. Upéi opurahéi mbeguemi “Soy un hijo de Dios” purahéi ñe’ẽ’imi.”¹

Areko rire i-dirección, teléfono número ha permiso akomparti hag̃ua ijobispo ndive, ha’e chupe añeha’ãmbaitétaha aĩ hag̃ua capilla-pe ára peteĩha ha’e oho jey vove tupaópe. Rombopaha ore je’ói aeropuerto guive che róga peve, ha avei ore je’oi’imi hembiasakuére, ha rojopoi.

Pokã semana uperire, ijobispo cherenói ha he’i chéve Omar oplaneaha hína ohóvo tupaópe peteĩ domingo. Ha’e chupe aĩtaha upépe. Upe domingo, Omar oĩ upépe ita’ýra ndive. Hembireko ha itajýra noĩri gueteri interesado. Pokã mese rire, ijobispo cherenói jey, ko’ág̃a he’i hag̃ua chéve Omar obautisataha hembirekópe ha mokõi imitãme, ha cheinvita aĩ hag̃ua upépe. Kóva ha’e ta’anga upe domingo oñekonfirmahague chupekuéra Tupaogua miembro.

Upe domingo, ha’ékuri Omar ha ifamíliape oñembosako’írõ hikuái, peteĩ arýpe che amomba’eguasueténe ajapo hag̃ua isellamiénto Lima Perú Templo-pe. Kóva ha’e ta’anga upe tembiasa rehegua imba’eguasuetéva oréve g̃uarã ojejapova’ekue peteĩ ary rire.

Mba’érepa akomparti penendive ko tembiasa? Akomparti hína mokõi mba’ére.

Peteĩha, añe’ẽ hag̃ua miembro-kuéra porãitépe, umi oiméne mba’érepa oñemomombyryva’ekue Jesucristo evanhélio restaurádogui. Mokõiha, añe’ẽ hag̃ua avei umi miembro opartisipáva ko árape ikatúva ndaijeroviarekoitéi ikonveniópe ha’evarãicha hikuái. Mokõive kásope, umi generasiõ oúva ojepoko, ha umi jehovasa ha promesa oñeñongatúva iñemoñarekuérape g̃uarã oje’apeligra.

Ñañepyrũ pe situasiõ peteĩháre, umi miembro porãite ohejava’ekue pe konvénio rape, ojehu haguéicha che angirũ peruano Omar ndive. Aporandúrõ chupe mba’érepa ou jey, he’i chéve ha’e ha hembireko oñanduhague imitãnguéra hekovy’avéta Jesucristo evanhélio reheve. Ha’e oñandu árama oho jey hag̃ua tupaópe imitãnguéra ñeimeporãrã.

Iñembyasyete jajotopárõ Tupaogua miembro noĩriva activo térã umi ndaha’éiva miembro, ára ohasava’ekuépe orekóvakuri pe evanhélio ifamilia mbytépe ha okañy chuguikuéra itúva, sy térã taita/jarýi oiporavógui opytu’utaha sapy’a Tupaógui. Upe jeiporavo orekokuaa peteĩ impacto iñemoñarépe akoiete g̃uarã!

Imitã ha inietokuéra opyta Jesucristo evanhélio ñemo’ã ha jehovasa’ỹre hekovépe. Ñanemokorasõrasyvéva ha’e okañyha chuguikuéra pe familia eterna rehegua promesa oĩva’ekue upépe peteĩ ára. Peteĩ tapicha desisiõ opoko opa peteĩ ñemoñare kadénare. Peteĩ jerovia rehegua jehejapyre ojeka.

Upéicharõ jepe, jaikuaaháicha, oimeraẽ mba’e ojekáva ikatu oñemoĩporã jey Jesucristo rupive. Upévare, pehechakuaami ko Presidente Russell M. Nelson invitasiõ: “Ko’ág̃a, pesẽrõraka’e tapégui, ikatúpa po’invitami opa che korasõ esperanza reheve pejevy jeymi hag̃ua. Taha’e ha’éva pende py’apykuéra, taha’e ha’éva pende desafío-kuéra, oĩ peteĩ tenda peẽme g̃uarã ko, Ñandejára Tupaópe. Peẽ ha umi generación ne’irãva gueteri onase ojehovasáta pene rembiapóre ko’ág̃a pejevy hag̃ua konvénio rapépe.”²

Ko’ág̃a, ñañe’ẽmi pe mokõiha situasiõre: umi miembro ko’ág̃agua opartisipáva ndaijeroviarekóiva ha’eva’erãháicha. Umi kueheguare desisiõ opokoháicha ko’ág̃agua oikóvare, ko’ág̃agua desisiõ oinfluíta ñande futúrope ha ñane familiakuéra futúrope.

Presidente Dallin H.Oaks ñanembo’e:

“Jesucristo evangelio restaurado ñanemokyre’ỹ ñapensa hag̃ua ára oútavare. … Ombo’e tuicha ideakuéra umi ára tenondeguágui oguia hag̃ua umi ñane mba’e’apo ko’ag̃aitegua.

“Hováivo, opavave jaikuaa tapichakuéra oñeinteresáva ára ko’ag̃aguárente: peiporu katu, peguerovy’a katu ko árape ha ani rejepy’apy ko’ẽrõre.

“… Jajapóvo umi desisiõ ko’ág̃a, ñañeporandu tapiaiteva’erã, ‘Moõpa oporogueraháta kóva?³ Ñandeguerahátapa umi desisiõ jajapóva vy’apavẽpe ko’ág̃a ha eternidápe, térã ñandegueraháta ñembyasy ha tesaýpe?

Oĩ oiméne opensáva: “Natekotevẽi jaha tupaópe opaite domingo”, térã “Ñame’ẽta ñande diezmo ohoporãve vove ñandéve”, térã “Naĩmo’ãi liderkuéra lado ko mba’épe”.

“Ha katu”, he’i hikuái, “roikuaa Tupao añeteguaha, ha araka’eve ndorohejamo’ãi Jesucristo evanhélio”.

Umíva ko’ãichagua temiandu reheve ndohechakuaái impacto negativo orekótava kóichagua membresía “hakuvýva” hekovépe ha iñemoñare rekovépe. Ikatu tuvakuéra opyta activo, ha katu peligro imitãkuéra toñehundi tuichaiterei, ko tekovépe ha eternidápe.

Umi ndohupytymo’ãivare pe gloria celestial ifamiliakuéra ndive, Ñandejára he’i: “Koʼãva haʼe umi ndaipyʼaguasúiva Jesús testimóniope; upéicha, haʼekuéra ndohupytýi upe koróna ñande Tupã rréinope.”⁴ Upéva piko pe jaipotáva ñandéve g̃uarã térã ñane mitãkuérape g̃uarã? Nañande py’aguasuveiva’erã piko ha ndaha’éi hakuvýnteva ñane ñeimeporãrã voi ha ñande ñemoñare ñeimeporãrã?

Presidente M. Russell Ballard oñe’ẽ avei peteĩ jepy’apy peichaguáre:

“Oĩ umi hasývape gueteri Cristo invitasiõ jaguerovia ha japyta hag̃ua. … Oĩ umi discípulo hasývape g̃uarã ontende peteĩ Tupao norma téra tekombo’e particular. Ambuévape katu ombopy’apy ñane rembiasakue térã umi miembro ha líder ko’ág̃agua térã ymaguare imperfección. …

“… Pe desisiõ “ndojeguatavemo’ãiha” Tupaogua miembro ha liderkuéra Ñandejára oiporavova’ekue ndive orekóta peteĩ impacto ag̃avegua ndaikatúiva jepi ojehecha upepete.”⁵

Mba’e legado ñambyasýva oñembohasa hag̃ua, ha mba’ére piko? Taha’e ha’éva, ndohupytýi jahecharei hag̃ua pe impacto espiritual negativo orekótava umi ñemoñare oútavape g̃uarã.

Che hermano ha hermana-kuéra pohayhuetéva, pehasárõ hína oimeraẽ ko’ã mokõi situasiõ añe’ẽva’ekuére che mensáhepe, perrekonsiderami pene mba’e’apo rape. Peikuaa Ñandejára orekoha peteĩ plan ñandéve g̃uarã ko tekovépe. Peikuaa umi familia ikatuha iñetérno. Mba’érepa pemboapeligráta penemba’éva? Aníkena nde pe mbojoapyha kangy upe jerovia kadéna porãite remoñepyrũva’ekuépe, térã rehupytyva’ekue legado-icha. Tanembaretéke. Ndéve otoka rejapo hag̃ua upéva, ha Ñandejára nepytyvõta.

Che korasõ pypukuete guive, poinvita pejepy’amongeta hag̃ua upévare, pemaña hag̃ua tenonde gotyo ha pehechakuaa “moõ gotyo pendegueraha kóva”, ha tekotevẽrõ, tapendepy’aguasu porã pemoambue hag̃ua pende rape pene ñemoñare ñeimeporãrã. Jesucristo rérape, amén.