Ñañembojave Salvador rehe

Ñandejára omohesakã ko’ã ára pahápe Ijeju jey mboyve, pe “trígo”, ha’e odescribíva “rreinogua ta’yrakuéra” ramo,”⁵ okakuaáta ojoykére umi “ñanavai” ndive, térã umi ndohayhúiva Tupãme ha naiñe’ẽrendúiva Hembiapoukapykuérare. “Mokõivéva okakuaáta oñondive”,⁶ ojoykére.

Kóva ha’éta ñane múndo pe Salvador ou jey peve, heta mba’e porã reheve ha heta mba’e vai reheve opárupi.⁷

Oĩta ára napeñeñandúi ha’eha peteĩ trígo apesã imbarete ha hi’ajúmavaicha. Penepasiénsiake pendejehe! Ñandejára he’i pe trígo orekotaha tague kyrỹi heñóiva.⁸ Opavave ñande ningo Isantokuéra Ára Pahapegua, ha jepe ndaha’éi gueteri opa jaipotaháicha, ñande sério ñande deséope ha’e hag̃ua Idiscípulo añete.

Jahechakuaápe aña okakuaaháicha ko múndope, ñande supervivencia espiritual, ha umi jahayhúvagui, oikotevẽta tañanutri, jafortifika ha ñamombareteve ñande jerovia Jesucristo-re. Apóstol Pablo ñanderekombo’e ñañembohapo,⁹ jajepytaso ha ñañemoĩ hatãva’erã¹⁰ ñane mborayhúpe Salvador rehe ha ñane determinasiõ jasegui hag̃ua Chupe. Ko ára ha umi oútava oikotevẽ peteĩ ñeha’ã isentradovéva, ñañemo’ãvo umi distracción, ha jesareko’ỹgui.¹¹

Jepe umi influencia mundana ñande jerére okakuaáva hína, ndajakyhyjeiva’erã. Ñandejára araka’eve ndohejareimo’ãi Itavayguakuéra konvenioguápe. Oĩ peteĩ pu’aka compensatorio umi don espiritual ha guía divína umi hekojojávape g̃uarã.¹² Upevére, umi jehovasave pu’aka espiritual rehegua noñemoĩri ñande ári ha’e haguérente ko generasiõgua. Ou ñamombaretévo ñande jerovia Ñandejára Jesucristo rehe ha ñaneñe’ẽrendúvo Hembiapoukapykuérare, jaikuaavévo ha jahayhuvévo Chupe. “Ha kóva ha’e tekove ijapyra’ỹva,” oñembo’e Jesús, “tandekuaa ndéve, Tupã añete ha peteĩetéva, ha Jesucristo-pe, upe nde rembouva’ekuépe.”¹³

Ñande jaikuaa porãháicha, jajerovia Jesucristo-re ha ha’e peteĩ discípulo añete ndaha’éi peteĩ javegua jeporavónte, ni peteĩ javegua mba’e oikóvante. Ha katu peteĩ proceso sagrádo okakuaa ha ojepysóva ñande rekove ára pukukue aja, ha oho meme ñañesũ meve Ipýpe.

Pe trigo okakuaávo ñanavai mbytépe ko múndope, mba’éichapa ñamombarete ha ñaprofundisa ñane kompromíso pe Salvador ndive umi ára oútavape?

Ko’ápe oĩ mbohapy pensamiento:

Peteĩha, ikatu ñañapymive Jesús rekovépe, Hekombo’ekuéra, Imahestad, Ipu’aka ha Isacrificio expiatorio-pe Pe Salvador he’i: “Pema’ẽ cherehe opa temiandúpe.”¹⁴ Apóstol Juan ñanemomandu’a: “Ñande jahayhu ichupe, ha’e raẽ ñanderayhúgui.”¹⁵ Ñañandu porãvévo Imborayhu, jahayhuvéntema Chupe, ha jajehechakuaa’ỹre jasegui porãve Iñehémplo jahayhu ha ñañangarekóvo umi ñande jerereguáre. Opa jeguata hekojojáva Ha’e gotyo reheve, jahecha porãve Chupe.¹⁶ Ja’adora Chupe, ha ñañeha’ã michĩ ñande ikatuháicha jasegui Iñehémplo.¹⁷

Upe rire: Jaikuaa ha jahayhu porãvévo pe Salvador-pe, ñame’ẽseve Chupe ñande rekomarangatu ha jeguerovia. Jajapo konveniokuéra Hendive. Ñañepyrũ ñande umi promésa ñañemongarai jave, ha ñakonfirma umi promésa ha ambuéva ñañearrepentívo ára ha ára, jajerure perdón, ha ñaha’arõ meme jahupytývo Santa Cena káda semana. Ñañekompromete “ñanemandu’ataha Hese tapiaite ha ñaneñe’ẽrendutaha Hembiapoukapykuérare.”¹⁸

Ñaime vove preparado, ja’acepta umi ordenánsa ha konveniokuéra témplopegua. Ñañandúvo pe eternidad influencia umi ñane momento sagrádo ha kirirĩháme Ñandejára rógape, vy’apópe jajapo konveniokuéra Tupã ndive ha ñamombarete ñane desisiõ ñañongatu hag̃ua umíva.

Jajapo ha ñañongatúvo konveniokuéra oheja pe Salvador mborayhu toiko pypukuve ñane korasõme. Liahona ko mes-guápe, Presidente Russell M. Nelson he’i: “[Ñane] konvenio[kuéra] ñanemoag̃ui ag̃uivéta Hese. … Tupã ndohejareimo’ãi Irrelasiõ umi ombokakuaaava’ekue upéichagua joaju Hendive.”¹⁹ Ha he’i porãite haguéicha Presidente Nelson ko pyhareve, “Opaite témplo pyahu dedikasiõ reheve, ouve pu’aka múndope, ñanemombarete ha ombogueve hag̃ua pe ñanderayhu’ỹva ñeha’ã heta hetavéva ohóvo”.²⁰

Jahechakuaápa mba’ére Ñandejára oguia Iprofétape omoag̃uive hag̃ua umi témplo sagrádo ñandéve ha oheja jaha py’ỹive Hógape?

Jaikévo témplope, ñanesãso sapy’ami umi influencia mundána ñanembojerévagui, jaikuaávo ñande propósitogui ko vídape ha umi don ijapyra’ỹva oñeikuave’ẽva ñandéve ñande Salvador Jesucristo rupive.

Ipahápe, che pensamiento mbohapyha: ko jeheka sagrádope, ñamomba’eguasu, ñamo’ã, ñadefende ha ñañangareko pe Espíritu Santo don-re. Presidente M. Russell Ballard ha Elder Kevin W. Pearson angetete oñe’ẽkuri Presidente Nelson ñeñomarandu profétikore, che ha’e jeýtava: “Ndaikatumo’ãi jagueropu’aka espiritualmente, pe Espíritu Santo ñemboguata, ñeisãmbyhy, ñemoangapyhy ha tapiagua influensia’ỹre.”²¹ Ha’e peteĩ don ijojaha’ỹva; Jajapo opa ikatumíva ñamo’ã hag̃ua umi ñande experiencia diaria, pe Espíritu Santo influénsia opyta hag̃ua ñanendive. Ñande niko tesape ko múndope, ha tekotevẽ jave, jaiporavo jaipotágui ñanediferente hag̃ua ambuekuéragui. Presidente Dallin H. Oaks nda’aréi oporandu umi kakuaa omenda’ỹvape: “[Peñanimápa] pene diferente hag̃ua?’ … [Especialmente] iñimportante … umi jeporavo pejapóva pende rekove personal-pe. … Pehópa hína tenonde gotyo múndo oposisiõ kóntrape?”²²

Peteĩ publikasiõ ramoitegua redes sociales-pe, ajerure mayma umi discipulo-kuérape tokompartimi desisiõ ojapova’ekue ojeruréva chupe idiferente hag̃ua múndogui. Arresivíkuri cientos ñembohovái.²³ Kóina ápe peteĩva:

Amánda: Che enfermera amba’apóva pe tavagua kárselpe. Añeha’ã añangareko umi preso-re Cristo ojapóne háicha.

Rachel: Che peteĩ ópera puraheiha, ha py’ỹi oñeimo’ã amondetaha oimeraẽ ao oñeme’ẽva chéve oimporta’ỹre pe modestia. [Areko rupi che investidura] ha’e [umi productor-pe] pe ao [imodestova’erãha]. Ndoguerohorýi hikuái upéva … ha katu jahéipe ojapo umi modifikasiõ. Nakambiaichéne pe py’aguapy oúva ha’évo Cristo-gui testigo opa árape.

Chriss: Che peteĩ alcohólico (recuperación prosésope), tupaogua miembro, digno aike hag̃ua témplope. Ndaguerokirirĩri umi che rembiasakue adicción reheve ha ahupytývokuri peteĩ testimónio [Jesucristo] Expiasiõgui.

Lauren: Ahaíkuri peteĩ obra de teatro che clase-gua kompañerokuéra escuela secundaria-gua ndive. Ha’ekuéra oipota che personáhe ikirirĩ ha irreservádo, toñe’ẽ tie’ỹ sapy’apy´a. Chepresiona vaipa hikuái, ha katu añenega ha nañemovãi.

Adán: Heta umi ndachegueroviáiva ha’érõ añongatuha léi castidad rehegua ha aiporavoha ajehekýi pornografía-gui. Nontendéi hikuái vy’apavẽ ha py’aguapy upéva oguerúva chéve.

Ella: Che ru ha’e miembro comunidad LGBTQ-pegua Añeha’ã tapiaite ajechakuaa ambuekuéra remiandu ame’ẽvo che testimonio tupaópe Cristo-gui ha chejeroviareko agueroviávare.

Andrade: adecidi ahamemetaha tupaópe, jepe che familia odecidi ndohomo’ãveimaha.

Ha ipahápe, Sherry-gui: Roasistíkuri peteĩ evénto governador mansiõme. Oñepyrũ orreparti hikuái champán peteĩ “brindis-rã”. Ainsisti y rehe, pe personal he’írõ jepe chéve upéva iñofensivotaha. Robrinda gobernador rehe ha che ahupi yvate che vaso y reheve! Gobernador noñeofendéi.

Presidente Nelson he’i: “Héẽ, peẽ peiko hína múndope, ha katu peguereko norma idiferentetéva mundoguágui, penepytyvõva pejehekýi hag̃ua mundogua ky’águi.”²⁴

Anastasia, peteĩ sy imitãva gueteri oĩvakuri hospital-pe orekopa rire peteĩ mitã, oñepyrũ vove umi bombardeo Kiev-pe febrero ohasava’ekuépe. Peteĩ enfermera oipe’a pe hospital koty rokẽ ha he’i ñe’ẽ pya’e reheve: “Ejagarra ne mitãmime, elia peteĩ manta reheve ha esẽ pasillo-pe ko’ág̃aite!”

Uperire, Anastasia omombe’u:

“Araka’eve naimo’ãikuri umi che ára ñepyrũ sýicha hasyetetahákuri, … ha katu añesentrahína … umi jehovasa ha milágro ahechava’ekuére. …

“Ko ára, … ha’ete ndaikatumo’ãiva aperdona umi peteĩ ára ojapova’ekue hetaite ñehundi ha mba’evai … , ha katu Cristo discípulo-ramo, ajerovia ikatutaha [aperdona]. …

“Ndaikuaái mba’épa oikóta tenonderã, ha katu aikuaa ñañongatúrõ ñane konveniokuéra pe Espíritu Santo oĩmeméta ñanendive, … ohejávo ñañandu vy’apavẽ ha esperanza, … jepe umi ára hasýpe.”²⁵

Che hermano ha hermana-kuéra, tuicha ajehovasákuri ohupyty hetaitévo ñande Salvador jahayhuetéva, Jesucristo mborayhu. Che aikuaa Ha’e oikove ha oguiaha Hembiapo marangatu. Ndaguerekopái ñe’ẽ ha’e hag̃ua che mborayhu Hese.

Opa ñande niko “konveniogua ta’yrakuéra”, iñasãiva ko yvy ári tetãnguéra ha cultura opa continente-pe, jajeipapávo millones-pe, ñaha’arõ aja Ñandejára ha Salvador jejujey glorióso. Tesapéicha ñamimbívo umi oĩva ñande jerérepe g̃uarã, ñamoldea concientemente umi ñande potapy, pensamiento, jeporavo ha tembiapo. Jahekávo jaikuaa ha jahayhu Salvador-pe, ñañemboyke múndogui koveniokuéra rupi Tupã ndive, ñanediferénte, jepigua’ỹ ha ñande espesial, ñamomorãvo Chupe ha Imbo’epykuéra, ñañemomombyry’ỹre umi oguerovia diferéntevagui ñandehegui.

Ha’évo trígo ñanavai apytépe ha’e peteĩ viáhe hechapyrãva, sapy’ánte henyhẽva akãrasýgui, ha katu tapiate oñembopy’aguapýva ñande jerovia ñemongakuaa ha ñemoañete rupi. Pehejávo pene mborayhu Salvador rehe ha Imborayhu penderehe toike pene korasõ ipypukuvehápe, apromete peẽme jeguerovia, py’aguapy ha vy’a tuichave pembohovake porã hag̃ua umi desafio ko tekovepegua. Ha Salvador opromete ñandéve: “Che ambya[týta] che tavayguakuérape, trígo ha ñanavai parávolape he’iháicha, oñeñongatu hag̃ua pe trígo umi granérope oreko hag̃ua tekove ijapyra’ỹva, ha oñekorona hag̃ua glória celestial reheve.”²⁶ Jesucristo rérape, Amén.