Py’aguasu legádo

Che hermano ha hermana-kuéra ahayhuetéva, cheaguyje aimévo penendive ko Jesucristo Tupao Santokuéra Árapahagua Conferencia General-hápe. Roñandu pende jerovia ha mborayhu peime peimehápe. Jaje’edifika umi tekombo’e inspirádo, testimónio mbarete ha purahéi hechapyrãvare.

Pomokyre’ỹ peñeha’ã meme hag̃ua penedigno pehojey hag̃ua ñande Ru Yvagagua ha Jesucristo rendápe. Tapeime peimehápe konvénio rapépe, pejuhúta peteĩ ñorairõ umi py’ara’ã físico ko tekove terrenal-gua ha Satana jeipy’ara’ã.

Che sy he’i haguéicha chéve ajekehárõ hasyha chéve peteĩ mba’e: “Oh Hal, añete hasýtantevoi. Upeichanteva’erã voi. Ko tekove ha’e peteĩ pruéva.”

Ha’e he’ikuaa upéva py’aguapýpe, pukavy reheve jepe, oikuaágui mokõi mba’e. Oĩramo jepe lúcha, iñimportantevéva niko oñeg̃uahẽ ógape oñeime hag̃ua Itúva Yvagagua ndive. Ha ha’e oikuaa ikatuha ojapo upéva ojerovia rupi Isalvador rehe.

Oñandu Ha’e iñag̃uiha hese. Umi ára oikuaa haguépe omanombotaha, oñe’ẽ chendie Salvador rehe oĩ aja ikotýpe. Oĩ peteĩ okẽ ambue koty gotyo hupa ypýpe. Opukavy ha omaña upe okẽre he’i kirirĩvo pya’e ohechataha Chupe. Chemandu’a gueteri amaña hague upe okẽre ha añeima hinaha koty ikupépe.

Ha’e oĩ ko’ág̃a mundo de los Espiritus-pe. Omantenekuaákuri hesa upe premio ohupytyseva’ekuére opa umi áño pukukue heta prueba física ha personal rupive.

Pe ñemokyre’ỹ legádo ha’e ohejava’ekue oréve oje’e porãve Moroni 7-pe, Mormón omokyre’ỹhápe ita’ýra Moroni ha itavayguakuérape. Ha’e peteĩ ñemokyre’ỹ legádo ñemoñarépe g̃uarã ha’e haguéicha che sýgui ifamiliakuérape g̃uarã. Mormón ombohasa upe ñemokyre’ỹ legádo opavave orekóvape determinasiõ okalifika hag̃ua, opa umi prueba mortal rupive, tekove ijapyra’ỹvape g̃uarã.

Mormón omoñepyrũ umi versículo peteĩha Moroni 7-pe peteĩ testimónio Jesucristo-re, anhelkuéra ha Cristo Espiritu-gui, ohejáva jahechakuaa porã iporãva ivaívagui ha upéicha jaiporavo porã kuaa.

Ha’e omoĩ Jesucristo-pe raẽvete, ojapoháicha opa umi omokyre’ỹkuaáva umi oñeha’ãvape hína ojupi tapére hóga yvagagua gotyo:

“Ha ni peteĩ yvypóra ndaikatúi ojesalva, Cristo ñeʼẽme heʼiháicha, ndoguerekóiramo jerovia hérare; upévare, koʼã mbaʼe opáramo, jerovia opa avei; ha ivaieterei yvypóra ñeime, oĩgui ndojejapoiramoguáicha mbaʼevéichagua rredensiõ.

“Ha katu péina ápe, che joykeʼy ahayhuetéva, che ajepyʼamongeta penderehe mbaʼe iporãvéva, ahusgágui peguerekoha jerovia Cristo rehe penderekomarangatu rupi; ha ndapejeroviáiramo hese upéicharõ napenderekojojái pejeipapa hag̃ua itupao tavayguakuéra apytépe.”¹

Mormón ohecha tekomarangatu jerovia mbarete rechaukahárõ. Ohecha oñanduha hikuái odependeha Salvador-gui. Ha’e omokyre’ỹ chupekuéra ohechávo pe jerovia. Mormón omokyre’ỹmeme chupekuéra oipytyvõvo ohecha hag̃ua ijerovia ha hekomarangatu omopu’ãtaha isegurida ha jerovia orekotaha hikuái éxito ilúchape:

“Ha avei, che joykeʼy ahayhuetéva, che añeʼẽse peẽme upe ñehaʼarõ rehe. Mbaʼéicha piko ikatu pehupyty jerovia, ndapeguerekóiramo ñehaʼarõ?

“Ha mbaʼe pehaʼarõvaʼerã? Péina ápe, che haʼe peẽme peguerekovaʼerãha ñehaʼarõporã Cristo expiasiõ rupive ha ijeikovejey puʼaka rupi, peñemopuʼãtaha tekove opaveʼỹvape, ha kóva pende jeroviáre hese, upe ñeʼẽmeʼẽme heʼiháicha.

“Upévare, peteĩ yvypóra ojeroviáramo tekotevẽ oguereko ñehaʼarõkuaa; jeroviaʼỹre ndaikatúigui oĩ ñehaʼarõkuaa.

“Ha avei, péina ápe che haʼe peẽme yvypóra ndaikatuiha oguereko jerovia ni ñehaʼarõ, noñemomirĩriramo, ha naimarangatúiramo ikorasõme.”²

Mormón omokyre’ỹ chupekuéra otestifikávo oĩha hikuái tapépe ohupytyu hag̃ua upe don ikorasõkuéra tahenyhẽ Cristo mborayhu potĩgui. Ha’e ombojoaju chupekuéra g̃uarã rrelasiõ oĩva jerovia Jesucristo-re, tekomarangatu, ñemomirĩ, Espiritu Santo ha ñeha’arõ mbarete jahupyty hag̃ua pe Tekove ijapyra’ỹva. Ha’e omokyre’ỹ chupekuéra kóicha:

“Ndaupéichairamo, ijerovia ha iñehaʼarõ ndahaʼéi mbaʼeve, avave noñemoĩporãigui Tupã ndive, haʼeʼỹramo umi ipyʼaguapy ha oñemomirĩva ikorasõme; ha peteĩ kuimbaʼe imarangatu ha oñemomirĩramo ikorasõme, ha okonfesáramo Espíritu Santo puʼaka rupi Jesús haʼeha upe Cristo, tekotevẽ oguereko karida; ha ndoguerekóiramo karida ndahaʼéi mbaʼeve; upévare tekotevẽ oguereko karida.”³

Amañávo tapykue gotyo, ahecha mba’éichapa upe karida don, Cristo mborayhu potĩ, omombarete, ogia, ombojepytaso ha omoambue che sýpe ilúchape oho jey hag̃ua ógape.

“Ha pe karida ohasaʼasykuaa, ipyʼamarangatu, ndoguerekói potapy, ni ndaijejapói, ndohekái imbaʼerã, ndaipochyreíri, ndojepyʼamongetái ivaívare, ndahorýi tembiapovaípe ha katu hory añeteguápe, opa mbaʼe ohasa, opa mbaʼe oguerovia, opa mbaʼe ohaʼarõ, opa mbaʼe ogueropuʼaka.

“Upévare, che joykeʼy ahayhuetéva, ndapeguerekóiramo karida, peẽ ndahaʼéi mbaʼeve, pe karida ndopáigui arakaʼeve. Upévare, pejejagarrána upe karida rehe, tuichavéva opaite mbaʼégui, opa mbaʼe opátagui—

“Ha katu karida haʼe Cristo mborayhu potĩ, ha opyta tapiaite peve g̃uarã; ha upe oguerekóvape ára pahápe, ou porãta.

“Upévare, che joykeʼykuéra ahayhuetéva, pejerure Túvape opa pene korasõ mbarete reheve, penerenyhẽ hag̃ua ko mborayhu haʼe omeʼẽvaʼekuégui opa umi haʼévape itaʼýra Jesucristo remimboʼe añete; oiko hag̃ua pendehegui Tupã raʼykuéra; haʼe ojehechauka vove ñande haʼe hag̃ua haʼéicha, jahechátagui chupe haʼeháicha, jaguereko hag̃ua ko ñehaʼarõ; ñañemopotĩ hag̃ua haʼe ipotĩháicha.”⁴

Cheaguyje Mormón ehémplo ha tekombo’e ñemokyre’ỹre. Avei ajehovasa che sy legádore. Umi proféta Adán guie ko’ág̃a peve, hekombo’ekuéra ha iñehémplo rupi, chemombaretékuri.

Umi che aikuaáva personalmente ha ifamiliakuéra rehehápe, adesidi ndaverifikamo’ãiha umi ijehasa’asy detallekuéra ni nañe’ẽmo’ãi públicamente umi idon tuichaite rehe. Upevére, upe ahechava’ekue chemokyre’ỹ ha cheñemoambue iporãve hag̃uáicha.

Akyhyjérõ jepe ainvaditaha iprivasida, ambojoajúta peteĩ ñemombe’u mbykymi che rembireko ñemokyre’ỹgui. Ajapo kóva ñangarekopópe. Ha’e niko peteĩ persona privada ndohekái ni ndoipotáiva ñemomorã.

Ojapóma 60 áño romenda hague. Upévare niko ko’ág̃a antende mba’épa he’ise ko’ã escritura ñe’ẽ: jerovia, ñeha’arõ, tekomarangatu, ñeha’ãmbaite, ndohekái imbaʼerã, hory añeteguápe, ndojepyʼamongetái ivaívare, ha opa mba’e ári, karida.⁵ Upe experiencia rupi ame’ẽkuaa testimónio yvyporakuéra ikatuha ovivi umi ideal hechapyrãitéva ára ha ára opu’ãvo umi tekovegua jehasa’asy rupive.

Millones peẽ pehendúva hína peikuaa umi tekovépe. Heta peẽ ha’e umi tekove. Opavave ñaikotevẽ umichagua ehémplo ñanemokyre’ỹva ha angirũ ñanderayhúva.

Peguapývo mávandi iñermána térã hermáno ministrante-r͂õ, peẽ perrepresenta Ñandejárape. Pepensami mba’épa ojapóne térã he’íne Ha’e. Ha’e oinvitáne chupekuéra ou hag̃ua Hendápe. Omokyre’ỹne chupekuéra. Ha’e ohechakuaa ha omomorãne umi ñemoambue ñepyrũ ojapova’erã hikuái. Ha ha’éne upe ehémplo iporãmbáva ha’ekuéra osegikuaátava.

Avave ndaikatúi gueteri ojapopa umíva, ha katu pehendúvo ko conferencia, ikatu peikuaa peimeha tapépe. Pe Salvador oikuaa pende jehasa’asy detálle. Ha’e oikuaa pende potencial guasu pekakuaa hag̃ua jerovia, ñeha’arõkuaa ha karidápe.

Umi tembiapoukapy ha konvénio Ha’e oikuave’ẽva peẽme ndaha’éi prueba penekontrola hag̃ua. Umíva ningo don penemopu’ã hag̃ua pehupyty hag̃uáicha opaite Tupã don ha peho jey hag̃ua ógape pende Ru Yvagagua ha Ñandejára penderayhuetévandi.

Jesucristo ohepyme’ẽ ñane angaipakuéra repykue. Ñarreklamakuaa pe tekove ijapyra’ỹva jehovasa ñandejeroviárõ Hese ñañearrepenti hag̃uáicha ha oiko ñandehegui mitãicha, potĩ ha oĩmbáva jarresivi hag̃uáicha Tupã don tuichavéva.

Añembo’e tapemog̃uahẽ Iñinvitasiõ ha peikuave’ẽ ambue ñande Ru Yvagagua ra’ykuérape.

Añembo’e umi ñane misionérore opa ko múndope. Toñeinspira omokyre’ỹ hag̃ua peteĩteĩme oipota ha oguerovia hag̃ua upe invitasiõ oúva Jesucristo-gui Isiervokuéra rupive ojagarrava’ekue hi’ári Héra.

Atestifika Ha’e oikoveha ha odirihiha Itupao. Che Itestígo. Presidente Russell M. Nelson Tupã proféta oikovéva opa ko yvýpe g̃uarã. Aikuaa péva añeteguaha. Jesucristo réra sagrádope, Amén.